Etɛ ka Nyí Axɔsuɖuto Mawu Tɔn?

1. Ðɛ nukúnɖeji tɛ mǐ ka na ba dò na dìn?

JEZU KLISU sɔ́ kpɔ́ndéwú ɖé ɖ’ayǐ dó lee è na xoɖɛ gbɔn é wu. Ðɛ enɛ ɖó tinmɛ tawun. Enyi a ba dò nú nùbyɔbyɔ atɔn nukɔntɔn ɖɛ ɔ tɔn lɛ ɔ, a na mɔ nukúnnú jɛ nǔ e Biblu kplɔ́n mɛ tawun lɛ é gègě wu.

2. Ðɔ nǔ e Jezu kplɔ́n ahwanvu tɔn lɛ ɖɔ ye ni nɔ xoɖɛ bo byɔ lɛ é atɔn.

² Ðò bǐbɛ̌mɛ ɖɛ enɛ tɔn ɔ, Jezu kplɔ́n tóɖóétɔ́ lɛ ɖɔ: “Lee mi ɖó na nɔ xoɖɛ gbɔn ɔ ɖíe: ‘Tɔ́ mǐtɔn e ɖò [jixwé] ɔ, nyikɔ towe ni nyí nǔ sísí. [Axɔsuɖuto] towe ni wá; jlǒ towe ni nyí wiwa ɖò ayikúngban jí fí, lee é nɔ nyí wiwa ɖò [jixwé] ɔ ɖɔhun.’” (Matie 6:9-13) Etɛ ka nyí tinmɛ nùbyɔbyɔ atɔn enɛ lɛ tɔn?

3. Etɛ mǐ ka ɖó na tuùn dó Axɔsuɖuto Mawu tɔn wu?

³ Mǐ ko kplɔ́n nǔ gègě dó nyikɔ Mawu tɔn Jehovah ɔ wu. Mǐ lɛ́vɔ ɖɔ xó dó nǔ e Mawu ko wà nú gbɛtɔ́ lɛ é kpo nǔ e é na wá wà nú ye lɛ é kpo wu ɖó bǎ ɖé mɛ. Amɔ̌, etɛ ɖɔ wɛ Jezu ka ɖè hwenu e é ɖɔ mǐ ni nɔ xoɖɛ ɖɔ: “[Axɔsuɖuto] towe ni wá” é? Etɛ ka nyí Axɔsuɖuto Mawu tɔn? Nɛ̌ wìwá tɔn ka na zɔ́n bɔ è na ɖó sísí nú nyikɔ Mawu tɔn, alǒ bló bɔ é na nyí nǔ mímɛ́ gbɔn? Nɛ̌ Axɔsuɖuto ɔ sín wìwá ka na zɔ́n bɔ jlǒ Mawu tɔn na nyí wiwa gbɔn?

NǓ E AXƆSUÐUTO MAWU TƆN NYÍ É

4. Etɛ ka nyí Axɔsuɖuto Mawu tɔn? Mɛ̌ ka nyí Axɔsu tɔn?

⁴ Axɔsuɖuto Mawu tɔn ɔ, acɛkpikpa ɖé wɛ bɔ Jehovah Mawu zé ɖ’ayǐ bo sɔ́ Axɔsu ɖokpo ɖ’enu. Mɛ̌ ka nyí Axɔsu nú Axɔsuɖuto Mawu tɔn? Jezu Klisu wɛ. Axɔsu enɛ hugǎn axɔsu égbé tɔn lɛ bɔ è ylɔ ɛ ɖɔ “Aklunɔ aklunɔ lɛ tɔn; Axɔsu axɔsu lɛ tɔn.” (Nǔɖexlɛ́mɛ 17:14) É ɖó hlɔnhlɔn bo na wà nǔ ɖagbe gègě hú axɔsu ɖebǔ ɖò égbé, é na bo tlɛ nyí axɔsu e nyɔ́ hugǎn ɖò ye mɛ é.

