Etɛwu Mǐ ka Ðó Na Nɔ Kplé Bo Sɛ̀n Mawu?

1-3. (a) Nɛ̌ Klisanwun lɛ ka nɔ xlɛ́ ɖɔ kplékplé ɖó kpɔ́ nɔ sɔ́ akpàkpà emi gbɔn? (Kpɔ́n fɔtóo e ɖò bǐbɛ̌mɛ é.) (b) Etɛ jí mǐ ka na ɖɔ xó dó ɖò xota elɔ mɛ?

HWENU e Corinna ɖó xwè 17 é ɔ, è wlí nɔ tɔn bo sɔ́ ɛ yì ɖó fí e è nɔ ɖó azɔ̌ syɛnsyɛn kɔ jí nú mɛ ɖè é ɖò fí ma yá fí ɖé. Nukɔnmɛ ɔ, è kplá Corinna lɔmɔ̌ sín xwè tɔn gbè bo bló kilomɛtlu afatɔ́n mɔkpan dó jǐ tɔn yì Sibérie. Finɛ ɔ, é nɔ w’azɔ̌ ɖò gle ɖé ta, bɔ è nɔ doya n’i kannumɔ ɖé ɖɔhun. Hweɖelɛnu ɔ, è nɔ hɛn ɛ gannugánnú ɖɔ é na w’azɔ̌ ɖò hɛnkɛ́n hwenu e avivɔ nɔ gbɛ́ glási tɛntin wɛ è ɖè ɖɔhun é, é ka nɔ dó awu e na sixu glɔ́n jɔhɔn n’i é ǎ. É ɖò mɔ̌ có, Corinna kpo nɔví nyɔnu ɖevo kpo kudeji ɖɔ emi na wà nǔ e wu emi kpé é bǐ bo na gosin gle ɔ ta bá yì kplé ɖò agun ɖé mɛ.

² Corinna ɖɔ: “Mǐ jó azɔ̌ mǐtɔn dó ɖò gbadanu, bo ɖi zɔnlin yì pípaan gáà e ɖó kilomɛtlu 25 dó finɛ é. Pípaan ɔ ɖido ɖò gan wè mɛ zǎnmɛ, bɔ mǐ bló ganxixo ayizɛ́n, bo lɛ́ wá ɖi zɔnlin nú kilomɛtlu wǒ cobo wá yì fí e kplé ɔ ɖè é.” Tagba e ye jɛ bo yì kplé ɔ é víví nú Corinna tawun. É ɖɔ: “Ðò kplé ɔ jí ɔ, mǐ kplɔ́n Atɔxwɛ bo lɛ́ jihan Axɔsuɖuto ɔ tɔn lɛ. É dó wusyɛn lanmɛ nú mǐ tawun bɔ nǔ e mǐ mɔ lɛ é lɔ hɛn nùɖiɖi mǐtɔn lidǒ.” Nɔví nyɔnu wè lɛ lɛkɔ yì gle ɔ ta azǎn tɔn atɔn gudo, amɔ̌ glenɔ ɔ tlɛ ɖó ayi wu ɖɔ ye yì ǎ.

³ Togun Jehovah tɔn sín mɛ lɛ nɔ jló na nɔ kpɔ́ xá yeɖée hwebǐnu. Ði kpɔ́ndéwú ɔ, akpàkpà nɔ sɔ́ Klisanwun xwè kanweko nukɔntɔn ɔ tɔn lɛ ɖɔ ye ni kplé bo sɛ̀n Jehovah bo lɛ́ kplɔ́n nǔ dó wutu tɔn. (Mɛsɛ́dó 2:42) É ɖò gaàn ɖɔ hwi lɔ nɔ jló na yì kplé lɛ. Amɔ̌, nɔví sunnu kpo nɔví nyɔnu towe lɛ bǐ kpo ɖɔhun ɔ, a sixu mɔ ɖɔ é na vɛwǔ bɔ è na nɔ yì kplé lɛ ɖò gbesisɔmɛ. Boya a ɖó na w’azɔ̌ nú hwenu gègě alǒ a ɖó nǔ gègě bo na wà alǒ nǔ nɔ cikɔ nú we hwebǐnu. Enyi mɔ̌ wɛ ɔ, etɛ ka na d’alɔ mǐ bɔ mǐ na wà nǔ e wu mǐ kpé é bǐ bo na nɔ yì kplé mǐtɔn lɛ?^[1] (Kpɔ́n tinmɛ e ɖò vivɔnu é.) Nɛ̌ mǐ ka sixu dó wusyɛn lanmɛ nú Biblu kplɔntɔ́ mǐtɔn lɛ kpo mɛ ɖevo lɛ kpo bɔ ye na yì kplé mǐtɔn lɛ ɖò gbesisɔmɛ gbɔn? Xota elɔ tinmɛ nǔ e wu kplé lɛ yiyi (1) nyí ɖagbe nú mǐ, (2) nɔ d’alɔ mɛ ɖevo lɛ bo nɔ lɛ́ (3) hɛn xomɛ hun Jehovah é.^[2]​—Kpɔ́n tinmɛ e ɖò vivɔnu é.

