XÓTA NǓKPLƆNKPLƆN TƆN 12
Wanyiyi Nɔ Zɔ́n Bɔ Mǐ Nɔ Dɛ Ðò Wangbɛnúmɛ Nu
“Nǔ e zɔ́n mi wɛ un ɖè ɔ wɛ nyí ɖɔ mi ni ɖó wanyiyi nú miɖée. Enyi mɛ e nyí gbɛ̀ ɔ tɔn lɛ gbɛ́ wǎn nú mi hǔn, mi tuùn ɖɔ ye ko gbɛ́ wǎn nú nyɛ jɛ nukɔn nú mi.”—JAAN 15:17, 18.
HAN 129 Mǐ Na Ðò Didɛ Wɛ
XÓNUSƆ́ÐÓTEa
1. Sɔgbe xá Matie 24:9 ɔ, enyi gbɛ̀ ɔ gbɛ́ wǎn nú mǐ ɔ, etɛwu é ma ka ɖó na kpaca mǐ ǎ?
JEHOVAH dá mǐ bɔ mǐ na yí wǎn nú mɛ, bɔ mɛ ɖevo lɛ lɔ na yí wǎn nú mǐ. Enɛ wu ɔ, enyi mɛɖé gbɛ́ wǎn nú mǐ ɔ, wǔ nɔ kú mǐ tawun, bɔ vlafo ɔ, xɛsi nɔ lɛ́ ɖi mǐ. Ði kpɔ́ndéwú ɔ, nɔví nyɔnu ɖé nɔ nyí Georgina bo nɔ nɔ Elɔpu bo ɖɔ: “Hwenu e un ɖó xwè 14 é ɔ, mamáa ce gbɛ́ wǎn nú mì ɖó Jehovah e sɛn wɛ un ɖè é wutu. Wǔ kú mì tawun bɔ un nɔ mɔ ɖɔ un ɖò nyiɖokpo, bo jɛ nǔ xò kpɔ́n jí ɖɔ un kún nyí mɛ ɖagbe ó.”b Nɔví sunnu ɖé nɔ nyí Danylo bo wlán ɖɔ: “Hwenu e sɔja lɛ wlí mì, zun mì, bo gblɔ́n adǎn nú mì ɖó Kúnnuɖetɔ́ Jehovah tɔn e un nyí é wu é ɔ, ayi ce gbadó, bɔ un lɛ́ mɔ ɖɔ è ɖè mì kpò.” Wangbɛnúmɛ mɔ̌hun nɔ kú wǔ nú mɛ tawun, amɔ̌, é ka nyí nǔkpacamɛ ǎ. Jezu ko ɖɔ ɖ’ayǐ ɖɔ è na gbɛ́ wǎn nú mǐ.—Xà Matie 24:9.
2-3. Etɛwu è ka nɔ gbɛ́ wǎn nú ahwanvu Jezu tɔn lɛ?
2 Gbɛ̀ ɔ gbɛ́ wǎn nú ahwanvu Jezu tɔn lɛ. Etɛwu? Ðó Jezu ɖɔhun ɔ, mǐ “nyí gbɛ̀ ɔ tɔn ǎ.” (Jaan 15:17-19) Enɛ wu ɔ, mǐ nɔ ɖó sísí nú acɛkpikpa e ɖò tò nu lɛ é, amɔ̌, mǐ nɔ ɖ’alɔ ɖò toxóɖiɖɔ mɛ, nɔ dó gbè asya alǒ nɔ jì tohan ǎ. Jehovah ɖokponɔ géé wɛ mǐ nɔ sɛn. Mǐ nɔ nɔ gudo nú acɛ e Mawu ɖó bo na kp’acɛ dó gbɛtɔ́ lɛ jí é, amɔ̌, Satáan kpo “kúnkan tɔn” kpo nɔ gbɛ́ ɖɔ Mawu kún ɖó acɛ enɛ ó. (Bǐb. 3:1-5, 15) Mǐ nɔ jlá ɖɔ Axɔ́suɖuto Mawu tɔn wɛ nyí nukúnɖiɖó ɖokpo e ɖè nú gbɛtɔ́ lɛ é, bɔ zaanɖé dìn ɔ, Axɔ́suɖuto enɛ na sú kún dó nú mɛ ɖěɖee klán gbè xá ɛ lɛ é bǐ. (Dan. 2:44; Nǔɖe. 19:19-21) Wɛn enɛ ɔ, wɛnɖagbe ɖé wɛ é nyí nú mɛfífá lɛ, bo ka nyí wɛn nyanya nú mɛdídá lɛ.—Ðɛh. 37:10, 11.