5. Fitɛ Axɔsuɖuto Mawu tɔn ka na kpa acɛ sín? Dó etɛ jí?

⁵ Fitɛ Axɔsuɖuto Mawu tɔn ka na kpa acɛ sín? É nyɔ́, fitɛ Jezu ka ɖè? A na ko flín ɖɔ emi ko kplɔ́n ɖɔ è hu i, bɔ enɛ gudo ɔ, Mawu fɔ́n ɛ sín kú. Azǎn 40 gudo ɔ, é lɛkɔ yì jixwé. (Mɛsɛ́dó 2:33) Enɛ wu ɔ, jixwé wɛ Axɔsuɖuto Mawu tɔn ɖè. Nǔ e wu Biblu ylɔ ɛ ɖɔ ‘axɔsuɖuto jixwé tɔn’ é nɛ. (2 Timɔtée 4:18) Axɔsuɖuto Mawu tɔn ɖò jixwé cobo ka na kpa acɛ dó ayikúngban ɔ jí.—Nǔɖexlɛ́mɛ 11:15.

6, 7. Etɛ ka zɔ́n bɔ Jezu nyí Axɔsu nukúnɖeji ɖé?

⁶ Etɛ ka zɔ́n bɔ Jezu nyí Axɔsu nukúnɖeji ɖé? Hwɛjijɔ ɖokpo wɛ nyí ɖɔ é na kú gbeɖé ǎ. Biblu ɖɔ dó wutu tɔn ɖɔ: “Kú sɔ́ ɖó acɛ ɖò jǐ tɔn ǎ.” (Hlɔmanu lɛ 6:9) Enɛ xlɛ́ ɖɔ nǔ ɖagbe e Jezu na bló lɛ é bǐ na nɔte kaka sɔyi. Mǐ ganjɛwu ɖɔ é na wà nǔ e na ɖó lè é nú gbɛtɔ́ lɛ.

⁷ Ð’ayi nǔ elɔ e Biblu ɖɔ ɖ’ayǐ dó Jezu wu é wu: “Gbigbɔ Jehovah tɔn na wá jǐ tɔn, gbigbɔ nùnywɛ kpo nukúnnúmɔjɛnǔmɛ kpo tɔn, gbigbɔ weɖéxámɛ kpo hlɔnhlɔn kpo tɔn, gbigbɔ nùtuùntuùn kpo xɛsi ɖi dó Jehovah wu kpo tɔn; xɛsi ɖi nú Jehovah wɛ nyí nǔ e na nɔ hun xomɛ n’i é. Nǔ e nukún tɔn lɛ mɔ kpowun é jí wɛ é na zɔ́n bo ɖɔhwɛ ǎ, nǔ e tó tɔn lɛ sè kpowun é jí wɛ é na zɔ́n bo gbɛ́ nǔ nú mɛ ǎ. Hwɛjlɔjlɔ wɛ é na dá nú mɛ e ma nyí nùɖé ǎ lɛ é, é na gbɛ́ nǔ nú mɛ kpo nǔjlɔjlɔwiwa kpo dó mɛɖesɔhwetɔ́ e ɖò ayikúngban ɔ jí lɛ é tamɛ.” (Isaïe 11:2-4) Xó enɛ lɛ xlɛ́ ɖɔ Jezu na nyí Axɔsu hwɛjujɔnɔ kpo xomɛnyɔtɔ́ kpo dó gbɛtɔ́ lɛ jí. A ba na ɖó axɔsu mɔhun à cé?

8. Mɛ̌ mɛ̌ e ka na ɖu axɔsu xá Jezu?

⁸ Nugbǒ ɖevo ɖíe dó Axɔsuɖuto Mawu tɔn wu: Jezu ɖokponɔ na ɖu axɔsu ǎ. Mɛ ɖevo lɛ na ɖu axɔsu xá ɛ. Ði kpɔ́ndéwú ɖé ɔ, mɛsɛ́dó Pɔlu ɖɔ nú Timɔtée ɖɔ: “Enyi mǐ syɛnlǐn ɔ, mǐ na ɖu axɔsu xá ɛ.” (2 Timɔtée 2:12) Mawu cyan Pɔlu, Timɔtée kpo gbejinɔtɔ́ ɖevo lɛ kpo bonu ye na ɖu axɔsu xá Jezu ɖò Axɔsuɖuto jixwé tɔn ɔ mɛ. Mɛ nabi è ka na na fɛ́nú enɛ?