KPLÉ LƐ YIYI NYÍ ÐAGBE NÚ MǏ

4. Nɛ̌ kplé lɛ ka nɔ d’alɔ mǐ bɔ mǐ nɔ kplɔ́n nǔ dó Jehovah wu gbɔn?

⁴ Kplé lɛ nɔ kplɔ́n mǐ. Kplé lɛ bǐ nɔ d’alɔ mǐ bɔ mǐ nɔ kplɔ́n nǔ dó Jehovah wu d’eji. Ði kpɔ́ndéwú ɔ, é ko lín dìn ǎ bɔ agun gègě kplɔ́n wema Dọnsẹpọ Jehovah ɖò Biblu Kplɔnkplɔn Agun Tɔn sín hwenu. Nɛ̌ é ka cí nú we, hwenu e mǐ ɖɔ xó dó jijɔ Jehovah tɔn lɛ wu, bɔ a lɛ́ sè lee nǔ nɔ cí nú nɔví towe lɛ dó wutu tɔn é? É ɖò wɛn ɖɔ enɛ na zɔ́n bɔ a na lɛ́ yí wǎn nú Jehovah d’eji. Ðò kplé lɛ jí ɔ, mǐ nɔ lɛ́ kplɔ́n nǔ ɖevo lɛ dó Biblu wu gbɔn tóɖíɖó xóɖiɖɔ lɛ, wazexlɛ́ lɛ kpo Biblu xixa kpo ganji gblamɛ. (Nɛɛmíi 8:8) Lin tamɛ dó nǔ tobutobu e mǐ nɔ mɔ hwenu e mǐ nɔ ɖò nǔ sɔ́ nú Biblu xixa wɛ é, kpo nǔ e mɛ ɖevo lɛ kplɔ́n ɖ’emɛ bo nɔ ɖɔ bɔ mǐ nɔ sè lɛ é kpo jí.

5. Nɛ̌ kplé lɛ ka ko d’alɔ we bɔ a zán nǔ e a kplɔ́n ɖò Biblu mɛ lɛ é, bo lɛ́ d’alɔ we bɔ sinsɛnzɔ́ towe kpɔ́n te d’eji gbɔn?

⁵ Kplé lɛ nɔ kplɔ́n mǐ lee mǐ na zán nǔ e mǐ kplɔ́n ɖò Biblu mɛ lɛ é ɖò gbɛzán mǐtɔn mɛ gbɔn é. (1 Tɛsalonikinu lɛ 4:9, 10) Ði kpɔ́ndéwú ɔ, a ka ko yì Atɔxwɛ Kplɔnkplɔn ɖé tɛnmɛ b’ɛ zɔ́n bɔ a jló na wà nǔ gègě ɖò sinsɛnzɔ́ Jehovah tɔn mɛ, bló bɔ ɖɛ towe lɛ na kpɔ́n te d’eji, alǒ sɔ́ hwɛ kɛ nɔví sunnu ɖé alǒ nɔví nyɔnu ɖé kpɔ́n à? Kplé e mǐ nɔ yì ɖò aklunɔzán gblamɛ tɛntin é sixu kplɔ́n lee mǐ na jla wɛnɖagbe ɔ alǒ d’alɔ mɛ ɖevo lɛ bɔ ye na mɔ nukúnnú jɛ nugbǒ Biblu tɔn lɛ mɛ gbɔn é mǐ.​—Matie 28:19, 20.

