TÀN 87
Jezu Ðò Tɛmpli ɔ Mɛ
KPƆ́N nyaví e ɖò xó ɖɔ xá sunnu mɛxo enɛ lɛ wɛ é. Nùkplɔnmɛtɔ́ wɛ nú ye ɖò tɛmpli Mawu tɔn mɛ ɖò Jeluzalɛmu. Jezu wɛ nyí nyaví ɔ. Xwè 12 ɖó wɛ é ɖè hwenɛnu.
Jezu tuùn nǔ gègě dó Mawu wu, bo lɛ́ mɔ nukúnnú jɛ Biblu mɛ. Nǔ enɛ kpaca nùkplɔnmɛtɔ́ enɛ lɛ tawun. Amɔ̌, etɛwu Jozɛfu kpo Mali kpo lɔmɔ̌ ma ka ɖò finɛ ǎ? Fitɛ ye ka ɖè? Mi nú mǐ ni ba dò na.
Xwewu xwewu ɔ, Jozɛfu nɔ kplá xwédo tɔn wá Jeluzalɛmu, bɔ ye nɔ ɖu xwè titewungbe e nɔ nyí Dindinwayi-xwè é. Nazalɛti lín dó Jeluzalɛmu tawun. Mɛɖebǔ ɖó mɔ̌to hwenɛnu ǎ, mɔ̌ jɛn pípan ma lɛ́ ɖè ǎ é nɛ. Mɛ gègě nɔ zɔn afɔ. Ye nɔ bló azǎn atɔn mɔ̌ cobo nɔ yì.
Jozɛfu sín xwédo ko d’agba. Enɛ wu ɔ, é ɖó na kpé nukún dó nɔví sunnu kpo nɔví nyɔnu Jezu tɔn lɛ kpo wu. Jozɛfu kpo Mali kpo lɛkɔ sín xwè ɔ tɛnmɛ kpo vǐ yetɔn lɛ kpo, bo wá xwè Nazalɛti gbè ɖokpo. Ye vɛdo ɖɔ Jezu na ɖò mɛ e kpo emi kpo zɔn lɛ é mɛ wɛ sín. Ee ye ɖi zɔnlin nú kéze ɖokpo bo wá nɔte é ɔ, ye ba Jezu kpò. Ye ba ɛ gbɔn hɛnnumɔ kpo xɔ́ntɔn yetɔn lɛ kpo gɔ́n, bo mɔ ɛ ǎ. Enɛ wu ɔ, ye lɛkɔ yì Jeluzalɛmu biba ɛ gbé.
Gudo mɛ ɔ, ye wá mɔ Jezu ɖò tɛmpli ɔ mɛ kpo nùkplɔnmɛtɔ́ lɛ kpo. É ɖò tó ɖó ye wɛ, bo lɛ́ ɖò nǔ kanbyɔ ye wɛ. Nùnywɛ Jezu tɔn kpaca mɛ e ɖò tó ɖó é wɛ lɛ é bǐ. Loɔ, Mali ɖɔ: ‘Vǐ ce, etɛwu a ka bló mɔ̌ xá mǐ? Bɔ nyɛ kpo tɔ́ towe kpo ɖò biba we wɛ adohu adohu.’
Jezu ɖɔ nú ye ɖɔ: ‘Etɛwu mi ka ɖò biba mì wɛ? Mi tuùn ɖɔ un ɖó na ɖò Tɔ́ ce sín xɔ mɛ à cé?’
Jezu yí wǎn nú fí e é na kplɔ́n Mawuxó ɖè é ninɔ. Mɔ̌ wɛ é ɖó na nyí gbɔn nú mǐ lɔmɔ̌ à cé? Ee ye lɛkɔ wá Nazalɛti é ɔ, Jezu nɔ yì kplé lɛ, bo nɔ sɛ̀n Jehovah ɖò aklunɔzán gbla lɛ bǐ mɛ. É kplɔ́n nǔ gègě ɖò Biblu mɛ, ɖó é nɔ ɖó ayi nǔ e è nɔ ɖɔ ɖò kplé ɔ jí lɛ é wu hwebǐnu. Mi nú mǐ ni xwedó kpɔ́ndéwú Jezu tɔn.