Un Hɛn Jehovah Dó Ayi Mɛ Ðò Gbeta E Kɔn Un Wá lɛ É Bǐ Mɛ

È jì mì ɖò 19 mai 1940 ɖò toxo Amioûn tɔn mɛ, ɖò Liban. Xwè klewun ɖé lɛ gudo ɔ, xwédo mǐtɔn sɛ̀ tɛn yì toxo Tripoli tɔn mɛ. Xwédo e tuùn Jehovah Mawu, bo lɛ́ yí wǎn n’i, bɔ wanyiyi kpo awǎjijɛ kpo ɖ’emɛ é ɖé mɛ wɛ un sù ɖè. Nyi wɛ nyí kpodé ɖò vǐ nyɔnu atɔn kpo vǐ sunnu we kpo e mɛjitɔ́ ce lɛ jì é mɛ. Nǔɖokan lɛ gbé nyinya jɛ nukɔn nú mɛjitɔ́ ce lɛ ǎ. Biblu kplɔnkplɔn, kplé Klisanwun tɔn lɛ yiyi, kpo alɔdidó mɛ ɖevo lɛ bonu ye na wá tuùn Mawu kpo jí wɛ gbɛzán mǐtɔn jinjɔn.

Klisanwun yí ami dó ɖè gegě wɛ ɖò agun mǐtɔn mɛ. Mɛ ɖokpo ɖò ye mɛ bo nyí Michel Aboud, bo nɔ kpé nukún dó kplé e è nɔ ylɔ́ ɖɔ “Oplọn Agunwe” é wu. É mɔ nǔgbo ɔ ɖò New York, bo jɛ wɛnɖagbe ɔ jlá jí ɖò Liban ɖò 1921. Nǔ taji e un nɔ flín é wɛ nyí lě dò é nɔ ɖó sísí nú Anne Beavor kpo Gwen Beavor kpo, bo nɔ lɛ́ nɔ gudo nú ye sɔ é. Mɛ winnyawinnya e yí kúnnuɖewema Galadi tɔn lɛ é wɛ nú ye. Xɔ́ntɔn ɖagbe lɛ wɛ mǐ kpo ye kpo huzu. Xwè mɔ̌kpan gudo ɔ, é víví nú mì tawun ɖɔ un xò gò Anne ɖò États-Unis. Táan kpɛɖé ɖò enɛ gudo ɔ, un xò gò Gwen lɔ, bɔ éyɛ ko da Wilfred Gooch, bɔ ye ɖò sinsɛnzɔ́ wà wɛ ɖò alaxɔ Londres tɔn mɛ ɖò Angleterre.

KÚNNUÐIÐE ÐÒ LIBAN

Hwenu e un ɖò winnyawinnya mɛ é ɔ, Kúnnuɖetɔ́ kpɛɖé jɛn ɖò Liban. É ɖò mɔ̌ có, kpo akpakpa sɔ́ mɛ kpo wɛ mǐ nɔ ɖɔ xó nú mɛ ɖevo lɛ dó Biblu wu. Sinsɛngán ɖé lɛ nɔ klán gbè xá mǐ có, mǐ ka nɔ wà mɔ̌. Nǔ e jɛ hwenɛnu é ɖé lɛ lɛ́ kpò ɖò ayi ce mɛ.

Gbè ɖokpo ɔ, nyi kpo nɔví ce nyɔnu Sana kpo ɖò Mawuxó ɖɔ wɛ ɖò xwé ɖé gbè. Yɛhwenɔ ɖé wá xwetɔ́n ɖò síngbó e jí mǐ ɖè bo ɖò Mawuxó ɖɔ nú mɛ lɛ wɛ é. Mɛɖé jɛn na ko ylɔ́ ɛ. Yɛhwenɔ ɔ jɛ nɔví ce zun jí. Xomɛ sin i, bɔ é sísɛ́ Sana, b’ɛ j’ayǐ sín síngbó ɔ jí bo gblewǔ. Mɛɖé ylɔ́ kponɔ lɛ bɔ ye wá; ee ye wá é ɔ, ye ba mɛɖé b’ɛ kpé nukún dó Sana wu. Ye kplá yɛhwenɔ ɔ yì kponɔzɔ́watɛn, finɛ wɛ ye wá mɔ ɖè ɖɔ é hɛn tú. Kponɔgán ɔ kanbyɔ ɛ ɖɔ: “Mɛ̌ a ka nyí tawun? Mawuxó jɛn a nɔ kplɔ́n mɛ à, alǒ dakaxixo wɛ a nɔ kplɔ́n mɛ lɛ?”