3 È nɔ lɛ́ gbɛ́ wǎn nú mǐ ɖó mǐ nɔ zán gbɛ̀ sɔgbe xá nǔgbododó jlɔjlɔ Mawu tɔn lɛ. Nǔgbododó enɛ lɛ gbɔn vo tawun nú nǔ e gbɛ̀ ɔ nɔ ylɔ́ ɖɔ nǔ ɖagbe kpo nǔ nyanya kpo é. Ði kpɔ́ndéwú ɔ, égbé ɔ, mɛ gegě nɔ yí gbè nú nǔbliblíwiwa e xyɔwǔ bo cí Sodɔmu kpo Gomɔ́ɔ kpo tɔn e wu Mawu sú kún dó nú tò ɔ é ɖɔhun é! (Ju. 7, nwt) Ðó mǐ nɔ zunfan nǔgbododó Biblu tɔn ɖěɖee kúnkplá nǔwalɔ mɔ̌hun é wutu ɔ, mɛ gegě nɔ ko mǐ bo nɔ ɖɔ ɖɔ mǐ nɔ hɛn nǔ gángángán dín!—1 Pi. 4:3, 4.
4. Enyi mɛ lɛ gbɛ́ wǎn nú mǐ ɔ, jijɔ tɛ lɛ ka nɔ na mǐ hlɔnhlɔn?
4 Enyi mɛ lɛ gbɛ́ wǎn nú mǐ bo nɔ lɛ́ zun mǐ ɔ, etɛ ka sixu d’alɔ mǐ bɔ mǐ na dɛ? Mǐ ɖó na ɖó nǔɖiɖi syɛnsyɛn e na zɔ́n bɔ Jehovah na d’alɔ mǐ é. Gǎglónú ɖé ɖɔhun ɔ, nǔɖiɖi mǐtɔn sixu “xò gǎ myɔnɔ e kɛntɔ́ na da dó [mǐ] ɔ cí.” (Efɛ. 6:16) Amɔ̌, nǔɖiɖi kɛɖɛ sín hudo wɛ mǐ ɖó ǎ. Mǐ lɛ́ ɖó hudo wanyiyi tɔn. Etɛwu? Ðó wanyiyi ɔ, “nǔɖe nɔ sin xomɛ n’i ǎ.” É nɔ dɛ ɖò nǔ e nɔ dó xomɛsin nú mɛ lɛ é bǐ nu. (1 Kɔ. 13:4-7, 13) Dìn ɔ, mǐ ni kpɔ́n lee wǎn yí nú Jehovah, wǎn yí nú nǔɖitɔ́ hatɔ́ mǐtɔn lɛ, kaka jɛ wǎn yí nú kɛntɔ́ mǐtɔn lɛ jí nɔ d’alɔ mǐ bɔ mǐ nɔ dɛ ɖò wangbɛnúmɛ nu gbɔn é.
WǍN YÍ NÚ JEHOVAH NƆ ZƆ́N BƆ MǏ NƆ DƐ ÐÒ WANGBƐNÚMƐ NU
5. Nɛ̌ wǎn e Jezu yí nú Tɔ́ tɔn é ka na ɛ hlɔnhlɔn gbɔn?
5 Ðò zǎn e jɛ nukɔn cobɔ kɛntɔ́ Jezu tɔn lɛ na hu i é mɛ ɔ, Jezu ɖɔ nú ahwanvu tɔn gbejinɔtɔ́ lɛ ɖɔ: “Un yí wǎn nú Tɔ́ ɔ, [enɛ wu ɔ] un na wà nǔ lee Tɔ́ ɔ zɔ́n mì gbɔn é.” (Jaan 14:31) Wǎn e Jezu yí nú Jehovah é na ɛ hlɔnhlɔn b’ɛ kpéwú bo dɛ ɖò mɛtɛnkpɔn syɛnsyɛn lɛ nu. Wǎn e mǐ yí nú Jehovah é sixu d’alɔ mǐ gbɔn mɔ̌.