9. Mɛ nabi ka na ɖu axɔsu xá Jezu? Hwetɛnu Mawu ka jɛ ye cyan jí?

⁹ Lee mǐ mɔ gbɔn ɖò Wemata 7gɔ́ wema elɔ tɔn mɛ é ɔ, mɛsɛ́dó Jaan mɔ ɖò nǔmimɔ ɖé mɛ bɔ “Lɛngbɔví ɔ [Jezu Klisu] ɖò te ɖò Ziɔn sín só ɔ jí [axɔsu sín tɛn e mɛ é ɖè ɖò jixwé é]. Gbɛtɔ́ afatɔ́ɔ́n afatɔ́ɔ́n donu kantɔn-ko-nukún ɛnɛ e sín nukɔn è wlan nyikɔ tɔn kpo [Tɔ́] tɔn sín nyikɔ kpan ɖó lɛ ɖò finɛ xá ɛ.” Mɛ̌ mɛ̌ e ka nyí gbɛtɔ́ 144 000 enɛ lɛ? Jaan ɖesu ɖɔ nú mǐ ɖɔ: “Ye nɔ xwedó Lɛngbɔví ɔ gbɔn fí e é xwè ɔ bǐ; è vɔ́ ye xɔ sín gbɛtɔ́ lɛ mɛ, bonu ye na nyí mɛ nukɔntɔn e è na Mawu kpo Lɛngbɔví ɔ kpo é.” (Nǔɖexlɛ́mɛ 14:1, 4) Ye nyí ahwanvu gbejinɔtɔ́ Jezu Klisu tɔn e è cyan bonu ye na ɖu axɔsu xá ɛ ɖò jixwé lɛ é. Enyi è fɔ́n ye sín kú dó jixwé gudo ɔ, ye na ɖu axɔsu dó ayikúngban ɔ jí xá Jezu Klisu. (Nǔɖexlɛ́mɛ 20:4, 6) Sín xwè 33 H.M. ɖokpoo wɛ Jehovah ko ɖò Klisanwun gbejinɔtɔ́ lɛ cyan wɛ bonu gbɛtɔ́ 144 000 lɛ na sɔgbe.

10. Etɛwu tuto e Mawu bló bɔ Jezu kpo gbɛtɔ́ 144000 lɛ kpo na ɖu axɔsu dó gbɛtɔ́ lɛ jí é ka xlɛ́ ɖɔ é ɖó wanyiyi nú mǐ?

¹⁰ Tuto e Mawu bló bɔ Jezu kpo gbɛtɔ́ 144 000 lɛ kpo na ɖu axɔsu dó gbɛtɔ́ lɛ jí é xlɛ́ ɖɔ é ɖó wanyiyi nú mǐ tawun. Hwɛjijɔ ɖokpo wɛ nyí ɖɔ Jezu ɖesu nɔ ayikúngban jí fí kpɔ́n bo tuùn wuvɛ̌ e gbɛtɔ́ lɛ nɔ mɔ é. Pɔlu ɖɔ dó Jezu wu ɖɔ: “Vɔsanúxwlémawutɔ́ ɖaxó e ma sixu kpéwú bo jiya xá mǐ ɖò gǎnmaɖó mǐtɔn lɛ mɛ ǎ ɔ wɛ mǐ ɖǒ ǎ. É nyɔ́ wà ɔ, vɔsanúxwlémawutɔ́ ɖaxó mǐtɔn ɔ, è tɛn ɛ kpɔ́n mǐ ɖɔhun ɖò nǔ bǐ mɛ; amɔ̌, é huhwɛ ǎ.” (Eble lɛ 4:15; 5:8) Mɛ e na ɖu axɔsu xá Jezu lɛ é lɔ jiya bo syɛnlǐn mǐ ɖɔhun. Ye lɛ́vɔ ɖí xwì xá hwɛhuhu, bo lɛ́ dɛ ɖò azɔn alɔkpa lɔkpa lɛ nu. É ɖò gaàn ɖɔ ye na mɔ nukúnnú jɛ tagba e mǐ nɔ mɔ lɛ é mɛ!

