Nukplɔnkplɔn 6

Etɛwɛ Axɔsuɖuta Mawu Tɔn Ka Nyí?

Fitɛ wɛ Axɔsuɖuta Mawu tɔn ɖe? (1)

Mɛ ka wɛ nyí Axɔsu tɔn? (2)

Mɛɖevo lɛ na ɖugan xá Axɔsu ɔ wɛ à? Enyí mɔ̌, mɛ nabi? (3)

Etɛwɛ ɖe xlɛ ɖɔ mí ɖò gbɛnɔ ɖò azan gudo tɔn lɛ mɛ wɛ? (4)

Etɛwɛ Axɔsuɖuta Mawu tɔn na wà nú gbɛtɔ lɛ ɖo sɔgudo? (5-7)

1. Hwenue e tin ɖo ayikungban ji ɔ, Jezu kplɔ́n ahwanvu tɔn lɛ ɖɔ̀ yé ni nɔ xa yɛwhe nú Axɔsuɖuta Mawu tɔn. Axɔsuɖuta ɔ, e nyí acɛkpikpa ɖe ee axɔsu ɖokpo ɖo tá na. Axɔsuɖuta Mawu tɔn nyí acɛkpikpa tawun ɖe. É tín ɖò sɛxwé bo na kpacɛ ɖ’ayikungban elɔ ji. É na klɔ nyikɔ Mawu tɔn wé abǐ hɛn ɛ huzu mímɛ́. É na blo bɔ jlo Mawu tɔn na nyí wiwà ɖ’ayikungban ji fi ɖi lee e nɔ nyí wiwà do sɛxwe gbɔn é.—Matie 6:9, 10.

2. Mawu do akpa ɖɔ Jezu wɛ na nyí Axɔsu Axɔsuɖuta Etɔn tɔn. (Luka 1:30-33) Hwenue Jezu ɖo ayikungban ji fi ɔ, é xlɛ ɖɔ émi na nyí Gán ɖagbe, hwɛjujɔnɔ, kpó wíwé kpó. Hwenue é lɛkɔ yì sɛxwé ɔ, é jɛ ganɖu ji ɖi Axɔsu Axɔsuɖuta Mawu tɔn ɖɔhun trolo ǎ. (Eble lɛ 10:12, 13) Ðò 1914 ɔ, Jehovah ná Jezu acɛkpikpa é sín akpá É dó n’i é. Sín hwenɛnu ɔ, Jezu ɖò axɔsuɖu wɛ ɖò sɛxwe ɖi Axɔsu gansusɔ Jehovah tɔn.—Daniel 7:13, 14.

3. Mɔɖokpo ɔ, Jehovah cyan sunnu kpó nyɔnu gbejinɔtɔ lɛ kpó sín ayikungban ji fi bɔ yé lɔ na yì sɛxwé. Yé na ɖugan xa Jezu ɖi axɔsu, hwɛɖɔtɔ kpó yɛhwenɔ kpó ɖò gbɛtɔvi lɛ ji. (Luka 22:28-30; Nǔɖexlɛ́mɛ 5:9, 10) Jezu ylɔ ganɖutɔgbɛ e na ɖugan xa ɛ ɖò Axɔsuɖuta tɔn mɛ lɛ ɖɔ “lɛngbɔkpo kpɛvi.” Mɛ 144 000 wɛ yé nyí.—Luka 12:32, NW; Nǔɖexlɛ́mɛ 14:1-3.