6. Sɔgbe xá Hlɔmanu lɛ 5:3-5 ɔ, nɛ̌ dɛ e dɛ wɛ mɛsɛntɔ́ Jehovah tɔn lɛ ɖè ɖò wangbɛnúmɛ gbɛ̀ ɔ tɔn nu é ka nɔ cí nú ye?
6 Hwebǐnu wɛ wǎn yí nú Mawu nɔ d’alɔ mɛsɛntɔ́ Jehovah tɔn lɛ bɔ ye nɔ dɛ ɖò yadonúmɛ nu. Ði kpɔ́ndéwú ɔ, hwenu e hwɛɖɔxɔsa ɖaxó Jwifu lɛ tɔn hlɔnhlɔnnɔ ɔ byɔ mɛsɛ́dó lɛ ɖɔ ye ni ɖó wɛnɖagbejijlazɔ́ ɔ te é ɔ, wǎn yí nú Mawu sísɛ́ ye bɔ ye ‘setónú nú Mawu hú gbɛtɔ́.’ (Mɛ. 5:29; 1 Jaan 5:3) Égbé ɔ, wanyiyi syɛnsyɛn mɔ̌hun nɔ d’alɔ nɔví mǐtɔn lɛ bɔ ye nɔ gbí dɔn ɖò acɛkpikpa hlɔnhlɔnnɔ adakaxotɔ́ lɛ nukɔn. Awakanmɛ nɔ kú mǐ ǎ, é nyɔ́ wà lɔ ɔ, wǔjɔmɛ ɖé wɛ mǐ nɔ kpɔ́n dɛ e dɛ wɛ mǐ ɖè ɖò wangbɛnúmɛ gbɛ̀ ɔ tɔn nukɔn é dó mɔ.—Mɛ. 5:41; xà Hlɔmanu lɛ 5:3-5.
7. Enyi mɛ e ɖò xwédo mǐtɔn mɛ lɛ é klán gbè xá mǐ ɔ, nɛ̌ mǐ ka ɖó na wà nǔ gbɔn?
7 Enyi mɛ e ɖò xwédo mǐtɔn ɖesu mɛ lɛ é klán gbè xá mǐ ɔ, enɛ sixu vɛwǔ tawun bɔ mǐ na dɛ ɖ’enu. Enyi mǐ jɛ nǔgbo Biblu tɔn lɛ kplɔ́n jí ɔ, mɛ e ɖò xwédo mǐtɔn mɛ é ɖé lɛ sixu lin ɖɔ è flú mǐ. Mɛ ɖevo lɛ sixu lin ɖɔ mǐ hun taɖu. (Sɔ́ jlɛ dó Maki 3:21 wu.) Ye tlɛ sixu lɛ́ klán gbè xá mǐ syɛnsyɛn. Enɛ ka ɖó na kpaca mǐ ǎ. Jezu ɖɔ: “Xwé mɛtɔn gbè nu lɛ na huzu kɛntɔ́ mɛtɔn.” (Mat. 10:36) Nǔgbo ɔ, enyi hɛ̌nnumɔ mǐtɔn lɛ na bo ɖó linlin ɖebǔ dó mǐ wu ɔ, mǐdɛɛ lɛ ɖó na nɔ kpɔ́n ye dó mɔ kɛntɔ́ mǐtɔn lɛ ǎ. É nyɔ́ wà ɔ, bǎ e mɛ wǎn e mǐ yí nú Jehovah é ɖò jijɛji wɛ yí ɖó é ɔ, bǎ enɛ mɛ wɛ wǎn e mǐ yí nú mɛ ɖevo lɛ lɔ é nɔ jɛji yì ɖó. (Mat. 22:37-39) Amɔ̌, mǐ na wɔn ya nú sɛ́n e ɖò Biblu mɛ lɛ é kpo nǔgbododó tɔn lɛ kpo ɖó mǐ jló na nyɔ́ mɛ ɖevo lɛ nukúnmɛ kpowun wu ǎ.
Mǐ sixu sè wuvɛ̌ nú hwenu ɖé, amɔ̌, Jehovah na ɖò akpá mǐtɔn hwebǐnu bo na dó gbɔ nú mǐ, lobo lɛ́ na hlɔnhlɔn mǐ (Kpɔ́n akpáxwé 8-10)
8-9. Gbeklánxámɛ syɛnsyɛn lɛ ɖò finɛ có, etɛ ka d’alɔ nɔví nyɔnu ɖé b’ɛ gbí dɔn?
