Mǐ kplɔ́n nǔ ɖo Nǔkplɔ́nmɛtɔ́ ɖaxó mǐtɔn gɔ́n ɖo gbɛzán mǐtɔn bǐ mɛ

KPƆ́NDÉWÚ MƐJITƆ́ CE LƐ́ TƆN

Ðo 1957 ɔ, mɛjitɔ́ ce lɛ́ sɛ tɛn sín Italie yi Kindersley, ɖo Saskatchewan, ɖo Canada. Táan kléwún ɖé gúdo ɔ, yě mɔ nǔgbó ɔ, bɔ é húzú nǔ e ɖo tají hú gǎn ɖo gbɛzán mǐtɔn mɛ é. Un flín ɖɔ hwenu e un ɖo vǔ é ɔ, un zán hwenu ɖó kpɔ́ xá xwédo mǐtɔn ɖo sinsɛnzɔ́ ɔ mɛ nú azǎn gěgé, énɛ́ wú ɔ, un nɔ ɖɔ fanfún hweɖélɛ́nu ɖɔ un “wa gběxosín-alijítɔ́ alɔgɔ́tɔ́zɔ́” hwenu e un ɖo xwe tántɔn ɖó wɛ é!

Wamamɔnɔ wɛ nyí mɛjitɔ́ ce lɛ́ có, yě ka sɔ́ kpɔ́ndéwú ɖagbe ɖ’ayǐ ɖo vɔ̌ sísá dó Jexóva tamɛ linu. Ði kpɔ́ndéwú ɔ, ɖo 1963 ɔ, yě sa nǔɖókan yětɔn gěgé bá dó mɔ akwɛ́ bo yi kpléɖókpɔ́ akɔjɔkplé tɔn e è bló ɖo Pasadena, Californie ɖo États-Unis é. Ðo 1972 ɔ, mǐ zɔn ali nú kilomɛ́tlu 1000 mɔ̌ bo yi Trail, Colombie-Britannique ɖo Canada bo d’alɔ ɖo fí e mɛ e nɔ dó Italie gbe lɛ́ é nɔ nɔ é. Ayǐjíjláɖózɔ́ wɛ tɔ́ ce nɔ wa. É nɔ gbɛ́ ali e nɔ hun n’i nú é ná mɔ akwɛ́ gěgé lɛ́ é bá dó sixú sɔ́ ayi tɔn bǐ ɖó Jexóva sinsɛn jí.

Kpɔ́ndéwú e mɛjitɔ́ ce lɛ́ sɔ́ ɖ’ayǐ nú nyi kpó nɔví ce atɔn lɛ́ kpó é su nukún ce mɛ. Énɛ́ kplɔ́n nǔ mì tawun ɖo azɔ̌ Axɔ́súɖuto ɔ tɔn lɛ́ wiwa linu, bo lɛ́ kplɔ́n nǔ e un ma ná wɔn gbeɖé ǎ é ɖé mì, é wɛ nyí ɖɔ, ényí un sɔ́ Axɔ́súɖuto ɔ ɖó tɛn nukɔntɔn ɔ mɛ ɔ, Jexóva ná kpé nukún dó wǔ ce.—Mat. 6:33.

HWENU E UN BƐ́ SINSƐNZƆ́ HWEBǏNU TƆN É

Ðo 1980 ɔ, un wlí alɔ xá Debbie; nɔví nyɔ̌nu ɖɛkpɛ ɖɛkpɛ e sinsɛnzɔ́ wiwa nú Jexóva nɔ myá nukún ná é ɖé wɛ. Mǐ jló ná bɛ́ sinsɛnzɔ́ hwebǐnu tɔn sín azɔ̌, énɛ́ wú ɔ, sun atɔn ɖo alɔwlíwlí mǐtɔn gúdo ɔ, Debbie bɛ́ gběxosín-alijítɔ́zɔ́. Mǐ wlí alɔ b’ɛ ɖó xwe ɖokpó gúdo é ɔ, mǐ sɛ tɛn yi agun kpɛví e mɛ hudó ɖe é ɖé mɛ, bɔ nyi lɔ bɛ́ gběxosín-alijítɔ́zɔ́ xá ɛ.

