TÀN 97
Jezu Ðè Axɔsu Fɔ
JEZU gbɔ azɔn nú nukúntuntɔnnɔ nùbyɔɖutɔ́ wè lɛ bɔ é nɔ zaan é ɔ, é wá yì gletoxo kpɛví e sɛkpɔ Jeluzalɛmu é ɖé mɛ. É ɖɔ nú ahwanvu tɔn wè ɖɔ: ‘Mi yì gletoxo ɔ mɛ, mi na mɔ sɔkɛtɛkɛtɛ winnyawinnya ɖé. Mi tún kàn n’i bo kplá ɛ wá nú mì.’
Ee ye kplá sɔkɛtɛkɛtɛ ɔ wá nú Jezu é ɔ, é junjɔn jí, bo ɖido Jeluzalɛmu. Ee é sɛkpɔ toxo ɔ é ɔ, tò ɔ mɛ nu gègě nyì ahwan wá kpé é. Mɛ gègě tɛ avɔ yetɔn lɛ ɖó ali ɔ jí. Mɛ ɖevo lɛ ka gbò děma bo tɛ. Ye bǐ nɔ súxó ɖɔ: ‘Mawu ni xoɖɛ ɖagbe dó axɔsu e jǎwe ɖò Jehovah nyikɔ mɛ é jí!’
Hwexónu ɖò Izlayɛli ɔ, axɔsu yɔyɔ̌ wɛ nɔ kun sɔkɛtɛkɛtɛ winnyawinnya byɔ Jeluzalɛmu dó ɖè éɖee xlɛ́ togun ɔ. Nǔ e wà wɛ Jezu ɖè é nɛ. Bɔ togun ɔ ɖò ɖiɖexlɛ́ wɛ ɖɔ emi jló ɖɔ Jezu ni nyí axɔsu nú emi. Amɔ̌, mɛ lɛ bǐ ka ba mɔ̌ ǎ. Nǔ e jɛ hwenu e Jezu yì tɛmpli ɔ mɛ é ɖè enɛ xlɛ́ mǐ.
Jezu gbɔ azɔn nú nukúntuntɔnnɔ lɛ kpo sékunɔ lɛ kpo ɖò tɛmpli ɔ mɛ. Ee yɔkpɔvu lɛ mɔ mɔ̌ é ɔ, ye súxó, bo kpa susu nú Jezu. Amɔ̌, nǔ enɛ sìn xomɛ nú vɔsanúxwlémawutɔ́ lɛ, bɔ ye ɖɔ nú Jezu ɖɔ: ‘A ka sè nǔ e ɖɔ wɛ vǐ enɛ lɛ ɖè é à?’
Jezu ɖɔ nú ye ɖɔ: ‘Un sè. Mi xà fí e ɖɔ ɖò Biblu mɛ ɖɔ: “Mawu na bló, bɔ susu kpikpa na tɔ́n sín nu yɔkpɔvu lɛ tɔn mɛ” é kpɔ́n à cé?’ Enɛ wu ɔ, yɔkpɔvu lɛ sɔ́ ɖó susu kpikpa nú axɔsu Mawu tɔn te ǎ.
Mǐ nɔ jló na wà nǔ yɔkpɔvu enɛ lɛ ɖɔhun, kabǐ? Mɛɖé lɛ sixu ba na ɖó axɔsuɖuto Mawu tɔn sín wɛn jijla te. Amɔ̌, mǐ ɖó na nɔ ɖò nùjiwǔ e Jezu jló na bló nú gbɛtɔ́ lɛ é ɖɔ nú mɛ ɖevo lɛ wɛ.
Hwenu e Jezu ɖò ayikúngban jí é ɔ, hwe ɔ nu ko sù n’i bonu é na jɛ gǎn ɖu jí ǎ. Hwetɛnu é ka na jɛ gǎn ɖu jí? Ahwanvu Jezu tɔn lɛ jló na tuùn. Mǐ na mɔ ɖò tàn e na bɔ d’ewu é mɛ.