Nukplɔnkplɔn 13

Nɛ Hwɛ Ka Na Mɔ Sinsɛ̀n Nugbo Ɔ Gbɛn?

Sinsɛ̀n lɛ bǐsese wɛ nyɔ́ ɖo Mawu nukún mɛ à, abǐ ɖokpo géé wɛ nyɔ́? (1)

Etɛwu wɛ sinsɛ̀n gege lɛ ka nɔ ɖɔ emi nyí Klisanwun? (2)

Nɛwɛ hwɛ ka sigan tuùn Klisanwun nugbo lɛ gbɛn? (3-7)

1. Sinsɛ̀n Klisanwun ɖokpo wɛ Jezu ze d’ayi. Enɛwutu ɖo egbe ɔ, agbaza ɖokpo géé wɛ ɖo na ɖe, abǐ kplekple ɖokpo nú Jehovah Mawu-sɛntɔ nugbo lɛ. (Jaan 4:23, 24; Efɛzinu lɛ 4:4, 5) Biblu kplɔ́n mí ɖɔ̀ gbɛtɔ kpɛɛvi ɖe kpowun wɛ ɖò ali sobwé gbɛ̀ mavɔmavɔ tɔn ji.—Matie 7:13, 14.

2. Biblu ko ɖɔ ɖ’ayi ɖɔ ɖò kú mɛsɛ́dó lɛ tɔn gudo ɔ, nukplɔnkplɔn masɔgbe abǐ walɔ e ma nyí Klisanwun tɔn lɛ ǎ é na byɔ agun Klisanwun tɔn mɛ. Gbɛtɔ lɛ na dɔn nuɖitɔ lɛ ɖo yeɖee ji bo na jó Klisu dó. (Matie 7:15, 21-23; Mɛsɛ́dó 20:29, 30) Nǔ é zɔ́n bɔ mí nɔ mɔ sinsɛ̀n vǒvǒ lɛ e e nɔ ɖɔ émi nyí Klisanwun lɛ é nɛ. Nɛwɛ mí ka na tuùn Klisanwun nugbo lɛ gbɛn?

3. Xlɛ titewungbe Klisanwun nugbo lɛ tɔn wɛ nyí ɖɔ yé ɖó wanyiyi titewungbe na yeɖee. (Jaan 13:34, 35) È kplɔ́n yě ɖɔ̀ yé kpɔnte hú gbɛtɔ akɔ̀ ɖevo lɛ, abǐ sinmɛ agbaza tɔn ǎ. Mɔɖokpo ɔ è kplɔ́n yě ɖɔ yé ni gbɛwannu gbɛtɔ tò ɖevo lɛ mɛ tɔn ǎ. (Mɛsɛ́dó 10:34, 35) Enɛwutu yé nɔ ɖó alɔ ɖò ahwanfunfun mɛ ǎ. Klisanwun nugbo lɛ nɔ wànu ɖo yeɖee tɛntin ɖi nɔvisunnu kpó nɔvinyɔnu kpó.—1 Jaan 4:20, 21.

4. Xlɛ ɖevo sinsɛ̀n nugbo tɔn wɛ nyí ɖɔ̀ sinsɛ̀n-gbɛ́ tɔn lɛ ɖo sisi titewungbe nú Biblu. Yé yí i ɖi Xó Mawu tɔn bo ka ɖo ɖi nǔ nú e e nɔ ɖɔ lɛ. (Jaan 17:17; 2 Timɔtée 3:16, 17) Yé nɔ ze nukún ɖaxo do kpɔ́n Xó Mawu tɔn ɖɔ̀ é nyí nu titewungbe hú linlin abǐ aca gbɛtɔ tɔn lɛ. (Matie 15:1-3, 7-9) Yé nɔ tɛnkpɔn bo nɔ xwedo Biblu ɖò gbɛzan yetɔn egbesɔ-egbesɔ tɔn mɛ. Enɛwu ɔ yé nɔ ɖɔ̀ nuɖe bo nɔ wà ɖevo ǎ.—Titu 1:15, 16.

5. Mɔɖokpo ɔ, sinsɛ̀n nugbo ɔ ɖo na ɖó sísí nú nyikɔ Mawu tɔn. (Matie 6:9) Jezu ɔ zɔ́n bɔ mɛɖevo lɛ tuùn nyikɔ Mawu tɔn e nyí Jehovah é. Klisanwun nugbo lɛ ɖo na blo nǔ ɖokpo ɔ. (Jaan 17:6, 26; Hlɔmanu lɛ 10:13, 14) Mɛ wɛ ka ɖò gbɛ́kplekple towe mɛ bo nɔ ɖɔ xo nú mɛɖevo lɛ ɖo Mawu sin nyikɔ ji?

6. Klisanwun nugbo lɛ ɖo na ɖɔ̀ xó ɖò Axɔsuɖuta Mawu tɔn ji. Jezu lɔ wà mɔ̌. É nɔ ɖɔ xo hwɛ̌hwɛ̌ ɖò Axɔsuɖuta ɔ ji. (Luka 8:1) É ɖè gbe nú ahwanvu tɔn lɛ ɖɔ̀ yé ni nɔ ɖɔ̀ xó ɖokpo ɔ lɛdo ayikungban bǐ. (Matie 24:14; 28:19, 20) Klisanwun nugbo lɛ ɖi ɖɔ̀ Axɔsuɖuta Mawu tɔn kɛɖɛ wɛ na hɛn fifa kpó ayijayi nugbo kpó wá ayikungban ji.—Psaumes 146:3-5.

7. Ahwanvu Jezu tɔn lɛ ɖo na nyí akpaɖexwe gbɛ́ nyanya elɔ tɔn ǎ. (Jaan 17:16) Yé ɖo na ɖó alɔ ɖò abǐ toxoɖiɖɔ gufinfɔn mɛ ǎ. Yé nɔ hɔn nú jijɔ ma sɔgbe, aca abǐ ninɔmɛ e nyí gbɛ̀ ɔ bǐ tɔn é. (Jaki 1:27; 4:4) A sixu mɔ sinsɛ̀n ɖo gbɛ́kplekple fi e a nɔ nɔ é bɔ é ɖò xlɛ Klisanwun nugbo tɔn enɛ lɛ à?

[Tinmɛ E Nɔ Nɔ Ðiɖe Glɔ É, Wexwɛ 27]

Klisanwun nugbo lɛ yiwannu yeɖee, ɖó sísí nú Biblu, bo nɔ ɖɔ xo ɖó Axɔsuɖuta Mawu tɔn ji