Tutoblonunu Ee Nɔ Wà Jlǒ Jehovah Tɔn É

GBƆN gbɛ̀ ɔ bǐ mɛ ɔ, tutoblonunu sinsɛn tɔn lɛ, toxóɖiɖɔ tɔn lɛ, ajɔ̌wiwa tɔn lɛ, kpo ɖevo lɛ kpo gegě wɛ tíìn, bɔ nǔ e è nɔ dó tuùn ye na lɛ é, nǔ e gbé nya wɛ ye ɖè lɛ é, linlin yetɔn lɛ, kpo nǔ e ye ɖi nǔ na lɛ é kpo nɔ gbɔn vovo. Amɔ̌, tutoblonunu ɖokpo tíìn bo gbɔn vo tawun nú ɖě lɛ bǐ. Xó Mawu tɔn xlɛ́ céɖécéɖé ɖɔ Kúnnuɖetɔ́ Jehovah tɔn lɛ sín tutoblonunu wɛ.

² Awǎjijɛ sín nǔ wɛ é nyí ɖɔ a jɛ gbɛ̌ dó xá tutoblonunu Jehovah tɔn jí. Hwiɖesunɔ wá tuùn jlǒ Mawu tɔn, bo jɛ wiwa jí. (Ðɛh. 143:10; Hlɔ. 12:2) A nyí sinsɛnzɔ́watɔ́ kanɖodónǔwutɔ́ ɖé, bo nɔ w’azɔ̌ ɖó kpɔ́ xá kplékplé nɔví lɛ tɔn wanyiyinɔ e gbɔn gbɛ̀ ɔ bǐ mɛ é ɖé. (2 Kɔ. 6:4; 1 Pi. 2:17; 5:9) Lee è ko d’akpá tɔn ɖò Xó Mawu tɔn mɛ gbɔn é ɔ, enɛ nɔ hɛn nyɔna kpo awǎjijɛ kpo gegě wá nú we. (Nǔx. 10:22; Mak. 10:30) Ðó a ɖò jlǒ Jehovah tɔn wà wɛ kpo gbejininɔ kpo dìn wutu ɔ, a ɖò nǔ sɔ́ ɖ’ayǐ wɛ bá ɖu sɔgudo susunɔ ɖé sín vivǐ kaka sɔyi.—1 Tim. 6:18, 19; 1 Jaan 2:17.

³ Tutoblonunu ɖokpo géé wɛ Gbɛɖotɔ́ Ðaxó mǐtɔn ɖó gbɔn gbɛ̀ ɔ bǐ mɛ, bɔ éɖesunɔ nɔ xlɛ́ ali tutoblonunu enɛ gbɔn mɛ e é sɔ́ lɛ é jí. Enɛ xlɛ́ ɖɔ Jehovah ɖesu wɛ nyí Gǎn nú nǔ lɛ bǐ. Mǐ ɖeji dó wǔ tɔn bǐ mlɛ́mlɛ́. É wɛ nyí Hwɛɖɔtɔ́ mǐtɔn, Sɛ́ndótɔ́ mǐtɔn, kpo Axɔ́su mǐtɔn kpo. (Eza. 33:22, nwt) Ðó é nyí Mawu ɖé bo ɖò tuto jí wutu ɔ, é bló tuto nú mǐ bɔ mǐ nɔ ‘wà azɔ̌ xá ɛ’ bonu linlin tɔn na dó jɛnu.—2 Kɔ. 6:1, 2.