Awakanmɛ wá kú mǐ hweɖénu bɔ mǐ jló ná gosín fínɛ́. Amɔ̌, cóbónú mǐ ná wa mɔ̌ ɔ, mǐ ɖɔ xó xá nukúnkpénǔwútɔ́ lɛ̌dó tɔn. É ɖɔ xójɔxó nú mǐ kpó wǎnyíyí kpó ɖɔ: “Mi lɔ tɔn ɖě ɖo wǔvɛ́ e mɔ wɛ mi ɖe é mɛ. Mi ɖo ayi sɔ́ ɖó nǔ e ma nyɔ́ ɖo ninɔmɛ mitɔn mɛ ǎ lɛ́ é jí wɛ dín. Amɔ̌, ényí mi ba nǔ ɖagbe lɛ́ ɔ, mi ná mɔ yě.” Wěɖexámɛ e sín hudó mǐ ɖó é pɛ́ɛ́ nɛ́. (Ðɛh. 141:5) Mǐ zán wěɖexámɛ ɔ afɔjíafɔjí bo yá wǔ ɖ’ayi wú ɖɔ nǔ ɖagbe gěgé ɖo fínɛ́ nǔgbó. Mɛ gěgé ɖo agun ɔ mɛ bo jló ná wa nǔ gěgé nú Jexóva, káká jɛ mɛ wínnyáwínnyá lɛ́ kpó mɛ ɖěɖěe mɛ e yě da é ma ɖo agun ɔ mɛ ǎ lɛ́ é ɖé lɛ́ kpó jí. Énɛ́ kplɔ́n nǔ tají ɖé mǐ. Mǐ kplɔ́n bo nɔ sɔ́ ayi ɖó nǔ ɖagbe lɛ́ jí, lobo nɔ nɔ te kpɔ́n Jexóva nú é ná ɖe ɖɛ wǔvɛ́ e ɖí xwi xá wɛ mǐ ɖe lɛ́ é ɖo hwetɔnnu. (Micée 7:7) Mǐ lɛ́vɔ́ ɖó awǎjijɛ, bɔ nǔ lɛ́ lɛ́ kpɔ́n te d’é jí.

Mɛ̌si ɖěɖěe kplɔ́n nǔ mǐ ɖo wěmaxɔmɛ gběxosín-alijítɔ́ lɛ́ tɔn nukɔntɔn e mǐ bló é hwenu lɛ́ é ko wa sinsɛnzɔ́ ɖo gbě ɖěvo jí kpɔ́n. Yě xlɛ́ fɔtóo yětɔn lɛ́ mǐ, bo ɖɔ wǔvɛ́ kpó nyɔ̌ná kpó ɖěɖěe yě mɔ hwenu e yě ɖo sinsɛnzɔ́ wa wɛ ɖo gbě ɖěvo jí lɛ́ é sín xó nú mǐ, bɔ énɛ́ flɔ́ zo dó glɔ̌ nú jlǒ e mǐ ɖó bá wa mɛsɛ́dózɔ́ é. Énɛ́ wú ɔ, mǐ wá gbeta ɔ kɔn bá sɔ́ mɛsɛ́dó nyínyí dó ɖó nǔ e gbé mǐ ná nya é.

