TÀN 104
Jezu Lɛkɔ Yì Jixwé
JEZU sɔ́ éɖee xlɛ́ ahwanvu tɔn lɛ azɔn gègě. É sɔ́ éɖee xlɛ́ ahwanvu 500 mɔ̌ zɛɛn gbè ɖokpo. A ka tuùn nǔ e jí Jezu ɖɔ xó dó hwenu e é sɔ́ éɖee xlɛ́ ye é à? Axɔsuɖuto Mawu tɔn jí wɛ. Jehovah sɛ́ Jezu dó ayikúngban jí bonu é na kplɔ́n nǔ mɛ dó Axɔsuɖuto ɔ wu. É wà mɔ̌ kaka, bo lɛ́ bló ɖò fínfɔ́n sín kú tɔn gudo.
A ka flín nǔ e axɔsuɖuto Mawu tɔn nyí é à? Acɛkpikpa jɔ acɛkpikpa ɖé wɛ, bɔ Mawu ɖó ɖò jixwé. Jezu wɛ É sɔ́, bɔ é na nyí axɔsu na. Jezu xlɛ́ lee é na nyí axɔsu ɖagbe gbɔn é, bɔ mǐ ko kplɔ́n wá yì. É na nùɖuɖu mɛ e ɖò xovɛ lɛ é, gbɔ azɔn nú azinzɔnnɔ lɛ, bo tlɛ lɛ́ fɔ́n mɛ sín kú!
Enɛ wu ɔ, nɛ̌ ayikúngban ɔ jí ka na wá cí hwenu e Jezu na ɖu axɔsu d’eji nú xwè afatɔ́ɔ́n é? Ayikúngban ɔ bǐ na huzu palaɖisi ɖɛkpɛɖɛkpɛ ɖé. Ahwan sɔ́ na tíìn ǎ, adakaxixo sɔ́ na tíìn ǎ, azɔn sɔ́ na tíìn ǎ, kú sɔ́ na tíìn ǎ. Nugbǒ wɛ nyí xó enɛ lɛ, ɖó Mawu bló ayikúngban ɔ bonu é na nyí palaɖisi ɖé, bɔ gbɛtɔ́ lɛ na ɖu vivǐ tɔn. Nǔ e wu é bló jikpá Edɛnu tɔn ɖò bǐbɛ̌mɛ é nɛ. Jezu na bló, bɔ jló Mawu tɔn na nyí wiwa.
Hwe ɔ nu sù lo, bɔ Jezu na lɛkɔ yì jixwé. É ko sɔ́ éɖee xlɛ́ ahwanvu tɔn lɛ nú azǎn 40. Enɛ wu ɔ, ye kudeji ɖɔ é ko fɔ́n sín kú. Amɔ̌, cobonu é na jó ahwanvu tɔn lɛ dó ɔ, é ɖɔ nú ye ɖɔ: ‘Mi nɔte ɖò Jeluzalɛmu kaka jɛ hwenu e gbigbɔ mímɛ́ na jɛ mi jí é.’ Hlɔnhlɔn e Mawu nɔ dó w’azɔ̌ é wɛ nyí gbigbɔ mímɛ́ ɔ. É cí jɔhɔn ɖɔhun. É na d’alɔ ahwanvu lɛ, bɔ ye na wà jlǒ Mawu tɔn. Gudo mɛ ɔ, Jezu ɖɔ: ‘Mi na ɖekúnnu nú mì kaka jɛ fí e gbɛ̀ ɔ kponu dó é.’
Ee Jezu ɖɔ mɔ̌ gudo é ɔ, nùjiwǔ ɖé jɛ. É ɖido jixwé, lee mɔ gbɔn wɛ a ɖè ɖò finɛ é. Enɛ gudo ɔ, akpɔ́kpɔ́ ɖé wá bú i, bɔ ahwanvu lɛ sɔ́ mɔ ɛ ǎ. Jezu yì jixwé, bo jɛ axɔsu ɖu jí dó ahwanvu tɔn lɛ jí.
1 Kolɛntinu lɛ 15:3-8; Nǔɖexlɛ́mɛ 21:3, 4; Mɛsɛ́dó 1:1-11.