6. Nɛ̌ kplé mǐtɔn lɛ ka nɔ dó wusyɛn lanmɛ nú mǐ bo nɔ lɛ́ na hlɔnhlɔn mǐ gbɔn?

⁶ Kplé lɛ nɔ dó wusyɛn lanmɛ nú mǐ. Gbɛ̀ Satáan tɔn nɔ tɛnkpɔn bo na vɔ́da nú nùɖiɖi mǐtɔn bo sixu zɔ́n bɔ mǐ na flú bǐ alǒ awakanmɛ na kú mǐ. Amɔ̌, kplé mǐtɔn lɛ nɔ dó wusyɛn lanmɛ nú mǐ bo nɔ na mǐ hlɔnhlɔn bonu mǐ na kpó ɖò Jehovah sɛ̀n wɛ. (Xà Mɛsɛ́dó 15:30-32.) Hwɛhwɛ ɔ, mǐ nɔ ɖɔ xó dó lee nǔɖɔɖ’ayǐ e ɖò Biblu mɛ lɛ é nɔ jɛnu gbɔn é jí. Enɛ sixu d’alɔ mǐ bɔ mǐ na lɛ́ ɖó ganjɛwu d’eji ɖɔ akpá e Jehovah dó dó sɔgudo wu lɛ é na jɛnu. Enyi hwenu e nɔví sunnu mǐtɔn lɛ kpo nɔví nyɔnu mǐtɔn lɛ kpo xwlé xóɖiɖɔ yetɔn lɛ mǐ é kɛɖɛ wɛ ye nɔ dó wusyɛn lanmɛ nú mǐ ǎ, loɔ, ye nɔ lɛ́ wà mɔ̌ hwenu e ye nɔ na xósin bo nɔ lɛ́ jihan sín ayi mɛ dó kpa susu nú Jehovah é. (1 Kɔlɛntinu lɛ 14:26) Gɔ́ na ɔ, hwenu e mǐ nɔ ɖɔ xó xá ye jɛ nukɔn nú kplé lɛ kpo kplé lɛ gudo kpo é ɔ, xóɖɔɖókpɔ́ enɛ nɔ fá kɔ nú mǐ, ɖó mǐ ɖó xɔ́ntɔn e nǔ mǐtɔn nɔ ɖu ayi mɛ na nugbǒ nugbǒ lɛ é gègě.​—1 Kɔlɛntinu lɛ 16:17, 18.

7. Etɛwu é ka ɖò taji tawun ɖɔ mǐ ni nɔ wá kplé lɛ?

⁷ Ðò kplé lɛ jí ɔ, mǐ nɔ mɔ alɔdo gbigbɔ mímɛ́ Mawu tɔn tɔn. Jezu nɔ zán gbigbɔ mímɛ́ enɛ dó xlɛ́ ali agun lɛ. Enɛ wu ɔ, é ɖɔ nú mǐ ɖɔ mǐ ɖó na “sè nǔ e ɖɔ nú agun lɛ wɛ [gbigbɔ mímɛ́] ɖè ɔ ganji.” (Nǔɖexlɛ́mɛ 2:7) Gbigbɔ mímɛ́ sixu d’alɔ mǐ bɔ mǐ na ɖí xwi xá mɛtɛnkpɔn lɛ bo na jla wɛnɖagbe ɔ kpo akɔnkpinkpan kpo. É sixu lɛ́ d’alɔ mǐ bɔ mǐ na wà nǔ e sɔgbe lɛ é. Enɛ wɛ zɔ́n bɔ mǐ ɖó na wà nǔ e wu mǐ kpé é bǐ bo na nɔ yì kplé mǐtɔn lɛ lobo na mɔ alɔdo gbigbɔ mímɛ́ Mawu tɔn tɔn.

