TÀN 56
Sawulu Nyí Axɔsu Nukɔntɔn Izlayɛli Tɔn
KPƆ́N Samuwɛli ɖò ami kɔn dó ta nú nya enɛ wɛ. Nǔ e è nɔ bló ɖò Izlayɛli, bo nɔ xlɛ́ ɖɔ è sɔ́ mɛɖé axɔsu é nɛ. Jehovah wɛ ɖɔ nú Samuwɛli ɖɔ é ni kɔn ami dó ta nú Sawulu. Ami bunɔ ɖé wɛ, bo ɖó wǎn ɖagbe.
Sawulu lin ɖɔ emi kún kpé nǔ wu, bo na ɖu axɔsu ó. É ɖɔ nú Samuwɛli ɖɔ: ‘Akɔta Bɛnjamɛ tɔn mɛ wɛ un gosin. É wɛ ka nyí akɔta kpɛví bǐ e ɖò Izlayɛli é. Etɛwu a ka ɖɔ un na nyí axɔsu?’ Jehovah yí wǎn nú Sawulu, ɖó é sɔ́ éɖee dó mɔ nùɖé ǎ. Nǔ e zɔ́n, bɔ É sɔ́ ɛ axɔsu é nɛ.
Amɔ̌, Sawulu ka nyí wamamɔnɔ ǎ, dɔkunnɔ ví wɛ n’i. Mɔ jɛn é ma ka nyí mɛ glì ǎ é nɛ. É nyɔ́ ɖɛkpɛ ɖesu, bo ɖi ga hú mɛ e ɖò Izlayɛli é bǐ. Wezunkantɔ́ ɖaxó wɛ n’i, bo lɛ́ ɖó hlɔnhlɔn tawun. Xomɛ hun togun ɔ, ɖó Jehovah sɔ́ Sawulu axɔsu. Ye bǐ jɛ xó sú jí, bo nɔ ɖɔ: ‘Jidɔ́ nú axɔsu ɔ!’
Hlɔnhlɔn kpó ɖò Kɛntɔ́ Izlayɛli-ví lɛ tɔn lɛ wu. Ye kpó ɖò tagba dó nú Izlayɛli-ví lɛ wɛ. Tlolo e Sawulu nyí axɔsu é ɔ, Amɔnunu lɛ tɔ́n ahwan Izlayɛli-ví lɛ. Amɔ̌, Sawulu kplé ahwangɔnu ɖaxó ɖé, bo ɖu ɖò Amɔnunu lɛ jí. Enɛ lɛ́ zɔ́n, bɔ togun ɔ bǐ ɖeji dó Sawulu wu.
Xwè ɖò xwè jí jɛ wɛ é ɔ, Sawulu nɔ nukɔn nú Izlayɛli-ví lɛ, bɔ ye ɖu ɖò kɛntɔ́ yetɔn gègě jí. Sawulu lɛ́ ɖó vǐ sunnu akɔnkpantɔ́ ɖé, bɔ é nɔ nyí Jonataan. Jonataan d’alɔ Izlayɛli-ví lɛ, bɔ ye ɖu ɖò ahwan gègě jí. Filisitiinu lɛ wɛ nyí kɛntɔ́ Izlayɛli-ví lɛ tɔn e baɖa hú bǐ é. Ye mɛ afatɔ́ɔ́n donu mɔkpan ja ahwan tɔ́n Izlayɛli-ví lɛ gbé gbè ɖokpo.
Samuwɛli ɖɔ nú Sawulu ɖɔ é ni nɔte bonu emi na wá savɔ̌ nú Jehovah. Amɔ̌, Samuwɛli yawu wá ǎ. Sawulu ɖi xɛsi ɖɔ Filisitiinu lɛ taa bɛ́ ahwan xá emi, bo gbɔ bo savɔ̌ ɔ éɖesu. Ee Samuwɛli wá é ɔ, é ɖɔ nú Sawulu ɖɔ é tlitó nú Mawu. É lɛ́ ɖɔ n’i ɖɔ: ‘Jehovah na sɔ́ mɛ ɖevo, bɔ é na ɖu axɔsu dó Izlayɛli jí.’
Enɛ gudo ɔ, Sawulu lɛ́ tlitó ɖevo. Enɛ wu ɔ, Samuwɛli ɖɔ n’i ɖɔ: ‘È setónú nú Jehovah nyɔ́ hú è na ɛ lɛngbɔ̌ e nyɔ́ wǔ hú lɛngbɔ̌ lɛ bǐ é. Jehovah na tin dó we, bonu a na kpó ɖò axɔsu Izlayɛli tɔn nyí wɛ ǎ, ɖó a setónú n’i ǎ.’
Tàn elɔ kplɔ́n nǔ taji wè mǐ. É kplɔ́n mǐ ɖɔ mǐ ɖó na nɔ setónú nú Jehovah hwebǐnu. É lɛ́ kplɔ́n mǐ ɖɔ mɛ ɖagbe, Sawulu ɖɔhun, sixu wá huzu mɛ nyanya. Mǐ na lɔn, bo na huzu mɛ nyanya gbeɖé ǎ. Alǒ mɔ̌ wɛ à é?
1 Samuel wemata 9 jɛ 11; 13:5-14; 14:47-52; 15:1-35; 2 Samuel 1:23.