TÀN 79
Daniɛli Ðò Kinikini Sín Dò Mɛ
YĚGÈ! É cí ɖɔ adǎn ɖaxó ɖò Daniɛli gbò wɛ ɖɔhun. Amɔ̌, kinikini lɛ ka ɖò nùɖé wà n’i wɛ ǎ! A ka tuùn nǔ e zɔ́n é à? Mɛ̌ mɛ̌ e ka zé Daniɛli dó kinikini dó ɔ mɛ? Mi nú mǐ ni ba dò na.
Nya e nɔ nyí Daliwusi é wɛ ɖò axɔsu Babilɔnu tɔn nyí wɛ hwenɛnu. É yí wǎn nú Daniɛli tawun, ɖó Daniɛli nyɔ́ xomɛ bo lɛ́ nyɔ̌nùí. Daliwusi ɖè Daniɛli bɔ elɔ nyí gǎn ɖaxó ɖokpo ɖò axɔsuɖuto tɔn mɛ. Nǔ enɛ zɔ́n bɔ mɛ ɖevo lɛ jɛ wǔ hwan Daniɛli jí. Enɛ wu ɔ, ye kàn ayixa ɖé.
Ye yì mɔ Daliwusi bo ɖɔ: ‘Axɔsu è, mǐ ɖó gbè kpɔ́ ɖɔ a ɖó na dó sɛ́n ɖɔ mɛɖebǔ kún ɖó na xoɖɛ sɛ́dó yɛhwe alǒ gbɛtɔ́ ɖevo zɛ hwɛ axɔsu ɔ wu ó, kaka nú azǎn 30. Enyi mɛɖebǔ gbà sɛ́n enɛ ɔ, è ɖò na sɔ́ ɛ nyì dó kinikini dó mɛ.’ Daliwusi tuùn nǔ e wu ye ɖò sɛ́n enɛ ba wɛ é ǎ. Amɔ̌, é mɔ ɖɔ sɛ́n ɔ kún nyla ó, bo zɔ́n ɖɔ è ni wlan ɖ’ayǐ. Enɛ wu ɔ, è sɔ́ sixu ɖyɔ sɛ́n ɔ ǎ.
Ee Daniɛli sè sɛ́n e ye dó é ɔ, é yì xwé tɔn gbè, bo xoɖɛ lee é ko nɔ wà gbɔn ɖ’ayǐ é. Nya baɖabaɖa enɛ lɛ tuùn ɖɔ Daniɛli kún na gɔn ɖɛ xò sɛ́dó Jehovah ó. Xomɛ hun ye, ɖó é cí ɖɔ tito e ye bló bo na hu Daniɛli é ɖò jijɛ nu wɛ ɖɔhun.
Ee axɔsu Daliwusi wá mɔ nǔ jɛ nǔ e wu ye ɖò sɛ́n enɛ ba wɛ é wu é ɔ, é vɛ́ n’i kaka. Loɔ, é ka sɔ́ sixu ɖyɔ sɛ́n ɔ ǎ. Enɛ wu ɔ, é ɖɔ bɔ è zé Daniɛli nyì kinikini dó ɔ mɛ. Amɔ̌, axɔsu ɔ ɖɔ nú Daniɛli ɖɔ: ‘Un ɖó nukúnɖiɖo ɖɔ Mawu towe e a nɔ sɛ̀n é na hwlɛn we.’
Wǔ kú Daliwusi kaka bɔ é sixu d’amlɔ zǎn enɛ mɛ ǎ. Ayihɔngbe tɔn zǎnzǎn ɔ, é kanwezun yì kinikini dó ɔ kɔn. É nɛ mɔ wɛ a ɖè ɖò kinikini dó ɔ kɔn nɛ. É súxó bo ɖɔ: ‘Daniɛli, deví Mawu gbɛɖe ɔ tɔn è! Mawu e a nɔ sɛ̀n é ka kpéwú bo hwlɛn we sín kinikini lɛ sí à?’
Daniɛli yí gbè n’i ɖɔ: ‘Mawu sɛ́ wɛnsagun tɔn dó, bɔ é bɔ nu dó nú kinikini lɛ bɔ ye wà nùɖé nú mì ǎ.’
Xomɛ hun axɔsu ɔ tawun. É ɖegbe ɖɔ è ni ɖè Daniɛli tɔ́n sín dò ɔ mɛ. Enɛ gudo ɔ, axɔsu ɔ ɖɔ bɔ è bɛ́ mɛ e ɖò kú Daniɛli tɔn ba wɛ lɛ é dó kinikini dó ɔ mɛ. Ye tlɛ jɛ dò ɔ sín azan jí vɔ́vɔ́ có kinikini lɛ nya ye wún, bo gbà xú yetɔn lɛ bǐ ǎ.
Enɛ gudo ɔ, axɔsu Daliwusi wlan wema sɛ́dó mɛ e ɖò axɔsuɖuto tɔn mɛ lɛ é bǐ ɖɔ: ‘Un ɖegbe ɖɔ mɛ bǐ ɖó na sí Mawu Daniɛli tɔn. É bló nùjiwǔ gègě. É hwlɛn Daniɛli sín kinikini lɛ sí.’