Bo ná dó sɔ́ nǔ nú mǐɖée nú nǔ énɛ́ e gbé nya wɛ mǐ ɖe é ɔ, mǐ sɛ tɛn yi fí e è nɔ dó Flanségbe ɖe ɖo Québec, b’ɛ ɖó kilomɛ́tlu 4000 jɛjí dó Colombie-Britannique é. Énɛ́ ɖo xlɛ́xlɛ́ wɛ ɖɔ mǐ ná kplɔ́n nǔwalɔ ɖěvo kpó gbe ɖěvo kpó. Wǔvɛ́ ɖěvo wɛ nyí ɖɔ hweɖélɛ́nu ɔ, akwɛ́ káká ɖé nɔ ɖo mǐ sí ǎ. Hweɖénu ɔ, nǔ e kpo nú mǐ bɔ mǐ ná ɖu é bǐ jɛ́n nyí dokwín wélí e glenɔ ɖé ná gbe mǐ bɔ mǐ nɔ ba é. Debbie nɔ sɔ́ dokwín énɛ́ lɛ́ dó ɖa nǔɖuɖu víví alɔkpa gěgé! Wǔvɛ́ énɛ́ lɛ́ ɖó fínɛ́ có, mǐ wa nǔ e wú mǐ kpé é bǐ bo dɛ kpó awǎjijɛ kpó. Hú gǎn bǐ ɔ, mǐ ɖ’ayi wú ɖɔ Jexóva ɖo nukún kpé dó mǐ wú wɛ.—Ðɛh. 64:11.

Gbe ɖokpó ɔ, mǐ yí apɛ́lu e mǐ ma ɖó nukún tɔn ǎ é ɖé. È ylɔ́ mǐ nú mǐ ná wa sinsɛnzɔ́ ɖo Betɛ́li Canada tɔn. Mǐ ko d’alɔ wěma mɛ bá yi wěmaxɔmɛ Galádi tɔn, énɛ́ wú ɔ, ylɔ̌ e è ylɔ́ mǐ é víví nú mǐ có, é ka lɛ́ vɛ́ nú mǐ. Amɔ̌, mǐ yí gbe nú ylɔ̌ e è ylɔ́ mǐ é. Ée mǐ yi é ɔ, mǐ kan nǔ élɔ́ byɔ́ nɔví súnnu Kenneth Little éé ɖo wěɖegbɛ́ alaxɔ ɔ tɔn mɛ é: “Nú è ka ylɔ́ mǐ nú wěmaxɔmɛ Galádi tɔn ɔ, nɛ̌ mǐ ka ná bló gbɔn?” É ɖɔ nú mǐ ɖɔ “ényí è ko ylɔ́ mi ɔ, mǐ ná wá ɖɔ xó dó énɛ́ wú.”

Aklúnɔzángbla ɖokpó gúdo ɔ, è ylɔ́ nyi kpó Debbie kpó bɔ mǐ ná yi Galádi. Énɛ́ wú ɔ, mǐ ɖó ná wá gbeta ɖé kɔn. Nɔví Little ɖɔ nú mǐ ɖɔ: “Mi ná bo tlɛ sɔ́ ɖěbǔ ɔ, hweɖélɛ́nu sixú wá su bɔ mi ná ɖɔ mǐ ko tuun ɔ, mǐ ná ko sɔ́ ɖě ɔ. Nǔ e mi sixú sɔ́ é ɖě nyɔ́ hú ɖě ǎ; Jexóva sixú kɔn nyɔ̌ná dó bǐ jí.” Mǐ yí gbe nú ylɔ̌ e è ylɔ́ mǐ nú Galádi é, bɔ xwe gěgé gúdo ɔ, mǐ wá mɔ ɖɔ xójɔxó wɛ nɔví Little ɖɔ nú mǐ. Hwɛhwɛ wɛ mǐ nɔ ɖɔ xó énɛ́ nú mɛ ɖěɖěe é nɔ byɔ́ ɖɔ yě ní sɔ́ sinsɛnzɔ́ e jló yě lɛ́ é ɖokpó é.

MƐSƐ́DÓZƆ́ WIWA

Akpakpa sɔ́ mǐ tawun ɖɔ mǐ ɖo wěmaxɔmɛví 24 e è ylɔ́ nú wěmaxɔmɛ Galádi tɔn sín klási 83​gɔ́ ɔ, ée è bló ɖo Brooklyn, New York ɖo avril 1987 lɛ́ é mɛ. Nɔví súnnu Ulysses Glass kpó Jack Redford kpó wɛ nyí mɛ̌si e kplɔ́n nǔ mɛ hú gǎn lɛ́ é. Sun atɔ́ɔ́n lɛ́ yá wǔ wa yi tawun, bɔ mǐ yí kúnnuɖewéma ɖo 6 septembre 1987. È sɛ́ mǐ, gɔ́ nú nɔví John Goode kpó Marie Goode kpó dó Haïti.

