Mars

Ðo wěma nukɔntɔn e Mawu sɔ́ d’ayi mɛ nú mɛsɛ́dó Piyɛ́ɛ b’ɛ wlán é mɛ ɔ, é byɔ́ nɔví tɔn lɛ́ ɖɔ yě ní zán nǔníná ɖěbǔ e yě ɖó é dó dó wǔsyɛ́n lanmɛ nú nǔɖitɔ́ hǎtɔ́ yětɔn lɛ́. Piyɛ́ɛ wlán ɖɔ: “Nǔníná tɛnmɛ tɛnmɛ wɛ Mawu ná mi. Mɛ ɖokpó ɖokpó ɖó ná nyí nǔjíkpɔ́ntɔ́ ɖagbe nǔníná e Mawu ná ɛ tɔn, bo ɖó ná zán nú ɖagbe mɛ bǐ tɔn.” (1 Pi. 4:10) Mǐ ɖó ná wa nǔ e wú mǐ kpé é bǐ bo zán nǔwúkpíkpé e mǐ ɖó lɛ́ é, mǐ ka ɖó ná xo nǔ kpɔ́n ɖɔ mɛ ɖěvo lɛ́ sixú hwan wǔ mǐ, alǒ awakanmɛ ná kú yě ǎ. Amɔ̌, mǐ ɖó ná cɔ́ mǐɖée bo ma wá jɛ go yí jí ɖó nǔníná e mǐ ɖó lɛ́ é wú ó. (1 Kɔ. 4:6) Mǐ ɖó ná flín ɖɔ Mawu wɛ nyí tɔn bɔ mǐ ɖó nǔwúkpíkpé jɔwámɔ tɔn ɖěbǔ e mǐ ɖó é. Mǐ ɖó ná zán nǔníná énɛ́ lɛ́ dó dó wǔsyɛ́n lanmɛ nú agun ɔ, é nyí bo ná dó jlá ajɔ̌ nú mǐɖée ǎ. (Filí. 2:3) Ényí mǐ nɔ zán hlɔ̌nhlɔ́n mǐtɔn kpó nǔwúkpíkpé mǐtɔn lɛ́ kpó dó wa jlǒ Mawu tɔn ɔ, mǐ ná ɖó hwɛjijɔ e wú mǐ sixú j’awǎ é, ɖó mǐ nɔ xlɛ́ ɖɔ mǐ nɔ wa nǔ hú mɛ ɖěvo lɛ́, alǒ mǐ hú gǎn yě ǎ, é nyɔ́ wa ɔ, nǔníná mǐtɔn lɛ́ wɛ mǐ nɔ zán dó kpa susu nú Jexóva. w22.04 11-12 akpá. 7-9

Jezu yí wǎn nú Nǔwlánwlán mímɛ́ lɛ́, bɔ lěe nǔ nɔ cí n’i d’é wú é tɔ́n ɖo nǔɖɔɖayǐ e ɖo Ðɛhan 40:9 mɛ é mɛ; fínɛ́ ɖɔ: “Mawu ce, jlǒ towe wiwa nɔ víví nú mì, sɛ́n towe ɖo ayi ce mɛ ganjí.” Ðó Jezu yí wǎn nú Mawuxówéma ɔ wútu ɔ, é ɖ’awǎjijɛ, bo lɛ́ kpo ɖo Jexóva sɛn wɛ. Ényí mǐ nɔ xa Xó Mawu tɔn, bo kplɔ́n lobo yí wǎn ná ɔ, mǐ lɔmɔ̌ sixú ɖó awǎjijɛ, lobo lɛ́ kpo ɖo Jexóva sɛn wɛ. (Ðɛh. 1:1-3) Mi nú xó Jezu tɔn lɛ́ kpó kpɔ́ndéwú tɔn kpó ní d’alɔ mǐ, nú mǐ ní bló bónú Biblu xixa mǐtɔn ní kpɔ́n te d’é jí. Mǐ sixú nɔ xo ɖɛ, nɔ xa nǔ dɛ̌dɛ̌, nɔ kan nǔɖé lɛ́ byɔ́ mǐɖée, lobo nɔ lɛ́ sɔ́ kɛ́n nǔ kléwún kléwún ɖé lɛ́ tɔn dó bló bónú nukúnnúmɔjɛnǔmɛ e mǐ ɖó dó wěmafɔ Biblu tɔn lɛ́ wú é ná kpɔ́n te d’é jí. Mǐ sixú nɔ xwe sɔ dó gbéjé nǔ e mǐ nɔ xa lɛ́ é kpɔ́n kpó alɔdó wěma mǐtɔn lɛ́ tɔn kpó, dó xlɛ́ ɖɔ mǐ ɖó ayi te. Gɔ́ ná ɔ, ényí mǐ nɔ ɖó linlin e sɔgbe é hwenu e mǐ ɖo nǔ xa wɛ é ɔ, mǐ ná jó Xó Mawu tɔn dó bɔ é ná wa azɔ̌ ɖo mǐ wú. Ényí mǐ wa nǔ e wú mǐ kpé é bǐ bo nɔ bló nǔ énɛ́ lɛ́ ɔ, mǐ ná ɖu Biblu xixa mǐtɔn sín le hú gǎn, lobo ná lɛ́ sɛkpɔ́ Jexóva d’é jí.—Ðɛh. 119:17; Ja. 4:8. w23.02 13 akpá. 15-16

Nya nǔ tawun ɖé lě gbé énɛ́ gúdo hǔn, ɖe afɔ tawun tawun lɛ́ bá dó kpé wú. Nɛ̌ a ka sixú wa énɛ́ gbɔn? Mǐ ní ɖɔ ɖɔ a ba ná húzú nǔkplɔ́nmɛtɔ́ alɔsekpɛ́nnánɔ ɖé. A sixú kplɔ́n alɔnuwéma Ðǒ kan dó nǔxixa kpó mɛkplɔ́nkplɔ́n kpó wú ɔ kpó sɔxwixwe kpó. Ényí è ɖe azɔ̌ nú we ɖo kplé aklúnɔzángbla mɛ tɛ́ntin tɔn hwenu ɔ, a sixú byɔ́ nɔví súnnu e nɔ kplɔ́n nǔ mɛ ganjí é ɖé ɖɔ é ní kpɔ́n azɔ̌ towe xá we, bo ɖɔ lěe a sixú vɔ́ azɔ̌ wa ɖ’é wú gbɔn é nú we cóbɔ a ná wá xwlé mɛ ɖo kplé jí. È ɖe azɔ̌ nú we hǔn, nɔ yá wǔ sɔ́ nǔ ná dó mɛhwenu, énɛ́ ná zɔ́n bɔ mɛ lɛ́ ná mɔ ɖɔ a nɔ ɖó kan dó azɔ̌ e è ɖe nú we lɛ́ é wú, bo ná lɛ́ ɖeji dó wǔtu towe. (2 Kɔ. 8:22) Ényí nǔ e gbé nya wɛ a ɖe é wɛ nyí ɖɔ alɔ ní se kpɛ́n nú we tawun ɖo nǔ e wiwa tɔn nɔ vɛ́ wǔ nú we é ɖé kɔn ɔ, étɛ́ a ka sixú wa? Ma jó gbe ó! Timɔtée ka húzú xóɖɔtɔ́, alǒ nǔkplɔ́nmɛtɔ́ alɔsekpɛ́nnánɔ a? Biblu ɖɔ ǎ. Amɔ̌, é ɖo wɛn ɖɔ alɔ bí nú Timɔtée tawun ɖo azɔ̌ e kɔn è sɛ́ ɛ dó é mɛ, ɖó é xwedó wěɖexámɛ Pɔ́lu tɔn wútu.—2 Tim. 3:10. w22.04 24-25 akpá. 8-11

Étɛ́ gběkanlin ta tɛ́nwenɔ ɔ ka nyí? Mǐ ɖ’ayi wú ɖɔ kanlin énɛ́ cí kpɔ ɖɔhun, bɔ afɔ tɔn lɛ́ cí lɔnmɔ sín afɔ ɖɔhun, bɔ nu tɔn cí kinnikínní sín nu ɖɔhun, b’ɛ ɖó zo wǒ. Lěe gběkanlin ɛnɛ e xó è ɖɔ ɖo Daniyɛ́li wěmata tɛ́nwegɔ́ ɔ mɛ lɛ́ é cí é pɛ́ɛ́ nɛ́. Amɔ̌, ɖo wěma Nǔɖexlɛ́mɛ tɔn mɛ fí ɔ, gběkanlin ɖokpó géé wɛ ɖó nǔ énɛ́ lɛ́ bǐ, é nyí gběkanlin vovo ɛnɛ ǎ. Mɔ̌ mɛ ɔ, é nyí acɛkpikpa ɖokpó kpowun wɛ gběkanlin énɛ́ nɔ te ná ǎ. Jaan lɛ́ ɖɔ ɖɔ é ɖo acɛ kpa dó ‘akɔta lɛ́ bǐ, togun lɛ́ bǐ, gbe lɛ́ bǐ kpó to lɛ́ bǐ kpó nu’ wɛ. Énɛ́ wú ɔ, é ɖó ná ɖ’agbɔ̌n hú acɛkpikpa ɖěvo ɖěbǔ. (Nǔɖe. 13:7) Hǔn, acɛkpikpa ɖěɖěe kp’acɛ dó gbɛtɔ́ lɛ́ nu sín hwexónu káká jɛ din lɛ́ é wɛ gběkanlin énɛ́ ɖó ná nɔ te ná. (Nǔt. 8:9) Nǔ ɖěvo wɛ nyí ɖɔ hwɛhwɛ ɔ, nú è zán kɛ́n wǒ ɖo Biblu mɛ ɔ, nǔ e ɖo bǔte é wɛ é nɔ dó gesí. w22.05 9 akpá. 6

