TÀN 77
Ye Ðèkɔ́ Ǎ
A KA flín ɖɔ emi ko kplɔ́n nùɖé dó dɔnkpɛvu atɔn e ɖò ɖiɖe ɔ mɛ lɛ é wu à? Ye wɛ gbɛ́ ɖɔ emi kún na ɖu nùɖuɖu e axɔsu ɔ nɔ ɖu lɛ é ó. Xɔ́ntɔn Daniɛli tɔn atɔn lɛ wɛ. Babilɔnunu lɛ nɔ ylɔ ye ɖɔ Cadlaki, Mɛcaki kpo Abɛdunɛgoo kpo. Amɔ̌, kpɔ́n ye lo. Aniwu ye ma ka ɖò kɔ́ ɖé nú bocyɔ ɖaxó e mɛ bǐ ɖò kɔ́ ɖé na wɛ é à? Mi nú mǐ ni ba dò na.
A ka flín sɛ́n e Jehovah ɖesu wlan bɔ è nɔ ylɔ ɖɔ Sɛ́n Wǒ lɛ é à? Sɛ́n nukɔntɔn ɔ ɖɔ: ‘A ɖó na sɛ̀n yɛhwe ɖevo ɖebǔ zɛ nyɛ wu ǎ.’ Sɛ́n enɛ ɔ setónú na wɛ dɔnkpɛvu enɛ lɛ ɖè. É bɔwǔ nú ye ǎ có ye ɖ’ewu.
Axɔsu Babilɔnu tɔn Nɛbukadunɛzaa xò gbɛtɔ́ nukúnɖeji gègě kplé, bonu ye na kpa susu nú bocyɔ enɛ e é bló é. É ɖɔ nú agun ɔ bǐ ɖɔ: ‘Enyi mi sè lanzo, agidigbo kpo nùxonú ɖevo lɛ kpo sín gbè hǔn, mi jɛkpo bo ɖèkɔ́ nú bocyɔ siká tɔn ɔ. Enyi mɛɖebǔ ma bló mɔ̌ ǎ ɔ, è na zé é nyí dó kpómɛmyɔ mɛ.’
Cadlaki, Mɛcaki kpo Abɛdunɛgoo kpo jɛkpo bo ɖèkɔ́ nú bocyɔ ɔ ǎ. Ee Nɛbukadunɛzaa sè mɔ̌ é ɔ, xomɛ sìn i ɖesu. É ɖɔ bɔ è kplá ye wá n’i. Ee ye wá é ɔ, é lɛ́ na tɛn ye hwɛ̌ bo na kpɔ́n ɖɔ ye na jɛkpo bo ɖèkɔ́ nú bocyɔ ɔ à jí. Amɔ̌, dɔnkpɛvu lɛ ɖeji dó Jehovah wu. Ye ɖɔ nú Nɛbukadunɛzaa ɖɔ: ‘Mawu mǐtɔn e mǐ nɔ sɛ̀n é kpé nǔ wu, bo na hwlɛn mǐ. Amɔ̌, enyi é ma tlɛ hwlɛn mǐ ǎ ɔ, mǐ na jɛkpo bo ɖèkɔ́ nú bocyɔ siká tɔn towe ǎ.’
Nɛbukadunɛzaa sè mɔ̌ é ɔ, xomɛ lɛ́ sìn i d’eji. É na gbè ɖɔ: ‘Mi bló bonu kpómɛmyɔ ɔ ni hun myɔ azɔn tɛnwe hú lee é ko ɖè é!’ Enɛ gudo ɔ, é ɖɔ bɔ sunnu e ɖó hlɔnhlɔn hú mɛ bǐ ɖò ahwangɔnu tɔn mɛ lɛ é bla Cadlaki, Mɛcaki kpo Abɛdunɛgoo kpo bo bɛ́ ye nyì dó kpómɛmyɔ ɔ mɛ. Kpómɛmyɔ ɔ hun myɔ kaka bɔ yǒzo tɔn hu sunnu glegbenu enɛ lɛ. Bɔ dɔnkpɛvu atɔn lɛ ka ló?
Axɔsu ɔ kpɔ́n kpómɛmyɔ ɔ mɛ, bɔ xɛsi ɖaxó ɖé jɛ jǐ tɔn. É kanbyɔ ɖɔ: ‘Sunnu atɔn wɛ mǐ bla, bo bɛ́ nyí dó kpómɛmyɔ ɔ mɛ à cé?’
Deví tɔn lɛ yí gbè n’i ɖɔ: ‘Ɛɛn, sunnu atɔn wɛ.’
É ɖɔ: ‘Amɔ̌, un mɔ sunnu ɛnɛ bɔ ye ɖò lɛlɛ̌ gbɔn myɔ ɔ mɛ wɛ. Ye ɖò blabla jí ǎ, myɔ ɔ ka wà nùɖé nú ye ǎ. Mɛ ɛnɛgɔ ɔ cí wɛnsagun ɖé ɖɔhun.’ Axɔsu ɔ sɛkpɔ kpómɛmyɔ sín hɔn, bo súxó ɖɔ: ‘Cadlaki! Mɛcaki! Abɛdunɛgoo! Mi tɔ́n, mi deví Mawu Ajalɔnnɔ ɔ tɔn lɛ!’
Ee ye tɔ́n sín kpómɛmyɔ ɔ mɛ é ɔ, mɛ bǐ mɔ ɖɔ nǔtí kún wà ye ó. Enɛ gudo ɔ, axɔsu ɔ ɖɔ: ‘Susu nú Mawu Cadlaki, Mɛcaki kpo Abɛdunɛgoo kpo tɔn! É sɛ́ wɛnsagun tɔn dó bɔ é hwlɛn ye, ɖó ye jɛkpo bo ɖèkɔ́ nú yɛhwe ɖevo ɖebǔ zɛ éyɛ wu ǎ.’
Gbejininɔ nú Jehovah sín kpɔ́ndéwú ɖagbe e mǐ na xwedó é ɖokpo nɛ à cé?
Exode 20:3; Daniel 3:1-30.