MǏ NƆ D’ALƆ MƐ ÐEVO LƐ ÐÒ KPLÉ LƐ JÍ

8. Enyi nɔví sunnu kpo nɔví nyɔnu mǐtɔn lɛ kpo mɔ mǐ ɖò kplé lɛ jí, bo sè nú mǐ na xósin bo lɛ́ jihan ɔ, nɛ̌ é ka nɔ d’alɔ ye gbɔn? (Lɛ̌ kpɔ́n gbàví “Nú É Lɛkɔ Xwè Xwé ɔ, É Nɔ Mɔ Éɖée Mɛ Hwebǐnu.”)

⁸ Ðò kplé lɛ jí ɔ, ali nɔ hun nú mǐ bɔ mǐ nɔ xlɛ́ nɔví sunnu kpo nɔví nyɔnu mǐtɔn lɛ kpo ɖɔ mǐ yí wǎn nú ye. Mɛ gègě ɖò agun mǐtɔn mɛ bo ɖò didɛ wɛ ɖò tagba syɛnsyɛn lɛ nu. Mɛsɛ́dó Pɔlu wlan ɖɔ: “Mi nú mǐ na kpé nukún dó mǐɖée wu.” (Eblée lɛ 10:24, 25) Mǐ sixu xlɛ́ ɖɔ nɔví mǐtɔn lɛ sín nǔ nɔ ɖu ayi mɛ nú mǐ gbɔn kplé lɛ yiyi bo dó wusyɛn lanmɛ nú mǐɖée lɛ gblamɛ. Enyi mǐ yì kplé lɛ ɔ, mǐ nɔ xlɛ́ nɔví mǐtɔn lɛ ɖɔ mǐ jló na nɔ kpɔ́ xá ye bo ɖɔ xó xá ye, bo nɔ lɛ́ xlɛ́ ye ɖɔ lee nǔ ɖè nú ye é ɖu ayi mɛ nú mǐ. Mǐ nɔ lɛ́ dó wusyɛn lanmɛ nú ye hwenu e ye sè xósin mǐtɔn lɛ kpo han e mǐ nɔ jì sín ayi mɛ lɛ é kpo é.​—Kolosinu lɛ 3:16.

9, 10. (a) Tinmɛ lee xó Jezu tɔn e ɖò Jaan 10:16 mɛ é d’alɔ mǐ bɔ mǐ tuùn nǔ e wu é ɖò taji ɖɔ mǐ ni nɔ kplé kpo nɔví mǐtɔn lɛ kpo é gbɔn é. (b) Enyi mǐ nɔ wá kplé lɛ ɖò gbesisɔmɛ ɔ, nɛ̌ mǐ ka sixu d’alɔ mɛ e mɛ tɔn lɛ gbɛ́ é ɖé gbɔn?

⁹ Enyi mǐ yì kplé lɛ ɔ, mǐ nɔ d’alɔ agun ɔ b’ɛ nɔ nɔ bǔ. (Xà Jaan 10:16.) Jezu jlɛ́ éɖée dó lɛngbɔnyitɔ́ ɖé wu bɔ ahwanvu tɔn lɛ cí lɛngbɔhwan ɖé ɖɔhun. Lin tamɛ dó nǔ elɔ wu: Enyi lɛngbɔ̌ wè ɖò só ɖé jí, bɔ wè ɖevo ɖò tɔdo ɖé mɛ lobɔ ɖokpo ɖò fí ɖevo ɔ, lɛngbɔ̌ atɔ́ɔ́n enɛ lɛ nyí lɛngbɔhwan ɖé à? Gbeɖé, ɖó bǔ wɛ lɛngbɔhwan ɖé nɔ nɔ bo nɔ xwedó lɛngbɔnyitɔ́ ɔ. Mɔ̌ ɖokpo ɔ, mǐ ɖó na nɔ zɔ nú nɔví mǐtɔn lɛ gbɔn kplé lɛ gingɔn gblamɛ ǎ. Mǐ ɖó na nɔ bǔ bo na ‘nyí lɛngbɔhwan ɖokpo’ bo na xwedó ‘lɛngbɔnyitɔ́ ɖokpo.’

