È sɔ́ mɛ yɔ̌yɔ́ we gɔ́ nú mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é

ÐO 5 OCTOBRE 2024 ɔ, è xwlé ɖɔnúese bǔnɔ ɖé mɛ, é wɛ nyí ɖɔ è sɔ́ nɔví Jody Jedele kpó Jacob Rumph kpó bɔ yě ná nɔ Hǎgbɛ́ alixlɛ́mɛtɔ́ Kúnnuɖetɔ́ Jexóva tɔn lɛ́ tɔn mɛ. Nɔví súnnu we lɛ́ bǐ wɛ ko sɛn Jexóva kpó gbejíninɔ kpó nú xwe gěgé.

È ji nɔví súnnu Jedele ɖo Missouri ɖo États-Unis, bɔ mɛjitɔ́ tɔn lɛ́ nyí Kúnnuɖetɔ́ Jexóva tɔn. Xwédo tɔn nɔ nɔ xá e mɛ Kúnnuɖetɔ́ Jexóva tɔn lɛ́ ma sukpɔ́ sɔmɔ̌ ɖe ǎ é ɖé. Énɛ́ wú ɔ, é nɔ xo go nɔví e nɔ gosín xá vovo mɛ bo nɔ wá d’alɔ bɔ è nɔ jlá wɛn ɖagbe ɔ ɖo fínɛ́ lɛ́ é gěgé. Wǎnyíyí yětɔn kpó bǔninɔ yětɔn kpó dó wǔsyɛ́n lanmɛ n’i tawun. Wǐnnyáwínnyá mɛ tawun wɛ é ɖe bo bló batɛ́mu ɖo 15 octobre 1983. É nɔ ɖu sinsɛnzɔ́ ɔ sín vǐví, bɔ hwenu e é fó wěmaxɔmɛ gúdo é ɔ, é bɛ́ gběxosín-alijítɔ́ hwebǐnu tɔn sín azɔ̌ ɖo septembre 1989.

Hwenu e nɔví Jedele ɖo wǐnnyáwínnyá mɛ é ɔ, mɛjitɔ́ tɔn lɛ́ nɔ kplá é kpó nɔví nyɔ̌nu tɔn kpó bɔ yě nɔ ɖi sa yi Betɛ́li. Mɔ̌ e yě nɔ wa é dó wǔsyɛ́n lanmɛ nú vǐ lɛ́ bɔ yě sɔ́ sinsɛnzɔ́ wiwa ɖo Betɛ́li dó ɖó nǔ e gbé yě ná nya é; yě bǐ nya gbě tɔn bo kpé wú. Nɔví Jedele wá Betɛ́li Wallkill tɔn ɖo septembre 1990. Azɔ̌xɔsá ayǐ jíjláɖó tɔn wɛ é wa azɔ̌ ɖe jɛ nukɔn, bɔ ɖo nukɔnmɛ ɔ, é wá w’azɔ̌ ɖo Azɔ̌xɔsá e nɔ kpé nukún dó lanmɛ ná nɔ ganjí wú é.

Táan énɛ́ mɛ ɔ, agun e nɔ dó Espagnol bo ɖo malínmálín dó fínɛ́ lɛ́ é ɖo nukɔn yi wɛ bo ɖó hudó nɔví súnnu lɛ́ tɔn. Énɛ́ wú ɔ, nɔví Jedele yi jɛ agun lɛ́ ɖokpó mɛ, bo jɛ Espagnol kplɔ́n jí. É sɔ́ lín ǎ bɔ é xo go nɔví nyɔ̌nu Damaris, éé nyí gběxosín-alijítɔ́ bo ɖo lɛ̌dó ɖokpó ɔ mɛ xá ɛ é. Yě wá wlí alɔ ɖo nukɔnmɛ, bɔ é xo kpóɖó n’i ɖo Betɛ́li.