Sin 1962 e è nya mɛsɛ́dó lɛ́ sín Haïti é ɔ, è ko sɔ́ sɛ́ mɛsɛ́dó e yi Galádi é ɖě dó dɔ̌n ǎ. Mǐ yí kúnnuɖewéma b’ɛ bló aklúnɔzángbla atɔn gúdo é ɔ, mǐ bɛ́ sinsɛnzɔ́ wiwa ɖo Haïti ɖo agun kpɛví e mɛ wɛnjlátɔ́ 35 ɖe ɖo sókan ɖé mɛ é mɛ. Mǐ ɖo wínnyáwínnyá mɛ bo ka lɛ́ mɔ nǔ káká ɖé kpɔ́n ǎ, bɔ mǐɖokpónɔ wɛ lɛ́ ɖo mɛsɛ́dó lɛ́ sín xwégbe fí e mǐ ɖe é. Yatɔ́nɔ klókló wɛ nyí mɛ lɛ́ bɔ gěgé yětɔn lɛ́ sixú nɔ lɛ́ xa nǔ ǎ. Ðo xwe nukɔntɔn e mǐ bló ɖo mɛsɛ́dózɔ́ ɔ mɛ lɛ́ é mɛ ɔ, mɛ lɛ́ tɛ́n kpɔ́n bá flí zinkpo sín glɔ̌ nú acɛkpikpa e ɖo to ɔ nu é, ɖi nǔvɛ́mɛwúzɔnlin, bɔ jɔhɔn syɛ́nsyɛ́n lɛ́ lɔ gba nǔ.

Didɛ kpó awǎjijɛ kpó nɔví súnnu, gɔ́ nú nɔví nyɔ̌nu ɖěɖěe ɖo Haïti lɛ́ é tɔn mimɔ kplɔ́n nǔ gěgé mǐ. Gbɛ vɛ́ wǔ dó yě mɛ gěgé, amɔ̌, yě yí wǎn nú Jexóva kpó sinsɛnzɔ́ ɔ kpó. Nɔví nyɔ̌nu mɛxómɔ ɖé tíin bo nɔ sixú xa nǔ ǎ, é ɖo mɔ̌ có, é tuun wěmafɔ Biblu tɔn 150 mɔ̌ dó tamɛ. Tagba xá ɔ mɛ tɔn lɛ́ zɔ́n bɔ mǐ lɛ́ ba hú gǎn bá jlá ɖɔ Axɔ́súɖuto Mawu tɔn kɛ́ɖɛ́ jɛ́n sixú ɖe ɖɛ tagba gbɛtɔ́ lɛ́ tɔn. É víví nú mǐ tawun ɖɔ mɛ ɖěɖěe mǐ kplɔ́n Biblu xá jɛ nukɔn ɖo xá ɔ mɛ lɛ́ é ɖé lɛ́ wá húzú gběxosín-alijítɔ́ hwebǐnu tɔn, gběxosín-alijítɔ́ titewungbe kpó mɛxó agun tɔn kpó ɖo nukɔnmɛ.

Hwenu e un ɖo Haïti é ɔ, un xo go Trevor, mɛ wínnyáwínnyá ɖé wɛ bo nyí mɛsɛ́dó Mormon. Ali ɔ hun nú mǐ bɔ mǐ ɖɔ xó dó Biblu jí azɔn nabí ɖé. Xwe ɖé lɛ́ gúdo ɔ, é sɛ́ wěma e un ma ɖó nukún tɔn ǎ é ɖé dó mì. É wlán ɖɔ: “Un jló ná bló batɛ́mu ɖo kpléɖókpɔ́ e jawě é jí! Un jló ná lɛ́ kɔ yi Haïti bo ná wa gběxosín-alijítɔ́ titewungbe sín azɔ̌ ɖo fí énɛ́ ɖokpó ɔ e un nyí mɛsɛ́dó Mormon ɖe ɖ’ayǐ é.” É kpó asi tɔn kpó ka wa mɔ̌ nǔgbó nú xwe gěgé.

