Nǔ E Nǔxatɔ́ lɛ Kanbyɔ lɛ É

Gbeɖiɖe ɖé ɖò Levíi ví lɛ 19:16 mɛ bo ɖɔ ɖɔ ‘mi ma dóhwɛ nɔzo mitɔn dó acɛ jí, bonu é sín enɛ wu, bɔ è ɖó kúhwɛ́ n’i ó.’ Etɛ ka nyí tinmɛ tɔn? Etɛ é ka sixu kplɔ́n mǐ?

Jehovah ɖɔ nú Izlayɛli-ví lɛ ɖɔ ye ni nyí togun mímɛ́ ɖé. Bo na dó d’alɔ ye bonu ye na nɔ mimɛ̌ jí ɔ, é ɖɔ nú ye ɖɔ: ‘Mi ma ɖò hɛ̌n dó nɔzo mitɔn kpé wɛ ó; mi ma ka dóhwɛ nɔzo mitɔn dó acɛ jí, bonu é sín enɛ wu, bɔ è ɖó kúhwɛ́ n’i ó. Nyɛ wɛ nyí Jehovah.’—Lev. 19:2, 16.

Xógbe Ebléegbe tɔn e è lilɛ ganji é ɖé wɛ na “mi ma ka dóhwɛ nɔzo mitɔn dó acɛ jí” ó ɔ. Etɛ ka nyí tinmɛ tɔn? Wema Jwifu lɛ tɔn ɖé ɖɔ xó dó wema Levíi-ví lɛ tɔn wu bo ɖɔ: “Nukúnnú mimɔ jɛ akpáxwé wemafɔ ɔ tɔn enɛ mɛ vɛwǔ, ɖó xógbe Ebléegbe tɔn e è zán é zawě ǎ; ɖò kpaa mɛ ɔ, tinmɛ tɔn wɛ nyí ‘ma sɛkpɔ́ ó.’”

Akɔwé ɖé lɛ lin ɖɔ nukɛgbe enɛ cá kan xá wemafɔ 15gɔ́ e ɖɔ xó elɔ é: “Mi ma dóhwɛ agɔ ó. Mi ɖò hwɛ ɖɔ wɛ hǔn, mi ma kpɔ́n wamamɔnɔ nukúnta dó ɖɔ hwɛ ó, mi ma ka kpɔ́n dɔkunnɔ nukúnta dó ɖɔ hwɛ ó. Mi xwedó hwɛjijɔ dó ɖɔ hwɛ.” (Lev. 19:15) Enɛ gudo ɔ, gbeɖiɖe e ɖò wemafɔ 16gɔ́ ɔ mɛ, bo ɖɔ ‘è ma dóhwɛ nɔzo mɛtɔn dó acɛ jí ó’ é sín tinmɛ sixu nyí ɖɔ Izlayɛli-ví lɛ ɖó na wà nǔ agɔ ɖě xá nɔzo yetɔn ɖò hwɛɖiɖɔ linu, ɖò ajɔ̌ kpáxwé, alǒ ɖò xwédo mɛ ǎ. Gɔ́ na ɔ, Izlayɛli-ví ɖé ɖó na ɖu ahizi ba dó ɖu lè ǎ. Nǔgbo wɛ ɖɔ mǐ ɖó na wà nǔ enɛ lɛ ǎ, amɔ̌, mǐ sixu lɛ́ mɔ nǔ jɛ nukɛgbe e ɖò wemafɔ 16gɔ́ ɔ mɛ é mɛ ɖò ali ɖagbe hugǎn ɖé nu.

Ð’ayi akpáxwé nukɔntɔn wemafɔ ɔ tɔn wu. Mawu ɖegbe nú mɛ e ɖò togun tɔn mɛ lɛ é ɖɔ ye ni ma nɔ ɖò hɛ̌n dó nɔzo yetɔn kpé wɛ ó. Hɛn dó ayi mɛ ɖɔ hɛ̌ndómɛ syɛn hú mɛnúɖiɖɔ, ɖó hɛ̌ndómɛ sixu lɛ́ dɔn tagba lɛ nyi ayǐ. (Nǔx. 10:19; Nǔt. 10:12-14; 1 Tim. 5:11-15; Ja. 3:6) Hwɛhwɛ ɔ, enyi è ɖɔ mɛɖé dó hɛ̌n mɛ ɔ, ɖiɖɔ wɛ è ɖè ɖɔ é sɔ́ jlǒ dó ɖó adingban, bá dó kɔn cí dó nyikɔ ɖagbe e ɖò mɛ ɖevo wu é wu. Mɛ e nɔ dó hɛ̌n mɛ é ɖé sixu nɔ ɖekúnnu agɔ dó mɛ ɖevo lɛ wu, enyi mɔ̌ wiwa na bo tlɛ sixu dɔn kú wá nú mɛ e dó hɛ̌n wɛ é ɖè é ɔ nɛ. Flín ɖɔ hɛ̌ndómɛtɔ́ lɛ ɖ’adingban dó Nabɔti kɔ, bɔ é sín enɛ wu, bɔ è nyi hwǎn dó è kaka bɔ é kú. (1 Axɔ́. 21:8-13) Enɛ wu ɔ, lee è ɖɔ gbɔn ɖò Levíi ví lɛ 19:16 mɛ é ɔ, mɛ e nɔ dó hɛ̌n mɛ é ɖé sixu dóhwɛ nɔzo tɔn d’acɛ jí, bɔ é na dɔn kú wá n’i.

Gɔ́ na ɔ, wangbɛnúmɛ nɔ zɔ́n bɔ è nɔ lɛ́ dó hɛ̌n mɛ. Ðò 1 Jaan 3:15 mɛ ɔ, mǐ xà ɖɔ: “Mɛ ɖebǔ gbɛ́ wǎn nú nɔví tɔn hǔn, mɛhutɔ́ wɛ é nyí; mi ka tuùn ɖɔ mɛhutɔ́ ɖebǔ kún ɖó gbɛ̀ mavɔmavɔ ó.” Gɔ́ na ɔ, ee Mawu ɖɔ nú ye ɖɔ: ‘Mi ma dóhwɛ nɔzo mitɔn dó acɛ jí ó’ gudo é ɔ, é ɖɔ gɔ́ na ɖɔ: “Mi ma gbɛ́ wǎn nú nɔzo mitɔn ó.”—Lev. 19:17.

Enɛ wu ɔ, gbeɖiɖe e è ma nɔ mɔ mɔ̌ ǎ, b’ɛ ɖò Levíi ví lɛ 19:16 mɛ é ɖè wě syɛnsyɛn ɖé xá Klisanwun lɛ. Mǐ ɖó na nɔ nyi alɔ nú linlin masɔgbe lɛ bǐ, bo ka na nɔ lɛ́ dó hɛ̌n mɛ ɖevo gbeɖé ǎ. Enyi ‘mǐ nɔ dóhwɛ nɔzo mǐtɔn dó acɛ jí,’ enɛ wɛ nyí ɖɔ, mǐ nɔ dó hɛ̌n ɛ, ɖó nǔ tɔn nɔ jɛ mǐtɔn jí ǎ, alǒ mǐ nɔ jló gbɛ̀ tɔn wutu ɔ, enɛ sixu nyí kúnnuɖenú ɖé ɖɔ mǐ gbɛ́ wǎn n’i. Klisanwun lɛ ɖó na nyi alɔ nú jijɔ enɛ bǐ mlɛ́mlɛ́.—Mat. 12:36, 37.