Joziyasi Ðó Xɔ́ntɔn Ðagbe Lɛ

A ka lin ɖɔ é nɔ vɛwǔ bɔ è na wà nǔ e sɔgbe é wɛ à?— Mɛ gegě nɔ lin mɔ̌. Biblu ɖɔ nú mǐ ɖɔ nǔ e sɔgbe é wiwa vɛwǔ tawun nú nyaví e nɔ nyí Joziyasi é. Amɔ̌, é ɖó xɔ́ntɔn ɖagbe lɛ bɔ ye d’alɔ ɛ. Nǔ mǐ ni kplɔ́n nǔ dó Joziyasi kpo xɔ́ntɔn tɔn lɛ kpo wu.

Axɔ́su Judáa tɔn Amɔni wɛ nyí tɔ́ Joziyasi tɔn. Mɛ nyanya tawun wɛ nyí Amɔni bɔ é nɔ lɛ́ sɛn vodun. Hwenu e Joziyasi sín tɔ́ kú é ɔ, Joziyasi huzu axɔ́su Judáa tɔn. Xwè tantɔn jɛn é ka ɖó hwenɛnu! A lin ɖɔ é lɔ nyí mɛ nyanya tɔ́ tɔn ɖɔhun wɛ à?— Eǒ!

Joziyasi kpò ɖò vǔ tawun có, é jló na setónú nú Jehovah. Enɛ wu ɔ, mɛ e yí wǎn nú Jehovah lɛ é kɛɖɛ wɛ é zun xɔ́ntɔn xá. Bɔ ye d’alɔ Joziyasi bɔ é wà nǔ e sɔgbe é. Mɛ̌ mɛ̌ e ka nyí ɖé lɛ ɖò Joziyasi sín xɔ́ntɔn lɛ mɛ?

Xɔ́ntɔn tɔn ɖokpo nɔ nyí Sofoníi. Gbeyiɖɔ ɖé wɛ nú Sofoníi, bɔ é ɖɔ nú mɛ e nɔ nɔ Judáa lɛ é ɖɔ enyi ye ma jó vodun sínsɛ́n dó ǎ ɔ, nǔ nyanya na jɛ dó ye wu. Joziyasi ɖótó Sofoníi bo sɛn Jehovah kɛɖɛ.

Xɔ́ntɔn Joziyasi tɔn ɖevo nɔ nyí Jelemíi. Xwè ɖokpo ɔ wɛ é kpo Joziyasi kpo ɖibla ɖó, bɔ ye mɛ we lɛ sù ɖó kpɔ́. Gbɛ̌ yetɔn víví sɔmɔ̌ bɔ hwenu e Joziyasi kú é ɔ, Jelemíi jì nǔwamɛhan ɖé dó lě dò e é jɛ dò Joziyasi tɔn sɔ é wu. Jelemíi kpo Joziyasi kpo d’alɔ yeɖée, bo mɔ tɛn dó wà nǔ e sɔgbe é lobo setónú nú Jehovah.

Etɛ kpɔ́ndéwú Joziyasi tɔn ka kplɔ́n we?— Joziyasi kpò ɖò vǔ có, é jló na wà nǔ e sɔgbe é. É tuùn ɖɔ emi ɖó na zun xɔ́ntɔn xá mɛ e yí wǎn nú Jehovah lɛ é. Hwi lɔ ni bo tɛ́n kpɔ́n, bo zun xɔ́ntɔn e yí wǎn nú Jehovah, bo ka sixu d’alɔ we bɔ a na wà nǔ e sɔgbe lɛ é é!