MǏ WA SINSƐNZƆ́ ÐO ELƆ́PU, BO WÁ WA ÐO AFLÍKA

È sɛ́ mǐ dó Elɔ́pu sín xá ɖé mɛ, fí e azɔ̌ Axɔ́súɖuto ɔ tɔn sín hɔn lɛ́vɔ́ wá hun ɖe é. Ðo 1992 ɔ, mǐ wá Ljubljana ɖo Slovénie, malínmálín dó fí e mɛjitɔ́ ce lɛ́ su ɖe cóbó wá sɛ tɛn yi Italie é. Ahwan kpo ɖo nǔ gba wɛ ɖo slǎ Yougoslavie xóxó ɔ tɔn mɛ. Alaxɔ Vienne tɔn ɖo Autriche gɔ́ nú azɔ̌xɔsá ɖěɖěe ɖo Zagreb ɖo Croatie kpó Belgrade ɖo Serbie kpó lɛ́ é wɛ nɔ kpé nukún dó wɛnjíjlázɔ́ ɔ wú ɖo gbě énɛ́ jí. Din ɔ, to e ɖo yěɖée sí lɛ́ é ɖokpó ɖokpó ɖó ná ɖó Betɛ́li yěɖésúnɔ tɔn.

Énɛ́ byɔ́ ɖɔ mǐ ní kplɔ́n gbe ɖěvo bo húzú sɔgbe xá lěe è nɔ wa nǔ gbɔn ɖo xá ɖěvo mɛ é. Ayǐ ɔ jí nu lɛ́ nɔ ɖɔ “Jezik je težek,” tínmɛ tɔn wɛ nyí “Gbe ɔ vɛ́ wǔ.” É ka vɛ́ wǔ nǔgbó! Gbejíninɔ nɔví súnnu kpó nɔví nyɔ̌nu kpó ɖěɖěe ɖo gbesisɔmɛ bo yí gbe nú hǔzúhúzú e tutoblónúnǔ ɔ bló lɛ́ é tɔn hun xomɛ nú mǐ tawun, bɔ mǐ lɛ́ mɔ lěe Jexóva kɔn nyɔ̌ná dó yě jí gbɔn é. Mǐ lɛ́ mɔ lěe Jexóva nɔ jlá nǔ lɛ́ ɖó kpó wǎnyíyí kpó hwebǐnu, bo nɔ lɛ́ wa mɔ̌ ɖo hwetɔnnu gbɔn é. Xwe ɖěɖěe mǐ bló ɖo Slovénie lɛ́ é ná hlɔ̌nhlɔ́n nǔ tootóbú e mǐ ko kplɔ́n lɛ́ é bɔ mǐ lɛ́ kplɔ́n nǔ yɔ̌yɔ́ ɖěvo lɛ́.

Amɔ̌, hǔzúhúzú ɖěvo lɛ́ lɛ́ kpo ɖo nukɔn. Ðo 2000 ɔ, è sɛ́ mǐ dó Côte d’Ivoire, ɖo gbadahwe jí Aflíka tɔn. Énɛ́ gúdo ɔ, ɖo novembre 2002 ɔ, è bɛ́ mǐ yi Sierra Leone ɖó tohwan wú. Fífó wɛ jɛ́n tohwan e è fun nú xwe 11 ɖo dɔ̌n é ɖe nɛ́. Côte d’Ivoire gigosín kplakpla mɔ̌ vɛ́ wǔ tawun. É ɖo mɔ̌ có, nǔ e mǐ ko kplɔ́n lɛ́ é d’alɔ mǐ bɔ mǐ kpo ɖo awǎjijɛ ɖó wɛ.

