Ðò acɛkpikpa Mawu tɔn glɔ́ ɔ, nǔɖiɖó lɛ bǐ nɔ bǔ, bo lɛ́ nɔ fífá mɛ
Etɛwu Mǐ ka Ðó Hudo Axɔ́suɖuto Mawu Tɔn Tɔn?
Ðò bǐbɛ̌mɛ hwenuxó gbɛtɔ́ tɔn tɔn ɔ, Gbɛɖotɔ́ mǐtɔn e sín nyikɔ nɔ nyí Jehovah é wɛ nyí Acɛkpatɔ́ ɖokpo e tíìn é. É nɔ kp’acɛ kpo wanyiyi kpo. É sɔnǔ nú xwé ɖagbeɖagbe ɖé nú gbɛtɔ́ lɛ, bonu ye na nɔ mɛ; enɛ wɛ nyí jikpá Edɛni tɔn. É lɛ́ na ye nǔɖuɖu gegě. Gɔ́ na ɔ, é lɛ́ zɔ́n azɔ̌ e ɖó nu é ɖé ye. (Bǐbɛ̌mɛ 1:28, 29; 2:8, 15) Enyi gbɛtɔ́ lɛ ko nɔ acɛkpikpa wanyiyinɔ Mawu tɔn glɔ́ wɛ ɔ, ye na ko ɖó fífá.
Gbɛtɔ́ nukɔntɔn lɛ gbɛ́ ɖɔ Mawu kún nyí acɛkpatɔ́ emitɔn ó
Biblu ɖɔ ɖɔ wɛnsagun gǔfɔntɔ́ e è wá ylɔ́ ɖɔ Satáan Awoví é ɖɔ ɖɔ Mawu kún ɖó acɛ bo na kp’acɛ dó gbɛtɔ́ lɛ jí ó. É ɖɔ ɖɔ alixlɛ́mɛ kpo acɛkpikpa Mawu tɔn kpo mɛvo ɔ, gbɛtɔ́ lɛ na ɖó awǎjijɛ hugǎn. É blawǔ ɖɔ mɛjitɔ́ mǐtɔn nukɔntɔn lɛ, Adamu kpo Ɛvu kpo xwedó Satáan, bo fɔ́n gǔ dó Mawu jí.—Bǐbɛ̌mɛ 3:1-6; Nǔɖexlɛ́mɛ 12:9.
Ðó Adamu kpo Ɛvu kpo gbɛ́ Mawu ɖɔ é kún nyí Acɛkpatɔ́ emitɔn ó wutu ɔ, ye hɛn xwé yetɔn Palaɖisi ɔ, kpo nukúnɖiɖó e ye ɖó bo na nɔ gbɛ̀ kaka sɔyi, ma ɖó blɔ̌ ɖò wǔ é kpo bú. (Bǐbɛ̌mɛ 3:17-19) Gbeta e kɔn ye wá é lɛ́ wà nǔ dó vǐ e ye wá jì lɛ é wu. Biblu ɖɔ ɖɔ ɖó Adamu hu hwɛ wu ɔ, ‘hwɛhuhu byɔ gbɛ̀ ɔ mɛ, bo dɔn kú wá.’ (Hlɔmanu lɛ 5:12) Hwɛhuhu gbɛtɔ́ tɔn lɛ́ jì nǔ baɖabaɖa ɖé: “Gbɛtɔ́ ɖě nɔ kpa acɛ gannaganna nú nɔzo tɔn, bo nɔ wà nǔ dó wǔ tɔn.” (Nǔnywɛtɔ́xó 8:9) Ðò alɔ ɖevo mɛ ɔ, enyi gbɛtɔ́ lɛ kp’acɛ dó yeɖée jí ɔ, tagba lɛ nɔ hán gbeɖé ǎ.
ACƐKPIKPA GBƐTƆ́ TƆN WÁ ATƐ MƐ
Nɛmulɔdi fɔ́n gǔ dó Jehovah jí
Acɛkpatɔ́ nukɔntɔn e xó Biblu ɖɔ é wɛ nyí Nɛmulɔdi. É fɔ́n gǔ dó acɛkpikpa Jehovah tɔn jí. Sín Nɛmulɔdi hwenu ɔ, gbɛtɔ́ hlɔnhlɔnnɔ lɛ nɔ zán tɛn acɛkpikpa tɔn e mɛ ye ɖè é nyi dò. Xwè 3 000 mɔ̌ ɖíe ɔ, Axɔ́su Salomɔ́ɔ wlan ɖɔ: “Mɛ e dóya na wɛ è ɖè lɛ ɖò avǐ ya wɛ. Mɛ ɖebǔ ka ɖè bo na dó gbɔ nú ye ǎ. Mɛ e ɖò ya dó nú ye wɛ lɛ sí wɛ acɛkpikpa ɔ ɖè; enɛ wu wɛ mɛ ɖebǔ ma ɖè bo na dó gbɔ nú ye ǎ.”—Nǔnywɛtɔ́xó 4:1.
Nǔ lɛ ko gbɔn vo ɖò égbé ǎ. Ðò 2009 ɔ, Kplékplé Akɔta lɛ tɔn sín wema ɖé ɖɔ ɖɔ acɛ kpikpa ɖò ali nyanya nu e fɔ́n bo ɖò syɛnsyɛn d’eji wɛ é “nyí ɖokpo ɖò nǔ e nɔ zɔ́n bɔ nǔ nyanya lɛ sukpɔ́ ɖò gbɛ̀ ɔ mɛ é mɛ.”
HWENU E MAWU NA JƐ NǓ WÀ JÍ DÓ É SÙ!
Gbɛ̀ ɔ ɖó hudo acɛkpatɔ́ ɖagbe hugǎn lɛ kpo acɛkpikpa ɖagbe hugǎn ɖé kpo tɔn. Nǔ e sín akpá Gbɛɖotɔ́ mǐtɔn ka dó é nɛ!
Acɛkpikpa gbɛtɔ́ tɔn e tlɛ nyɔ́ hugǎn lɛ é kpéwú bo ɖeɖɛ tagba syɛnsyɛn gbɛtɔ́ lɛ tɔn lɛ ǎ
Mawu ko sɔ́ Axɔ́suɖuto, alǒ acɛkpikpa e na wá ɖyɔ acɛkpikpa gbɛtɔ́ tɔn lɛ bǐ é ɖé ɖ’ayǐ, bɔ “éyɛ na nɔte kaka sɔyi.” (Daniyɛli 2:44) Axɔ́suɖuto e tamɛ gbɛtɔ́ livi mɔkpan ko nɔ xoɖɛ dó é wɛ. (Matie 6:9, 10) Amɔ̌, Mawu ɖesunɔ wɛ na kp’acɛ dó axɔ́suɖuto enɛ nu ǎ. É nyɔ́ wà ɔ, é ko sɔ́ mɛ e ko nɔ gbɛ̀ ɖò ayikúngban jí kpɔ́n é ɖé, bonu é na nyí acɛkpatɔ́. Mɛ̌ Mawu ka sɔ́?