8 Georgina e xó mǐ ɖɔ wá yì é sín nɔ klán gbè xá ɛ syɛnsyɛn có, é kpéwú bo gbí dɔn. Georgina tinmɛ ɖɔ: “Nyi kpo nɔ ce kpo jɛ Biblu kplɔ́n xá Kúnnuɖetɔ́ lɛ jí. Sun ayizɛ́n gudo ɔ, un ba na jɛ kplé lɛ yì jí, amɔ̌, linlin nɔ ce tɔn huzu hazawun. Un wá wɔ́ ɖɔ é nɔ wà nǔ ɖó kpɔ́ xá gǔfɔndómawujitɔ́ lɛ, bɔ nú é ɖò xó ɖɔ nú mì wɛ ɔ, é nɔ zán linlin yetɔn lɛ. É nɔ lɛ́ zun mì, dɔn ɖa ce, glɔ́n gbɔjɛ nú mì, bo nɔ lɛ́ fúnfún wema ce lɛ. Hwenu e un ɖó xwè 15 é ɔ, un bló baptɛm. Enɛ gudo ɔ, nɔ ce sɔ́ mì yì ɖó xwé e gbè ɖyɔvǐ lɛ kɛɖɛ ɖè é ɖé, bonu má mɔ tɛn bo jó Jehovah sinsɛn dó; mɛ e nɔ nu azɔ bo nɔ lɛ́ wà alǎnnú é ɖé lɛ ɖò xwé enɛ gbè. Enyi mɛ e ɖó na yí wǎn nú we bo lɛ́ kpé nukún wǔ we é ɖé wɛ ɖò gbè klán xá we wɛ ɔ, é nɔ vɛwǔ bonu è na ɖí xwi xá.”
9 Nɛ̌ Georgina ka dɛ ɖ’enu gbɔn? É ɖɔ: “Biblu ɔ blebu xixa wɛ un fó kɛɖɛ bɔ nɔ ce fɔ́n gǔ dó jǐ ce. Dìn ɔ, un kúdeji bǐ mlɛ́mlɛ́ ɖɔ un ko mɔ nǔgbo ɔ bo lɛ́ mɔ ɖɔ un sɛkpɔ́ Jehovah tawun. Hwɛhwɛ wɛ un nɔ xoɖɛ sɛ́dó è b’ɛ nɔ ɖótó mì. Hwenu e un ɖò xwé ɖě ɔ gbè é ɔ, nɔví nyɔnu ɖé nɔ ylɔ́ mì wá xwé tɔn gbé, bɔ mǐ nɔ kplɔ́n Biblu ɖó kpɔ́. Nɔví lɛ nɔ dó wusyɛn lanmɛ nú mì tawun ɖò kplé lɛ jí ɖò hwe ɔ nu. Ye yí mì dó xwédo yetɔn mɛ. Un mɔ vaan ɖɔ Jehovah ɖó hlɔnhlɔn tawun hú gbeklánxámɛtɔ́ mǐtɔn lɛ, enyi ye na bo tlɛ nyí mɛ alɔkpa ɖebǔ ɔ nɛ.”
10. Jiɖiɖe tɛ mǐ ka sixu ɖó dó Jehovah Mawu mǐtɔn wu?
10 Mɛsɛ́dó Pɔlu wlán ɖɔ nǔ ɖebǔ kún sixu “ɖè mǐ ɖó vo nú wanyiyi e Mawu ɖexlɛ́ mǐ gbɔn Aklunɔ mǐtɔn Klisu Jezu jí é” ó. (Hlɔ. 8:38, 39) Mǐ tlɛ sixu jiya nú hwenu ɖé, amɔ̌, Jehovah ɖò akpá mǐtɔn hwebǐnu bo na dó gbɔ nú mǐ, lobo lɛ́ na mǐ hlɔnhlɔn. Gɔ́ na ɔ, lee é nyí gbɔn nú Georgina é ɔ, Jehovah nɔ lɛ́ d’alɔ mǐ gbɔn nɔví e ɖò agun ɔ mɛ lɛ é gblamɛ.