Mǐ sɔ́ ayi mǐtɔn bǐ ɖó mɛ tootóbú e ba ná kplɔ́n nǔgbó ɔ ɖo fínɛ́ lɛ́ é kpó nɔví vívɛ́ mǐtɔn e ko dɛ ɖo ahwan nu nú xwe mɔ̌kpán lɛ́ é kpó jí. Wamamɔnɔ wɛ yě nyí có, yě ka nɔ ba ná má nǔ e ɖo yě sí lɛ́ é xá mɛ ɖěvo lɛ́. Nɔví nyɔ̌nu ɖokpó ná awu ɖé lɛ́ Debbie. Ée Debbie xo nǔ kpɔ́n dó yǐyí tɔn wú é ɔ, nɔví nyɔ̌nu ɔ tɛ́ kú d’é jí bo ɖɔ: “Ðo ahwan ɔ hwenu ɔ, nɔví e ɖo to ɖěvo mɛ lɛ́ é wɛ nɔ gǔdo nú mǐ. Din ɔ, mǐdɛɛ lɛ́ wɛ ali ɔ hun ná bɔ mǐ ná d’alɔ.” Mǐ ba ná xwedó kpɔ́ndéwú yětɔn.

Mǐ wá lɛ́ kɔ yi Côte d’Ivoire, amɔ̌, hunnyahunnya lɛ́vɔ́ bɛ́ azɔn ɖěvo. Énɛ́ wú ɔ, ɖo novembre 2004 ɔ, sáki ɖokpó ɖokpó jɛ́n mǐ sɔ́ kpowun bɔ è bɛ́ mǐ dó jɔmɛhún kpɛví ɖé mɛ bɔ mǐ hɔn. Mǐ dɔ́ kɔ́mɛ ɖo fí e sɔ́ja France tɔn lɛ́ ɖó gɔnu ɖó é zǎn ɔ mɛ, bo wá dó jɔmɛhún yi Suisse ayǐhɔ́ngbe tɔn. Ée mǐ wá alaxɔ ɔ mɛ é ɔ, mɛ e ɖo wěɖegbɛ́ alaxɔ tɔn mɛ lɛ́ é kpó wěmaxɔmɛ devízɔ́ kplɔ́nkplɔ́n tɔn sín mɛ̌si lɛ́ kpó, gɔ́ nú asi yětɔn lɛ́ yí mǐ kpó akpakpa sɔ́ mɛ kpó, zunfán mǐ, ná nǔɖuɖu zozo kpó cokoláá Suisse tɔn gěgé kpó mǐ. É byɔ́ lanmɛ nú mǐ tawun.

È sɛ́ mǐ dó Ghana nú hwenu ɖé, bɔ énɛ́ gúdo ɔ, ée hunnyahunnya ɔ xwɛ ɖo Côte d’Ivoire gúdo é ɔ, è lɛ́ sɛ́ mǐ dó dɔ̌n. Xomɛnyínyɔ́ kplékplé nɔví lɛ́ tɔn tɔn d’alɔ mǐ bɔ mǐ dɛ ɖo děyi děyi énɛ́ e ɖó adohu adohu nú mɛ lɛ́ é kpó azɔ̌ hwenu kléwún tɔn énɛ́ lɛ́ kpó nu. É ná bo tlɛ nyí ɖɔ walɔ mɛ wɛ wǎnyíyí nɔví nɔví tɔn mɔ̌hun ko ɖe nú tutoblónúnǔ Jexóva tɔn ɔ, nyi kpó Debbie kpó mɔ nǔ jɛ wú ɖɔ mǐ kún ɖó ná sɔ́ dó mɔ nǔ e mǐ ɖó acɛ ná é gbeɖé ó. Nǔgbó ɔ, hwenu wǔvɛ́ tɔn énɛ́ lɛ́ zɔ́n bɔ mǐ kplɔ́n nǔ tají gěgé.