ETƐ AXƆSUÐUTO MAWU TƆN KA NA WÀ?

11. Aniwu è ka ɖó hudo Axɔsuɖuto Mawu tɔn tɔn bonu jlǒ Mawu tɔn na dó nyí wiwa ɖò jixwé?

¹¹ Ee Jezu ɖɔ nú ahwanvu tɔn lɛ ɖɔ ye ɖó na xoɖɛ ɖɔ Axɔsuɖuto Mawu tɔn ni wá é ɔ, é lɛ́ ɖɔ ye ɖó na xoɖɛ ɖɔ jlǒ Mawu tɔn ni nyí “wiwa ɖò ayikúngban jí fí lee é nɔ nyí wiwa ɖò [jixwé] ɔ ɖɔhun.” Mawu ɖò jixwé, bɔ wɛnsagun gbejinɔtɔ́ lɛ nɔ wà jlǒ tɔn hwebǐnu ɖò dɔ̌n. É ɖò mɔ̌ có, mǐ ko kplɔ́n ɖò Wemata 3gɔ́ wema elɔ tɔn mɛ ɖɔ wɛnsagun ɖokpo wá jó jlǒ Mawu tɔn wiwa dó, lobo dɔn Adamu kpo Ɛva kpo dó hwɛhuhu mɛ. Ðò Wemata 10gɔ́ ɔ mɛ ɔ, mǐ na kplɔ́n nǔ gègě dó nǔ e Biblu ɖɔ dó wɛnsagun nyanya enɛ e è nɔ ylɔ ɖɔ Sataan Awovi wu é wu. Mawu tin dó Sataan kpo wɛnsagun e xwedó é bɔ è nɔ ylɔ ye ɖɔ awovi lɛ é kpo bɔ ye nɔ jixwé nú hwenu ɖé. Enɛ wu ɔ, mɛ lɛ bǐ nɔ wà jlǒ Mawu tɔn ɖò jixwé ǎ. Nǔ enɛ ɖyɔ hwenu e Axɔsuɖuto Mawu tɔn jɛ axɔsu ɖu jí é. Jezu Klisu, Axɔsu yɔyɔ̌ e è sɔ́ é fun ahwan xá Sataan.—Nǔɖexlɛ́mɛ 12:7-9.

12. Nǔ taji wè tɛ lɛ jí Nǔɖexlɛ́mɛ 12:10 ka ɖɔ xó dó?

¹² Xóɖɔɖ’ayǐ e bɔ d’ewu lɛ é tinmɛ nǔ e jɛ é: “Un sè gbè ɖaxó ɖé ɖi sín jixwé bo ɖɔ: ‘Hwlɛngán sín hwenu sù lo! Mawu ɖè axɔsuɖuɖu tɔn kpo hlɔnhlɔn tɔn kpo xlɛ́ lo! Klisu tɔn ɖè acɛkpikpa e nyí étɔn ɔ xlɛ́ lo! Ðó hwɛdomɛtɔ́ [Sataan] e ɖò te ɖò Mawu mǐtɔn nukɔn bo [nɔ] dóhwɛ nɔví mǐtɔn lɛ zǎn kéze ɔ, è ko zin i dɛ.’” (Nǔɖexlɛ́mɛ 12:10) A ka ɖó ayi nǔ taji wè e xó wemafɔ Biblu tɔn enɛ ɖɔ é wu à? Nukɔntɔn ɔ, Axɔsuɖuto Mawu tɔn e nu Jezu Klisu ɖè é jɛ acɛ kpa jí. Wegɔ ɔ, è nya Sataan sín jixwé dó ayikúngban ɔ jí.

