TÀN 80
Togun Mawu Tɔn Tɔ́n Sín Babilɔnu
É KO ɖibla ɖó xwè wè mɔ̌ dìn, bɔ Mɛdinu lɛ kpo Pɛlusiinu lɛ kpo gbà Babilɔnu. Bo ka kpɔ́n nǔ e ɖò jijɛ wɛ ɖò ɖiɖe ɔ mɛ é! Izlayɛli-ví lɛ ɖò Babilɔnu tɔ́n sín wɛ. Nɛ̌ kàn ka jó ye gbɔn? Mɛ̌ ka tún kàn ye?
Axɔsu Pɛlusii tɔn Silusi wɛ. Cobonu è na jì Silusi ɔ, Jehovah ɖɔ nú gbeyiɖɔ tɔn Ezayi bɔ é wlan dó wutu tɔn ɖɔ: ‘Nǔ e Un jló ɖɔ a ni wà é wɛ a na wà pɛ́ɛ́. È na jó hɔntogbo lɛ dó nyì nuvo nú we, bɔ a na yí tò ɔ.’ Silusi nɔ nukɔn nú Mɛdinu lɛ kpo Pɛlusiinu lɛ kpo, bɔ ye yí Babilɔnu nugbǒ. Ye wá zǎnmɛ, bo mɔ hɔntogbo lɛ ɖò nuvo bo byɔ toxo ɔ mɛ.
Amɔ̌, gbeyiɖɔ Jehovah tɔn Ezayi lɛ́ ɖɔ ɖɔ Silusi na na gbè bɔ è na vɔ̌ Jeluzalɛmu kpo tɛmpli tɔn kpo gbá. Silusi ka na gbè nugbǒ à? Ɛɛn, é wà mɔ̌. Silusi ɖɔ nú Izlayɛli-ví lɛ ɖɔ: ‘Mi yì Jeluzalɛmu lo, bo vɔ́ tɛmpli Jehovah Mawu mitɔn tɔn gbá.’ Nǔ e Izlayɛli-ví enɛ lɛ wlí ali bo xwè wiwa gbé é nɛ.
Amɔ̌, Izlayɛli-ví e ɖò Babilɔnu lɛ é bǐ kpéwú bo lɛkɔ yì Jeluzalɛmu ǎ. Kilomɛtlu 800 mɔ̌ wɛ Jeluzalɛmu ɖó dó Babilɔnu, bɔ ye mɛ gègě ka ko kpò alǒ ɖò azɔn jɛ wɛ bo sixu zɔn ali gaga ǎ. Hwɛjijɔ ɖevo lɛ lɛ́ zɔ́n bɔ mɛɖé lɛ yì ǎ. Amɔ̌, Silusi ɖɔ nú mɛ e ma yì ǎ lɛ é ɖɔ: ‘Mi bɛ́ kpatagan, siká kpo nùnina ɖevo lɛ kpo nú mɛ e lɛkɔ bo na yì vɔ́ Jeluzalɛmu kpo tɛmpli tɔn kpo gbá lɛ é.’
Enɛ wu ɔ, ye bɛ́ nùnina gègě nú Izlayɛli-ví enɛ lɛ e wlí ali xwè Jeluzalɛmu é. Silusi lɛ́ fɔ gannu kpo kɔfu e Axɔsu Nɛbukadunɛzaa bɛ́ sín tɛmpli Jehovah tɔn mɛ lɛ é kpo nú ye. Togun ɔ mɔ nǔ gègě bɛ́ yì xwé.
Izlayɛli-ví lɛ zɔn ali nú sun ɛnɛ mɔ̌ cobo wá Jeluzalɛmu. É sɔgbe pɛ́ɛ́ dó hwenu e Jehovah ɖè é. È gbà tò ɔ bɔ é jɛ vɔ̌ bǐ é ɔ, xwè 70 pɛ́ɛ́ ɖó wɛ é ɖè nɛ. Amɔ̌, Izlayɛli-ví lɛ lɛkɔ wá tò yeɖesunɔ tɔn mɛ cobo ka mɔ wuvɛ̌ gègě. Mǐ na wá kplɔ́n nǔ d’eji.
Isaïe 44:28; 45:1-4; Ezra 1:1-11.