TÀN 96
Jezu Gbɔ Azɔn Nú Mɛ
EE JEZU ɖò tò lɛ mɛ gbɔn wɛ é ɔ, é nɔ ɖò azɔn gbɔ nú mɛ wɛ. Nùjiwǔ enɛ lɛ sín wɛn gbakpé fí bǐ. Enɛ wu ɔ, gbɛtɔ́ lɛ nɔ kplá sékunɔ lɛ, nukúntuntɔnnɔ lɛ, tokunɔ lɛ kpo azinzɔnnɔ gègě ɖevo lɛ kpo wá n’i. Jezu gbɔ azɔn nú ye bǐ.
Jaan bló baptɛm nú Jezu é ɔ, xwè atɔn jɛji ko wá yì. Jezu ɖɔ nú mɛsɛ́dó tɔn lɛ ɖɔ emi na yì Jeluzalɛmu malin-malin mɛ, bɔ ye na hu emi ɖò finɛ, enɛ gudo ɔ, emi na fɔ́n sín kú. Cobonu nǔ enɛ na jɛ ɔ, Jezu nɔ ɖò azɔn gbɔ nú mɛ wɛ.
Jezu ɖò nǔ kplɔ́n mɛ wɛ ɖò Gbɔjɛzán Jwifu lɛ tɔn gbè gbè ɖokpo. Nawe e ɖò finɛ é j’azɔn tawun. É nɔ zɔn tɔ́tɔ́, bo sɔ́ nɔ sixu jlɔ́ ǎ kaka nú xwè 18. Enɛ wu ɔ, Jezu ɖ’alɔ jǐ tɔn, bɔ azɔn tɔn gbɔ.
Nǔ enɛ sìn xomɛ nú sinsɛngán lɛ. Mɛ ɖokpo súxó ɖò ye mɛ, bo ɖɔ: ‘Azǎn ayizɛ́n wɛ mǐ ɖó na w’azɔ̌ na. Azǎn enɛ lɛ jí wɛ mi na wá, bɔ è na gbɔ azɔn nú mi, é nyí Gbɔjɛzángbe ǎ!’
Amɔ̌, Jezu ɖɔ: ‘Mi nùbaɖabaɖa elɔ lɛ emi! Mi mɛ ɖebǔ nɔ tún kàn nú sɔkɛtɛkɛtɛ mitɔn, bo nɔ kplá ɛ yì sìn nu gbé Gbɔjɛzángbe à cé? Enɛ wu ɔ, è ɖò na gbɔ azɔn nú nawe elɔ e ko jɛ azɔn kaka nú xwè 18 é ɖò Gbɔjɛzángbe à cé?’ Enɛ wu ɔ, winnya hu ye.
Jezu kpo mɛsɛ́dó tɔn lɛ kpo wlí ali, bo wá xwè Jeluzalɛmu. Ee ye tɔ́n sín toxo Jeliko tɔn mɛ tlolo é ɔ, nukúntuntɔnnɔ nùbyɔɖutɔ́ wè sè ɖɔ Jezu wá xweyigbe. Enɛ wu ɔ, ye súxó, bo ɖɔ: ‘Jezu, d’alɔ mǐ!’
Jezu ylɔ nukúntuntɔnnɔ lɛ, bo kanbyɔ ye ɖɔ: ‘Etɛ mi ka jló ɖɔ ma wà nú mi?’ Ye ɖɔ: ‘Aklunɔ, hun nukún nú mǐ.’ Jezu ɖ’alɔ nukún yetɔn lɛ jí, bɔ ye jɛ nǔ mɔ jí tlolo! A ka tuùn nǔ e wu Jezu bló nùjiwǔ enɛ lɛ bǐ é à? É yí wǎn nú gbɛtɔ́ lɛ, bo lɛ́ jló ɖɔ ye ni ɖi nǔ nú emi wu wɛ. Enɛ wu ɔ, mǐ hɛn ɔ, mǐ na ɖeji ɖɔ mɛɖebǔ kún sɔ́ na j’azɔn ɖò axɔsuɖuɖu tɔn hwenu ó.
Matie 15:30, 31; Luka 13:10-17; Matie 20:29-34.