⁴ Ee gbɛ̀ elɔ sín vivɔ ɖò sisɛkpɔ́ wɛ tawun é ɔ, mǐ nɔ nɔ acɛkpikpa Axɔ́su e è sɔ́ b’ɛ nyí Klisu Jezu é tɔn glɔ́. (Eza. 55:4; Nǔɖe. 6:2; 11:15) Jezu ɖɔ ɖ’ayǐ ɖɔ ahwanvu emitɔn lɛ na wà nǔ hú nǔ ɖěɖee emi wà ɖò sinsɛnzɔ́ ayikúngban jí tɔn emitɔn hwenu lɛ é. (Jaan 14:12) Nǔ ka na nyí mɔ̌ nǔgbo, ɖó ahwanvu tɔn lɛ na zán hwenu gegě dó w’azɔ̌, bo na ɖò jijɛji wɛ, lobo na gbló ada nú azɔ̌ ɔ gbɔn fí gegě ɖò gbɛ̀ ɔ mɛ. Ye na jla wɛnɖagbe Axɔ́suɖuto ɔ tɔn kaka yì fí e gbɛ̀ ɔ kponu ɖó é.—Mat. 24:14; 28:19, 20; Mɛ. 1:8.

⁵ Xó enɛ lɛ ko jɛnu nǔgbo. Amɔ̌, lee Jezu ko ɖɔ nyi wɛn gbɔn é ɔ, wɛnɖagbejijla sín azɔ̌ ɔ na fó hwenu e Jehovah ɖó dó é. Nǔɖɔɖ’ayǐ e ɖò Xó Mawu tɔn mɛ lɛ é bǐ xlɛ́ ɖɔ azǎn ɖaxó Jehovah tɔn e dó xɛsi é ko ɖò kɛnnɛkɛnnɛ bǐ.—Jowɛ. 3:4; Sof. 1:14-18; 2:2, 3; 1 Pi. 4:7.

⁶ Ðó mǐ tuùn nǔ e jlǒ Jehovah tɔn nyí é ɖò gan gudogudo tɔn elɔ lɛ mɛ wutu ɔ, gǎn ɖěɖee dó wɛ mǐ ɖè bo ɖò nǔ e Mawu byɔ ɖò mǐ sí lɛ é wà wɛ é ɖó na syɛn d’eji. Enɛ byɔ ɖɔ mǐ ni tuùn lee tutoblonunu Mawu tɔn nɔ w’azɔ̌ gbɔn é ganji, bo wà nǔ ɖó kpɔ́ xá ɛ bǐ mlɛ́mlɛ́. Tutoblonunu ɔ nɔ wà nǔ sɔgbe xá nǔgbododó Mawuxówema ɔ tɔn lɛ, kaka jɛ gbeɖiɖe lɛ, sɛ́n lɛ, gbeta lɛ, gbetakɛ́n lɛ, kpo nǔkplɔnmɛ ɖěɖee ɖò Xó Mawu tɔn mɛ lɛ é kpo jí.—Ðɛh. 19:8-10.

⁷ Enyi togun Jehovah tɔn xwedó alixlɛ́mɛ jinjɔn Biblu jí mɔhun lɛ ɔ, ye nɔ vo bo nɔ w’azɔ̌ ɖó kpɔ́ ɖò fífá kpo bǔninɔ kpo mɛ. (Ðɛh. 133:1; Eza. 60:17; Hlɔ. 14:19) Etɛ ka nɔ zɔ́n bɔ kancica e ɖò nɔví mǐtɔn e gbɔn gbɛ̀ ɔ bǐ mɛ lɛ é tɛntin é nɔ syɛn? Wanyiyi wɛ. É wɛ mǐ nɔ dó awu ɖɔhun, b’ɛ nɔ sísɛ́ mǐ ɖò nǔ bǐ mɛ. (Jaan 13:34, 35; Kolo. 3:14) Ðó Jehovah bló bɔ bǔninɔ enɛ ɖò tɛntin mǐtɔn wutu ɔ, mǐ nɔ nɔ xúsúxusu xá tutoblonunu tɔn sín akpáxwé jixwé tɔn ɔ.