Nǔ ɖevo e un nɔ lɛ́ flín ganji é wɛ nyí hwenu e agun mǐtɔn xáya mɔ̌to ɖé, b’ɛ na sɔ́ mǐ yì toxo e jɛ gblolo é ɖé mɛ, bonu mǐ na yì jlá wɛnɖagbe ɔ é. Nǔ bǐ ɖò yiyi wɛ ganji, kaka jɛ hwenu e yɛhwenɔ ayǐ ɔ jí tɔn ɖé sè ɖɔ mǐ ɖò wɛnɖagbe jlá wɛ é. Enɛ gudo ɔ, é xò mɛ lɛ kplé bonu ye na xò adaka mǐ wu. Ye ɖó adohu adohu nú mǐ, bo tlɛ lɛ́ nyi hwǎn dó mǐ lɔ, bɔ tɔ́ ce gblewǔ. Un flín ɖɔ un ɖò kpinkpɔn ɛ wɛ bɔ hun ɖò sisa sín nukún tɔn mɛ wɛ. É lɛkɔ yì hǔn ɔ kɔn kpo nɔ ce kpo, bɔ mǐ mɛ e kpò lɛ é xwedó ye wǔblawúbla. Nǔ ɖò mɔ̌ có, na wɔn nǔ e nɔ ce ɖɔ hwenu e é ɖò wǔtu súnsún nú tɔ́ ce wɛ é gbeɖé ǎ; é ɖɔ: “Jehovah, ye tuùn nǔ e wà wɛ ye ɖè é ǎ, sɔ́ kɛ ye.”

Hweɖevonu ɔ, mǐ yì hɛ̌nnumɔ mǐtɔn lɛ kpɔ́n gbé ɖò tò mǐtɔn mɛ. Mǐ xò gò sinsɛngán nukúnɖeji ɖé ɖò gǎn’páa ce xwé. Sinsɛngán enɛ tuùn ɖɔ Kúnnuɖetɔ́ Jehovah tɔn wɛ nyí mɛjitɔ́ ce lɛ. Xwè ayizɛ́n ɖó wɛ un ɖè có, é dlɛ́n alɔ dó mì, bo ɖɔ: “Hwɛ ɖɔ wɛ un ɖè, etɛwu a ma ko bló baptɛm ǎ?” Un ɖɔ n’i ɖɔ un kpò ɖò vǔ, bɔ cobonu un na bló baptɛm ɔ, un ɖó na tuùn nǔ gegě ɖò Biblu mɛ, bo na lɛ́ ɖó nǔɖiɖi adodwé. Xósin ce jɛji n’i ǎ, b’ɛ ɖɔ nú gǎn’páa ce ɖɔ mɛmasí wɛ gbɛ́ dó nyi.

Amɔ̌, nǔ nyanya enɛ lɛ e jɛ dó mǐ jí é kpítí ǎ. Ðò kpaa mɛ ɔ, mɛ ɖěɖee nɔ nɔ Liban lɛ é jɔmɛ bo nɔ lɛ́ yí mɛ. Enɛ wu ɔ, mǐ kpéwú bo ɖɔ xó dó Biblu jí xá mɛ gegě ganji, bo lɛ́ bɛ́ Biblu kplɔnkplɔn xá mɛ sukpɔ́.

MǏ WÁ GBETA Ɔ KƆN BO NA SƐ̀ TƐN YÌ TÒ ÐEVO MƐ

Hwenu e un kpò ɖò wemaxɔmɛ yì wɛ é ɔ, nɔví sunnu winnyawinnya ɖé gosin Vénézuéla bo sɛ̀ tɛn wá Liban. É nɔ wá kplé lɛ ɖò agun mǐtɔn mɛ, bo jɛ tíntɔ́n xá nɔví nyɔnu ce Wafa jí. Hwenu ɖò yiyi wɛ é ɔ, ye wlí alɔ, bo sɛ̀ tɛn yì Vénézuéla. Ðò wema e Wafa nɔ wlán sɛ́dó mǐ lɛ é mɛ ɔ, é nɔ byɔ tɔ́ ce ɖɔ xwédo ɔ bǐ ni sɛ̀ tɛn wá Vénézuéla. É nɔ wà mɔ̌, ɖó é jɛ dò mǐtɔn tawun wutu. Wǎgbɔ tɔn ɔ, mǐ sè xó tɔn, bo wá gbeta ɔ kɔn bo sɛ̀ tɛn!

