TÀN 81
Ye Ðeji Dó Alɔdo Mawu Tɔn Wu
GBƐTƆ́ hú 50 000 wɛ zɔn ali sín Babilɔnu yì Jeluzalɛmu. Amɔ̌, ee ye wá Jeluzalɛmu é ɔ, mɛɖebǔ ɖò finɛ ǎ, tò ɔ kpó ɖò gbigba jí. Izlayɛli-ví lɛ ɖó na vɔ́ tò ɔ bǐ gbǎ.
Nǔ nukɔntɔn e ye bló lɛ é ɖokpo wɛ nyí vɔsakpe. Vɔsakpe enɛ jí wɛ ye nɔ savɔ̌ nú Jehovah ɖè. Sun yɔywɛ ɖé gudo ɔ, Izlayɛli-ví lɛ jɛ tɛmpli ɔ gbá jí. Amɔ̌, kɛntɔ́ e ɖò tò e sɛya ye lɛ é mɛ é ba ɖɔ Izlayɛli-ví lɛ ni gbá tɛmpli ɔ ǎ. Enɛ wu ɔ, ye tɛnkpɔn bo na gbà ayi dó nú ye bonu ye na ɖó azɔ̌ ɔ te. Gudo mɛ ɔ, kɛntɔ́ enɛ lɛ ɖɔ nú axɔsu yɔyɔ̌ Pɛlusii tɔn ɖɔ é ni dó sɛ́n ɖé bo dó ɖó azɔ̌ ɔ te.
Ee Izlayɛli-ví lɛ wá Jeluzalɛmu, bɔ é bló xwè 17 gudo é ɔ, Jehovah sɛ́ gbeyiɖɔ tɔn Agayi kpo Zakali kpo dó. Gbeyiɖɔ enɛ lɛ ɖɔ nú togun ɔ ɖɔ ye ni lɛ́ jɛ azɔ̌ ɔ wu. È dó sɛ́n ɖɔ ye ni ma gbá tɛmpli ɔ ó có, ye ɖeji dó alɔdo Jehovah tɔn wu, bo setónú nú gbeyiɖɔ lɛ.
Enɛ wu ɔ, axɔsuzɔwatɔ́ e nɔ nyí Tatenayii é wá kàn acɛ e Izlayɛli-ví lɛ ɖó bo ɖò tɛmpli ɔ gbá wɛ é byɔ ye. Izlayɛli-ví lɛ ɖɔ n’i ɖɔ Axɔsu Silusi wɛ ɖɔ nú emi hwenu e emi ɖò Babilɔnu é ɖɔ: ‘Mi yì Jeluzalɛmu lo, bo vɔ́ tɛmpli Jehovah Mawu mitɔn tɔn gbá.’
Tatenayii sɛ́ wema dó Babilɔnu, bo kanbyɔ ɖɔ Silusi ɖɔ mɔ̌ nugbǒ hwenu e é ɖò gbɛ̀ é à jí. Tlolo ɔ, axɔsu yɔyɔ̌ Pɛlusii tɔn sɛ́ wema dó. Wema ɔ ɖɔ ɖɔ Silusi ɖɔ mɔ̌ nugbǒ. Axɔsu ɔ lɛ́ wlan dó wema ɔ mɛ ɖɔ: ‘Jǒ Izlayɛli-ví lɛ dó bonu ye ni gbá tɛmpli Mawu yetɔn tɔn. Un ɖegbe nú we ɖɔ a ni d’alɔ ye.’ Xwè ɛnɛ mɔ̌ gudo ɔ, ye fó tɛmpli ɔ gbigbá, bɔ xomɛ hun Izlayɛli-ví lɛ kaka.
È gbá tɛmpli ɔ fó, bɔ é ɖó xwè 48 gudo é ɔ, nɛ̌ Jeluzalɛmu ka cí? Jeluzalɛmunu lɛ jɛ hɛ̌n, bɔ toxo ɔ kpo tɛmpli Mawu tɔn kpo sɔ́ nyɔ́ kpɔ́n ɖebǔ ǎ. Izlayɛli-ví Ɛzla ɖò Babilɔnu bo sè ɖɔ è ɖò na jla tɛmpli ɔ ɖó, bɔ é na nyɔ́ ɖɛkpɛ. Enɛ wu ɔ, a ka tuùn nǔ e é wà é à?
Ɛzla yì mɔ axɔsu Pɛlusii tɔn Alutakɛlukesi. Axɔsu ɖagbe enɛ na nǔ gègě Ɛzla bonu é na bɛ́ yì Jeluzalɛmu. Ɛzla ɖɔ nú Izlayɛli-ví e ɖò Babilɔnu lɛ é ɖɔ ye ni d’alɔ emi bonu emi na bɛ́ nùnina lɛ yì Jeluzalɛmu. Mɛ 6 000 mɔ̌ ɖɔ emi na xwedó é. Ye ɖó kpatagan kpo siká gègě kpo, gɔ́ nú akwɛnú ɖevo lɛ bo na bɛ́ yì.
Ɛzla jɛ linkpɔ́n mɛ, ɖó jaguda lɛ nɔ nɔ ali ɔ jí. Jaguda enɛ lɛ sixu xò kpatagan kpo siká yetɔn lɛ kpo yí bo hu ye. Enɛ wu ɔ, Ɛzla xò togun ɔ kplé lee mɔ gbɔn wɛ a ɖè ɖò ɖiɖe ɔ mɛ é. Enɛ gudo ɔ, ye xoɖɛ sɛ́dó Jehovah ɖɔ é ni cyɔn alɔ emi jí kaka yì Jeluzalɛmu.
Jehovah cyɔn alɔ ye jí nugbǒ. Sun ɛnɛ gudo ɔ, ye jɛ Jeluzalɛmu wuyɛyɛ̌-afɔyɛ́yɛ́. Nǔ enɛ xlɛ́ ɖɔ Jehovah nɔ cyɔn alɔ mɛ e ɖeji dó alɔdo tɔn wu lɛ é jí à cé?
Ezra wemata 2 jɛ 8.