TÀN 85
È Jì Jezu Ðò Kanlin-Xɔ Mɛ
A KA tuùn yɛyɛví e ɖò ɖiɖe ɔ mɛ é à? Jezu wɛ. Tlolo wɛ è jì i ɖò kanlin-xɔ ɖé mɛ. Mali ɖò Jezu sɔ́ mlɔ́ tò ɖé mɛ wɛ. Nǔ e mɛ sɔkɛtɛkɛtɛ lɛ kpo kanlin ɖevo lɛ kpo nɔ ɖu nǔ ɖè é wɛ . Amɔ̌, etɛwu Mali kpo Jozɛfu kpo ka ɖò finɛ kpo kanlin lɛ kpo? Finɛ jɛn è ka nɔ jì vǐ ɖè à?
Eǒ. Amɔ̌, nǔ e wu ye ɖò finɛ é ɖíe: Axɔsu Hlɔma tɔn Sezaa Ogusi ɖè sɛ́n ɖé tɔn, bo ɖɔ mɛ ɖokpo ɖokpo ni lɛkɔ yì tò e mɛ è jì i ɖè é, bo dó nyikɔ wema mɛ. Bɛteleyɛmu wɛ è jì Jozɛfu ɖè. Amɔ̌, ee é kpo Mali kpo wá finɛ é ɔ, ye mɔ xɔ dó fí ɖebǔ ǎ. Enɛ wu wɛ ye gbɔ bo wá ɖò finɛ kpo kanlin lɛ kpo. Gbè enɛ gbè ɖokpo ɔ wɛ Mali jì Jezu. Amɔ̌, nǔ ɖebǔ wà vǐ ɔ ǎ, lee mɔ gbɔn wɛ a ɖè é.
A ka mɔ lɛngbɔnyitɔ́ e ja Jezu kpɔ́n gbé lɛ é à? Gbehan mɛ wɛ ye ɖè, bo ɖò zǎn cɔ́ wɛ ɖò lɛngbɔ̌ yetɔn lɛ kɔn, bɔ weziza ɖé hɔ́n lɛlɛ̌ dó ye. Wɛnsagun ɖé wɛ! Xɛsi ɖaxó ɖé jɛ lɛngbɔnyitɔ́ lɛ bǐ jí. Amɔ̌, wɛnsagun ɔ ɖɔ: ‘Mi ma ɖi xɛsi ó! Wɛnɖagbe ɖé dó nú mi gbé wɛ un wá. È jì Klisu Aklunɔ ɔ égbé ɖò Bɛteleyɛmu. É na hwlɛn togun ɔ! Mi na mɔ bɔ è bǔ avɔ dó é, bo sɔ́ ɛ mlɔ́ tò ɖé mɛ.’ Wɛnsagun wɔbuwɔbu ɖé lɛ wá xwetɔ́n ajijimɛ, bo jɛ Mawu kpa jí. Azɔn ɖokpo ɔ, lɛngbɔnyitɔ́ enɛ lɛ fya bo yí ba Jezu mɔ.
A ka tuùn nǔ e wu Jezu gbɔn vo tawun é à? A ka tuùn mɛ e é nyí tawun é à? Vǐ Mawu tɔn nukɔntɔn ɔ wɛ, bɔ mǐ ko kplɔ́n nǔ d’eji ɖò tàn nukɔntɔn wema elɔ tɔn mɛ. A ka flín à? É w’azɔ̌ xá Jehovah, bɔ ye ɖó jinukúnsin, ayikúngban kpo nǔ ɖevo lɛ kpo.
Jehovah zé gbɛ̀ Vǐ tɔn tɔn sín jixwé dó xomɛ nú Mali. Yɛyɛví ɔ jɛ susu jí ɖò xò tɔn mɛ, lee yɛyɛví bǐ nɔ sù gbɔn ɖò nɔ yetɔn lɛ xomɛ é ɖɔhun. Amɔ̌, Vǐ Mawu tɔn wɛ nú yɛyɛví enɛ. Gudo mɛ ɔ, è jì Jezu ɖò kanlin-xɔ mɛ ɖò Bɛteleyɛmu. Jiji Jezu tɔn sín wɛn dido hun xomɛ nú wɛnsagun lɛ kaka. A ka mɔ nukúnnú jɛ nǔ é wu wɛ é mɛ lo à?