Mɛ̌ mɛ̌ e ka ná ɖu nǔ ɖaaɖagbe énɛ́ lɛ́ sín le? Mɛ wɔ̌búwɔ́bú ɖěɖěe ná xo Aamagedɔ́ni zlɛ́ lɛ́ é, gɔ́ nú vǐ ɖěɖěe yě sixú wá ji lɛ́ é wɛ ná ɖu nǔ énɛ́ lɛ́ sín le jɛ nukɔn. Amɔ̌, Nǔɖexlɛ́mɛ wěmata 20gɔ́ ɔ lɛ́ d’akpá ɖɔ mɛ e ko kú lɛ́ é ná fɔ́n sín kú. (Nǔɖe. 20:11-13.) “Nǔjlɔ́jlɔ́watɔ́ ” ɖěɖěe ko kú lɛ́ é, gɔ́ nú “nǔagɔwatɔ́” ɖěɖěe ali ma hun nú yě bɔ yě kplɔ́n nǔ dó Jexóva wú ǎ lɛ́ é ɔ, è ná fɔ́n yě bɔ yě ná lɛ́ wá nɔ gbɛ ɖo ayǐkúngban jí fí. (Mɛ. 24:15; Jaan 5:28, 29) Ðiɖɔ wɛ è ɖe ɖɔ è ná fɔ́n mɛ lɛ́ bǐ sín kú ɖo Axɔ́súɖuɖu xwe afatɔ́n tɔn ɔ hwenu a? Éǒ! È ná fɔ́n mɛ ɖěɖěe ali hun nú yě bɔ yě ná sɛn Jexóva, lobɔ yě ka gbɛ́ bǐ lɛ́ é sín kú ǎ. Ali ko hun nú yě wá yi, amɔ̌, yě xlɛ́ ɖɔ émí kún jɛxá bo ná nɔ gbɛ ɖo Palaɖísi mɛ ɖo ayǐkúngban jí ó.—Mat. 25:46; 2 Tɛ. 1:9; Nǔɖe. 17:8; 20:15. w22.05 18-19 akpá. 16-17

Jezu gbɔn “mɛsɛntɔ́ gbejínɔtɔ́ ayiɖotenánɔ” ɔ jí, bo ɖó tutoblónúnǔ jí wǔ ɖé ayǐ ɖo ayǐkúngban ɔ jí, bónú é ná jɛ hun dó lěe Mawu ba ɖɔ è ní sɛn émí gbɔn é jí. (Mat. 24:45) Nɛ̌ nǔ ka nɔ cí nú we dó tutoblónúnǔ énɛ́ wú? Vlafo lěe nǔ cí nú mɛsɛ́dó Piyɛ́ɛ e kan nǔ e ɖo tɛ́si égbé tɔn mɛ é byɔ́ Jezu é wɛ é ná ko cí nú hwi lɔ. Ényí mǐ ma ko mɔ tutoblónúnǔ Jexóva tɔn wɛ ǎ ɔ, fítɛ́ mǐ ka ná ɖe égbé? Gbɔn tutoblónúnǔ ɔ gblamɛ ɔ, Klísu nɔ tɛ́n kpɔ́n bɔ mǐ nɔ mɔ nǔ ɖu ganjí ɖo gbigbɔ lixo. É nɔ lɛ́ kplɔ́n azɔ̌ mǐ bónú mǐ ná wa sinsɛnzɔ́ mǐtɔn ganjí. Gɔ́ ná ɔ, é nɔ lɛ́ d’alɔ mǐ bónú mǐ ná sɔ́ “mɛ yɔ̌yɔ́ ɔ” dó bɔ nǔ mǐtɔn ná nɔ nyɔ́ Jexóva nukúnmɛ. (Efɛ́. 4:24) Jezu nɔ ɖe wě e nǔnywɛ́ kpé lɛ́ é xá mǐ ɖo hwenu vɛ́ wǔ lɛ́ mɛ. Ðagbe e wěɖexámɛ énɛ́ lɛ́ nɔ wa é jɛ wě hwenu e jɛmɛjí Covid-19 bɛ́ é. Hwenu e mɛ e ɖo gbɛ ɔ mɛ lɛ́ é gěgé ma tuun lěe yě ná wa nǔ gbɔn é ǎ é ɔ, Jezu nɔ tɛ́n kpɔ́n bɔ è nɔ ɖe wě e za wě lɛ́ é xá mǐ bónú mǐ ná dó kpo ɖo ayijayǐ mɛ. w22.07 12-13 akpá. 13-14

Jexóva byɔ́ Izlayɛ́li ví hwexónu tɔn lɛ́ ɖɔ yě ní nɔ kplɔ́n nǔ vǐ yětɔn lɛ́ dó émí wú hwɛhwɛ. (Sɛ́n. 6:6, 7) Ali gěgé wɛ hun nú mɛjitɔ́ énɛ́ lɛ́ ɖo kéze ɔ mɛ bɔ yě ná ɖɔ xó ɖó kpɔ́ xá vǐ yětɔn lɛ́, lobo lɛ́ dó wǎn yí nú Jexóva dó ayi yětɔn mɛ. Ði kpɔ́ndéwú ɔ, Izlayɛ́li ví súnnu e kpo ɖo wǐnnyáwínnyá mɛ é ɖé sixú zán hwenu gěgé dó d’alɔ tɔ́ tɔn, bɔ yě ná dó nǔkún alǒ ya nǔkún. Nɔví tɔn nyɔ̌nu sixú zán hwenu gěgé ɖo kéze ɔ mɛ dó d’alɔ Mamáa tɔn bɔ yě ná tɔ nǔ, lɔn avɔ, alǒ wa xwégbezɔ́ ɖěvo lɛ́. Mɛjitɔ́ lɛ́ kpó vǐ lɛ́ kpó ɖo azɔ̌ wa ɖó kpɔ́ wɛ ɔ, yě sixú ɖɔ xó dó nǔ tají gěgé jí. Ði kpɔ́ndéwú ɔ, yě sixú ɖɔ xó ɖó kpɔ́ dó lěe Jexóva nyɔ́ sɔ é jí, bo lɛ́ ɖɔ xó dó lěe é ɖo alɔ dó xwédo ɔ wɛ gbɔn é jí. Ðo to gěgé mɛ ɔ, mɛjitɔ́ lɛ́ kpó vǐ lɛ́ kpó sɔ́ sixú nɔ zán hwenu ɖó kpɔ́ ɖo kéze ɔ mɛ ǎ. Mɛjitɔ́ lɛ́ sixú yi azɔ̌ mɛ, bɔ vǐ lɛ́ sixú yi wěmaxɔmɛ. Énɛ́ wú ɔ, mɛjitɔ́ lɛ́ ɖó ná ba ali ɖěɖěe nu yě sixú ɖɔ xó xá vǐ yětɔn lɛ́ ɖe lɛ́ é.—Efɛ́. 5:15, 16. w22.05 28-29 akpá. 10-11

Hwɛ syɛ́nsyɛ́n lɛ́ huhu ɔ, afɔ tɛ sɛ́n Mawu tɔn lɛ́ jí ɖo ali e nylá tawun lɛ́ é nu wɛ nɔ nyí mɔ̌. Ényí klisánwun ɖé hu hwɛ mɔ̌hun ɔ, é ɖó ná xo ɖɛ sɛ́dó Jexóva Mawu dó byɔ́ hwɛsɔ́kɛ, lobo lɛ́ yi ɖɔ nú mɛxó agun tɔn lɛ́. (Ðɛh. 32:5; Ja. 5:14) Azɔ̌ tɛ́ mɛxó agun tɔn lɛ́ ka nɔ wa? Jexóva kɛ́ɖɛ́ wɛ ɖó acɛ bo nɔ sɔ́ hwɛ kɛ mɛ bǐ mlɛ́mlɛ́ gbɔn vɔ̌sísá gbɛxɔnúmɛ tɔn ɔ jí. Amɔ̌, Jexóva sɔ́ azɔ̌ d’así nú mɛxó agun tɔn lɛ́, énɛ́ wɛ nyí ɖɔ yě ná zán Biblu dó wá gbeta ɔ kɔn ɖɔ hwɛhutɔ́ ɔ sixú kpo ɖo agun ɔ mɛ alǒ gbɔ. (1 Kɔ. 5:12, 13) Bo ná dó kpé azɔ̌ énɛ́ wú ɔ, nǔ e yě nɔ wa lɛ́ é ɖokpó wɛ nyí ɖɔ yě nɔ ba xósin nú nǔkanbyɔ́ élɔ́ lɛ́: É ka tuun bo hu hwɛ ɔ wɛ a? Mɛ ɔ ka ko ɖo linlin wɛ bá wa nǔ nyanya ɖ’ayǐ wɛ a? Sín hwenu línlín ɖíe wɛ é ko ɖo hwɛ syɛ́nsyɛ́n ɔ hu wɛ a? Tají hú gǎn ɔ, kúnnuɖenú ɖé lɛ́ ka xlɛ́ ɖɔ é lɛ́ kɔ sín hwɛ tɔn lɛ́ gúdo nǔgbó a? Nǔɖé lɛ́ ka ɖe bo xlɛ́ ɖɔ Jexóva sɔ́ hwɛ kɛ ɛ a?—Mɛ. 3:19. w22.06 9 akpá. 4

