TÀN 78
Alɔví Ðé Wlan Nǔ Dó Dǒ Wu
ETƐ ka ɖò jijɛ wɛ ɖò ɖiɖe ɔ mɛ? Mɛ lɛ ɖò agɔ̌ ɖaxó ɖé ɖu wɛ. Vivǔ Nɛbukadunɛzaa tɔn Bɛlucazaa wɛ ɖò axɔsu ɖu wɛ ɖò Babilɔnu hwenɛnu. É ylɔ jonɔ nukúnɖeji afatɔ́ɔ́n. Kɔfu siká tɔn kpo kpatagan tɔn kpo gɔ́ nú gannu e ye bɛ̌ sín tɛmpli Jehovah tɔn mɛ ɖò Jeluzalɛmu lɛ é zán dó ɖu agɔ̌ ɔ wɛ ye ɖè. Amɔ̌, alɔví mɛɖé tɔn tɔ́n ɖò jɔhɔn mɛ ajijimɛ, bo jɛ nǔ wlan dó dǒ ɔ wu jí. Ado hu ye bǐ.
Axɔsu ɔ súxó ylɔ nùnywɛtɔ́ tɔn lɛ. É ɖɔ nú ye ɖɔ: ‘Mɛɖebǔ kpéwú bo xà nùwlanwlan elɔ bo lɛ́ tinmɛ ɔ, un na na ɛ nǔ gègě, bɔ é na lɛ́ nyí mɛ nukúnɖeji atɔngɔ e na kpa acɛ ɖò axɔsuɖuto ɔ mɛ é.’ Amɔ̌, nùnywɛtɔ́ lɛ ɖebǔ kpéwú bo xà alǒ tinmɛ nùwlanwlan e ɖò dǒ ɔ wu é ǎ.
Axɔsu ɔ sín nɔ sè xósusu ɔ, bo byɔ xɔ ɖaxó e mɛ ye ɖò agɔ̌ ɔ ɖu ɖé wɛ é. É ɖɔ nú axɔsu ɔ ɖɔ: ‘Kɛnklɛn, ma nú ado hu we dín ó. Nya ɖé ɖò axɔsuɖuto towe mɛ, bɔ gbigbɔ yɛhwe mímɛ́ lɛ tɔn ɖò jǐ tɔn. Hwenu e daagbo towe Nɛbukadunɛzaa ɖò axɔsu ɖu wɛ é ɔ, é sɔ́ ɛ ɖó nùnywɛtɔ́ tɔn lɛ bǐ nu. Daniɛli wɛ é nɔ nyí. Sɛ́ mɛ dó é, é na tín nǔ enɛ lɛ bǐ mɛ nú we.’
Enɛ wu ɔ, è kplá Daniɛli wá xɔ ɔ mɛ tlolo. Daniɛli gbɛ́ ɖɔ emi kún ba nǔ tɔn lɛ ó. Enɛ gudo ɔ, Daniɛli jɛ nǔ e zɔ́n bɔ Jehovah ɖè daagbo tɔn Nɛbukadunɛzaa sín axɔsuzinkpo jí hweɖenu é tinmɛ n’i jí. Daniɛli ɖɔ: ‘É nɔ yigo tawun, bɔ Jehovah dɔn tó n’i.’
Daniɛli ɖɔ nú Bɛlucazaa ɖɔ: ‘Amɔ̌ hwɛ ɔ, a tuùn nǔ enɛ lɛ bǐ, cobo ka kpó ɖò gò yí wɛ Nɛbukadunɛzaa ɖɔhun. A fɔ kɔfu kpo gannu e é bɛ́ sín tɛmpli Jehovah tɔn mɛ lɛ é kpo bo dó ɖò agɔ̌ ɖu wɛ. A ɖò susu kpa nú yɛhwe e è sɔ́ kpò kpo awinnya kpo dó bló lɛ é wɛ, bo wlí yɛ̌yi ɖebǔ nú Gbɛɖotɔ́ ɔ ǎ. Nǔ e wu Mawu sɛ́ alɔ enɛ dó, bɔ é wlan xókwin enɛ lɛ é nɛ.’
Daniɛli ɖɔ: ‘Nùwlanwlan ɔ ɖíe: MENE, MENE, TEKƐLI kpo PALUSINU kpo.’
‘Tinmɛ MENE ɔ tɔn ɖíe: Mawu ko xà axɔsuɖuto towe sín azǎn, bo ɖó nǔ nu. TEKƐLI sín tinmɛ nyí: è da we ɖò nǔdagan jí, bɔ a da gan ǎ. PALUSINU ɔ tɔn ɖíe: è zé axɔsuɖuto towe nú Mɛdinu lɛ kpo Pɛlusiinu lɛ kpo.’
Daniɛli kpò ɖò xó enɛ lɛ ɖɔ wɛ có, Mɛdinu lɛ kpo Pɛlusiinu lɛ kpo tɔ́n ahwan Babilɔnu. Ye yí toxo ɔ, bo hu Bɛlucazaa. Nǔ e è wlan dó dǒ ɔ wu é jɛ gbè nɛ gbè zǎn mɛ nugbǒ. Amɔ̌, nɛ Izlayɛli-ví lɛ tɔn ka wá nyí gbɔn? Cobonu mǐ na ba dò na ɔ, mǐ na tó kpɔ́n nǔ e jɛ dó Daniɛli wu é hwɛ̌.