¹⁰ Kplé mǐtɔn lɛ nɔ d’alɔ mǐ bɔ mǐ nɔ nɔ bǔ xwédo wanyiyinɔ ɖé ɖɔhun. (Ðɛhan 133:1) Mɛɖé lɛ ɖò agun ɔ mɛ bɔ hagbɛ̌ xwédo yetɔn tɔn lɛ ko gbɛ́ ye, ɖi mɛjitɔ́ yetɔn lɛ, alǒ nɔví sunnu yetɔn lɛ alǒ nɔví nyɔnu yetɔn lɛ. Amɔ̌, Jezu d’akpá ɖɔ emi na na xwédo ɖé ye b’ɛ na yí wǎn nú ye lobo na kpé nukún dó ye wu. (Maki 10:29, 30) Enyi a nɔ yì kplé lɛ ɖò gbesisɔmɛ ɔ, a sixu huzu tɔ́ ɖé, nɔ ɖé, nɔví sunnu ɖé, alǒ nɔví nyɔnu ɖé nú mɛɖé ɖò agun ɔ mɛ. Tamɛ linlin dó enɛ jí na zɔ́n bɔ mǐ na jló na wà nǔ e wu mǐ kpé é bǐ bo na nɔ yì kplé lɛ bǐ.

MǏ NA HƐN XOMƐ HUN JEHOVAH

11. Enyi mǐ setónú nú sɛ́n Jehovah tɔn e ɖɔ mǐ ni nɔ wá kplé lɛ é ɔ, nɛ̌ é ka nɔ cí n’i?

¹¹ Ðò kplé lɛ jí ɔ, mǐ nɔ sɔ́ nǔ e sín acɛ Jehovah ɖó é n’i. Ðó é wɛ nyí Gbɛɖotɔ́ ɔ wutu ɔ, mǐ ɖó na dokú n’i, wlí yɛ̌yi n’i bo lɛ́ kpa susu n’i. (Xà Nǔɖexlɛ́mɛ 7:12.) Mǐ sixu wà mɔ̌ ɖò kplé lɛ jí hwenu e mǐ xoɖɛ sɛ́dó Jehovah, jihan dó kpa ɛ, bo lɛ́ ɖɔ xó dó wutu tɔn é. Ali jiwǔ ɖé wɛ hun nú mǐ ɖò aklunɔzán gbla lɛ bǐ mɛ bɔ mǐ na nɔ sɛ̀n Jehovah.

12. Nɛ̌ tónú e mǐ nɔ sè nú gbeɖiɖe Jehovah tɔn e ɖɔ mǐ ni nɔ yì kplé lɛ é ka nɔ cí n’i?

¹² Jehovah bló mǐ bɔ mǐ ɖó na setónú n’i. É ɖegbe nú mǐ ɖɔ mǐ ni nɔ kplé ɖó kpɔ́, ɖò taji ɔ, dìn e mǐ ɖò vivɔnu ɔ sɛkpɔ wɛ bǐ é. Enɛ wu ɔ, enyi mǐ setónú nú gbeɖiɖe enɛ ɔ, xomɛ nɔ hun Jehovah. (1 Jaan 3:22) É nɔ ɖó ayi wu ɖɔ mǐ jló tawun bo na yì kplé lɛ, bɔ gǎn e mǐ nɔ dó bo nɔ yì lɛ é nɔ sù nukún tɔn mɛ.​—Eblée lɛ 6:10.

13, 14. Nɛ̌ mǐ ka nɔ sɛkpɔ Jehovah kpo Vǐ tɔn kpo ɖò kplé lɛ jí gbɔn?