Jezu dó wǔsyɛ́n lanmɛ nú ahwanvú tɔn lɛ́ ɖɔ yě ní nɔ nya nǔjlɔ́jlɔ́wiwa gbé. (Mat. 5:6) Énɛ́ sín tínmɛ wɛ nyí ɖɔ è ní ɖó jlǒ syɛ́nsyɛ́n bá wa nǔ e sɔgbe, nǔ e nyɔ́, bo lɛ́ mɛ́ ɖo Mawu nukúnmɛ é. A ka yí wǎn nú nǔgbóɖiɖɔ kpó nǔjlɔ́jlɔ́wiwa kpó a? Mǐ kán ɖ’é jí ɖɔ nǔ nyí mɔ̌. A gbɛ́ wǎn nú adingban kpó nǔ nyanya alɔkpa lɛ́ bǐ kpó. (Ðɛh. 119:128, 163) Ényí mɛɖé nɔ ɖó adingban hǔn, kpɔ́ndéwú Satáan e nyí gǎn gbɛ élɔ́ tɔn é tɔn xwedó wɛ é ɖe mɔ̌ nɛ́. (Jaan 8:44; 12:31) Nǔ e gbé nya wɛ Satáan ɖe é ɖokpó wɛ nyí ɖɔ é ní kɔn cí dó nyǐkɔ mímɛ́ Jexóva Mawu tɔn wú. Sín gǔ e è fɔ́n ɖo Edɛ́ni é hwenu ɖokpóo wɛ Satáan ko jɛ adingban fúnfún kpé dó Mawu wú jí. É nɔ tɛ́n kpɔ́n bo nɔ bló bɔ mɛ lɛ́ nɔ lin ɖɔ Jexóva ɔ, Acɛkpatɔ́ cejɛ́nnábínɔ e ma nɔ wa nǔ jlɔ́jlɔ́ ǎ, bo nɔ tɛ nǔ ɖagbe gbɛtɔ́ lɛ́ é wɛ é nyí. (Bǐb. 3:1, 4, 5) Adingban e Satáan ɖó dó Jexóva wú é zɔ́n bɔ mɛ lɛ́ kpo ɖo linlin masɔgbe ɖó dó wǔ tɔn wɛ káká jɛ égbé. Ényí mɛ lɛ́ wá gbeta ɔ kɔn bo ma ná “yí wǎn nú nǔgbóɖiɖɔ” ǎ ɔ, Satáan sixú sísɛ́ yě bɔ yě ná ɖ’alɔ ɖo nǔagɔwiwa kpó dǎkaxixo kpó alɔkpa bǐ mɛ.—Hlɔ̌. 1:25-31. w23.03 2-3 akpá. 3

Bóyá a ɖo gǎn dó wɛ syɛ́nsyɛ́n bá ɖó nǔ e a tuun ɖɔ é kún sɔgbe ó é ɖé wiwa te, amɔ̌, hweɖélɛ́nu ɔ, a sixú nɔ lɛ́ wa nǔ ɖokpó ɔ nyi do. Alǒ a sixú nɔ mɔ ɖɔ suúluɖíɖó hwe dó émí, bɔ akpɔ nɔ lɛ́ ɖó we, ɖó nǔ e gbé nya wɛ a ɖe é ko yá we ɖěbǔ ǎ wútu. Étɛ́ ka ná d’alɔ we bɔ a ná dɛ? Wǎn yí nú Jexóva wɛ. Wǎn e a yí nú Jexóva é ɔ, jijɔ ɖaaɖagbe ɖé wɛ; é wɛ nyí jijɔ ɖagbe hú gǎn e a ɖó é. (Nǔx. 3:3-6) Wǎnyíyí adodwé e a ɖó nú Mawu é sixú d’alɔ we bɔ a ná ɖí xwi xá gbɛ mɛ tagba lɛ́ bɔ é ná kpa we. Hwɛhwɛ wɛ Biblu nɔ ɖɔ xó dó xomɛ e wǎnyíyí nɔ sísɛ́ Jexóva bɔ é nɔ nyɔ́ dó mɛsɛntɔ́ tɔn lɛ́ wú é wú. Xomɛ e wǎnyíyí nɔ sísɛ́ Jexóva bɔ é nɔ nyɔ́ dó mɛsɛntɔ́ tɔn lɛ́ wú é sín tínmɛ wɛ nyí ɖɔ é kún ná jó mɛsɛntɔ́ tɔn lɛ́ dó gbeɖé ó, é kún ka ná gɔn wǎn yí nú yě gbeɖé ó. Akpajlɛ́ Mawu tɔn mɛ wɛ è dá we ɖó. (Bǐb. 1:26) Nɛ̌ a ka sixú ɖe wǎnyíyí mɔ̌hun xlɛ́ gbɔn? Nǔ e è wa nú we lɛ́ é ní nɔ su nukún towe mɛ. (1 Tɛ. 5:18) Nɔ kanbyɔ́ hwiɖée gbe bǐ gbe ɖɔ: ‘Nɛ̌ Jexóva ka xlɛ́ ɖɔ émí yí wǎn nú mì gbɔn?’ Énɛ́ gúdo hǔn, nɔ xo ɖɛ sɛ́dó Jexóva dó dó kú n’i, bo nɔ slɛ́ nǔ tawun tawun e é wa nú we lɛ́ é. Tuun ɖɔ nǔ énɛ́ lɛ́ e Jexóva wa nú hwiɖésúnɔ mɛtún ɔ lɛ́ é ɔ, wǎn e é yí nú we é wú wɛ. w23.03 12 akpá. 17-19

Jezu wa nǔ xá mɛsɛ́dó 12 lɛ́ bǐ kpó xomɛnyínyɔ́ kpó, kpódó wǎnyíyí kpán. Nǔkplɔ́nmɛ ɔ ɖíe: Nǔ tají ɔ nyí nǔ e mɛ ɖěvo lɛ́ wa é kɛ́ɖɛ́ ǎ, loɔ, lěe mǐ nɔ wa nǔ gbɔn hwenu e yě wa nǔ nyi do, alǒ ɖe afɔ gbɔ é lɔ ɖo tají. Ényí nǔɖitɔ́ hǎtɔ́ ɖé dó xomɛsin nú mǐ ɔ, mǐ sixú kan nǔ élɔ́ lɛ́ byɔ́ mǐɖée: ‘Aniwú nǔ e é wa é ka dó xomɛsin nú mì sɔmɔ̌? Gǎnmaɖó ce lɛ́ ɖě wɛ énɛ́ ɖe xlɛ́, bɔ un ɖó ná w’azɔ̌ ɖ’é wú a? Wǔvɛ́ ɖé ɖí xwi xá wɛ mɛ e dó xomɛsin nú mì é ka ɖe a? É ná bo tlɛ nyí ɖɔ un mɔ ɖɔ hwɛ ce wɛ jɔ wú wɛ xomɛ sin mì ɔ, un ka sixú ɖe wǎnyíyí xlɛ́, bo sɔ́ hwɛ kɛ mɛ ɔ kpowun a?’ Lě do mǐ nɔ wa nǔ xá mɛ ɖěvo lɛ́ kpó wǎnyíyí kpó sɔ é ɔ, mɔ̌ do wɛ mǐ nɔ xlɛ́ ɖɔ mǐ nyí ahwanvú Jezu tɔn nǔgbó lɛ́ sɔ. Kpɔ́ndéwú Jezu tɔn lɛ́vɔ́ kplɔ́n mǐ ɖɔ mǐ ɖó ná nɔ tɛ́n kpɔ́n bo mɔ nǔ jɛ ninɔmɛ nǔɖitɔ́ hǎtɔ́ mǐtɔn lɛ́ tɔn wú. (Nǔx. 20:5) Jezu sixú mɔ nǔ jɛ ayi mɛ ɖěvo lɛ́ tɔn mɛ. Mǐdɛɛ lɛ́ ka sixú ǎ. Amɔ̌, mǐ sixú nɔ ɖó suúlu dó nɔví mǐtɔn lɛ́ wú hwenu e yě dó xomɛsin nú mǐ é. (Efɛ́. 4:1, 2; 1 Pi. 3:8) Ényí mǐ kplɔ́n bo tuun ninɔmɛ e mɛ yě su ɖe é ɔ, mɔ̌ wiwa ná bɔ wǔ nú mǐ. w23.03 30 akpá. 14-16

