TÀN 105
Jezu Kɔn Gbigbɔ Mímɛ́ Dó Ahwanvu Tɔn lɛ Jí
AHWANVU Jezu tɔn lɛ wɛ nyí mɛ e ɖò finɛ lɛ é. Ye setónú n’i, bo nɔte ɖò Jeluzalɛmu. Ee ye bǐ kplé é ɔ, zingidi ɖaxó ɖé kpé xwé e gbè ye ɖè é bǐ. É cí jɔhɔn ɖaxó wɛ ɖò nyinyi wɛ ɖɔhun. Enɛ gudo ɔ, zoɖɛ́ tɔ́n ɖò ta nú ahwanvu lɛ ɖokpo ɖokpo. A ka mɔ zoɖɛ́ ɔ ɖò ta nú ye à? Etɛ ka nyí tinmɛ nǔ enɛ lɛ bǐ tɔn?
Nùjiwǔ ɖé wɛ! Jezu ɖò Tɔ́ tɔn gɔ́n ɖò jixwé, bo ɖò gbigbɔ mímɛ́ Mawu tɔn kɔn dó ahwanvu tɔn lɛ jí wɛ. A ka tuùn nǔ e gbigbɔ mímɛ́ enɛ d’alɔ ye bɔ ye wà é à? Ye bǐ jɛ xó ɖɔ dó gbè vovo mɛ jí.
Mɛ gègě ɖò Jeluzalɛmu bo sè zingidi ɔ, bo wá nǔ e ɖò jijɛ wɛ é kpɔ́n gbé. Tò ɖevo mɛ nu ɖé lɛ ɖò ye mɛ, bo wá Pantekotu e nyí xwè Izlayɛli-ví lɛ tɔn é tɛnmɛ. Nǔ e jonɔ enɛ lɛ mɔ é kpaca ye tawun. Ye sè bɔ ahwanvu lɛ ɖò nùjiwǔ e Mawu wà lɛ é sín xó ɖɔ dó gbè ye mɛ ɖokpo ɖokpo tɔn mɛ wɛ.
Jonɔ lɛ ɖɔ: ‘Galileenu wɛ ka nyí ye bǐ à cé? Nɛ̌ ka gbɔn, bɔ ye kpéwú bo ɖò xó ɖɔ dó tò mǐtɔn lɛ sín gbè vovo lɛ mɛ wɛ?’
Piyɛɛ ka site bo tinmɛ nǔ nú ye. É zé gbè yì jǐ, bo ɖɔ lee è hu Jezu, bɔ Jehovah ka fɔ́n ɛ sín kú gbɔn é nú togun ɔ. Piyɛɛ ɖɔ: ‘Jezu ɖò jixwé dìn bo ɖò ɖisi Mawu tɔn xwé. É kɔn gbigbɔ mímɛ́ e sín akpá é dó é dó mǐ jí. Nǔ e wu mi sè, bo lɛ́ mɔ nùjiwǔ enɛ lɛ é nɛ.’
Ee Piyɛɛ ɖɔ xó enɛ lɛ é ɔ, nǔ e jɛ dó Jezu wu lɛ é vɛ́ nú mɛ gègě. Ye kanbyɔ ɖɔ: ‘Etɛ mǐ ka ɖó na wà?’ Piyɛɛ ɖɔ nú ye ɖɔ: ‘Mi lɛkɔ sín hwɛ mitɔn lɛ gudo, bonu è na bló baptɛm nú mi.’ Enɛ wu ɔ, gbɛtɔ́ 3 000 mɔ̌ bló baptɛm gbè nɛ gbè bo huzu ahwanvu Jezu tɔn.