13. Etɛ ka jɛ hwenu e è nya Sataan sín jixwé é?

¹³ Lee mǐ na wá mɔ gbɔn ɖò nukɔn mɛ é ɔ, nǔ taji wè enɛ lɛ ko jɛ. Etɛ lɛ mɛ ye ka tɔ́n kɔ dó? Nǔ e jɛ ɖò jixwé bɔ Biblu ɖɔ é ɖíe: “[Jixwé] kpo mi mɛ e ɖò [jixwé] lɛ kpo ni jɛ awǎ.” (Nǔɖexlɛ́mɛ 12:12) Nugbǒ ɔ, wɛnsagun gbejinɔtɔ́ e ɖò jixwé lɛ é jɛ awǎ, ɖó Sataan kpo awovi tɔn lɛ kpo sɔ́ ɖò dɔ̌n ǎ. Mɛ e ɖò jixwé lɛ é bǐ wɛ nyí gbejinɔtɔ́ nú Jehovah Mawu. Fífá kpo gbenɔkpɔ kpo kɛɖɛ wɛ ɖò dɔ̌n. Dìn ɔ, jlǒ Mawu tɔn nɔ nyí wiwa ɖò jixwé.

14. Ee è nya Sataan sɛ́dó ayikúngban jí é ɔ, etɛ ka jɛ?

¹⁴ Etɛ ka jɛ ɖò ayikúngban ɔ jí lo? Biblu ɖɔ: “Heelu ayikúngban kpo xù kpo. Ðó [A]wovi jɛte wá mi gɔ́n kpodo xomɛsin ɖaxó kpo, ɖó é tuùn ɖɔ hwenu kpɛɖé jɛn wɛ kpò nú emi.” (Nǔɖexlɛ́mɛ 12:12) Sataan ɖò xomɛ sìn wɛ, ɖó è nya ɛ sín jixwé, bɔ hwenu kpɛví ɖé jɛn ka kpò n’i. Ðò xomɛsin enɛ ɔ mɛ ɔ, é hɛn wuvɛ̌ wá ayikúngban jí. Ðò wemata e na bɔ d’ewu é mɛ ɔ, mǐ na kplɔ́n nǔ gègě dó wuvɛ̌ enɛ lɛ wu. Amɔ̌, mǐ sixu kanbyɔ dìn ɖɔ: Nɛ̌ Axɔsuɖuto Mawu tɔn ka na bló bɔ jlǒ Mawu tɔn na nyí wiwa ɖò ayikúngban ɔ jí gbɔn?

15. Etɛ ka nyí linlin Mawu tɔn nú ayikúngban ɔ?

¹⁵ É nyɔ́, a ka flín linlin Mawu tɔn nú ayikúngban ɔ à? Mǐ kplɔ́n ɖò Wemata 3gɔ́ ɔ mɛ. Ðò Edɛnu mɛ ɔ, Mawu xlɛ́ ɖɔ linlin emitɔn nú ayikúngban ɔ wɛ nyí ɖɔ é ni nyí palaɖisi ɖé bonu nǔjlɔjlɔwatɔ́ e ma na kú ǎ lɛ é ni gɔ́ mɛ. Sataan zɔ́n bɔ Adamu kpo Ɛva kpo hu hwɛ, bo na dó sú ali dó linlin Mawu tɔn enɛ. Amɔ̌, nǔ e Mawu lin é ka na gló ǎ. Jehovah kpò ɖò linlin wɛ ɖɔ “ayikúngban ɔ na nyí nǔjlɔjlɔwatɔ́ lɛ tɔn, bɔ ye na nɔ jí kaka sɔyi.” (Psaume 37:29) Axɔsuɖuto Mawu tɔn wɛ na bló enɛ. Gbɔn nɛ̌ é?

16, 17. Etɛ lɛ Daniel 2:44 ka ɖɔ nú mǐ dó Axɔsuɖuto Mawu tɔn wu?

¹⁶ Lin tamɛ dó xóɖɔɖ’ayǐ e ɖò Daniel 2:44 mɛ é wu? Mǐ xá ɖò finɛ ɖɔ: “Ðò azǎn axɔsu enɛ lɛ tɔn gbè ɔ, Mawu jixwé tɔn ɔ na zé axɔsuɖuto ɖé ɖ’ayǐ bɔ è na gbà ɛ gbeɖé ǎ. Axɔsuɖuto enɛ ɔ na jɛ togun ɖevo ɖebǔ sín alɔ mɛ ǎ. É na gbà axɔsuɖuto enɛ lɛ bǐ, bo sú kún dó nú ye, bɔ éyɛ na nɔte kaka sɔyi.” Etɛ ɖɔ nú mǐ wɛ enɛ ka ɖè dó Axɔsuɖuto Mawu tɔn wu?