Ényí ajijimɛnú e kúnkplá dotóoxwéxó é ɖé xá mǐ ɔ, Satáan sixú gbɔn yɛkan énɛ́ mɛ bá mɔ tɛn dó bló bónú mǐ ná gbɛ́ nǔ e mǐ ɖi nǔ ná lɛ́ é. Dotóo lɛ́, alǒ mɛ e ɖo xwédo mǐtɔn mɛ bo ma nyí nǔɖitɔ́ ǎ lɛ́ é sixú gbídí kɔ nú mǐ bónú mǐ ná yí gbe bá dó hun; mɔ̌ wiwa ka ná t’afɔ sɛ́n Mawu tɔn lɛ́ jí. Alǒ mɛɖé sixú tɛ́n kpɔ́n bo ná bló bɔ mǐ ná yí gbe nú nukúnkpédómɛwú ɖěvo e ma sɔgbe xá nǔgbódodó Biblu tɔn lɛ́ ǎ é. Mǐ nɔ ba ná kú ǎ có, mǐ ka tuun ɖɔ ényí mǐ ná bo tlɛ kú ɔ, Jexóva ná kpo ɖo wǎn yí nú mǐ wɛ. (Hlɔ̌. 8:37-39) Ényí xɔ́ntɔn Jexóva tɔn lɛ́ kú ɔ, é nɔ kpo ɖo yě flín wɛ, cí nǔ ɖɔ yě kpo ɖo gbɛ wɛ ɖɔhun. (Luk. 20:37) Akpakpa ɖo sísɔ́ ɛ wɛ b’ɛ ná fɔ́n yě. (Jɔb. 14:15) Axɔ́ ɖaxó wɛ Jexóva sú, bónú mǐ ná dó sixú “mɔ gbɛ mavɔmavɔ.” (Jaan 3:16) Mǐ tuun lě do Jexóva yí wǎn nú mǐ, lobo nɔ lɛ́ kpé nukún dó mǐ wú sɔ é. Énɛ́ wú ɔ, ényí mǐ ɖo azɔn jɛ wɛ, alǒ è gblɔ́n kúdán nú mǐ ɔ, mǐ nɔ jó Jexóva dó ǎ, é nyɔ́ wa ɔ, mǐ nɔ gán jɛ wǔ tɔn, bo nɔ tuun ɖɔ é ná dó gbɔ nú mǐ, ná nǔnywɛ́ mǐ, lobo lɛ́ ná hlɔ̌nhlɔ́n mǐ.—Ðɛh. 41:4. w22.06 18 akpá. 16-17

Biblu ɖɔ: ‘Sísí ɖó nú Jexóva wɛ nyí fí e nǔnywɛ́ bɛ́sín é; mɛ e tuun Mawu mɛ mímɛ́ ɔ, Mawu nɔ ná mɛ ɔ nukúnnúmɔjɛnǔmɛ.’ (Nǔx. 9:10) Énɛ́ wú ɔ, ényí mǐ ja gbeta tají ɖé kɔn wá gbé ɔ, mǐ ɖó ná bló bɔ gbeta e kɔn wá gbé wɛ mǐ ja é ná jínjɔ́n linlin Jexóva tɔn jí, énɛ́ wɛ nyí tuun e mǐ “tuun Mawu mɛ mímɛ́ ɔ” é jí. Mǐ sixú wa mɔ̌ gbɔn Biblu kpó wěma mǐtɔn lɛ́ kpó kplɔ́nkplɔ́n gblamɛ. Ényí mǐ nɔ wa mɔ̌ hǔn, nǔnywɛ́ jɔ nǔnywɛ́ ɔ ɖe xlɛ́ wɛ mǐ ɖe nɛ́. (Nǔx. 2:5-7) Jexóva ɖokpónɔ jɛ́n sixú ná nǔnywɛ́ jɔ nǔnywɛ́ mǐ. (Hlɔ̌. 16:27) Aniwú Jexóva ka nyí Jɔtɛn nǔnywɛ́ tɔn? Nukɔntɔn, ɖó é wɛ nyí Gbɛɖótɔ́ ɔ wútu ɔ, é tuun nǔ bǐ dó nǔ e é dá lɛ́ é wú. (Ðɛh. 104:24) Wegɔ́, nǔ e Jexóva dá lɛ́ é bǐ nɔ xlɛ́ ɖɔ é nyɔ́nǔi. (Hlɔ̌. 11:33) Atɔngɔ́, wěɖexámɛ Jexóva tɔn e nǔnywɛ́ nɔ kpé lɛ́ é nɔ hɛn le wá nú mɛ ɖěɖěe nɔ xwedó lɛ́ é hwebǐnu. (Nǔx. 2:10-12) Ényí mǐ ba ná ɖó nǔnywɛ́ jɔ nǔnywɛ́ ɔ, mǐ ɖó ná yí gbe nú nǔkplɔ́nmɛ nukɔn nukɔntɔn énɛ́ lɛ́, lobo ná tɛn yě bónú yě ná nɔ xlɛ́ ali gbeta e kɔn mǐ nɔ wá lɛ́ é kpó nǔwiwa mǐtɔn lɛ́ kpó. w22.10 19 akpá. 3-4

Satáan ɖu ɖo ahwan e xó è ɖɔ ɖo Nǔɖexlɛ́mɛ wěmata 12gɔ́ ɔ mɛ é jí ǎ, bɔ è nya é kpó awǒvi tɔn lɛ́ kpó sɛ́ dó ayǐkúngban jí. Xomɛsin ɖaxó e jí Satáan ɖe é zɔ́n bɔ é ɖo dǎka xo gbɛtɔ́ lɛ́ wú wɛ; énɛ́ wú wɛ Biblu ɖɔ “heelú ayǐkúngban.” (Nǔɖe. 12:7-12) Le tɛ́ nǔɖɔɖayǐ énɛ́ lɛ́ ka sixú hɛn wá nú mǐ? Nǔ ɖěɖěe ɖo jijɛ wɛ ɖo gbɛ ɔ mɛ lɛ́ é kpó hǔzúhúzú tají e byɔ́ lěe gbɛtɔ́ lɛ́ nɔ wa nǔ gbɔn é mɛ é kpó ná d’alɔ mǐ, bɔ mǐ ná mɔ nǔ jɛ mɛ ɖɔ Jezu jɛ acɛ kpa jí. Énɛ́ wú ɔ, ényí mǐ mɔ bónú mɛ lɛ́ nɔ wa nǔ kpó cejɛ́nnábí kpó, lobo nɔ lɛ́ xo dǎka ɔ, xomɛ sɔ́ nɔ sin mǐ ǎ, é nyɔ́ wa ɔ, mǐ nɔ flín ɖɔ nǔɖɔɖayǐ Biblu tɔn ɖé wɛ ɖo jijɛnu wɛ gbɔn lěe wa nǔ gbɔn wɛ yě ɖe é gblamɛ. Axɔ́súɖuto ɔ ko jɔ! (Ðɛh. 37:1) Gɔ́ ná ɔ, din e Aamagedɔ́ni ko lɛ́ ɖo sisɛkpɔ́ wɛ hú gǎn é ɔ, mǐ sixú ɖó nukún ɖɔ wǔvɛ́ lɛ́ ná lɛ́ jɛjí ɖo gbɛ ɔ mɛ. (Mak. 13:8; 2 Tim. 3:13) É su nukún mǐtɔn mɛ tawun ɖɔ Tɔ́ mǐtɔn jǐxwé tɔn wǎnyíyínɔ ɔ d’alɔ mǐ, bɔ mǐ mɔ nǔ jɛ nǔ e wú wǔvɛ́ sukpɔ́ ɖo gbɛ ɔ mɛ sɔmɔ̌ é wú. w22.07 3-4 akpá. 7-8

Mǐ sixú byɔ́ Jexóva ɖɔ é ní d’alɔ nǔɖitɔ́ hǎtɔ́ mǐtɔn lɛ́ bónú yě ná dɛ ɖo azɔn, adla j’ayǐ, tohwan, yadónúmɛ alǒ wǔvɛ́ ɖěvo lɛ́ nu. Mǐ sixú lɛ́ xo ɖɛ dó nɔví mǐtɔn e nɔ w’azɔ̌ syɛ́nsyɛ́n bo ná dó hɛn sɔ mɛ e ɖo hudó mɛ lɛ́ é takúnmɛ. Hwiɖésúnɔ sixú tuun mɛ ɖěɖěe ɖo xwi ɖí xá wǔvɛ́ mɔ̌hun wɛ é ɖé lɛ́. Nɔ ylɔ́ nyǐkɔ yětɔn lɛ́ ɖo ɖɛ towe lɛ́ mɛ. Ényí mǐ nɔ byɔ́ Jexóva ɖɔ é ní d’alɔ yě bónú yě ní dɛ hǔn, wǎnyíyí jɔ wǎnyíyí nɔví nɔví tɔn ɔ ɖe xlɛ́ wɛ mǐ ɖe nɛ́. Ényí mǐ nɔ xo ɖɛ dó nɔví ɖěɖěe nɔ w’azɔ̌ syɛ́nsyɛ́n ɖo agun ɔ mɛ lɛ́ é takúnmɛ ɔ, é nɔ víví nú yě bɔ yě nɔ lɛ́ ɖu le tɔn. Mɛsɛ́dó Pɔ́lu tuun ɖɔ émí ɖó ɖɛ mɛ ɖěvo lɛ́ tɔn sín hudó. É wlán ɖɔ: “Mi nɔ xo ɖɛ dó ta nyi lɔ tɔn mɛ, bónú Mawu ní nɔ ná mì xó e sɔgbe é, hwenu e un hun nu bo ja xó ɖɔ gbé é. Énɛ́ ɔ, un ná sixú kpé wú bo nɔ ɖɔ xó kpó adɔgbígbó kpó, hwenu e un ɖo nǔbúdo Mawu tɔn e kúnkplá wɛn ɖagbe ɔ é xó ɖɔ wɛ é.” (Efɛ́. 6:19) Égbé ɖésú ɔ, mǐ ɖó nɔví súnnu azɔ̌syɛ́nsyɛ́nwatɔ́ e nɔ kpé nukún dó nǔ lɛ́ wú é gěgé. Ényí mǐ nɔ byɔ́ Jexóva ɖɔ é ní kɔn nyɔ̌ná dó azɔ̌ yětɔn lɛ́ jí hǔn, wǎnyíyí ɖe xlɛ́ yě wɛ mǐ ɖe nɛ́. w22.07 23-24 akpá. 14-16