WǍN YÍ NÚ NǓÐITƆ́ HATƆ́ MǏTƆN LƐ NƆ D’ALƆ MǏ BƆ MǏ NƆ DƐ ÐÒ WANGBƐNÚMƐ NU
11. Nɛ̌ wanyiyi e xó Jezu ɖɔ ɖò Jaan 15:12, 13 mɛ é ka d’alɔ ahwanvu tɔn lɛ gbɔn? Nǎ kpɔ́ndéwú ɖé.
11 Ðò zǎn e jɛ nukɔn nú kú Jezu tɔn é mɛ ɔ, é flín ahwanvu tɔn lɛ ɖɔ ye ni yí wǎn nú yeɖée. (Xà Jaan 15:12, 13.) É tuùn ɖɔ wanyiyi mɛɖée sísɔ́ dó savɔ̌ tɔn na d’alɔ ye bɔ ye na nɔ bǔ bo dɛ ɖò wangbɛnúmɛ gbɛ̀ ɔ tɔn nu. Mǐ ni kpɔ́n kpɔ́ndéwú agun e ɖò Tɛsaloniki é tɔn. Sín hwenu e è ɖó agun ɔ ayǐ é ɔ, è nɔ dóya nú mɛ ɖěɖee ɖò agun ɔ mɛ lɛ é. É ɖò mɔ̌ có, nɔví enɛ lɛ dɛ kpo gbejininɔ kpo, bo lɛ́ ɖè wanyiyi xlɛ́. (1 Tɛ. 1:3, 6, 7) Pɔlu dó wusyɛn lanmɛ nú ye ɖɔ ye ni kpò ɖò wanyiyi ɖexlɛ́ wɛ, bonu é “ni nɔ lɛ́ jɛji ayihɔngbe ayihɔngbe.” (1 Tɛ. 4:9, 10) Wanyiyi na sísɛ́ ye bɔ ye na na akɔ́nkpinkpan mɛ e ɖò linkpɔ́n mɛ lɛ é, bo lɛ́ gɔ́ alɔ nú mɛ e ma ɖó gǎn ǎ lɛ é. (1 Tɛ. 5:14, nwt) Ye xwedó alixlɛ́mɛ Pɔlu tɔn lɛ, bɔ ɖò xwè ɖokpo mɔ̌ gudo ɖò wema wegɔ́ e Pɔlu sɛ́dó ye é mɛ ɔ, é ɖɔ nǔ elɔ: “Wanyiyi e ɖokpo ɖokpo mitɔn ɖó nú mɛ ɖě lɛ ɔ nɔ ɖò jijɛji wɛ.” (2 Tɛ. 1:3-5) Wanyiyi yetɔn d’alɔ ye bɔ ye dɛ ɖò wuvɛ̌ syɛnsyɛn lɛ kpo yadonúmɛ kpo nu.
Wanyiyi nɔví nɔví tɔn mǐtɔn sixu d’alɔ mǐ bɔ mǐ na dɛ ɖò wangbɛnúmɛ nu (Kpɔ́n akpáxwé 12)c
12. Ðò ahwan ɖé hwenu ɔ, nɛ̌ nɔví sunnu kpo nɔví nyɔnu kpo e ɖò tò ɖé mɛ lɛ é ka ɖè wanyiyi xlɛ́ yeɖée gbɔn?
12 Mǐ ni lɛ́ ɖɔ xó dó Danylo e xó mǐ ɖɔ wá yì é kpo asì tɔn kpo wu. Hwenu e ahwan hɛn tò yetɔn kíjá é ɔ, ye kpò ɖò kplé lɛ yì wɛ, nɔ jlá wɛn ɔ lee ye kpéwú gbɔn é, lobo nɔ lɛ́ má nǔɖuɖu e ye ɖó lɛ é xá nɔví yetɔn lɛ. Enɛ gudo ɔ, gbè ɖokpo ɔ, sɔja lɛ wá Danylo xwégbe kpo tú kpo. Danylo ɖɔ: “Ye byɔ mì ɖɔ nyi ni ɖɔ ɖɔ nyi kún sɔ́ nyí Kúnnuɖetɔ́ ɖé ó. Ee un gbɛ́ é ɔ, ye xò mì, bo sɔ́ tú dó jǐ ce, lobo lɛ́ gblɔ́n kú dán nú mì. Cobonu ye na yì ɔ, ye gblɔ́n adǎn nú mì ɖɔ emi na lɛkɔ wá bo na wá hwlɛn kan xá asì ce. Amɔ̌, nɔví mǐtɔn lɛ yawǔ dó pípan nú mǐ bɔ mǐ yawǔ yì tò ɖevo mɛ. Un na wɔn wanyiyi e nɔví vívɛ́ enɛ lɛ ɖexlɛ́ mǐ é gbeɖé ǎ. Hwenu e mǐ wá tò yɔyɔ̌ ɔ mɛ é ɔ, nɔví e ɖò xá ɔ mɛ lɛ é na mǐ nǔɖuɖu bo lɛ́ d’alɔ mì bɔ un mɔ azɔ̌ ɖé kpo xɔ ɖé kpo. Enɛ zɔ́n bɔ mǐ kpéwú bo mɔ fí ɖé nú Kúnnuɖetɔ́ ɖevo e gosin fí e fun ahwan ɖè wɛ è ɖè lɛ é bonu ye na nɔ.” Nǔ enɛ lɛ xlɛ́ ɖɔ wanyiyi Klisanwun tɔn sixu d’alɔ mǐ bɔ mǐ na dɛ ɖò wangbɛnúmɛ nu.
