TÀN 57
Mawu Sɔ́ Davidi Axɔsu
A KA mɔ nǔ e jɛ ɖò ɖiɖe ɔ mɛ é à? Nyaví ɔ hwlɛn lɛngbɔví enɛ sín lɔnmɔ ɔ sí. Lɔnmɔ ɔ wá wlí lɛngbɔví ɔ bo na yí ɖu. Amɔ̌, nyaví ɔ kanwezun jɛ gudo tɔn, bo hwlɛn lɛngbɔví ɔ sín nu tɔn mɛ. Lɔnmɔ ɔ wá tlɔ́kpé nú nyaví ɔ, bɔ nyaví ɔ ka hu i. É ka ko hwlɛn lɛngbɔ̌ ɖé sín kinikini ɖé sí wá yì. Nyaví ɔ kpàn akɔ́n à cé? A ka tuùn mɛ é wɛ é à?
Davidi wɛ. É nɔ nɔ Bɛteleyɛmu. Obɛdi wɛ nyí Daagbo tɔn. Hwiliti kpo Boazu kpo wɛ ka jì Obɛdi. A ka flín ye à? Jɛse wɛ nyí Davidi sín tɔ́. Davidi nɔ nyì lɛngbɔ̌ tɔ́ tɔn tɔn lɛ. Jehovah sɔ́ Sawulu axɔsu, bɔ é bló xwè 10 é wɛ è jì Davidi.
Jehovah ɖɔ nú Samuwɛli gbè ɖokpo ɖɔ: ‘Wǔn ami bunɔ ɔ, bo yì Jɛse xwégbe ɖò Bɛteleyɛmu. Un ko sɔ́ axɔsu vǐ tɔn lɛ ɖokpo.’ Ee Samuwɛli mɔ vǐsunnuɖaxo Jɛse tɔn Eliabu é ɔ, é ɖɔ d’ayi mɛ ɖɔ: ‘Mɛ e Jehovah sɔ́ é jɛn na ko ɖíe.’ Amɔ̌, Jehovah ɖɔ n’i ɖɔ: ‘Ma kpɔ́n ga tɔn kpo ɖɛkpɛ tɔn kpo ó. Mɛ e Un sɔ́ axɔsu é nɛ ǎ.’
Enɛ wu ɔ, Jɛse kplá vǐ sunnu tɔn Abinadabu wá nú Samuwɛli. Amɔ̌, Samuwɛli ɖɔ: ‘Eǒ, Jehovah sɔ́ mɛ enɛ lɔ ǎ.’ Enɛ gudo ɔ, Jɛse kplá vǐ sunnu tɔn Camaa wá. Samuwɛli lɛ́ ɖɔ: ‘Eǒ, Jehovah sɔ́ mɛ enɛ lɔmɔ̌ ǎ.’ Jɛse kplá vǐ sunnu tɔn tɛnwe wá nú Samuwɛli, amɔ̌, Jehovah ka sɔ́ ye mɛ ɖebǔ ǎ. Samuwɛli kanbyɔ Jɛse ɖɔ: ‘Vǐ sunnu towe lɛ bǐ jɛn ko nɛ à?’
Jɛse ɖɔ: ‘É kpò kpodé ɔ. Amɔ̌, éyɛ ɖò lɛngbɔ̌ lɛ nyì wɛ ɖò gbehan mɛ.’ Ee è kplá Davidi wá é ɔ, Samuwɛli mɔ ɖɔ nyaví ɖɛkpɛɖɛkpɛ ɖé wɛ. Jehovah ɖɔ: ‘Mɛ e Un sɔ́ é nɛ. Kɔn ami dó ta n’i.’ Samuwɛli wà mɔ̌ nugbǒ. Hwe ɔ nu na wá sù, bɔ Davidi na nyí axɔsu Izlayɛli tɔn.
1 Samuel 17:34, 35; 16:1-13.