Sɔ́ja ɖé nɔ xwe gangbakún dó cyɔ́n alɔ ta tɔn jí. Ðo ahwan gbigbɔ tɔn e fun wɛ mǐ ɖe é mɛ ɔ, mǐ ɖó ná cyɔ́n alɔ ayi mǐtɔn jí bónú Satáan ma wá wa nǔ d’é wú ó. É nɔ zán nǔ tɛnmɛ tɛnmɛ lɛ́ dó tɛ́n mǐ kpɔ́n, lobo nɔ lɛ́ zán wlɛnwín vovo lɛ́ dó wa nǔ dó linlin mǐtɔn wú. Lěe gangbakún nɔ cyɔ́n alɔ ta sɔ́ja ɖé tɔn jí gbɔn é ɔ, nukúnɖíɖó mǐtɔn nɔ cyɔ́n alɔ linlin mǐtɔn jí bónú mǐ ná dó sixú kpo ɖo gbejí nɔ nú Jexóva wɛ. Ényí nukúnɖíɖó mǐtɔn ɖe kpo, bɔ mǐ jó linlin agbaza tɔn lɛ́ dó bɔ yě jɛ ayi mǐtɔn mɛ byɔ́ jí ɔ, énɛ́ sixú zɔ́n bɔ ayi mǐtɔn ná gosín nukúnɖíɖó gbɛ mavɔmavɔ tɔn mǐtɔn jí. Ð’ayi kpɔ́ndéwú klisánwun e nɔ gbɛ ɖo Kɔlɛ́nti ɖo hwexónu é ɖé lɛ́ tɔn wú. Yě sɔ́ ɖi nǔ nú nukúnɖíɖó fínfɔ́n sín kú tɔn e nyí akpá tají e Mawu dó lɛ́ é ɖokpó é ǎ. (1 Kɔ. 15:12) Pɔ́lu wlán ɖɔ mɛ ɖěɖěe ma ɖi nǔ nú fínfɔ́n sín kú ǎ lɛ́ é nɔ sú jlǒ yěɖésúnɔ tɔn lɛ́ sín do. (1 Kɔ. 15:32) Égbé ɔ, mɛ ɖěɖěe ma nɔ ɖeji dó akpá Mawu tɔn lɛ́ wú ǎ lɛ́ é gěgé nɔ gbɔ jlǒ ɖěbǔ e yě ɖó é. Amɔ̌ mǐdɛɛ lɛ́ gbɔn vo, ɖó mǐ ɖeji dó akpá e Mawu dó dó sɔgúdo wú lɛ́ é wú. w22.10 25-26 akpá. 8-9

Jexóva byɔ́ we ɖɔ hwi ní nɔ xo ɖɛ sɛ́dó émí. É nɔ mɔ wǔvɛ́ e ɖí xwi xá wɛ a ɖe lɛ́ é, bo ná we gǎnjɛwú ɖɔ émí ná nɔ ɖótó ɖɛ towe lɛ́ hwelɛ́bǐnu. Xomɛ nɔ hun i dó tó ɖíɖó mɛsɛntɔ́ tɔn lɛ́ wú. (Nǔx. 15:8) Ényí a nɔ mɔ ɖɔ émí ɖo émíɖokpó ɔ, étɛ́ lɛ́ takúnmɛ a ka sixú nɔ xo ɖɛ dó? Nɔ ɖɔ lěe nǔ cí nú we é nú Jexóva. (Ðɛh. 62:9) Nɔ ɖɔ nǔ e ɖo adohu adohu ɖó nú we wɛ lɛ́ é kpó lěe nǔ nɔ cí nú we dó yě wú é kpó n’i. Nɔ byɔ́ Jexóva ɖɔ é ní d’alɔ we bónú a ná tuun nǔ e a ná wa hwenu e a mɔ ɖɔ a ɖo hwiɖokpó, alǒ wǔ kú we é bónú é ní ná we akɔ́nkpinkpan e sín hudó a ɖó bo ná ɖɔ xó é. A tlɛ sixú lɛ́ byɔ́ ɛ nǔnywɛ́ bo ná dó tínmɛ nǔ e a ɖi nǔ ná lɛ́ é kpó nǔnywɛ́ kpó. (Luk. 21:14, 15) Ényí a ɖo xwi ɖí xá linlin masɔgbe lɛ́ wɛ hǔn, byɔ̌ Jexóva ɖɔ é ní d’alɔ we bónú a ní ɖɔ xó xá klisánwun e zin é ɖé. A sixú byɔ́ Jexóva ɖɔ é ní d’alɔ mɛ e ɖɔ xó ná gbé wɛ a ja é bónú é ní ɖótó we bo mɔ nǔ jɛ lěe nǔ cí nú we é mɛ. Nɔ ɖó ayi lěe é nɔ ná xósin nú ɖɛ towe lɛ́ gbɔn é wú, lobo nɔ lɛ́ yí gbe nú alɔdó mɛ ɖěvo lɛ́ tɔn, énɛ́ ɔ, a sɔ́ ná nɔ mɔ ɖɔ émí ɖo émíɖokpó dín ǎ. w22.08 10 akpá. 6

Agun yɔ̌yɔ́ Tɛsaloníki tɔn ɔ, è klán gbe xá ɛ syɛ́nsyɛ́n. Gbeklánxámɛtɔ́ yɛmɛnúwatɔ́ énɛ́ lɛ́ dɔn “nɔví ɖé lɛ́ . . . yi gǎn toxo ɔ tɔn lɛ́ nukɔn.” (Mɛ. 17:6) Dǒ nukún lěe klisánwun yɔ̌yɔ́ énɛ́ lɛ́ sín ayi ná ko gba dó sɔ é mɛ kpɔ́n! Kan e yě nɔ ɖó dó Jexóva sinsɛn wú é sixú ko ɖe kpo, amɔ̌, mɛsɛ́dó Pɔ́lu ba ɖɔ nǔ ní nyí mɔ̌ nú yě ǎ. É bló tuto bónú è ná kpé nukún dó agun yɔ̌yɔ́ énɛ́ wú ganjí. Pɔ́lu flín Tɛsaloníkinu lɛ́ ɖɔ: Mǐ “sɛ́ nɔví mǐtɔn Timɔtée dó . . . bónú é ná wá ɖɔ xó dó ná lǐnsyɛ́nsyɛ́n kpó akɔ́nkpinkpan kpó mi, ɖo nǔɖiɖi mitɔn mɛ; bónú mi ma jó miɖée dó nú ya e ji wɛ mǐ ɖe ɔ ní dán mɛ ɖokpó ɖo mi mɛ ó.” (1 Tɛ. 3:2, 3) Timɔtée ko mɔ lěe Pɔ́lu dó wǔsyɛ́n lanmɛ nú nɔví lɛ́ gbɔn ɖo Lisítli é. Ðó Timɔtée ko mɔ lěe Jexóva kpé nukún dó nɔví lɛ́ wú ɖo dɔ̌n gbɔn é wútu ɔ, é sixú ná gǎnjɛwú nɔví súnnu kpó nɔví nyɔ̌nu kpó tɔn lɛ́ ɖɔ nǔ lɛ́ bǐ ná yi ganjí nú yě lɔ.—Mɛ. 14:8, 19-22; Ebl. 12:2. w22.08 21 akpá. 4

Ðo 1870 ɔ, gbɛ̌ta Biblu kplɔ́ntɔ́ lɛ́ tɔn e Charles Taze Russell ɖo nukɔn ná é jɛ Biblu kplɔ́n jí dó nǔjɔnǔ mɛ. Yě jló ná tuun nǔgbó ɔ dó lě do vɔ̌sísá Jezu tɔn xɔ akwɛ́ sɔ é kpó lěe yě ná nɔ flín kú tɔn gbɔn é kpó wú. Égbé ɔ, mǐ nɔ ɖu le nǔ e ko kplɔ́n lɛ́ é tɔn. Gbɔn nɛ̌ é? Mǐ mɔ nǔ jɛ nǔ e vɔ̌sísá Jezu tɔn nyí é, gɔ́ nú nǔ e é ná wa nú mǐ kpó gbɛtɔ́ lɛ́ bǐ kpó é wú. (1 Jaan 2:1, 2) Mǐ lɛ́ kplɔ́n ɖɔ nukúnɖíɖó we wɛ Mawu sɔ́ ɖó te nú mɛ ɖěɖěe sín nǔ nɔ nyɔ́ nukún tɔn mɛ lɛ́ é bɔ Biblu ɖɔ; yě wɛ nyí gbɛ jɔmakú ɖo jǐxwé nú mɛɖé lɛ́ kpó gbɛ mavɔmavɔ ɖo ayǐkúngban jí nú mɛ ɖěvo lɛ́ kpó. Ényí mǐ nɔ lin tamɛ dó lě do Jexóva yí wǎn nú mǐ sɔ é kpó lě do mǐ mɛ ɖokpó ɖokpó nɔ ɖu le vɔ̌ e Jezu sá dó ta mǐtɔn mɛ é tɔn gbɔn é kpó jí ɔ, mǐ nɔ lɛ́ sɛkpɔ́ Jexóva d’é jí. (1 Pi. 3:18) Énɛ́ wú ɔ, klisánwun gbejínɔtɔ́ hwexónu tɔn lɛ́ ɖɔhun ɔ, mǐ nɔ ylɔ́ mɛ ɖěvo lɛ́ ɖɔ yě ní wá gɔ́ nú mǐ ɖo kú Klísu tɔn flínflín domɛ, bónú mǐ ná bló nǔwiwa ɔ lěe Jezu ɖe gbe tɔn nú ahwanvú tɔn lɛ́ gbɔn é. w23.01 21-22 akpá. 6-7