WǍN YÍ NÚ KƐNTƆ́ MǏTƆN LƐ NƆ D’ALƆ MǏ BƆ MǏ NƆ DƐ ÐÒ WANGBƐNÚMƐ NU
13. Enyi mɛ lɛ na bo tlɛ gbɛ́ wǎn nú mǐ ɔ, nɛ̌ gbigbɔ mímɛ́ ka sixu d’alɔ mǐ bɔ mǐ na dɛ bá kpò ɖò Jehovah sɛn wɛ gbɔn?
13 Jezu ɖɔ nú ahwanvu tɔn lɛ ɖɔ ye ni yí wǎn nú kɛntɔ́ yetɔn lɛ. (Mat. 5:44, 45) É ka nɔ bɔwǔ à? Ðebǔ ǎ! Amɔ̌, kpo alɔdó gbigbɔ mímɛ́ Mawu tɔn tɔn kpo ɔ, è sixu kpéwú. Wanyiyi, suúluɖiɖó, xomɛnyínyɔ́, xomɛfífá kpo mɛɖéejiɖuɖe kpo ɖò nǔ ɖěɖee gbigbɔ mímɛ́ Mawu tɔn nɔ na mɛ lɛ é mɛ. (Ga. 5:22, 23) Jijɔ enɛ lɛ nɔ d’alɔ mǐ bɔ mǐ nɔ dɛ ɖò wangbɛnúmɛ nu. Mɛ gegě sɔ́ nɔ klán gbè xá mǐ ǎ, ɖó asú yetɔn, asì yetɔn, vǐ yetɔn, alǒ, nɔzo yetɔn lɛ nɔ ɖè jijɔ enɛ lɛ xlɛ́ ye. Gbeklánxámɛtɔ́ gegě tlɛ ko huzu nɔví vívɛ́ mǐtɔn lɛ. Enɛ wu ɔ, enyi a mɔ ɖɔ wǎn yí nú mɛ ɖěɖee gbɛ́ wǎn nú we ɖó a ɖò Jehovah sɛn wɛ wutu lɛ é vɛwǔ nú we hǔn, xoɖɛ bo byɔ gbigbɔ mímɛ́. (Luk. 11:13) Gɔ́ na ɔ, kúdeji bǐ mlɛ́mlɛ́ ɖɔ alixlɛ́mɛ Mawu tɔn lɛ wɛ nɔ nyɔ́ zán hugǎn hwebǐnu.—Nǔx. 3:5-7.
14-15. Nɛ̌ Hlɔmanu lɛ 12:17-21 ka d’alɔ Yasmeen bɔ asú tɔn ɖò gbè klán xá ɛ wɛ syɛnsyɛn có, é ka kpò ɖò wanyiyi ɖexlɛ́ ɛ wɛ gbɔn?
14 Mǐ ni kpɔ́n kpɔ́ndéwú Yasmeen ee nɔ nɔ Gbadahweji Azíi tɔn é tɔn. Ee é huzu Kúnnuɖetɔ́ Jehovah tɔn é ɔ, asú tɔn mɔ ɖɔ è flú i, bo tɛ́n kpɔ́n bo na bló b’ɛ na gbɔ Mawu sɛn. É nɔ zun i, bo byɔ hɛ̌nnumɔ tɔn lɛ, sinsɛngán ɖé, gɔ́ nú azɔnɖatɔ́ ɖé ɖɔ, ye ni ɖɔ emi na wà nǔ nyanya n’i, bo dóhwɛ ɛ ɖɔ é ɖò xwédo tɔn gbà wɛ. Asú tɔn tlɛ nɔ wá zun nɔví lɛ ɖò kplé lɛ hwenu! Yasmeen nɔ y’avǐ hwɛhwɛ ɖó è nɔ wà nǔ xá ɛ kpo xomɛnyínyɔ́ kpo ǎ wutu.
15 Nɔví sunnu lɛ kpo nɔví nyɔnu lɛ kpo nɔ dó gbɔ nú Yasmeen bo nɔ lɛ́ na ɛ hlɔnhlɔn ɖò Kplé lɛ jí. Mɛxo agun tɔn lɛ dó wusyɛn lanmɛ n’i ɖɔ é ni zán wěɖexámɛ e ɖò Hlɔmanu lɛ 12:17-21 mɛ lɛ é. (Xà.) Yasmeen ɖɔ: “É vɛwǔ tawun, amɔ̌, un byɔ Jehovah ɖɔ é ni d’alɔ mì, bɔ un wà nǔ e wu un kpé lɛ é bǐ bo zán nǔ e Biblu ɖɔ lɛ é. Enɛ wu ɔ, enyi asú ce tuùn ganji bo hɛn adoxwɛsa ɔ kwiji ɔ, un nɔ jlaɖó. Enyi é zun mì ɔ, un nɔ yí gbè n’i kpo xomɛfífá kpo. Bɔ nú é ɖò azɔn jɛ wɛ ɔ, un nɔ kpé nukún dó wǔ tɔn.”