¹³ Enyi mǐ yì kplé lɛ ɔ, mǐ nɔ xlɛ́ Jehovah ɖɔ mǐ jló na sɛkpɔ é kpo Vǐ tɔn kpo. Ðò kplé lɛ jí ɔ, mǐ nɔ kplɔ́n Biblu bɔ Jehovah nɔ kplɔ́n nǔ e mǐ ɖó na wà é kpo lee mǐ ɖó na zán gbɛ̀ mǐtɔn gbɔn é kpo mǐ. (Ezayíi 30:20, 21) Enyi mɛ e ma tlɛ nɔ sɛ̀n Jehovah ǎ lɛ é ɖé lɛ wá kplé lɛ jí ɔ, ye nɔ mɔ ɖɔ Mawu ɖò ali xlɛ́ mǐ wɛ. (1 Kɔlɛntinu lɛ 14:23-25) Jehovah nɔ nɔ gudo nú kplé mǐtɔn lɛ kpo gbigbɔ mímɛ́ tɔn kpo, bɔ nǔ e mǐ nɔ kplɔ́n ɖò finɛ lɛ é nɔ gosin gɔ̌n tɔn. Enɛ wu ɔ, enyi mǐ yì kplé lɛ ɔ, mǐ nɔ ɖótó nǔ e Jehovah nɔ ɖɔ lɛ é, nɔ mɔ lee é yí wǎn nú mǐ sɔ́ é, lobo nɔ lɛ́ sɛkpɔ ɛ.

¹⁴ Jezu e nyí Gǎn nú agun ɔ é ɖɔ: “Fí e mɛ wè, abǐ mɛ atɔn kplé ɖè, ɖò nyikɔ ce mɛ ɔ, un ɖò tɛntin yetɔn.” (Matie 18:20) Biblu lɛ́ ɖɔ ɖɔ Jezu “ɖò zɔnlin ɖi wɛ ɖò” agun lɛ “tɛntin.” (Nǔɖexlɛ́mɛ 1:20–2:1) É ɖò wɛn ɖɔ Jehovah kpo Jezu kpo ɖò kpɔ́ xá mǐ bo nɔ ɖò hlɔnhlɔn na mǐ wɛ ɖò kplé mǐtɔn lɛ jí. Nɛ̌ a ka nɔ lin ɖɔ é nɔ cí nú Jehovah hwenu e é nɔ mɔ bɔ a nɔ ɖò nǔ e wu a kpé lɛ é bǐ wà wɛ bo na dó sixu sɛkpɔ é kpo Vǐ tɔn kpo é?

15. Nɛ̌ kplé lɛ yiyi ka nɔ xlɛ́ Mawu ɖɔ mǐ jló na setónú n’i gbɔn?

¹⁵ Enyi mǐ nɔ yì kplé lɛ ɔ, mǐ nɔ ɖexlɛ́ Jehovah ɖɔ mǐ jló na setónú n’i. Jehovah nɔ hɛn mǐ gannugánnú ɖɔ mǐ ni wà nǔ e é ɖɔ é ǎ. (Ezayíi 43:23) Enɛ wu ɔ, enyi mǐ setónú nú gbeɖiɖe tɔn e ɖɔ mǐ ni nɔ wá kplé lɛ é ɔ, mǐ nɔ xlɛ́ ɛ ɖɔ mǐ yí wǎn n’i, bo nɔ lɛ́ yí gbè ɖɔ é ɖ’acɛ bo na ɖɔ nǔ e mǐ na wà é nú mǐ. (Hlɔmanu lɛ 6:17) Ði kpɔ́ndéwú ɔ, enyi gǎn mǐtɔn byɔ mǐ ɖɔ mǐ ni w’azɔ̌ zɛ xwé wu b’ɛ na zɔ́n, bɔ mǐ ma sɔ́ na yì kplé mǐtɔn lɛ ɖò gbesisɔmɛ ǎ ɔ, etɛ mǐ ka na wà? Alǒ acɛkpikpa lɛ sixu ɖɔ ɖɔ enyi mɛɖé kplé bo na sɛ̀n Jehovah ɔ, è na gbò akwɛ n’i, é na yì ganmɛ, alǒ è na sɔ́ nǔ syɛnsyɛn ɖé dó dɔn tó n’i. Kabǐ ɖò hweɖelɛnu ɔ, mǐ sixu nɔ jló kpowun bo na wà nùɖé lɛ, bo gɔn kplé lɛ. Ðò ninɔmɛ enɛ lɛ ɖokpo ɖokpo mɛ ɔ, mǐ wɛ ɖó na ɖɔ nǔ e mǐ na wà é. (Mɛsɛ́dó 5:29) Amɔ̌, enyi mǐ setónú nú Jehovah hweɖebǔnu ɔ, xomɛ nɔ hun i.​—Nùnywɛxó 27:11.

