TÀN 116
Nǔ E Mǐ Na Wà bo Na Nɔ Gbɛ̀ Kaka Sɔyi É
A KA tuùn nǔ e xà wɛ nyɔnuví enɛ kpo xɔ́ntɔn tɔn lɛ kpo ɖè é à? Wema e xà wɛ a ɖè é wɛ—Tàn Biblu Tɔn lɛ Sín Wema Ce. Tàn e xà wɛ a ɖè dìn é xá wɛ ye lɔ ɖè—“Nǔ E Mǐ Na Wà Bo Na Nɔ Gbɛ̀ Kaka Sɔyi É.”
Etɛ mǐ ka na wà bo na nɔ gbɛ̀ kaka sɔyi? Mǐ ɖó na tó tuùn Jehovah kpo Vǐ tɔn Jezu kpo hwɛ̌. Biblu ɖɔ: ‘Gbɛ̀ mavɔmavɔ ɔ wɛ nyí ɖɔ è ni tuùn Mawu nugbǒ ɖokpo ɔ, bo lɛ́ tuùn Jezu Klisu e é sɛ́dó gbɛ̀ ɔ mɛ é.’
Nɛ̌ mǐ ka sixu tuùn Jehovah Mawu kpo Vǐ tɔn Jezu kpo gbɔn? Tàn Biblu Tɔn lɛ Sín Wema Ce xixa sín bǐbɛ̌mɛ kaka jɛ vivɔnu nyí wlɛnwín ɖokpo. É kplɔ́n nǔ gègě mǐ dó Jehovah kpo Jezu kpo wu, kabǐ? É lɛ́ kplɔ́n nǔ gègě mǐ dó nǔ e ye ko wà lɛ é kpo nǔ ye na wá wà lɛ é kpo wu. Amɔ̌, wema elɔ kɛɖɛ xixa ko kpé ǎ.
A ka mɔ wema wegɔ enɛ e ɖò finɛ é à? Biblu wɛ. Ðɔ nú mɛɖé, bonu é ni xà akpáxwé Biblu tɔn e jí tàn ɖokpo ɖokpo jinjɔn lɛ é nú we. Biblu ɖɔ nǔ e sín hudo mǐ ɖǒ bo na sɛ̀n Jehovah ganji, ba mɔ gbɛ̀ mavɔmavɔ é bǐ nú mǐ. Enɛ wu ɔ, mǐ ɖó na ɖó aca, bo na nɔ kplɔ́n Biblu hwɛhwɛ.
Amɔ̌, Jehovah kpo Jezu kpo tuùntuùn kɛɖɛ ko kpé ǎ. Mǐ sixu tuùn nǔ gègě dó ye kpo nùkplɔnmɛ yetɔn lɛ kpo wu ganji, cobo ka na lɛ́ xò gbɛ̀ mavɔmavɔ ɔ kpò. A ka tuùn nǔ ɖevo e lɛ́ kpò é à?
Gbɛzinzan mǐtɔn ɖó na sɔgbe kpo nǔ e mǐ kplɔ́n lɛ é kpo. A ka flín Juda Isikaliɔti à? É lɔ ɖò mɛ 12 e Jezu cyan bɔ ye nyí mɛsɛ́dó tɔn lɛ é mɛ. Juda tuùn nǔ gègě dó Jehovah kpo Jezu kpo wu. Amɔ̌, etɛ é ka wà? É wá dó nukúnkɛ́n, bo sà Jezu nú kɛntɔ́ tɔn lɛ yí gankwɛ 30. Enɛ wu ɔ, Juda na mɔ gbɛ̀ mavɔmavɔ ǎ.
A ka flín Geazi e wu mǐ kplɔ́n nǔ dó ɖò Tàn 69 gɔ́ ɔ mɛ é à? É dó nukúnkɛ́n akwɛ kpo avɔ e ma nyí étɔn ǎ é kpo tɔn. Enɛ wu ɔ, é ɖ’adingban bo mɔ tɛn dó yí nǔ enɛ lɛ. Amɔ̌, Jehovah dɔn tó n’i. Enyi mǐ lɔmɔ̌ ma setónú nú sɛ́n tɔn lɛ ǎ ɔ, é na dɔn tó nú mǐ.
Amɔ̌, mɛ gègě sɛ̀n Jehovah hwebǐnu kpo gbejininɔ kpo. Mǐ jló na wà nǔ mɛ enɛ lɛ ɖɔhun, kabǐ? Nyaví kpɛví Samuwɛli nyí kpɔ́ndéwú ɖagbe bɔ mǐ na xwedó. A ka flín ɖɔ xwè ɛnɛ alǒ atɔ́ɔ́n mɔ̌ jɛn é ɖó, bo jɛ Jehovah sɛ̀n jí ɖò goxɔ Tɔn mɛ, bɔ mǐ kplɔ́n ɖò Tàn 55 gɔ́ ɔ mɛ à? Enɛ wu ɔ, a na bo kpò ɖò vǔ ɔ, hwi lɔ hɛn ɔ a na sɛ̀n Jehovah.
Mɛ e sín afɔdomɛ mǐ bǐ ɖó na xwedó tawun é wɛ nyí Jezu Klisu. É kpó ɖò kpɛví cobo ka yì tɛmpli mɛ, bo ɖɔ xó nú gbɛtɔ́ lɛ dó Tɔ́ tɔn jixwé tɔn wu, lee mǐ mɔ gbɔn ɖò Tàn 87 gɔ́ ɔ mɛ é. Mi nú mǐ ni xwedó kpɔ́ndéwú tɔn, bo ɖɔ xó nú gbɛtɔ́ gègě dó Jehovah Mawu mǐtɔn kpo Vǐ tɔn Jezu Klisu kpo wu, lee mǐ kpéwú gbɔn é. Enyi mǐ bló nǔ enɛ lɛ ɔ, mǐ na nɔ gbɛ̀ kaka sɔyi ɖò palaɖisi yɔyɔ̌ e Mawu na bló dó ayikúngban ɔ jí é mɛ.
Jaan 17:3; Psaume 145:1-21.