MǏ YI MOYEN-ORIENT

Ðo 2006 ɔ, hɔ̌nkan gbɛ ɔ tɔn mǐtɔn sɛ́ wěma ɖé dó mǐ bo sɛ́ mǐ dó Moyen-Orient. Énɛ́ ɖo xlɛ́xlɛ́ wɛ ɖɔ gbɛ wezun yɔ̌yɔ́, tagba yɔ̌yɔ́, gbe yɔ̌yɔ́ kpó nǔwalɔ yɔ̌yɔ́ lɛ́ kpó ko lɛ́ ɖo te kpɔ́n mǐ. Nǔ gěgé wɛ mǐ ná kplɔ́n ɖo xá énɛ́ e mɛ toxóɖiɖɔ kpó sinsɛn kpó kpa zinkpo ɖe é. Mǐ yí wǎn nú gbe vovo e è nɔ dó ɖo agun lɛ́ mɛ lɛ́ é, bo mɔ ɖɔ ényí è nɔ xwedó ali e tutoblónúnǔ ɔ nɔ xlɛ́ mɛ lɛ́ é ɔ, bǔninɔ nɔ tíin. Xomɛ nɔ hun mǐ tawun dó nɔví lɛ́ wú, ɖó gěgé yětɔn dɛ ɖo gbeklánxámɛ xwédo tɔn, wěmaxɔmɛvígbɛ́ lɛ́ tɔn, azɔ̌gbɛ́ lɛ́ tɔn kpó nɔzo yětɔn lɛ́ tɔn kpó nu kpó akɔ́nkpinkpan kpó.

Mǐ yi kpléɖókpɔ́ bǔnɔ e è bló ɖo Tel Aviv ɖo Israel ɖo 2012 é. Kpléɖókpɔ́ énɛ́ wɛ nyí azɔn nukɔntɔn e togun Jexóva tɔn kplé ɖó kpɔ́ ɖo xá ɔ mɛ, bo sukpɔ́ sɔmɔ̌ sín Pantekótu 33 H.M. tɔn é. Hwenu manáwɔn ɖé wɛ!

Ðo xwe énɛ́ vlamɛ ɔ, è sɛ́ mǐ dó bɔ mǐ yí ba to e mɛ è ɖó dogbó nú azɔ̌ mǐtɔn ɖe é ɖé kpɔ́n. Mǐ hɛn wěma mǐtɔn ɖé lɛ́ yi, ɖ’alɔ ɖo sinsɛnzɔ́ ɔ mɛ, bo lɛ́ bló kpléɖókpɔ́ lɛ̌dó tɔn kléwún kléwún lɛ́. Sɔ́ja e hɛn ahwanlínnyánú kpɔ́ gégé lɛ́ é kpó denu lɛ́ kpó gbɔn fí bǐ, amɔ̌, ényí mǐ kpó wɛnjlátɔ́ kwínwe lɛ́ kpó ɖó ayi te bo ɖo yiyi wɛ ɔ, mǐ nɔ mɔ ɖɔ mǐ ɖo ayijayǐ mɛ.

MǏ LƐ́ KƆ YI AFLÍKA

Ðo 2013 ɔ, è sɔ́ azɔ̌ vo sésé dó así nú mǐ bɔ mǐ ná wa ɖo alaxɔ Congo Kinshasa tɔn mɛ, to ɖaxó ɖɛkpɛ ɖɛkpɛ ɖé wɛ, amɔ̌, ya kpó ahwan kpó dó ya n’i tawun. Mǐ ɖɔ hwɛ̌ ɖɔ: “Mǐ tuun Aflíka; mǐ ɖo gbesisɔmɛ.” Amɔ̌, nǔ kpo kpɔ́ bɔ mǐ ná kplɔ́n, ɖo tají ɔ, nú nǔ e kan tomɛyiyi gbɔn xá e ma hun nukún ǎ lɛ́ é mɛ é. Mǐ mɔ nǔ ɖagbe e jí mǐ ná sɔ́ ayi ɖó lɛ́ é gěgé káká jɛ akwɛ́yózo e nɔ ɖo fínɛ́ cóbɔ nɔví lɛ́ nɔ ɖó kan dó nǔ wú bo nɔ lɛ́ ɖó awǎjijɛ é, wǎn e yě yí nú sinsɛnzɔ́ ɔ é, gǎn e yě nɔ dó bo nɔ yi kplé lɛ́ kpó kpléɖókpɔ́ lɛ́ kpó é jí. Mǐɖésúnɔ mɔ kpó nukún mǐtɔn kpó ɖɔ gǔdonɔnúmɛ Jexóva tɔn kpó nyɔ̌ná Jexóva tɔn kpó kɛ́ɖɛ́ wɛ nyí tɔn bɔ azɔ̌ Axɔ́súɖuto ɔ tɔn ɖo nukɔn yi wɛ. Ðo xwe ɖěɖěe mǐ wa sinsɛnzɔ́ hwebǐnu tɔn ná ɖo Congo lɛ́ é mɛ ɔ, mǐ kplɔ́n nǔ tají gěgé, bo lɛ́ zun xɔ́ntɔn gěgé bɔ yě cí xwédo ɖɔhun nú mǐ.

