TÀN 98
Olivutínsó Jí
JEZU nɛ ɖò Olivutínsó ɔ jí nɛ. Mɛsɛ́dó tɔn lɛ wɛ nyí mɛ ɛnɛ e gɔ́ n’i lɛ é. Andle, Piyɛɛ, Jaki kpo Jaan kpo wɛ. Tɛmpli Mawu tɔn e ɖò Jeluzalɛmu é mɔ sɛ́dó wɛ a ɖè nɛ.
Jezu kun sɔkɛtɛkɛtɛ winnyawinnya byɔ Jeluzalɛmu é ɔ, é ɖò azǎn wè bló wɛ nɛ. Jezu wá tɛmpli ɔ mɛ Talátagbe zǎnzǎn tɛɛn. Vɔsanúxwlémawutɔ́ lɛ kàn ayixa bo na wlí i bo hu i ɖò finɛ. Amɔ̌, xɛsi ɖi ye, ɖó togun ɔ yí wǎn nú Jezu.
‘Dan jɔmɔ emi! Dan kúnkan emi!’ Mɔ̌ wɛ Jezu ylɔ sinsɛngán enɛ lɛ ɖɔ. É ɖɔ Mawu na dɔn tó nú ye, ɖó nǔ baɖabaɖa e ye dosin lɛ é wu. Enɛ gudo ɔ, Jezu wá Olivutínsó ɔ jí, bɔ mɛsɛ́dó ɛnɛ enɛ lɛ jɛ nǔ kanbyɔ ɛ jí. A ka tuùn nǔ e kanbyɔ Jezu wɛ ye ɖè é à?
Mɛsɛ́dó lɛ ɖò nǔ kanbyɔ dó sɔgudo wu wɛ. Ye tuùn ɖɔ Jezu na wá ɖè nǔnyanyawiwa bǐ sín ayikúngban ɔ jí. Amɔ̌, ye jló na tuùn hwenu e enɛ na jɛ dó é. Hwetɛnu Jezu ka na lɛkɔ wá bo na ɖu axɔsu?
Jezu tuùn ɖɔ ahwanvu emitɔn lɛ kún sixu kpéwú bo mɔ emi hwenu e emi na lɛkɔ wá é ó. Ðó é na ɖò jixwé, bɔ yedɛɛ lɛ ka ɖò ayikúngban jí. Enɛ wu ɔ, Jezu ɖɔ nú mɛsɛ́dó tɔn lɛ ɖɔ nùɖé lɛ na ɖò jijɛ wɛ ɖò ayikúngban jí, bo na xlɛ́ ɖɔ emi ko ɖò axɔsu ɖu wɛ ɖò jixwé. Mǐ ni kpɔ́n ɖé lɛ ɖò nǔ e na jɛ lɛ é mɛ.
Jezu ɖɔ ɖɔ ahwan ɖaxó ɖaxó lɛ na tɔ́n, mɛ gègě na j’azɔn, adɔ na tɔ́n, adakaxixo na sukpɔ́ d’eji, ayikúngban na danwǔ ɖesu gbɔn fí tɛnmɛ tɛnmɛ. Jezu lɛ́ ɖɔ ɖɔ è na jla axɔsuɖuto Mawu tɔn sín wɛnɖagbe gbɔn ayikúngban ɔ bǐ jí. Nǔ enɛ lɛ ka ɖò jijɛ wɛ ɖò hwe mǐtɔn nu à cé? Ganji! Enɛ wu ɔ, mǐ na ɖeji ɖɔ Jezu ɖò axɔsu ɖu wɛ ɖò jixwé dìn. Zaanɖé ɔ, é na ɖè nǔnyanyawiwa bǐ sín ayikúngban ɔ jí.
Matie 21:46; 23:1-39; 24:1-14; Maki 13:3-10.