TÀN 75
Daniɛli kpo Xɔ́ntɔn Tɔn lɛ Kpo
AXƆSU Nɛbukadunɛzaa bɛ́ wemasetɔ́ ɖaxó e ɖò Izlayɛli é bǐ hɛn yì Babilɔnu. Enɛ gudo ɔ, é cyan dɔnkpɛvu e nyɔ́ ɖɛkpɛ, bo nyɔ̌nùí ganji ɖò ye mɛ lɛ é. Ye mɛ ɛnɛ nɛ mɔ wɛ a ɖè ɖò ɖiɖe ɔ mɛ nɛ. Mɛ ɖokpo nɔ nyí Daniɛli, bɔ Babilɔnunu lɛ nɔ ylɔ mɛ ɖě lɛ ɖɔ Cadlaki, Mɛcaki kpo Abɛdunɛgoo kpo.
Nɛbukadunɛzaa bló tuto bɔ è na kplɔ́n azɔ̌ dɔnkpɛvu enɛ lɛ, bonu ye na wá w’azɔ̌ xá ɛ ɖò hɔn mɛ. Enyi ye kplɔ́n azɔ̌ ɔ nú xwè atɔn gudo ɔ, é na cyan mɛ e nyɔ̌nùí ganji lɛ é bonu ye na nɔ ɖè wě xá ɛ. Axɔsu ɔ ba ɖɔ ye ni ɖò hunsin ɖagbe mɛ ɖò azɔ̌ kplɔnkplɔn ɔ hwenu. Enɛ wu ɔ, é ɖɔ nú deví tɔn lɛ ɖɔ nùɖuɖu hunsin ɖagbe tɔn kpo vɛɛn ɖokpo ɔ kpo wɛ ye na nɔ na xwédo emitɔn kpo ye bǐ kpo.
Kpɔ́n Daniɛli. A ka tuùn xó e ɖɔ nú deví Nɛbukadunɛzaa tɔn lɛ sín gǎn Acupenazi wɛ é ɖè é à? Daniɛli ɖò ɖiɖɔ n’i wɛ ɖɔ emi kún ba nùɖuɖu hunsin ɖagbe tɔn e axɔsu ɔ nɔ ɖu lɛ é ó. Amɔ̌, xó ɔ hu ado nú Acupenazi. É ɖɔ: ‘Axɔsu ɔ ko ɖɔ nǔ e mi na ɖu bo na nu é. Enyi mi ma nyɔ́ wǔ dɔnkpɛvu ɖě lɛ ɖɔhun ǎ ɔ, é sixu hu mì.’
Daniɛli wá yì mɔ mɛ e Acupenazi ɖè bɔ é nɔ kpé nukún dó ye wu é. É ɖɔ: ‘Kɛnklɛn, nǎ mǎ kpo sìn kpo kɛɖɛ mǐ nú azǎn 10, bo dó tɛ́n mǐ kpɔ́n. Enɛ gudo hǔn, sɔ́ mǐ jlɛ dó dɔnkpɛvu e nɔ ɖu axɔsu ɔ sín nùɖuɖu lɛ é wu, bo kpɔ́n mɛ e na nyɔ́ wǔ hugǎn é.’
Nya ɔ yí gbè nugbǒ. Ee azǎn 10 lɛ sɔgbe é ɔ, è mɔ ɖɔ Daniɛli kpo xɔ́ntɔn tɔn lɛ kpo nyɔ́ wǔ hú dɔnkpɛvu ɖě lɛ. Enɛ wu ɔ, nya ɔ gbɔ bo nɔ na mǎ ye.
Ðò xwè atɔn lɛ gudo ɔ, è kplá dɔnkpɛvu lɛ bǐ wá Nɛbukadunɛzaa nukɔn. Ee axɔsu ɔ ɖɔ xó xá ye bǐ gudo é ɔ, é mɔ ɖɔ Daniɛli kpo xɔ́ntɔn tɔn atɔn lɛ kpo nyɔ̌nùí hú ye bǐ. Enɛ wu ɔ, é ɖè yedɛɛ lɛ bonu ye na d’alɔ ɛ ɖò hɔn mɛ. Tagba syɛnsyɛn ɖé lɛ nɔ wá fɔ́n, bɔ Axɔsu ɔ nɔ zé nyì atɛ jí bonu è na ɖɔ gbò. Enyi é wà mɔ̌ hweɖebǔnu ɔ, é nɔ mɔ ɖɔ nùnywɛ Daniɛli, Cadlaki, Mɛcaki kpo Abɛdunɛgoo kpo tɔn nɔ hugǎn nùnywɛtɔ́ ɖaxó tò ɔ tɔn lɛ tɔn donu 10.