Ðo 2005 ɔ, yě ɖó sinsɛnzɔ́ e wa wɛ yě ɖe ɖo Betɛ́li é te bá yi kpé nukún dó mɛjitɔ́ yětɔn gbejínɔtɔ́ lɛ́ wú. Ðo táan énɛ́ mɛ ɔ, yě húzú gběxosín-alijítɔ́ hwebǐnu tɔn. Nɔví Jedele kplɔ́n nǔ mɛ ɖo Wěmaxɔmɛ sinsɛnzɔ́ gběxosín-alijítɔ́ tɔn, bo lɛ́ nɔ Wěɖegbɛ́ e nɔ kpé nukún dó dotóoxwéxó lɛ́ wú é kpó Wěɖegbɛ́ e nɔ kpé nukún dó xɔgbígbá wú ɖo gbě yětɔn jí é kpó mɛ.

Ðo 2013 ɔ, è lɛ́ ylɔ́ nɔví súnnu kpó nɔví nyɔ̌nu kpó Jedele wá Betɛ́li ɖó xɔgbígbázɔ́ Warwick tɔn wú. Sín hwenɛ́nu ɔ, yě lɛ́ wa sinsɛnzɔ́ ɖo Patterson kpó Wallkill kpó. Nɔví Jedele ko wa azɔ̌ ɖo Azɔ̌xɔsá e nɔ kpé nukún dó xɔgbígbá wú é bo lɛ́ wa azɔ̌ ɖo Azɔ̌xɔsá e nɔ ɖɔ nǔ dó lanmɛ ná nɔ ganjí xó lɛ́ wú é. Ðo mars 2023 ɔ, è sɔ́ ɛ alɔgɔ́tɔ́ nú Wěɖegbɛ́ sinsɛnzɔ́ tɔn. Ée é lin tamɛ dó azɔ̌ e è sɔ́ d’así n’i lɛ́ é bǐ jí é ɔ, é ɖɔ: “Ényí azɔ̌ yɔ̌yɔ́ lɛ́ wá xwetɔ́n ɔ, è sixú mɔ hweɖélɛ́nu ɖɔ nǔ lɛ́ hú agbɔ̌n mɛ. Amɔ̌, hwenɛ́nu wɛ è ɖó ná flín ɖɔ è ɖó ná gán jɛ Jexóva wú, ɖó é wɛ nyí mɛ e nɔ zɔ́n bɔ mǐ nɔ kpé nǔ ɖěbǔ e é zɔ́n mǐ é wú é.”

È ji nɔví súnnu Rumph ɖo Californie, ɖo États-Unis. Hwenu e é ɖo vǔ é ɔ, nɔ tɔn ɖó kplé lɛ́ kpó kúnnuɖegbé kpó yiyi te, cóbó ka tɛ́n kpɔ́n bo kplɔ́n ɛ nǔgbó Biblu tɔn lɛ́. Gɔ́ ná ɔ, ɖo xwe ɖokpó ɖokpó mɛ ɔ, nɔví Rumph nɔ yi ba gan’máa tɔn e nyí Kúnnuɖetɔ́ gbejínɔtɔ́ ɖé é kpɔ́n. É d’alɔ ɛ bɔ é ba ná kplɔ́n nǔ dó nǔgbó ɔ wú d’é jí, bɔ hwenu e é ɖo xwe 13 ɖó wɛ é ɔ, é yí gbe nú Biblu kplɔ́nkplɔ́n. Ðo 27 septembre 1992 ɔ, é bló batɛ́mu; wǐnnyáwínnyá mɛ wɛ é kpo ɖe tawun hwe ɔ nu. É nyɔ́ tawun ɖɔ nɔ tɔn lɛ́ jɛ kúnnuɖegbé kpó kplé lɛ́ kpó yi jí, bɔ xwédo ɔ blěbú yá wǔ yi nukɔn bo bló batɛ́mu.