¹⁷ Nukɔntɔn ɔ, é ɖɔ nú mǐ ɖɔ è na zé Axɔsuɖuto Mawu tɔn ɖ’ayǐ “ɖò azǎn axɔsu enɛ lɛ tɔn gbè,” alǒ hwenu e axɔsuɖuto ɖevo lɛ na kpó ɖò ayǐ é. Wegɔ ɔ, é ɖɔ nú mǐ ɖɔ Axɔsuɖuto ɔ na nɔ ayǐ kaka sɔyi. Acɛkpikpa ɖevo ɖebǔ na gbà ɛ bo jɛ tɛn tɔn mɛ ǎ. Atɔngɔ ɔ, mǐ mɔ ɖɔ ahwan ɖé na tɔ́n ɖò Axɔsuɖuto Mawu tɔn kpo axɔsuɖuto gbɛ̀ elɔ tɔn lɛ kpo tɛntin. Axɔsuɖuto Mawu tɔn wɛ ka na ɖu ɖò ahwan ɔ jí. Ðò vivɔnu ɔ, acɛkpikpa ɖokpo géé e na kpa acɛ dó gbɛtɔ́ lɛ nu é nɛ. Gbɛtɔ́ lɛ na ɖu vivǐ acɛkpikpa e nyɔ́ hugǎn bɔ ye ma ko mɔ kpɔ́n gbeɖé ǎ é tɔn.

18. Nɛ̌ è ka nɔ ylɔ ahwan gudo tɔn e Axɔsuɖuto Mawu tɔn na fun xá acɛkpikpa gbɛtɔ́ lɛ tɔn é ɖɔ?

¹⁸ Biblu ɖɔ nǔ gègě dó ahwan gudo tɔn e Axɔsuɖuto Mawu tɔn kpo acɛkpikpa gbɛ̀ elɔ tɔn lɛ kpo na fun é wu. Ði kpɔ́ndéwú ɖé ɔ, é kplɔ́n mɛ ɖɔ hwenu e ahwan enɛ na jɛ sisɛkpɔ jí é ɔ, gbigbɔ nyanya lɛ na fúnfún adingbanxó lɛ bo dó blɛ́ “axɔsu e ɖò ayikúngban ɔ bǐ jí lɛ” é. Ðó aniwu? “Bo na kplé ye [axɔsu lɛ] nú ahwan e è na fun ɖò Mawu nǔbǐwukpétɔ́ ɔ sín azǎn ɖaxó ɔ gbé é.” È na kplé axɔsu ayikúngban ɔ jí tɔn lɛ bǐ ɖó kpɔ́ ɖò “tɛn e mɛ è nɔ ylɔ ɖɔ Amagedɔ́ɔ́n ɔ dó Eblegbe mɛ é.” (Nǔɖexlɛ́mɛ 16:14, 16) Sɔgbe kpo nǔ e è ɖɔ ɖò wemafɔ wè enɛ lɛ mɛ é kpo ɔ, ahwan gudo tɔn e Axɔsuɖuto Mawu tɔn na fun xá acɛkpikpa gbɛtɔ́ lɛ tɔn é nɔ nyí Amagedɔ́ɔ́n.

19, 20. Aniwu é ka sín bɔ jlǒ Mawu tɔn ma ko nyí wiwa ɖò ayikúngban ɔ jí ǎ?