Mǐ yì Vénézuéla ɖò 1953, bo yì jɛ Caracas, ɖò malin-malin dó togán ɔ sín agbasá. Ðó un kpò ɖò vǔ wutu ɔ, un nɔ ba tawun bo na mɔ togán ɔ hwenu e é na ɖò mɔ̌to tɔn vɛnkpɛnvɛnkpɛn ɔ mɛ, bo na ɖò wiwáyi wɛ é. Amɔ̌, huzuhuzu sɔgbe xá tò yɔyɔ̌ e mɛ mǐ wá é, gbè tò ɔ tɔn, aca tò ɔ tɔn, nǔ e è nɔ ɖu ɖò finɛ lɛ é, kpo lee ayǐ mɛ ɖè é kpo bɔwǔ ɖebǔ nú mɛjitɔ́ ce lɛ ǎ. Nǔgbo ɔ, nǔ lɛ wɛ jɛ mimǎ ye jí kɛɖɛ, bɔ nǔ baɖabaɖa ɖé jɛ.

NǓ BAÐABAÐA ÐÉ JƐ

Lanmɛ tɔ́ ce tɔn jɛ finfan jí. É kpaca mǐ tawun, ɖó kaka jɛ hwenɛnu ɔ, é gbɔn ɖě n’i ǎ, é ɖò ganji ɖò lanmɛ. Mǐ sixu ɖɔ ɖɔ é kún jɛ azɔn kpɔ́n ó. È wá mɔ kansɛ́ɛ ɖé n’i, bɔ è ɖó na w’azɔ̌ n’i. É blawǔ ɖɔ é kú ɖò aklunɔzán gbla ɖokpo gudo.

Mǐ sixu ɖɔ lee nǔ enɛ e jɛ é blawǔ nú mǐ sɔ é ǎ. Xwè 13 kpowun ɖó wɛ jɛn un ɖè hwenɛnu. Ahwi xò mǐ, b’ɛ cí ɖɔ zǎn wɛ kú dó mǐ kéze ɖɔhun. Nú táan ɖé ɔ, é vɛwǔ nú nɔ ce, b’ɛ na dɛ ɖò kú tɔ́ mǐtɔn tɔn nu. É ɖò mɔ̌ có, mǐ wá mɔ ɖɔ gbɛ̀ kpò ɖò nukɔn, bɔ kpo alɔdó Jehovah tɔn kpo ɔ mǐ dɛ ɖ’enu. Xwè 16 ɖó wɛ un ɖè bo yí kúnnuɖewema wemaxɔmɛ linsinmɛ tɔn tɔn, bo jló vɛ́návɛ́ná bá nɔ gudo nú xwédo ce.

Ðò hwe ɖokpo ɔ nu ɔ, nɔví ce Sana wlí alɔ xá Rubén Araujo, ee ko yí kúnnuɖewema Galadi tɔn bo lɛkɔ wá Vénézuéla é. Ye wá gbeta ɔ kɔn bá sɛ̀ tɛn yì New York. Enɛ zɔ́n bɔ hwenu e xwédo ɔ ɖɔ nyi na yì kplɔnyiji-alavɔ é ɔ, un mɔ mɛ e kpa un na nɔ é. Hwenu e un ɖò nɔví ce kpo asú tɔn kpo gɔ́n é ɔ, kpɔ́ndéwú ɖagbe yetɔn d’alɔ mì tawun bɔ un yì nukɔn ɖò gbigbɔ lixo. Gɔ́ na ɔ, nɔví sunnu e zin ɖò gbigbɔ lixo é gegě wɛ ɖò agun e nɔ dó Espagne-gbè ɖò Brooklyn é mɛ. Xomɛ hun mì tawun ɖɔ un tuùn Milton Henschel kpo Frederick Franz kpo. Ye bǐ wɛ nɔ w’azɔ̌ ɖò Betɛli Brooklyn tɔn.