Enyi mǐ ɖè wanyiyi xlɛ́ gbeklánxámɛtɔ́ mǐtɔn lɛ ɔ, ye sixu huzu jijɔ (Kpɔ́n akpáxwé 16-17)d
16-17. Etɛ kpɔ́ndéwú Yasmeen tɔn ka sixu kplɔ́n we?
16 È d’ajɔ Yasmeen ɖó wanyiyi e é ɖexlɛ́ asú tɔn é wu. É ɖɔ: “Asú ce jɛ jiɖe ɖó dó wǔ ce jí hugǎn, ɖó é tuùn ɖɔ un nɔ ɖɔ nǔgbo hwebǐnu. Enyi mǐ ɖò xó ɖɔ ɖó kpɔ́ wɛ dó sinsɛn wu ɔ, é nɔ ɖótó mì kpo sísí kpo, bo yí gbè ɖɔ emi na bló bɔ fífá na tíìn ɖò xwédo ɔ mɛ. É ɖɔ nú mì dìn ɖɔ nyi ni nɔ yì kplé lɛ. Nyi kpo asú ce kpo vɛ́ dìn tawun, bɔ fífá lɛ́ ɖò xwédo mǐtɔn mɛ. Nukúnɖiɖó ce wɛ nyí ɖɔ asú ce ni yí gbè nú nǔgbo ɔ, bo wá gɔ́ nú mì ɖò Jehovah sinsɛn mɛ.”
17 Yasmeen sín kpɔ́ndéwú xlɛ́ ɖɔ wanyiyi ‘nɔ dɛ ɖò nǔ bǐ nu, nɔ hɛn nukúnɖiɖó mǐtɔn kpodo hunkúkú mǐtɔn kpan ɖó te.’ (1 Kɔ. 13:4, 7) Wangbɛnúmɛ sixu syɛn bo lɛ́ ɖó wuvɛ̌ nú mɛ tawun, amɔ̌, wanyiyi ɖ’agbɔ̌n tawun hú mɔ̌. É nɔ zɔ́n bɔ mɛ ɖevo lɛ nɔ huzu jijɔ, bo nɔ lɛ́ dó xomɛhunhun nú Jehovah. Amɔ̌, enyi gbeklánxámɛtɔ́ lɛ na bo tlɛ kpò ɖò wǎn gbɛ́ nú mǐ wɛ ɔ, mǐ sixu kpò ɖò awǎ jɛ wɛ. Gbɔn nɛ̌ é?
È NA BO GBƐ́ WǍN NÚ WƐ HǓN, J’AWǍ
18. Enyi è na bo tlɛ gbɛ́ wǎn nú mǐ ɔ, etɛwu mǐ ka sixu kpò ɖò awǎ jɛ wɛ?
18 Jezu ɖɔ: “Nǔ na nyɔ́ nú mi hwenu e gbɛtɔ́ lɛ na gbɛ́ wǎn nú mi” é. (Luk. 6:22) Mǐɖesunɔ nɔ bló bɔ mɛ ɖevo lɛ na gbɛ́ wǎn nú mǐ ǎ. Enyi è ɖò ya dó nú mǐ wɛ ɖó nǔɖiɖi mǐtɔn wu ɔ, xomɛ nɔ hun mǐ ǎ. Enɛ wu ɔ, enyi è gbɛ́ wǎn nú mǐ ɔ, etɛwu mǐ ka sixu j’awǎ? Hwɛjijɔ atɔn ɖíe. Nukɔntɔn, enyi mǐ dɛ ɔ, nǔ mǐtɔn nɔ nyɔ́ Mawu nukún mɛ. (1 Pi. 4:13, 14) Wegɔ́, nǔɖiɖi mǐtɔn nɔ lɛ́ xɔ akwɛ hugǎn, bo nɔ lɛ́ syɛn. (1 Pi. 1:7) Atɔngɔ́, mǐ nɔ mɔ ajɔ xɔ akwɛ ɖé yí; enɛ wɛ nyí gbɛ̀ mavɔmavɔ.—Hlɔ. 2:6, 7.