Hwenu e nɔví Rumph ɖo wǐnnyáwínnyá mɛ é ɔ, é mɔ lěe gběxosín-alijítɔ́ lɛ́ nɔ ɖó awǎjijɛ gbɔn é. Énɛ́ wú ɔ, ée é fó wěmaxɔmɛ gúdo é ɔ, é bɛ́ gběxosín-alijítɔ́zɔ́ ɖo septembre 1995. Ðo 2000 ɔ, é sɛ tɛn yi Équateur bo ná yi wa sinsɛnzɔ́ ɖo fí e hudó sukpɔ́ ɖe é. Fínɛ́ wɛ é xo go Inga e nyí nɔví nyɔ̌nu gběxosín-alijítɔ́ ɖé bo gosín Canada é ɖe, bɔ yě wá wlí alɔ ɖo nukɔnmɛ. Yě bɛ́ alɔwlíwlí sín gbɛzán yětɔn ɖo Équateur sín toxo e mɛ gbɛ̌ta wɛnjlátɔ́ lɛ́ tɔn kpɛví ɖé ɖe é mɛ. Agun ɖaxó wɛ é ko nyí din.

É wá yá é ɔ, è sɔ́ nɔví súnnu kpó nɔví nyɔ̌nu kpó Rumph gběxosín-alijítɔ́ titewungbe, bɔ ɖo nukɔnmɛ ɔ, yě wá wa lɛ̌dózɔ́. Ðo 2011 ɔ, è ylɔ́ yě nú klási 132​gɔ́ Galádi tɔn. Ée yě yí kúnnuɖewéma gúdo é ɔ, yě wa sinsɛnzɔ́ ɖo awa vovo gbɛ ɔ tɔn lɛ́ xwé, bo ɖu sinsɛnzɔ́ alɔkpa vovo lɛ́ sín vǐví, ɖi sinsɛnzɔ́ wiwa ɖo Betɛ́li, mɛsɛ́dózɔ́ kpó lɛ̌dózɔ́ kpó. È lɛ́ jɔ wǔ nɔví Rumph b’ɛ kplɔ́n nǔ mɛ ɖo Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́.

É sín jɛmɛjí Covid-19 wú bɔ nɔví súnnu kpó nɔví nyɔ̌nu kpó Rumph lɛ́ kɔ yi États-Unis. È ylɔ́ yě wá Betɛ́li Wallkill tɔn, bo kplɔ́n azɔ̌ nɔví Rumph ɖo Azɔ̌xɔsá sinsɛnzɔ́ tɔn. Nukɔnmɛ ɔ, è lɛ́ lɛ́ kɔ nú yě sɛ́dó alaxɔ Équateur tɔn mɛ, bɔ nɔví Rumph nɔ Wěɖegbɛ́ alaxɔ ɔ tɔn mɛ. Ðo 2023 ɔ, è lɛ́ sɛ́ yě dó Warwick. Ðo janvier 2024 ɔ, è sɔ́ nɔví Rumph alɔgɔ́tɔ́ nú Wěɖegbɛ́ sinsɛnzɔ́ tɔn. Ée é lin tamɛ dó fí e é wa sinsɛnzɔ́ ɖe lɛ́ é jí gúdo é ɔ, é ɖɔ: “Nǔ e nɔ zɔ́n bɔ sinsɛnzɔ́ ɖé nɔ nyí nǔ bǔnɔ é nɔ nyí fí e è wa ɖe é gbeɖé ǎ, loɔ, mɛ e wa sinsɛnzɔ́ xá wɛ è ɖe lɛ́ é wú wɛ é nɔ sín.”

Azɔ̌ syɛ́nsyɛ́n e nɔví énɛ́ lɛ́ wa lɛ́ é su nukún mǐtɔn mɛ tawun, bɔ yě “kpo ɖo mɛ vívɛ́ná nyí nú [mǐ] wɛ.”—Filí. 2:29.