Jezu kplɔ́n nǔ mɛ lɛ́ dó nyɔ̌ná e Axɔ́súɖuto Mawu tɔn ná hɛn wá lɛ́ é wú. Gbɛxixɔ ɔ nɔ su nukún mǐtɔn mɛ, ɖó é hun ali nú mǐ bɔ mǐ nɔ ɖu vǐví xɔ́ntɔn vívɛ́ zunzun xá Jexóva kpó Jezu kpó tɔn. Mɛ e ɖi nǔ nú Jezu lɛ́ é lɛ́ ɖó nukúnɖíɖó ɔ bo ná nɔ gbɛ káká sɔ́yi, lobo lɛ́ mɔ mɛ vívɛ́ná yětɔn e ko kú lɛ́ é bɔ yě ná fɔ́n wá gbɛ. (Jaan 5:28, 29; Hlɔ̌. 6:23) Mǐ wa nǔ ɖěbǔ bo dó jɛxá nyɔ̌ná énɛ́ lɛ́ ǎ. Mǐ ka sixú lɛ́ wa nǔɖé bo sú nǔ e Mawu kpó Klísu kpó wa nú mǐ é sín axɔ́ yě gbeɖé ǎ. (Hlɔ̌. 5:8, 20, 21) Amɔ̌, mǐ sixú ɖe lě do nǔ e yě wa nú mǐ é su nukún mǐtɔn mɛ sɔ é xlɛ́ yě. Gbɔn nɛ̌ é? Gbɔn akwɛ́ mǐtɔn zínzán dó nɔ gǔdo nú nukɔnyiyi azɔ̌ Axɔ́súɖuto ɔ tɔn gblamɛ. Ði kpɔ́ndéwú ɔ, mǐ sixú zé mǐɖée jó bo d’alɔ bɔ è ná gbá xɔ e mɛ mǐ nɔ sɛn Mawu ɖe lɛ́ é, bo lɛ́ hɛn yě ɖó mǐmɛ́ jí. w23.01 26-28 akpá. 3, 5

Mɛ ɖěɖěe ɖo acɛ kpa wɛ ɖo Axɔ́súɖuto Mawu tɔn mɛ lɛ́ é ná d’alɔ bɔ è ná kpé nukún dó gbɛtɔ́ lǐva mɔ̌kpán wú gbɔn gbɛ ɔ bǐ mɛ. Jezu ɖɔhun ɔ, mɛ 144000 lɛ́ ná nyí axɔ́sú kpó vɔ̌sánúxwlémawutɔ́ kpó. (Nǔɖe. 5:10) Ðo Mɔyízisɛ́n ɔ glɔ́ ɔ, vɔ̌sánúxwlémawutɔ́ lɛ́ wɛ nyí mɛ nukɔntɔn e nɔ d’alɔ togun ɔ bɔ é nɔ nɔ ganjí ɖo agbaza mɛ, bo nɔ lɛ́ sɛkpɔ́ Jexóva é. ‘Yɛ nǔ ɖagbe e jawě lɛ́ tɔn’ wɛ Sɛ́n ɔ nyí, énɛ́ wú ɔ, é sɔgbe ɖɔ è ní wá gbeta ɔ kɔn ɖɔ mɛ e ná kp’acɛ xá Jezu lɛ́ é ná d’alɔ togun Mawu tɔn bɔ é ná nɔ ganjí ɖo agbaza mɛ, lobo lɛ́ sɛkpɔ́ Jexóva. (Ebl. 10:1) Din hwɛ̌ ɔ, mǐ tuun lěe mɛ énɛ́ lɛ́ e ná nyí axɔ́sú kpó vɔ̌sánúxwlémawutɔ́ kpó lɛ́ é ná ɖɔ xó xá toví Axɔ́súɖuto ɔ tɔn e ɖo ayǐkúngban jí lɛ́ é gbɔn é ǎ. Mǐ sixú ɖeji ɖɔ ɖo palaɖísi e ja é mɛ ɔ, è ná xlɛ́ ali e sín hudó mɛ ɖěɖěe ɖo ayǐkúngban ɔ jí lɛ́ é ná ɖó é yě.—Nǔɖe. 21:3, 4. w22.12 11 akpá. 11-13

Hwɛjijɔ e wú mǐ nɔ ylɔ́ mɛ ɖěvo lɛ́ wá kú Klísu tɔn flínflín domɛ é ɖokpó wɛ nyí ɖɔ, mǐ ba ɖɔ mɛ ɖěvo e ná wá do tɔn mɛ lɛ́ é ní kplɔ́n nǔ dó nǔ e Jexóva kpó Jezu kpó wa nú mǐ bǐ lɛ́ é wú. (Jaan 3:16) Mǐ nɔ ɖó nukún ɖɔ nǔ e yě ná mɔ, bo se ɖo kú Klísu tɔn flínflín domɛ lɛ́ é ná sísɛ́ yě bɔ yě ná kplɔ́n nǔ d’é jí bo húzú mɛsɛntɔ́ Jexóva tɔn lɛ́. Mǐ nɔ lɛ́ ylɔ́ mɛ ɖěɖěe ko sɛn Jexóva kpɔ́n, bo ma ka sɔ́ ɖo mɔ̌ wa wɛ din ǎ lɛ́ é. Mǐ nɔ wa mɔ̌ dó flín yě ɖɔ Mawu kpo ɖo wǎn yí nú yě wɛ. Yě mɛ gěgé nɔ yí gbe nú ylɔ̌ e mǐ ylɔ́ yě é, bɔ awǎjijɛ mǐtɔn nɔ túnflá hwenu e mǐ mɔ yě é. Kú Klísu tɔn flínflín domɛ wíwá nɔ flín yě lě do yě ko ɖu vǐví Jexóva sinsɛn tɔn gbɔn wá yi é. (Ðɛh. 103:1-4) Ényí mɛ lɛ́ yí gbe nú ylɔ̌ e ylɔ́ yě wɛ mǐ ɖe é kpó yě gbɔ kpó ɔ, mǐ nɔ wa nǔ e wú mǐ kpé é bǐ dó ylɔ́ yě wá kú Klísu tɔn flínflín domɛ, ɖó mǐ tuun ɖɔ nǔ mɛ e wá lɛ́ é ɖokpó ɖokpó tɔn wɛ nɔ ɖu ayi mɛ nnú Jexóva.—Luk. 15:7; 1 Tim. 2:3, 4. w23.01 20 akpá. 1; 22-23 akpá. 9-11

Ðo zǎn e jɛ nukɔn nú kú Jezu tɔn é mɛ ɔ, é byɔ́ nǔ tají ɖé Tɔ́ tɔn jǐxwé tɔn ɔ. É byɔ́ Jexóva ɖɔ é ní kpé nukún dó ahwanvú émítɔn lɛ́ wú. (Jaan 17:15, 20) Hwebǐnu wɛ nukún Jexóva tɔn nɔ ɖo togun tɔn jí, énɛ́ wɛ nyí ɖɔ é nɔ kpé nukún dó wǔ tɔn, bo nɔ lɛ́ cyɔ́n alɔ jǐ tɔn. É ɖo mɔ̌ có, Jezu tuun ɖɔ gbe e Satáan ná klán xá ahwanvú émítɔn lɛ́ é ɔ, é kún ko klán mɔ̌hun xá yě kpɔ́n ó. Jezu lɛ́ tuun ɖɔ yě ná ɖó alɔdó Jexóva tɔn sín hudó, bo ná dó gbí dɔn ɖo ahwantɔ́nmɛ Awǒvi tɔn lɛ́ nukɔn. Gbɛ élɔ́ e nu kp’acɛ dó wɛ Satáan ɖe é nɔ dɔn wǔvɛ́ gěgé wá nú klisánwun nǔgbó lɛ́ ɖo égbé. Mǐ nɔ mɔ wǔvɛ́ ɖěɖěe sixú kú awakanmɛ nú mǐ, bo tlɛ sixú tɛ́n gbejí e mǐ ɖe nú Jexóva é kpɔ́n lɛ́ é. Amɔ̌, mǐ ɖó ná ɖi xɛsi nú nǔ ɖěbǔ ǎ. Nukún Jexóva tɔn ɖo mǐ jí, énɛ́ wɛ nyí ɖɔ é nɔ mɔ wǔvɛ́ e ɖí xwi xá wɛ mǐ ɖe lɛ́ é, bo ɖo gbesisɔmɛ bo ná d’alɔ mǐ bɔ mǐ ná ɖí xwi xá yě. Nǔgbó ɔ, Jexóva “sín nukún nɔ ɖo mɛ e nɔ nɔ gbejí n’i lɛ́ jí.”—Ðɛh. 33:18-20. w22.08 8 akpá. 1-2

