Mɛɖé ka Sixu Wà Azɔ̌ Ðagbe lɛ Ðò Gbɔjɛzángbe À?

Nǔ gègě wɛ Jezu bló ɖò sinsɛnzɔ́ ɖaxó e é wà ɖò Galilée é hwenu. Amɔ̌, ee é ɖɔ ɖɔ “axɔsuɖuɖu Mawu tɔn ɔ, [emi] ɖó na yì jla Wɛnɖagbe tɔn tò ɖě lɛ lɔmɔ̌” é ɔ, Galilée kɛɖɛ wɛ ɖò linlin tɔn mɛ ǎ. Enɛ wu ɔ, é yì bo “nɔ ɖò Mawuxó jla wɛ gbɔn kplɔ́ngbasá lɛ, ɖò Judée yikúngban jí.” (Luki 4:43, 44) É ka sɔgbe ɖɔ é ni wà mɔ̌, ɖó Xwèjísun alǒ Lidosun mɛ wɛ ye ko ɖè, bɔ xwè gɛnnyigɛnnyi ɖé ɖò sisɛkpɔ wɛ ɖò Jeluzalɛmu.

Wema Wɛnɖagbe tɔn lɛ ɖɔ xó nabi ɖé dó azɔ̌ e Jezu wà ɖò Judée é wu ǎ, enyi è sɔ́ jlɛ́ dó sinsɛnzɔ́ e é wà ɖò Galilée bɔ ye ɖɔ é wu ɔ nɛ. Enyi mɛ lɛ na bo ma tlɛ yí Jezu ganji ɖò Judée ǎ hǔn, enɛ ka ɖó è te bonu é gɔn wɛn ɔ jla kpo kanɖodonǔwu kpo, lobo gɔn azɔ̌ ɖagbe lɛ wà ɖò fí ɖebǔ e é ɖè é ǎ.

Zaan ɔ, Jezu tunta Judée sín toxo ɖaxó e nɔ nyí Jeluzalɛmu é mɛ, bo na dó sixu ɖu Dindinwayixwe xwè 31 H.M. tɔn ɔ. Ðò xá e mɛ mɛ lɛ sukpɔ́ ɖè ɖò Lɛngbɔ̌ Hɔntogbo ɔ kpá é ɔ, sindo e mɛ è nɔ lɛwu ɖè é ɖaxó ɖé ɖò finɛ, bɔ è nɔ ylɔ ɖɔ Bɛtizata. Azinzɔnnɔ, nukúntíntɔ́nnɔ, kpo sékunɔ kpo gègě nɔ wá sindo enɛ kɔn. Aniwu? Ðó mɛ gègě ɖi nǔ ɖɔ enyi è ɖò azɔn alɔkpa ɖebǔ jɛ wɛ, bo lɔ́n jɛ sìn ɔ mɛ hwenu e sìn ɔ ɖò adǎn jí é ɔ, azɔn mɛtɔn sixu gbɔ.

Gbɔjɛzángbe wɛ mǐ ɖè dìn, bɔ Jezu mɔ dawe ɖé ɖò sindo enɛ kpá, bɔ é ko ɖò azɔn jɛ wɛ sín xwè 38 ɖíe. Jezu kanbyɔ ɛ ɖɔ: “A jló bonu azɔn towe ni gbɔ à?” Dawe ɔ yí gbè n’i ɖɔ: “Aklunɔ, un ɖó mɛɖé ɖò fí bɔ é na sɔ́ mì dó sìn ɔ mɛ hwenu e é nɔ xò dó ɔ ǎ; hwenu e un nɔ ɖò gǎn dó wɛ ɖɔ ma yì jɛ mɛ ɔ, mɛ ɖevo nɔ ko jɛ tɔ̀ ɔ mɛ jɛ nukɔn nú mì.”​—Jaan 5:6, 7.

Jezu ɖɔ xó ɖé bɔ é ɖó na kpaca dawe ɔ kpo mɛɖebǔ e na ko sè é kpo, é ɖɔ: “Site, sɔ́ zan towe bo zun zɔnlin.” (Jaan 5:8) Nǔ e dawe ɔ ka wà é pɛ́pɛ́ nɛ. Ee azɔn tɔn gbɔ n’i tlolo é ɔ, é sɔ́ zan tɔn bo jɛ zɔnlin zun jí!

Nùjiwǔ enɛ e jɛ é ɖó na hun xomɛ nú Jwifu lɛ wɛ, loɔ, ye ka mɔ dawe ɔ bo jɛ hwɛ dó è jí ɖɔ: “Égbé ɔ, gbɔjɛzángbe wɛ; a ɖó na zé zan gbɔjɛzángbe ǎ, sɛ́n mǐtɔn gbɛ́.” Dawe ɔ yí gbè nú ye ɖɔ: “Mɛ e gbɔ azɔn nú mì ɔ wɛ ɖɔ nú mì ɖɔ: ‘Zě zan towe bo zun zɔnlin.’” (Jaan 5:10, 11) Jwifu enɛ lɛ mɔ xó ɖɔ dó azɔn e è gbɔ nú mɛ ɖò Gbɔjɛzángbe é wu.

“Mɛ̌ ka nyí mɛ e ɖɔ nú we ɖɔ: ‘Zě zan towe bo ɖi zɔnlin’ ɔ?” Ye jló na ɖó mɔjɛmɛ nǔ enɛ tɔn. Aniwu ye ka kàn mɔ̌ byɔ dawe ɔ? Ðó Jezu ko “gosin agun e kplé ɖò finɛ ɔ mɛ,” bɔ dawe e sín azɔn gbɔ é ka tuùn nyikɔ Jezu tɔn ǎ. (Jaan 5:12, 13, tinmɛ e ɖò dò é.) Amɔ̌, dawe enɛ ɔ na lɛ́vɔ wá mɔ Jezu. Nukɔnmɛ ɔ, é xò gò Jezu ɖò tɛmpli ɔ mɛ, bo tuùn nyikɔ mɛ e gbɔ azɔn n’i ɖò sindo ɔ kpá é tɔn.

Dawe e azɔn gbɔ na é yì mɔ Jwifu e kàn nǔ byɔ ɛ dó lee azɔn tɔn gbɔ gbɔn é wu lɛ é. É ɖɔ nú ye ɖɔ Jezu wɛ. Ee Jwifu lɛ sè mɔ̌ é ɔ, ye yì mɔ Jezu. Nǔ e d’alɔ Jezu bɔ é bló nùjiwǔ mɔhun lɛ é tuùn gbé wɛ ye ka tɔ́n bo yì mɔ ɛ à? Eǒ. É nyɔ́ wà ɔ, bo na dó dóhwɛ Jezu, ɖó é wà ɖagbe ɖò Gbɔjɛzángbe wutu wɛ. Bɔ ye tlɛ lɛ́ jɛ gbě tɔn nya jí!