Ee xwè nukɔntɔn e un bló ɖò kplɔnyiji-alavɔ ɖò New York é xwè vivɔnu é ɔ, un jɛ tamɛ lin dó nǔ e wà wɛ un ɖè ɖò gbɛzán ce mɛ é wu jí. Un xà nǔ dó Klisanwun ɖěɖee sɔ́ nǔɖe lɛ dó nukɔn nú yeɖée ɖò sinsɛnzɔ́ Jehovah tɔn mɛ, bo nya gbě yetɔn é wu ɖò xójlawema e nɔ nyí Atɔxwɛ é mɛ, lobo lin tamɛ dó xóta enɛ lɛ jí dó nǔjɔnǔ mɛ. Un mɔ lě dò gbexosin-alijitɔ́ lɛ kpo mɛ ɖěɖee nɔ w’azɔ̌ ɖò Betɛli bo ɖò agun mǐtɔn mɛ lɛ é kpo ɖó awǎjijɛ sɔ é, b’ɛ nɔ jló mì tawun ɖɔ má cí ye ɖɔhun. Amɔ̌, un ko bló baptɛm hwenɛnu ǎ. É sɔ́ lín ǎ bɔ un mɔ ɖɔ é ɖò taji ɖɔ má sɔ́ gbɛzán ce jó nú Jehovah. Un wà mɔ̌, bɔ enɛ gudo ɔ, un bló baptɛm, ɖò 30 mars 1957.

GBETA TAJI LƐ KƆN WIWÁ

Un lɛ́ jɛ tamɛ lin dó gbeta ɖevo e kɔn un na wá é wu jí; enɛ wɛ nyí sinsɛnzɔ́ hwebǐnu tɔn. Gbexosin-alijitɔ́zɔ́ wiwa nɔ jló mì tawun. Amɔ̌, un nɔ mɔ ɖɔ gbeta enɛ kɔn wiwá na vɛwǔ. Nɛ̌ un ka sixu wà nǔ we lɛ zɛɛn gbɔn? Enɛ wɛ nyí ɖɔ un na nyí gbexosin-alijitɔ́, bo lɛ́ ɖò kplɔnyiji-alavɔ yì wɛ. Nyi kpo xwédo ce kpo wlán wema gegě sɛ́dó mǐɖée, bɔ un tinmɛ nú ye ɖò wema-sɛ́dó-mɛ lɛ mɛ ɖɔ un na jó azɔ̌mɛ dó, bo na lɛkɔ yì Vénézuéla, bo na huzu gbexosin-alijitɔ́.

Un lɛkɔ yì Caracas ɖò juin 1957. Amɔ̌, un mɔ ɖɔ lee xwédo ce ɖè é kún nyɔ́ ó. É byɔ ɖɔ mɛ ɖevo ni nɔ lɛ́ hɛn akwɛ wá xwédo ɔ mɛ. Nɛ̌ un ka sixu d’alɔ gbɔn? È xwlé azɔ̌ ɖé mì ɖò akwɛsɛxwetɛn ɖé, amɔ̌ un jló tawun bá wà gbexosin-alijitɔ́zɔ́. È na ɖɔ ɔ, hwɛjijɔ e wu un lɛkɔ é nɛ. Un kánɖeji bá wà nǔ we lɛ bǐ. Nú xwè mɔ̌kpan ɔ, un nɔ w’azɔ̌ hwebǐnu ɖò akwɛsɛxwetɛn ɔ, bo ka lɛ́ ɖò gbexosin-alijitɔ́zɔ́ ce wà wɛ. Un ko ján sɔmɔ̌ kpɔ́n ǎ, mɔ̌ jɛn un ma ka lɛ́ ɖ’awǎjijɛ sɔmɔ̌ kpɔ́n ǎ é nɛ!

Nǔ e lɛ́ gɔ́ sò nú awǎjijɛ ce é wɛ nyí Sylvia e un xò gò bɔ mǐ da mǐɖée é. Nɔví nyɔnu Allemagne-nu ɖɛkpɛɖɛkpɛ ɖé wɛ n’i, bo lɛ́ yí wǎn nú Jehovah tawun. É kpo mɛjitɔ́ tɔn lɛ kpo sɛ̀ tɛn wá Vénézuéla hwe ɔ nu. Mǐ wá jì vǐ we, sunnu ɖokpo, nyɔnu ɖokpo, Michel kpo Samira kpo. Un lɛ́ jɛ nukún kpé dó nɔ ce wu jí. É wá jɛ akpá mǐtɔn. Nǔgbo wɛ ɖɔ un ɖó na ɖó gbexosin-alijitɔ́zɔ́ ce te, bo na dó kpé nukún dó xwédo ce wu có, un kpò ɖò kan ɖó dó Mawuxóɖiɖɔzɔ́ ɔ wu wɛ. Nyi kpo Sylvia kpo nɔ nyí gbexosin-alijitɔ́ alɔgɔtɔ́ hweɖebǔnu e mǐ kpéwú é, ɖò gbɔjɛhwenu lɛ.