Xwe ɖokpó ɖokpó mɛ ɖo kú Klísu tɔn flínflín sín táan mɛ ɔ, mǐ nɔ lin tamɛ dó ɖagbe e kú Jezu tɔn wa nú gbɛtɔ́ lɛ́ é jí, lobo nɔ xo ɖɛ dó takún tɔn mɛ dó xlɛ́ ɖɔ é su nukún mǐtɔn mɛ. Mǐ nɔ lɛ́ ylɔ́ mɛ gěgé lěe mǐ kpé wú gbɔn é bónú yě ní wá gɔ́ nú mǐ ɖo nǔwiwa bǔnɔ énɛ́ domɛ. Gɔ́ ná ɔ, mǐ kán ɖ’é jí, bo ná lɔn nú nǔ ɖěbǔ ná glɔ́n ali nú mǐ bónú mǐ ná gɔn kú Klísu tɔn flínflín domɛ yi ǎ. Ðo kú Klísu tɔn flínflín domɛ ɔ, mǐ nɔ kplɔ́n nǔ dó nǔ e wú gbɛtɔ́ lɛ́ ɖó hudó gbɛxixɔ ɔ tɔn é kpó lěe kú mɛ ɖokpó tɔn sixú xɔ mɛ gěgé sín hwɛ mɛ gbɔn é kpó wú. È nɔ flín nǔ mǐ dó nǔ e wɔ̌xúxú ɔ kpó vɛ̌ɛn ɔ kpó nɔ te ná é wú, bo nɔ lɛ́ flín nǔ mǐ dó mɛ ɖěɖěe ná ɖu wɔ̌xúxú ɔ, bo lɛ́ nu vɛ̌ɛn ɔ é wú. (Luk. 22:19, 20.) Gɔ́ ná ɔ, mǐ nɔ lin tamɛ dó nyɔ̌ná ɖěɖěe ɖo te kpɔ́n mɛ ɖěɖěe ɖo nukún ɖó wɛ bo ná nɔ gbɛ káká sɔ́yi ɖo ayǐkúngban jí lɛ́ é wú. (Eza. 35:5, 6; 65:17, 21-23) Nǔgbó énɛ́ lɛ́ ɖó ná nɔ su nukún mǐtɔn mɛ. w23.01 20-21 akpá. 2, 4

Sɛ́ e Mawu sɛ́ Vǐ tɔn dó, bɔ é wá sɔ́ gbɛ tɔn jó dó hwɛ mǐtɔn lɛ́ tamɛ é zɔ́n bɔ mǐ sixú nɔ gbɛ káká sɔ́yi. (Mat. 20:28) Mɛsɛ́dó Pɔ́lu wlán ɖɔ: “Ðó lěe kú gbɔn gbɛtɔ́ ɖokpó jí wá ɔ, mɔ̌ jɛ́n fínfɔ́n sín kú mɛkúkú lɛ́ tɔn gbɔn gbɛtɔ́ ɖokpó jí wá é nɛ́. Lěe gbɛtɔ́ bǐ nɔ kú ɖó bǔ e yě ɖe xá Adámu ɔ wútu ɔ, mɔ̌ ɖokpó ɔ, mɛ e ɖo bǔ xá Klísu lɛ́ bǐ ɔ, Mawu ná fɔ́n yě sín kú.” (1 Kɔ. 15:21, 22) Jezu kplɔ́n ahwanvú tɔn lɛ́ ɖɔ yě ní nɔ xo ɖɛ ɖɔ Axɔ́súɖuto Mawu tɔn ní wá, bónú jlǒ Mawu tɔn ní nyí wiwa ɖo ayǐkúngban jí. (Mat. 6:9, 10) Gbɛ ninɔ káká sɔ́yi ɖo ayǐkúngban jí nyí linlin e Mawu ɖó nú gbɛtɔ́ lɛ́ é sín akpáxwé ɖokpó. Bo ná dó kpé énɛ́ wú ɔ, Jexóva sɔ́ Vǐ súnnu tɔn bɔ é nyí Axɔ́sú nú Axɔ́súɖuto Mɛsíya ɔ tɔn. Mawu xo mɛ 144000 kplé sín ayǐkúngban jí, bɔ yě ná w’azɔ̌ xá Jezu bónú linlin Mawu tɔn ní dó jɛnu.—Nǔɖe. 5:9, 10. w22.12 5 akpá. 11-12

Ényí mɛ e mǐ yí wǎn ná é ɖé kú ɔ, mǐ nɔ jɛ do tɔn tawun! Ðo bǐbɛ́mɛ ɔ, mǐ nɔ se wǔvɛ́ tawun, ɖo tají ɔ, ényí é se wǔvɛ́ cóbó kú ɔ nɛ́. Amɔ̌, ényí hwenu ɖo yiyi wɛ bɔ mǐ lin tamɛ dó nǔ e é kplɔ́n mǐ alǒ wa, kabǐ ɖɔ dó dó wǔsyɛ́n lanmɛ nú mǐ, abǐ dó dó nǔkiko nú mǐ é ɖé jí ɔ, mǐ nɔ lɛ́ jɛ awǎjijɛ ɖó jí. Ðo ali ɖokpó ɔ nu ɔ, ényí mǐ xa nǔ dó wǔvɛ́ e Jezu mɔ é kpó kú tɔn kpó wú ɔ, wǔ nɔ kú mǐ. Ðo kú Klísu tɔn flínflín sín hwenu ɔ, mǐ nɔ ɖe hwenu ɖó vo bo nɔ lin tamɛ dó lě do vɔ̌sísá tɔn xɔ akwɛ́ sɔ é jí. (1 Kɔ. 11:24, 25) Bɔ ényí mǐ lin tamɛ dó nǔ e Jezu ɖɔ kpó nǔ e é wa hwenu e é ɖo ayǐkúngban jí lɛ́ é kpó bǐ jí ɔ, mǐ nɔ ɖó awǎjijɛ tawun. Ényí mǐ lin tamɛ dó nǔ e wa wɛ é ɖe din é kpó nǔ e é ná wá wa ɖo sɔgúdo lɛ́ é kpó jí ɔ, é nɔ lɛ́ dó wǔsyɛ́n lanmɛ nú mǐ. w23.01 26 akpá. 1-2

Wǔ kú ahwanvú lɛ́ tawun hwenu e Jezu kú é. Xɔ́ntɔn vívɛ́ yětɔn kú. Énɛ́ kɛ́ɖɛ́ ka wɛ ǎ, é cí ɖɔ yě lɛ́ ba nukúnɖíɖó kpo ɖɔhun. (Luk. 24:17-21) Amɔ̌, hwenu e Jezu ɖe éɖée xlɛ́ yě é ɔ, é zán hwenu dó d’alɔ yě bɔ yě mɔ nǔ jɛ nǔ e é ɖó ná wa bɔ nǔɖɔɖayǐ Biblu tɔn lɛ́ ná jɛnu é mɛ. É lɛ́ sɔ́ azɔ̌ tají ɖé d’así nú yě bɔ yě ná wa. (Luk. 24:26, 27, 45-48) Ée Jezu yi jǐxwé gúdo é ɔ, aluwɛ ahwanvú lɛ́ tɔn húzú awǎjijɛ ɖaxó. Tuun e yě tuun ɖɔ gǎn émítɔn ɖo gbɛ, bo ɖo gbesisɔmɛ bo ná d’alɔ émí, bɔ émí ná wa azɔ̌ yɔ̌yɔ́ e é sɔ́ d’así nú émí é é d’awǎjijɛ nú yě. Awǎjijɛ e mɛ yě ɖe é zɔ́n bɔ yě kpa susu nú Jexóva, bɔ nǔ ɖěbǔ sixú ɖó énɛ́ te ǎ. (Luk. 24:52, 53; Mɛ. 5:42) Bo ná dó xwedó kpɔ́ndéwú ahwanvú Jezu tɔn lɛ́ tɔn ɔ, é byɔ́ ɖɔ mǐ ní sɔ́ Axɔ́súɖuto Mawu tɔn ɖó tɛn nukɔntɔn ɔ mɛ ɖo gbɛzán mǐtɔn mɛ. É nɔ byɔ́ didɛ cóbɔ è ná kpo ɖo Jexóva sɛn wɛ có, é d’akpá nú mǐ ɖɔ ényí mǐ wa mɔ̌ ɔ, émí ná kɔn nyɔ̌ná dó mǐ jí bɔ é ná túnflá.—Nǔx. 10:22. w23.01 30-31 akpá. 15-16