19. Etɛwu hwenu e è xò mɛsɛ́dó lɛ gudo é ɔ, ye ka j’awǎ?
19 Jezu fɔ́n sín kú b’ɛ na nɔ zaan é ɔ, mɛsɛ́dó tɔn lɛ mɔ awǎjijɛ e xó é ɖɔ é. Ee è xò ye bo lɛ́ gbɛ́ nú ye ɖɔ ye ma sɔ́ jlá wɛnɖagbe ɔ ó gudo é ɔ, ye j’awǎ. Etɛwu? “Ðó ye mɔ ɖɔ Mawu mɔ emi dó mɔ mɛ e jɛxa ya jì dó Jezu nyikɔ mɛ é.” (Mɛ. 5:40-42) Ye yí wǎn nú Gǎn yetɔn hú xɛsi ɖi nú wangbɛnúmɛ kɛntɔ́ yetɔn lɛ tɔn. Ye “nɔ gɔn” wɛnɖagbe ɔ jlá ǎ, bɔ enɛ xlɛ́ ɖɔ ye yí wǎn nú nɔzo yetɔn lɛ. Égbé ɔ, wuvɛ̌ lɛ nɔ ɖò finɛ có, nɔví mǐtɔn lɛ gegě nɔ ɖò Mawu sɛn wɛ kpo gbejininɔ kpo. Ye tuùn ɖɔ Jehovah kún na wɔn azɔ̌ e ye wà é kpo wanyiyi e ye ɖexlɛ́ ɛ é kpo ó.—Ebl. 6:10.
20. Etɛ jí mǐ ka na ɖɔ xó dó ɖò xóta e bɔ d’ewu é mɛ?
20 Enyi gbɛ̀ éyɛ kpò ɖò te jɛn wɛ ɔ, mɛ lɛ na nɔ gbɛ́ wǎn nú mǐ jɛn wɛ. (Jaan 15:19) Amɔ̌, é byɔ ɖɔ mǐ ni ɖi xɛsi ǎ. Lee mǐ na mɔ gbɔn ɖò xóta e bɔ d’ewu é mɛ é ɔ, Jehovah ‘na na hlɔnhlɔn gbejinɔtɔ́ tɔn lɛ, bo na cyɔn alɔ ye jí.’ (2 Tɛ. 3:3) Enɛ wu ɔ, mi nú mǐ ni kpò ɖò wǎn yí nú Jehovah wɛ. Mǐ ni kpò ɖò wǎn yí nú nɔví sunnu kpo nɔví nyɔnu kpo mǐtɔn lɛ wɛ, kaka jɛ kɛntɔ́ mǐtɔn lɛ jí. Enyi mǐ xwedó wěɖexámɛ enɛ ɔ, mǐ na kpò ɖò bǔ, mǐ na kpò ɖò dǒ lí wɛ ɖò gbigbɔ lixo, mǐ na kpa susu nú Jehovah, bo na lɛ́ xlɛ́ ɖɔ wanyiyi ɖ’agbɔ̌n tawun hú wangbɛnúmɛ.
HAN 106 Sɔnǔ nú Wanyiyi
a Ðò xóta elɔ mɛ ɔ, mǐ na mɔ lee wǎn yí nú Jehovah, wǎn yí nú nǔɖitɔ́ hatɔ́ mǐtɔn lɛ, kaka jɛ wǎn yí nú kɛntɔ́ mǐtɔn lɛ jí nɔ d’alɔ mǐ bɔ mǐ nɔ dɛ ɖò wangbɛnúmɛ gbɛ̀ ɔ tɔn nu gbɔn é. Mǐ na lɛ́ mɔ nǔ e wu Jezu ɖɔ ɖɔ enyi è na bo gbɛ́ wǎn nú mǐ ɔ, mǐ sixu ɖó awǎjijɛ é.
b È ɖyɔ nyikɔ ɖé lɛ.
c ÐIÐE LƐ SÍN TINMƐ: Ee sɔja lɛ gblɔ́n adǎn nú Danylo é ɔ, nɔví lɛ d’alɔ é kpo asì tɔn kpo bɔ ye yì jɛ tò ɖevo mɛ, bɔ nɔví ɖěɖee ɖò dɔ̌n lɛ é yí ye kpo akpakpa sɔ́ mɛ kpo.
d ÐIÐE LƐ SÍN TINMƐ: Yasmeen sín asú klán gbè xá ɛ, amɔ̌, mɛxo lɛ ɖè wě ɖagbe lɛ xá ɛ. É xlɛ́ ɖɔ emi nyí asì ɖagbe ɖé, bo kpé nukún dó asú tɔn wu hwenu e é ɖò azɔn jɛ wɛ é.