GBETA TAJI ÐEVO

Vǐ lɛ kpò ɖò wemaxɔmɛ yì wɛ, cobɔ nǔ e xó un ɖɔ ɖò bǐbɛ̌mɛ xóta elɔ tɔn é jɛ. Un na ɖɔ xó jɔ xó ɔ, un vo tawun, bɔ mɛ ɖevo lɛ nɔ lɛ́ ɖó sísí nú mì ɖò akwɛsɛxwetɛn e un nɔ w’azɔ̌ ɖè é. É ka ɖò mɔ̌ có, nǔ taji e ba wɛ un ɖè é wɛ nyí ɖɔ mɛ lɛ ni tuùn ɖɔ un nyí Kúnnuɖetɔ́ Jehovah tɔn. Un kpò ɖò tamɛ lin dó nǔ e wá ayi ce mɛ ɖò azǎn enɛ jí é jí wɛ. Enɛ wu ɔ, nyi kpo asì ce kpo jinjɔn ayǐ bo ɖɔ xó dó akwɛzinzan mǐtɔn wu. Enyi un ɖó azɔ̌wiwa ɖò akwɛsɛxwetɛn ɔ te ɔ, ye na sú akwɛ ɖaxó ɖé mì, dó nyi mì. Ðó mǐ ma ɖu axɔ́ ǎ wutu ɔ, mǐ mɔ ɖɔ enyi mǐ zán gbɛ̀ e bɔkun é ɔ, akwɛ e mǐ na zán dó kpé nukún dó mǐɖée wu nú hwenu línlín é kún na hán mǐ ó.

Gbeta enɛ kɔn wiwa d’ayihun ǎ, amɔ̌, asivɛ́ ce kpo nɔ ce kpo nɔ gudo nú mì tawun. Enɛ wu ɔ, un lɛ́ jló na nyí gbexosin-alijitɔ́. É víví nú mì tawun. Nǔ lɛ zawě dìn, amɔ̌, é sɔ́ lín ǎ bɔ mǐ sè wɛn maɖónukún ɖé.

NǓ MAÐÓNUKÚN ÐÉ JƐ!

Gbè ɖokpo ɔ, dotóo mǐtɔn ɖɔ nú mǐ ɖɔ Sylvia ɖò xò. É kpaca mǐ mɛ we lɛ bǐ. É víví nú mǐ tawun, é ɖò mɔ̌ có, un lɛ́ kpò ɖò gbeta e kɔn un wá bo na nyí gbexosin-alijitɔ́ é flín wɛ. Un ka sixu lɛ́ wá huzu gbexosin-alijitɔ́ à? Mǐ jlá linlin mǐtɔn kpo lee nǔ nɔ cí nú mǐ é kpo ɖó, bo jɛ nukún ɖó mɛ yɔyɔ̌ e na wá xwédo ɔ mɛ é jí. Amɔ̌, un ka na lɛ́ wá kpé gbexosin-alijitɔ́zɔ́ ɔ wu à jí wɛ un nɔ kanbyɔ nyiɖée.

Ee mǐ ɖɔ xó dó nǔ e gbé nya wɛ mǐ ɖè é jí gudo é ɔ, mǐ wá gbeta ɔ kɔn ɖɔ un ɖó na lɛ́ huzu gbexosin-alijitɔ́. Mǐ jì vǐ mǐtɔn Gabriel ɖò avril 1985. Un ka ko jó azɔ̌wiwa ɖò akwɛsɛxwetɛn ɔ dó nɛ, bo lɛ́ jɛ gbexosin-alijitɔ́ hwebǐnu tɔn sín azɔ̌ wà jí ɖò juin 1985. É wá sù hweɖenu bɔ è jɔwǔ mì bɔ un na nɔ w’azɔ̌ xá Wěɖegbɛ́ Alaxɔ tɔn. Amɔ̌, alaxɔ ɔ ɖò Caracas ǎ, enɛ xlɛ́ ɖɔ un ɖó na zɔn ali nú kilomɛtlu 80, azɔn we, alǒ atɔn ɖò aklunɔzán gbla ɖokpo mɛ.