Ðo vivɔnu 2017 tɔn ɔ, è sɛ́ mǐ dó Afrique du Sud. Alaxɔ e mɛ mǐ wa sinsɛnzɔ́ ɖe lɛ́ é ɖě ko d’agba sɔ énɛ́ ǎ, mǐ ka tlɛ ko wa azɔ̌ e è sɔ́ d’así nú mǐ ɖo fínɛ́ lɛ́ é ɖě kpɔ́n ǎ. Nǔ gěgé wɛ mǐ ko lɛ́ ɖo nǎ kplɔ́n wɛ ɖo fínɛ́, amɔ̌, nǔ e mǐ mɔ wá yi lɛ́ é d’alɔ mǐ. Mǐ yí wǎn nú nɔví súnnu kpó nɔví nyɔ̌nu kpó tootóbú e ɖo didɛ wɛ sín xwe mɔ̌kpán ɖíe lɛ́ é. É jí wǔ tawun ɖɔ mɛ e gosín akɔta vovo mɛ bo lɛ́ ɖó nǔwalɔ vovo lɛ́ é wɛ ɖo azɔ̌ wa wɛ ɖo Betɛ́li ɔ có, bǔninɔ ka tíin. É bɔ wǔ bɔ è ná mɔ ɖɔ Jexóva ɖo fífá sín nyɔ̌ná kɔn dó togun tɔn jí wɛ, ɖó yě nɔ sɔ́ gbɛtɔ́ yɔ̌yɔ́ ɔ dó bo nɔ zán nǔgbódodó Biblu tɔn lɛ́.

Ðo xwe lɛ́ vlamɛ ɔ, è sɔ́ azɔ̌ e sɔ́ akpakpa mɛ lɛ́ é dó así nú nyi kpó Debbie kpó, mǐ húzú sɔgbe xá nǔwalɔ ɖěvo lɛ́, lobo lɛ́ kplɔ́n gbe ɖěvo lɛ́. É bɔ wǔ hwebǐnu ǎ, amɔ̌, mǐ nɔ mɔ xomɛnyínyɔ́ Jexóva tɔn hwebǐnu gbɔn tutoblónúnǔ tɔn kpó kplékplé nɔví lɛ́ tɔn kpó gblamɛ. (Ðɛh. 144:2) Nǔ tootóbú e sinsɛnzɔ́ hwebǐnu tɔn zɔ́n bɔ mǐ kplɔ́n lɛ́ é zɔ́n bɔ mǐ jɛ alɔ nú Jexóva hú gǎn.

Nǔ e mɛjitɔ́ ce lɛ́ kplɔ́n mì é, gǔdo e asi vívɛ́ ce Debbie nɔ nú mì é kpó kpɔ́ndéwú ɖaaɖagbe xwédo mǐtɔn gbigbɔ tɔn e gbɔn gbɛ ɔ bǐ mɛ é tɔn kpó nɔ su nukún ce mɛ tawun. Ényí nyi kpó asi ce kpó ɖo nukún dó sɔgúdo mǐtɔn mɛ kpɔ́n sɛ́dó wɛ ɔ, mǐ nɔ kán ɖ’é jí bá kpo ɖo nǔ kplɔ́n wɛ ɖo Nǔkplɔ́nmɛtɔ́ ɖaxó mǐtɔn gɔ́n.