¹⁹ Etɛ Axɔsuɖuto Mawu tɔn ka na wà gbɔn Amagedɔ́ɔ́n gblamɛ? Lɛ̌vɔ lin tamɛ dó nǔ e nyí linlin Mawu tɔn nú ayikúngban ɔ é jí. Linlin Jehovah Mawu tɔn wɛ nyí ɖɔ nǔjlɔjlɔwatɔ́ e ma ɖó blɔ̌ ǎ lɛ é ni gɔ́ ayikúngban ɔ jí bo sɛ̀n ɛ ɖò Palaɖisi mɛ. Aniwu é ka sín bɔ nǔ ma ko ɖò mɔ̌ ǎ? Nukɔntɔn ɔ, mǐ mɛ bǐ wɛ nyí hwɛhutɔ́ bo nɔ j’azɔn bo nɔ kú. É ɖò mɔ̌ có, mǐ ko kplɔ́n ɖò Wemata 5gɔ́ ɔ mɛ ɖɔ Jezu kú dó ta mǐtɔn mɛ. Enɛ wu ɔ, mǐ hɛn ɔ, mǐ na nɔ gbɛ̀ kaka sɔyi. A sixu ko flín xó e è ɖɔ ɖò Wɛnɖagbe Jaan tɔn mɛ é: “Mawu yí wǎn nú gbɛtɔ́ lɛ sɔmɔ̌, bo sɔ́ Vǐɖokponɔ tɔn jó, bonu mɛ e na ɖi nǔ n’i lɛ ɖebǔ ma dɔn ó; loɔ, ye bǐ ni mɔ gbɛ̀ mavɔmavɔ.”—Jaan 3:16.

²⁰ Nǔ ɖevo wɛ lɛ́ nyí ɖɔ mɛ gègě nɔ dó nǔ baɖabaɖa lɛ sìn. Ye nɔ ɖó adingban, nɔ xò mɛ ɖu, bo nɔ lɛ̀ aga. Ye nɔ jló na wà jlǒ Mawu tɔn ǎ. È na hu mɛ e nɔ dó nǔ baɖabaɖa enɛ lɛ sìn é ɖò Amagedɔ́ɔ́n hwenu. (Psaume 37:10) Hwɛjijɔ ɖevo e wu jlǒ Mawu tɔn ma nɔ nyí wiwa ɖò ayikúngban jí dìn ǎ é wɛ nyí ɖɔ acɛkpikpa gbɛtɔ́ lɛ tɔn nɔ dó wusyɛn tɔn lanmɛ nú mɛ lɛ ǎ. Acɛkpikpa gègě wɛ ko vɔ́da, nɔ xò daka, alǒ nɔ táfú mɛ lɛ. Biblu ɖɔ céɖécéɖé ɖɔ: “Gbɛtɔ́ ɖò acɛ kpa dó wegɔ tɔn jí wɛ bo na dó táfú i.”—Ecclésiaste 8:9.

21. Nɛ̌ Axɔsuɖuto ɔ ka na bló bɔ jlǒ Mawu tɔn na nyí wiwa ɖò ayikúngban ɔ jí gbɔn?

²¹ Ðò Amagedɔ́ɔ́n gudo ɔ, Axɔsuɖuto Mawu tɔn ɖokponɔ géé wɛ na kpa acɛ dó gbɛtɔ́ lɛ jí. Axɔsuɖuto enɛ na bló jlǒ Mawu tɔn bo na hɛn nyɔna ɖagbe lɛ wá. Ði kpɔ́ndéwú ɖé ɔ, é na zé Sataan kpo awovi tɔn lɛ kpo nyì dó dò ma ɖó azan ɔ mɛ kaka nú xwè afatɔ́ɔ́n. (Nǔɖexlɛ́mɛ 20:1-3) Vɔsisa Jezu tɔn sín acɛ na bló bɔ gbɛtɔ́ gbejinɔtɔ́ lɛ sɔ́ na j’azɔn bo kú ǎ. Ye na nɔ gbɛ̀ kaka sɔyi ɖò Axɔsuɖuto Mawu tɔn sín acɛkpikpa glɔ. (Nǔɖexlɛ́mɛ 22:1-3) Ayikúngban ɔ bǐ na huzu palaɖisi ɖé. Enɛ wu ɔ, Axɔsuɖuto ɔ na bló bɔ jlǒ Mawu tɔn na nyí wiwa ɖò ayikúngban ɔ jí bɔ nyikɔ tɔn na nyí nǔ sísí. Etɛ ɖɔ wɛ è ka ɖè bo ɖɔ mɔ̌? Nǔ ɔ wɛ nyí ɖɔ ɖò Axɔsuɖuto Mawu tɔn glɔ ɔ, mɛ lɛ bǐ na nɔ sɔ́ nyikɔ Jehovah tɔn sù.