MǏ LƐ́ SƐ̀ TƐN

Toxo La Victoria tɔn mɛ wɛ alaxɔ ɔ ɖè, enɛ wu ɔ, mǐ wá gbeta ɔ kɔn, bá yì jɛ dɔ̌n bo na dó sɛkpɔ́ Betɛli ɔ. Huzuhuzu ɖaxó ɖé wɛ é nyí nú mǐ bǐ. Un sixu gɔn lee un yí wǎn nú xwédo ce, bɔ nǔ tɔn nɔ lɛ́ sù nukún ce mɛ sɔ é ɖɔ ǎ. Lee ye wà nǔ gbɔn é d’alɔ tawun. Nɔví nyɔnu ce Baha ɖò gbesisɔmɛ bo na kpé nukún dó nɔ mǐtɔn wu. Michel ko da asì, amɔ̌, Samira kpo Gabriel kpo kpò ɖò akpá mǐtɔn. Tɛnsisɛ yì La Victoria na byɔ ɖɔ ye ni jó xɔ́ntɔn yetɔn e ɖò Caracas lɛ é dó. Gɔ́ na ɔ, asivɛ́ ce Sylvia ɖó na huzu sɔgbe xá lee nǔ lɛ nɔ yì gbɔn ɖò toxo kpɛví ɖé mɛ é, ɖó é sɔ́ nyí azinkan tò ɔ tɔn e mɛ gbɛtɔ́ sukpɔ́ ɖè, bɔ alɔnu mɛ lɛ tɔn nɔ lɛ́ ján tawun é mɛ wɛ mǐ ɖè dìn ǎ. Mǐ ɖó na lɛ́ kplɔ́n lee è nɔ nɔ xwé kpɛví ɖé gbè gbɔn é. È na ɖɔ ɔ, tɛnsisɛ sín Caracas yì La Victoria na byɔ nǔ gegě.

Amɔ̌, nǔ lɛ lɛ́ huzu. Gabriel da asì, bɔ Samira lɔ jɛ éɖée sí. Enɛ gudo ɔ, è ylɔ́ nyi kpo Sylvia kpo dó Betɛli ɖò 2007; mǐ ɖò wǔjɔmɛ enɛ sín vivǐ ɖu wɛ kaka jɛ égbé. Vǐ sunnu ɖaxó mǐtɔn Michel nyí mɛxo agun tɔn ɖé, bo lɛ́ ɖò gbexosin-alijitɔ́zɔ́ wà wɛ, é kpo asì tɔn Monica kpo. Gabriel lɔ nyí mɛxo agun tɔn, bɔ é kpo asì tɔn Ambra kpo nɔ nɔ Italie. Gɔ́ nú gbexosin-alijitɔ́zɔ́ e wà wɛ Samira ɖè é ɔ, é nɔ lɛ́ nɔ xwé tɔn gbè dó w’azɔ̌ sɛ́dó Betɛli.

GBETA ÐOKPO Ɔ LƐ KƆN JƐN UN NA LƐ́ WÁ

È na ɖɔ xó jɔ xó ɔ, gbeta taji gegě kɔn wɛ un wá ɖò gbɛzán ce mɛ. Amɔ̌, nǔ ɖě vɛ́ nú mì ǎ. Enyi é lɛ́ byɔ ɖɔ má wá gbeta ce lɛ kɔn ɔ, nǔ ɖokpo ɔ lɛ jɛn un na lɛ́ wà. Nǔ e wu un kpé bo wà nú Jehovah lɛ é bǐ wɛ sù nukún ce mɛ. Ee xwè lɛ ɖò yiyi wɛ é ɔ, un wá mɔ lee é ɖò taji sɔ ɖɔ è ni ɖó kancica syɛnsyɛn xá Jehovah é. Enyi gbeta e kɔn mǐ ɖó na wá lɛ é na bo tlɛ ɖò klewun, alǒ ɖò taji ɔ, mǐ sixu mɔ fífá Mawu tɔn e “hugǎn nukúnnúmɔjɛnǔmɛ gbɛtɔ́ tɔn bǐ” é. (Fili. 4:6, 7) Sylvia kpo nyi kpo ɖu vivǐ sinsɛnzɔ́ xɔ akwɛ mǐtɔn tɔn ɖò Betɛli, bo mɔ ɖɔ Jehovah kɔn nyɔna dó gbeta ɖěɖee kɔn mǐ wá ɖò gbɛzán mǐtɔn mɛ lɛ é jí, ɖó mǐ sɔ́ ɛ ɖó nukɔn hwebǐnu ɖò gbɛzán mǐtɔn mɛ.