É ɖo wɛn ɖɔ mǐ kún jló ná wa nǔ ɖokpó ɔ nyi do Adámu kpó Ɛvu kpó ɖɔhun ó. Ényí mǐ kpo ɖo nǔ kplɔ́n dó Jexóva wú wɛ, bɔ jijɔ tɔn lɛ́ nɔ su nukún mǐtɔn mɛ, lobɔ mǐ lɛ́ ɖo tíntɛ́nkpɔ́n wɛ bá mɔ nǔ jɛ lěe é nɔ lin nǔ gbɔn é wú ɔ, mǐ sixú nyi alɔ nú afɔ ɖokpó ɔ ɖiɖe Adámu kpó Ɛvu kpó ɖɔhun. Ényí mǐ nɔ wa mɔ̌ ɔ, é ɖo wɛn ɖɔ wǎn e mǐ yí nú Jexóva é ná ɖo jijɛjí wɛ. Lin tamɛ dó kpɔ́ndéwú Ablaxámu tɔn jí. É yí wǎn nú Jexóva tawun. É ná bo tlɛ nyí hwenu e é vɛ́ wǔ nú Ablaxámu bɔ é ná mɔ nǔ jɛ gbeta e kɔn Jexóva nɔ wá lɛ́ é mɛ é ɔ, é fɔ́n gǔ ǎ. É nyɔ́ wa ɔ, é dó gǎn bo lɛ́ tuun Jexóva ganjí. Ði kpɔ́ndéwú ɔ, hwenu e Ablaxámu se gbeta e kɔn Jexóva wá ɖɔ émí ná sú kún dó nú Sodɔ́mu kpó Gomɔ́ɔ kpó é ɔ, xɛsi jɛ jǐ tɔn tlóló ɖɔ “hwɛɖɔtɔ́ gbɛ ɔ bǐ tɔn” ná sú kún dó nú mɛ ɖagbe kpó mɛ nyanya kpó wɛ a jí. Ðo Ablaxámu nukúnmɛ ɔ, nǔ mɔ̌hun sixú jɛ ǎ, énɛ́ wú ɔ, kpó mɛɖéesɔ́hwe kpó ɔ, é kan nǔ ɖěbɔdóɖěwú ɖé lɛ́ byɔ́ Jexóva. Jexóva ná ɛ xósin kpó suúlu kpó. Wǎgbɔ tɔn ɔ, Ablaxámu wá mɔ ɖɔ Jexóva nɔ mɔ nǔ jɛ ayi mɛ ɖokpó ɖokpó tɔn mɛ, bɔ É kún ná dɔn mɛ ɖagbe kpó mɛ nyanya kpó ɖó kpɔ́, bo dɔn tó ná ó.—Bǐb. 18:20-32. w22.08 28 akpá. 9-10

Ðo 455 J.H.M. tɔn hwenu e tokpɔngán Nɛɛmíi ko vɔ́ dǒ Jeluzalɛ́mu tɔn lɛ́ mɛ gúdo é ɔ, é ba súnnu ɖejidéwú ɖěɖěe ná kpé nukún dó toxo ɔ wú ganjí lɛ́ é. Nɛɛmíi cyán mɛɖé lɛ́ ɖo yě mɛ. Ananíya ahwangán ɔ ɖo yě mɛ. Nǔ e Biblu ɖɔ dó Ananíya wú é ɖíe: “Gbɛtɔ́ ɖejidéwú ɖé wɛ nyí nya énɛ́ ɔ, bo ɖo gbejí nú Mawu hú mɛ gěgé.” (Nɛɛ. 7:2) Wǎn e Ananíya yí nú Jexóva é kpó xɛsi e é nɔ ɖi ɖɔ émí kún ná jɛ do n’i ó é kpó nɔ sísɛ́ ɛ bɔ é nɔ wlíbo nú azɔ̌ ɖěbǔ e è sɔ́ d’así n’i é ganjí. Jijɔ énɛ́ lɛ́ ná d’alɔ mǐ lɔ bɔ mǐ ná nyí mɛ ɖejidéwú ɖo sinsɛnzɔ́ e wa nú Mawu wɛ mǐ ɖe é mɛ. Ð’ayi Ticíku e nyí azɔ̌gbɛ́ ɖejidéwú mɛsɛ́dó Pɔ́lu tɔn é sín kpɔ́ndéwú wú. Ticíku wú wɛ Pɔlu ɖeji dó. É ɖɔ dó wǔ tɔn ɖɔ é “nyí sinsɛnzɔ́watɔ́ gbejínɔtɔ́.” (Efɛ́. 6:21, 22) Pɔ́lu ɖeji ɖɔ Ticíku ná sɔ́ wěma e émí sɛ́dó nɔví e ɖo Efɛ́zi lɛ́ é kpó nɔví e ɖo Kolósi lɛ́ é kpó é yi jó nú yě, bo ná lɛ́ dó wǔsyɛ́n lanmɛ nú yě lobo lɛ́ dó gbɔ nú yě. Kpɔ́ndéwú Ticíku tɔn flín mǐ súnnu gbejínɔtɔ́ e nɔ kpé nukún dó hudó gbigbɔ tɔn mǐtɔn lɛ́ wú ɖo égbé lɛ́ é.—Koló. 4:7-9. w22.09 9-10 akpá. 5-6

Jozɛ́fu mɔ wǔvɛ́ syɛ́nsyɛ́n gěgé nú xwe 13 mɔ̌. Jozɛ́fu sixú ko kanbyɔ́ éɖée ɖɔ Jexóva ka yí wǎn nú émí dóó a jí. É sixú ko lɛ́ kanbyɔ́ éɖée ɖɔ Jexóva jó émí dó hwenu e émí ɖó hudó alɔdó tɔn é wɛ a jí. Amɔ̌, Jozɛ́fu hɛn mɛ dó xomɛ ǎ. É nyɔ́ wa ɔ, é ɖó suúlu dó xlɛ́ ɖɔ émí ɖo jlɛ̌ jí. Ée ali ɔ hun n’i bɔ é ná ba hlɔn nɔví tɔn lɛ́ wú é ɔ, é wa mɔ̌ ǎ, é nyɔ́ wa ɔ, é xlɛ́ ɖɔ émí yí wǎn nú yě, bo sɔ́ hwɛ kɛ yě. (Bǐb. 45:4, 5) Kpé e Jozɛ́fu kpé wú bo lin tamɛ ganjí é wɛ zɔ́n bɔ é wa nǔ gbɔn mɔ̌. É nɔ ɖo tamɛ lin dó wǔvɛ́ tɔn lɛ́ jí wɛ ǎ, loɔ, nǔ e Jexóva ba lɛ́ é jí wɛ é nɔ lin tamɛ dó. (Bǐb. 50:19-21) Étɛ́ énɛ́ ka kplɔ́n mǐ? Ényí è wa nǔ agɔ xá we hǔn, ma dó hwɛ Jexóva, alǒ nɔ kanbyɔ́ ɖɔ é jó émí dó wɛ a jí ó. É nyɔ́ wa hǔn, nɔ lin tamɛ dó lěe d’alɔ we gbɔn wɛ é ɖe, bɔ a ɖo didɛ ɖo tagba ɔ nu wɛ é jí. Gɔ́ ná ɔ, ényí mɛ ɖěvo lɛ́ wa nǔ agɔ xá we hǔn, tɛ́n kpɔ́n bónú wǎn e a yí nú yě é ní cyɔ́n nǔ dó nǔwanyido yětɔn lɛ́. w22.11 21 akpá. 4

Gbeyíɖɔ Daniyɛ́li mɔ nǔmimɔ ɖé, b’ɛ xlɛ́ nyi wɛn ɖɔ Jexóva ɖó acɛ hú acɛkpatɔ́ lɛ́ bǐ. Gběkanlin ɖaxó ɛnɛ wɛ Daniyɛ́li mɔ jɛ nukɔn, bɔ yě nɔ te nú acɛkpikpa e ɖ’agbɔ̌n hú bǐ ɖo gbɛ ɔ mɛ wá yi lɛ́ é kpó égbé tɔn lɛ́ kpó. Yě wɛ nyí Babilɔ́nu, Mɛdi kpó Pɛ́si kpó, Glɛ̌ki, Hlɔ̌ma kpó acɛkpikpa e ɖó agbɔ̌n hú bǐ ɖo gbɛ ɔ mɛ, bo ɖo acɛ kpa wɛ égbé é kpó, é wɛ nyí Anglo-Amérique. (Dan. 7:1-3, 17) Énɛ́ gúdo ɔ, Daniyɛ́li mɔ Jexóva Mawu b’ɛ ɖo ayǐjínjɔ́n ɖo axɔ́súzinkpo tɔn jí ɖo hwɛɖɔxɔsá ɖo jǐxwé. (Dan. 7:9, 10) Mawu yí hlɔ̌nhlɔ́n kpó acɛ kpó e acɛkpatɔ́ lɛ́ ɖó lɛ́ é bǐ sín yě sí, bo sɔ́ jó nú mɛ e jɛxá hú gǎn, bo lɛ́ ɖó hlɔ̌nhlɔ́n hú gǎn é. Mɛ̌ é ka sɔ́ ná? Mɛ e “cí gbɛtɔ́ví ɔ ɖɔhun” é; mɛ énɛ́ wɛ nyí Jezu Klísu, gɔ́ nú “togun mímɛ́ Mawu Ajalɔ̌nlɔn ɔ tɔn,” énɛ́ wɛ nyí mɛ 144000 ɖěɖěe ná ɖu axɔ́sú “káká yi mavɔmavɔ” lɛ́ é. (Dan. 7:13, 14, 18) É ɖo wɛn ɖɔ Jexóva wɛ nyí “Mawu Ajalɔ̌nlɔn ɔ.” Nǔ e Daniyɛ́li mɔ ɖo nǔmimɔ mɛ é dó zǒgbe nǔ e é ɖɔ jɛ nukɔn é ɖé jí. Daniyɛ́li ɖɔ: “Mawu [jǐxwé] tɔn ɔ” “wɛ nɔ ɖe axɔ́sú sín gǎnzinkpo jí. É wɛ nɔ zé mɛ axɔ́sú.”—Dan. 2:19-21. w22.10 14-15 akpá. 9-11