4. Ée Jezu huzu Axɔsu trolo ɔ, é nyà Sataan kpó angɛli tɔn nyanya lɛ kpó sín sɛxwé bɔ yé wá do lɛdo ayikungban ji tɔn. Enɛ wɛ zɔ́n bɔ nǔ lɛ fɔ́n bo syɛn deji sin 1914 ɖokpo ɔ́. (Nǔɖexlɛ́mɛ 12:9, 12) Ahwan lɛ, xovɛ, azɔ̀n nyanyan lɛ, sudeji sɛ́ngbìgbà tɔn—nǔ enɛ lɛ bǐ wɛ nyí akpaɖexwe ‘wuntun’ ee na xlɛ ɖɔ Jezu ɖo ganɖu wɛ bɔ titonu elɔ byɔ azan tɔn gudo tɔn lɛ mɛ.—Matie 24:3, 7, 8, 12; Luka 21:10, 11; 2 Timɔtée 3:1-5.

5. Zanɖe ɔ Jezu na ɖɔhwɛ xa gbɛtɔ lɛ, bo na má yé ɖo vǒvǒ ɖi lee lɛngbɔnyitɔ nɔ má lɛngbɔ kpó gbɔ́ kpó ɖo vǒ ɖɔhun. “Lɛngbɔ̌” lɛ wɛ nyí mɛ e ɖe yedelɛ xlɛ ɖi mɛjiɖuganɖo gbejinɔtɔ lɛ. Yé na mɔ gbɛ̀ mavɔmavɔ yí ɖò ayikungban ji. “Gbɔ̌” lɛ wɛ nyí mɛ e gbɛ́ Axɔsuɖuta Mawu tɔn lɛ. (Matie 25:31-34, 46) Ðò sɔgudo malin malin mɛ ɔ, Jezu na và mɛ ee ci gbɔ́ lɛ ɖɔhun. (2 Tɛsalonikinu lɛ 1:6-9) Enyí a jlo bo na nyí “lɛngbɔ̌” Jezu tɔn ɔ, a ɖo na ɖó tó wɛn Axɔsuɖuta tɔn bo blo nu e a kplɔ́n lɛ.—Matie 24:14.

6. Din ɔ, ayikungban elɔ nyí mimá ɖò akɔta vǒvǒ lɛ ji. Ðokpo ɖokpo yetɔn ɖó ganɖuɖu yeɖesunɔ tɔn. Akɔta enɛ lɛ ɔ nɔ ɖò hunxo wɛ ɖò yeɖee tɛntin hwɛ̌hwɛ̌. Amɔ̌ Axɔsuɖuta Mawu tɔn na wá ɖyɔ ganɖuɖu gbɛtɔ lɛ tɔn bǐ. É na kpacɛ ɖi ganɖuɖu ɖokpo gee ɖò ayikungban bǐ ji. (Daniel 2:44) Hwenɛnu ɔ, ahwan, sɛ́ngbìgbà, kpó adanuwiwa kpó sɔ na tin ǎ. Gbɛtɔ lɛ bǐsese na nɔ kpɔ ɖò fɛɛ mɛ.—Mika 4:3, 4.

7. Ðò Ganɖuɖu Xwè Afatɔ́ɔ́n Jezu tɔn hwenu ɔ, gbɛtɔ gbejinɔtɔ lɛ na huzu mímɛ́ bɔ ayikungban ji bǐsese na huzu paladisi ɖe. Ðò vivɔnu xwè afatɔ́ɔ́n tɔn hwenu ɔ, Jezu na ko blo nǔ e Mawu jlo ɖɔ̀ é ni blo lɛ bǐ. Hwenɛnu ɔ, é na lɛ́ ze Axɔsuɖuta ɔ jo nú Tɔ́ tɔn. (1 Kolɛntinu lɛ 15:24) Etɛwu a ma na ɖɔ nú xɔntɔn towe lɛ kpó mɛ e a yiwanna lɛ kpó dogbɔn nǔ e Axɔsuɖuta Mawu tɔn ɖo na wà wɛ e wu?

[Tinmɛ E Nɔ Nɔ Ðiɖe Glɔ É, Wexwɛ 13]

Ðo acɛkpikpa Jezu tɔn glɔ, wangbɛnumɛ kpó mɛnujlomɛ kpó sɔ na tin ǎ