NƆ BLÓ KPLÉ LƐ XÁ NƆVÍ TOWE LƐ

16, 17. (a) Nɛ̌ mǐ ka wà gbɔn bo tuùn ɖɔ kplé lɛ ɖò taji tawun nú Klisanwun xwè kanweko nukɔntɔn ɔ tɔn lɛ? (b) Nɛ̌ kplé Klisanwun tɔn lɛ ka nɔ cí nú Nɔví George Gangas?

¹⁶ Ee Klisanwun lɛ kplé ɖò Pantekotu xwè 33 H.M. tɔn gudo é ɔ, ye nɔ lɛ́ kplé hwɛhwɛ bo nɔ sɛ̀n Jehovah. Ye “nɔ ɖókan dó mɛsɛ́dó lɛ sín nùkplɔnmɛ kpodo kpɔ́ninɔ ɖò nɔví mɛ kpo wu.” (Mɛsɛ́dó 2:42) Acɛkpikpa Hlɔma tɔn kpo sinsɛngán Jwifu lɛ tɔn lɛ kpo na bo ɖò ya dó nú ye wɛ ɔ, ye nɔ gɔn kplékplé ɖó kpɔ́ ǎ. É nɔ bɔwǔ ǎ có, ye nɔ wà nǔ e wu ye kpé lɛ é bǐ bo nɔ kpó ɖò kplékplé ɖó kpɔ́ wɛ.

¹⁷ Égbé ɖesu ɔ, kplé lɛ nɔ sù Jehovah sɛntɔ́ lɛ nukúnmɛ tawun, bɔ tɛn tɔn mɛ ninɔ nɔ víví nú ye. George Gangas e nyí ɖokpo ɖò Hagbɛ̌ Alixlɛ́mɛtɔ́ ɔ mɛ nú xwè 22 jɛji é ɖɔ: “Nú nyɛ ɔ, kpɔ́ninɔ xá nɔví lɛ ɖò kplé lɛ jí nyí ɖokpo ɖò nǔ e nɔ na mì awǎjijɛ hugǎn ɖò gbɛ̀ mɛ é mɛ, é nɔ lɛ́ dó wusyɛn lanmɛ nú mì. Un nɔ ba na nɔ mɛ nukɔntɔn e na yì Kpléxɔ Axɔsuɖuto ɔ Tɔn mɛ lɛ é mɛ, bo na lɛ́ nɔ mɛ gudo tɔn e na tɔ́n sín mɛ lɛ é mɛ, enyi é nyɔ́ bló ɔ nɛ. Enyi un ɖò xó ɖɔ xá mɛ Mawu tɔn lɛ wɛ ɔ, awǎjijɛ nɔ gɔ́ ayi ce mɛ. Un ɖò ye tɛntin ɔ, é nɔ cí ɖɔ xwégbe wɛ un ɖè xá xwédo ce ɖɔhun, ɖò palaɖisi gbigbɔ tɔn ɖé mɛ.” É ɖɔ gɔ́ na ɖɔ: “Linlin ce vívɛ́ná kpo jlǒ ce vívɛ́ná ɔ kpo wɛ nyí ɖɔ má yì kplé lɛ.”

18. Etɛ a ka nɔ lin dó kplé mǐtɔn lɛ wu? Etɛ a ka kudeji bo na wà?

¹⁸ Hwi lɔ ka nɔ ɖó linlin ɖokpo ɔ dó Jehovah sinsɛn wu à? Enyi mɔ̌ hǔn, nɔ ɖò nǔ e wu a kpé lɛ é bǐ wà wɛ bo na dó nɔ kpɔ́ xá nɔví lɛ ɖò kplé lɛ jí, enyi é na bo vɛwǔ ɔ nɛ. Ðexlɛ́ Jehovah ɖɔ a ɖó linlin ɖokpo ɔ Axɔsu Davidi ɖɔhun, éyɛ ɖɔ: “Mawu Mavɔmavɔ, un yí wǎn nú xwé e gbè a ɖè é.”​—Ðɛhan 26:8.