TÀN 73
Axɔsu Ðagbe Joziasi
XWÈ tantɔn jɛn Joziasi ɖó bo nyí axɔsu nú akɔta wè tofɔligbé tɔn lɛ ɖò Izlayɛli. Mɛ e ɖó xwè enɛ é ko sù axɔsu ɖu ǎ. Enɛ wu ɔ, mɛxo ɖé lɛ tó d’alɔ ɛ hwɛ̌.
Hwenu e é ɖu axɔsu nú xwè tɛnwe gudo é ɔ, é jɛ biba na tuùn jlǒ Jehovah tɔn jí. É xwedó kpɔ́ndéwú axɔsu ɖagbe lɛ tɔn, ɖi Davidi, Jozafati kpo Ezekiasi kpo. Enɛ wu ɔ, hwenu e é ma tlɛ ko ɖó xwè 20 ǎ é ɔ, é wà akɔnkpinkpanzɔ́ ɖé.
Xwè mɔkpan wɛ Izlayɛli-ví gègě wà nǔ nyanya na. Ye nɔ sɛ̀n yɛhwe ɖevo lɛ. Enɛ wu ɔ, Joziasi kpo sunnu ɖé lɛ kpo byɔ toxo lɛ mɛ, bo jɛ kún sú dó nú yɛhwe ɖevo lɛ sínsɛ́n jí. Azɔ̌ ɖaxó ɖesu wɛ, ɖó mɛ gègě wɛ ɖò yɛhwe ɖevo lɛ sɛ̀n wɛ. A ka mɔ Joziasi kpo sunnu e xwedó é lɛ é kpo ɖò bocyɔ lɛ gbà wɛ ɖò ɖiɖe ɔ mɛ à?
Enɛ gudo ɔ, Joziasi ɖè sunnu atɔn, bonu ye na kpé nukún dó tɛmpli Jehovah tɔn jijla ɖó wu. È bɛ́ akwɛ e togun ɔ jɔ é d’así nú ye, bonu ye na sú azɔ̌kwɛ azɔ̌watɔ́ lɛ. Ee ye ɖò azɔ̌ wà wɛ ɖò tɛmpli ɔ mɛ é ɔ, vɔsanúxwlémawutɔ́ ɖaxó Ilikiya mɔ nú titewungbe ɖé ɖò finɛ. Sɛ́nwema e Jehovah ɖɔ nú Mɔyizi bɔ é wlan sín xwè línlín ɖíe é wɛ. Wema enɛ bú dìn é ɔ, é sɔ́ hwe ǎ.
È zé wema ɔ wá nú Joziasi, bɔ é ɖɔ è ni xà nú emi. Ee Joziasi ɖò tó ɖó wɛ é ɔ, é mɔ ɖɔ togun ɔ kún ɖò sɛ́n Jehovah tɔn lɛ nyì wɛ ó. Wǔ kú i kaka, bɔ é vún awu tɔn, lee mɔ gbɔn wɛ a ɖè ɖò ɖiɖe ɔ mɛ é. É ɖɔ: ‘Jehovah sìn xomɛ dó mǐ wu, ɖó tɔ́ mǐtɔn lɛ setónú nú sɛ́n e ɖò wema elɔ mɛ lɛ é ǎ.’
Joziasi zɔ́n vɔsanúxwlémawutɔ́ ɖaxó Ilikiya ɖɔ é ni yí ba dò nú nǔ e Jehovah na wà nú ye é. Ilikiya yì gbeyiɖɔ nyɔnu Uluda gɔ́n bo kàn nǔ ɔ byɔ ɛ. Uluda ɖɔ n’i ɖɔ é ni dó wɛn Jehovah tɔn elɔ nú Joziasi: ‘Un na dɔn tó nú Jeluzalɛmu kpo togun tɔn kpo, ɖó ye sɛ̀n yɛhwe ɖevo lɛ, bɔ nǔ nyanya gɔ́ tò ɔ bǐ mɛ. Amɔ̌, ɖó hwɛ Joziasi wà nǔ ɖagbe wutu ɔ, Un na dɔn tó nú tò ɔ ɖò hwe towe nu ǎ.’
2 Chroniques 34:1-28.