HWETƐNU AXƆSUÐUTO Ɔ KA NA BLÓ BƆ JLǑ MAWU TƆN NA NYÍ WIWA ÐÒ AYIKÚNGBAN JÍ?

22. Etɛwu mǐ ka tuùn ɖɔ Axɔsuɖuto Mawu tɔn kún wá hwenu e Jezu ɖò ayikúngban jí é alǒ ɖò fínfɔ́n sín kú tɔn gudo tlolo ó?

²² Hwenu e Jezu ɖɔ nú ahwanvu tɔn lɛ ɖɔ ye ni xoɖɛ ɖɔ “[axɔsuɖuto] towe ni wá” é ɔ, é ɖò gaàn ɖɔ Axɔsuɖuto ɔ kún ko wá hwe enɛ nu ó. É ka wá hwenu e Jezu yì jixwé é wɛ à? Eǒ, ɖó Piyɛɛ kpo Pɔlu kpo ɖɔ ɖɔ ɖò fínfɔ́n sín kú Jezu tɔn gudo ɔ, nǔɖɔɖ’ayǐ e ɖò Psaume 110:1 mɛ é jɛ dó wǔ tɔn: “Xó e Jehovah ɖɔ nú Aklunɔ ce é ɖíe: ‘Junjɔn ɖisi ce xwé kaka nú ma sɔ́ kɛntɔ́ towe lɛ dó bló afɔɖótɛn towe.’” (Mɛsɛ́dó 2:32-35; Eble lɛ 10:12, 13) Hwenu ɖé tíìn bɔ Axɔsuɖuto Mawu tɔn na nɔte na hwɛ̌ cobo na jɛ acɛ kpa jí.

23. (a) Hwetɛnu Axɔsuɖuto Mawu tɔn ka jɛ acɛ kpa jí? (b) Etɛ jí wemata e bɔ d’ewu é ka na ɖɔ xó dó?

²³ Hwenu nabi Axɔsuɖuto Mawu tɔn ka na nɔte na hwɛ̌ cobo na jɛ acɛ kpa jí? Xwè 40 mɔ̌ jɛ nukɔn nú 1914 ɔ, Biblu kplɔntɔ́ lɛ sín gbɛ̌ta ɖé jɛ nukúnnú mɔ jɛ wu jí kpɛɖé kpɛɖé ɖɔ te ninɔ enɛ na fó ɖò 1914. (kpɔ́n Xota Ðevo ɔ “1914: Xwè Taji ɖé Ðò Nǔɖɔɖ’ayǐ Biblu Tɔn Mɛ” ba mɔ dò nú azǎnlinlɛn enɛ.) Nǔ e jɛ jijɛ jí bɛ́sín 1914 gbɔn gbɛ̀ ɔ mɛ lɛ é xlɛ́ ɖɔ nukúnnúmɔjɛnǔmɛ Biblu kplɔntɔ́ ayijlɔjlɔnɔ enɛ lɛ tɔn sɔgbe. Nǔɖɔɖ’ayǐ Biblu tɔn lɛ sín jijɛ ɖexlɛ́ ɖɔ ɖò 1914 ɔ, Klisu huzu Axɔsu bɔ Axɔsuɖuto Mawu tɔn jɛ acɛ kpa jí ɖò jixwé. Enɛ wu ɔ, hwenu e mǐ ɖè é ɔ, “hwenu kpɛɖé” e kpò nú Sataan é wɛ. (Nǔɖexlɛ́mɛ 12:12; Psaume 110:2) Mǐ hɛn ɔ, mǐ na lɛ ɖɔ kpo jiɖiɖe kpo ɖɔ zaanɖé dìn ɔ, Axɔsuɖuto Mawu tɔn na bló bɔ jlǒ tɔn na nyí wiwa ɖò ayikúngban jí. A mɔ ɖɔ wɛnɖagbe ɖé nɛ à cé? A ka ɖi ɖɔ nǔ na nyí mɔ̌ nugbǒ à? Wemata e bɔ d’ewu é na d’alɔ we bɔ a na mɔ ɖɔ Biblu kplɔ́n nǔ enɛ lɛ mɛ nugbǒ.