TÀN 103
Jezu Sɔ́ Éɖee Xlɛ́ Ahwanvu Tɔn Lɛ
EE PIYƐƐ kpo Jaan kpo gosin fí e è ɖi Jezu dó é ɔ, Mali ɖokponɔ cí finɛ. É jɛ avǐ ya jí. Enɛ gudo ɔ, é fɛ bo kpɔ́n yɔdo ɔ mɛ, lee ɖiɖe e wá yì é xlɛ́ gbɔn é. É mɔ wɛnsagun wè ɖò yɔdo ɔ mɛ! Ye kanbyɔ ɛ ɖɔ: ‘Etɛwu a ka ɖò avǐ ya wɛ?’
Mali ɖɔ nú ye ɖɔ: ‘Ye sɔ́ Aklunɔ ce sín fí, bɔ un tuùn fí e ye sɔ́ ɛ yì ɖó é ǎ.’ Ee Mali ɖɔ mɔ̌ é ɔ, é lilɛ bo mɔ nya ɖé. Nya ɔ kanbyɔ ɛ ɖɔ: ‘Mɛ̌ ba wɛ a ka ɖè?’
Mali ka vɛdo ɖɔ jikpajikpɔntɔ́ ɔ wɛ sín, bo lin ɖɔ é wɛ na ko sɔ́ cyɔ Jezu tɔn. Enɛ wu ɔ, Mali ɖɔ n’i ɖɔ: ‘Enyi hwi wɛ sɔ́ ɛ sín fí hǔn, ɖɔ fí e a sɔ́ ɛ yì ɖó é nú mì.’ Amɔ̌, Jezu wɛ ka nyí nya ɔ. É ɖò agbaza e mɛ Mali ma sixu tuùn i ɖè ǎ é. Amɔ̌, ee é ylɔ nyikɔ Mali tɔn é ɔ, é wá tuùn ɖɔ Jezu wɛ. É kanwezun bo yì ɖɔ nú ahwanvu lɛ ɖɔ: ‘Un mɔ Aklunɔ ɔ!’
Gbè nɛ gbè ɖokpo ɔ, ahwanvu wè xwè gletoxo Emayusi tɔn mɛ, bɔ nya ɖé wá xwedó ye wu. Hu e è hu Jezu é blawu nú ye tawun. Ee ye ɖò yìyì wɛ é ɔ, nya ɔ tinmɛ nǔ gègě nú ye dó Biblu wu, bɔ xomɛ hun ye tawun. Ye wá nɔte bo jló na ɖu nǔ. Hwenɛnu wɛ ye wá tuùn ɖɔ Jezu wɛ. Enɛ gudo ɔ, Jezu bú sín tɛntin yetɔn. Ahwanvu lɛ kanwezun lɛkɔ ɖido ɖiɖɔ nú mɛsɛ́dó lɛ gbé ɖò Jeluzalɛmu.
Hwenu e enɛ ɖò jijɛ wɛ é ɔ, Jezu lɛ́ sɔ́ éɖee xlɛ́ Piyɛɛ. Mɛ ɖevo lɛ sè mɔ̌ é ɔ, xomɛ hun ye. Enɛ gudo ɔ, ahwanvu wè lɛ yì mɔ mɛsɛ́dó lɛ ɖò Jeluzalɛmu. Ye ɖɔ lee Jezu sɔ́ éɖee xlɛ́ ye lɔmɔ̌ gbɔn ɖò ali jí é nú mɛsɛ́dó lɛ. Enɛ ɖɔ wɛ ye ɖè kɛɖɛ bɔ nùjiwǔ ɖé jɛ. Nùjiwǔ tɛ?
Kpɔ́n ɖiɖe ɔ mɛ. Xɔ e mɛ ahwanvu lɛ ɖè é sín hɔn ɖò súsú jí có Jezu wá tɔ́n ɖò tɛntin yetɔn. Xomɛ hun ahwanvu lɛ tawun. Azǎn awǎjijɛ tɔn nɛ à cé? A ka tuùn azɔn nabi e Jezu ko sɔ́ éɖee xlɛ́ ahwanvu tɔn lɛ dìn é à? Azɔn atɔ́ɔ́n nɛ à cé?
Mɛsɛ́dó Tɔmaa ɖò finɛ có Jezu sɔ́ éɖee xlɛ́ ahwanvu lɛ ǎ. Enɛ wu ɔ, ahwanvu lɛ ɖɔ n’i ɖɔ: ‘Mǐ mɔ Aklunɔ ɔ!’ Amɔ̌, Tɔmaa ɖɔ emiɖesu jɛn na mɔ Jezu hwɛ̌ cobo na ɖi. Azǎn tɔn tantɔn gudo ɔ, ahwanvu lɛ lɛ́ kplé ɖò xɔ ɖokpo ɔ mɛ, bɔ hɔn ɔ ɖò súsú. Hwenɛnu ɔ, Tɔmaa lɔmɔ̌ ɖò finɛ. Jezu lɛ́ wá tɔ́n ɖò ye tɛntin ajijimɛ. Tɔmaa wá ɖi lo.