TUTOBLONUNU JEHOVAH TƆN SÍN AKPÁXWÉ JIXWÉ TƆN Ɔ

⁸ Gbeyiɖɔ Ezayíi, Ezekiyɛli, kpo Daniyɛli kpo mɔ tutoblonunu Jehovah tɔn sín akpáxwé jixwé tɔn ɔ ɖò nǔmimɔ mɛ. (Eza., wemata 6; Ezek., wemata 1; Dan. 7:9, 10) Mɔ̌ ɖokpo ɔ, mɛsɛ́dó Jaan mɔ tuto jixwé tɔn enɛ ɖò nǔmimɔ ɖé mɛ, bo ɖexlɛ́ mǐ ɖò wema Nǔɖexlɛ́mɛ tɔn mɛ. É mɔ Jehovah ɖò axɔ́suzinkpo susunɔ ɖé jí, bɔ wɛnsagun lɛ lɛlɛ̌ dó è bo nɔ ɖɔ: “Mimɛ̌! Mimɛ̌! Mimɛ̌ wɛ Aklunɔ Mawu ɔ nyí; é tíìn ɖ’ayǐ, bo tíìn dìn; é na wá.” (Nǔɖe. 4:8) Jaan lɛ́ mɔ “Lɛngbɔ̌ví ɖokpo ɖò te ɖò axɔ́suzinkpo ɔ tɛntin,” Lɛngbɔ̌ví Mawu tɔn Jezu Klisu wɛ.—Nǔɖe. 5:6, 13, 14; Jaan 1:29.

⁹ Axɔ́suzinkpo jí e Jehovah jinjɔn ɖò nǔmimɔ ɔ mɛ é xlɛ́ ɖɔ é wɛ nyí Gǎn nú tutoblonunu enɛ. Tan Nukɔntɔn 29:11, 12 ɖɔ xó elɔ lɛ dó Jehovah kpo tɛn ɖaxó e mɛ é ɖè é kpo wu: ‘Jehovah, towe wɛ nyí susu, hlɔnhlɔn, acɔ́, axɔ́suɖuɖu kpo weziza kpo, ɖó nǔ e ɖò jinukúnsin kpo ayikúngban jí kpo lɛ bǐ wɛ nyí towe. Ðó hwi wɛ nyí axɔ́su e kpa acɛ dó atín kpo kan kpo nu é. Gɔ̌n towe wɛ dɔkun kpo susu kpo gosin. Hwi wɛ kpa acɛ nú nǔ bǐ. Alɔ towe mɛ wɛ hlɔnhlɔn kpo nǔbǐwukpíkpé kpo ɖè. Hwi wɛ ɖó acɛ, bo nɔ sɔ́ mɛ e jló we ɔ sù, bo ɖó acɛ bo nɔ dó wusyɛn lanmɛ nú mɛ e jló we é.’

¹⁰ Ðó Jezu Klisu nyí azɔ̌gbɛ́ Jehovah tɔn wutu ɔ, é ɖò tɛn ɖaxó ɖé mɛ ɖò jixwé, bɔ è na ɛ acɛ gegě. Nǔgbo ɔ, Mawu “sɔ́ nǔ lɛ bǐ ɖó Klisu sín acɛ mɛ, bo sɔ́ ɛ ɖó agun ɔ nu, bɔ é wɛ nyí gǎn ɖaxó bǐ ɔ.” (Efɛ. 1:22) Mɛsɛ́dó Pɔlu ɖɔ dó Jezu wu ɖɔ: “Mawu sɔ́ ɛ sù, bo sɔ́ ɛ ɖó tɛn e nyí ɖaxó bǐ ɔ mɛ, lobo na ɛ nyikɔ e hugǎn nyikɔ ɖě lɛ bǐ é, bonu è ylɔ́ Jezu sín nyikɔ hweɖebǔnu ɔ, mɛ e ɖò jixwé lɛ bǐ, kpo mɛ e ɖò ayikúngban jí lɛ bǐ kpo, kpodo mɛ e ɖò ayikúngban glɔ́ lɛ bǐ kpan na jɛkpo kpo sísí kpo, bonu mɛ bǐ na jla ɖɔ Jezu Klisu wɛ nyí Aklunɔ; enɛ ɔ wɛ na sɔ́ Mawu Tɔ́ ɔ sù.” (Fili. 2:9-11) Enɛ wu ɔ, mǐ sixu ɖeji bǐ mlɛ́mlɛ́ dó acɛkpikpa hwɛjijɔnɔ Jezu Klisu tɔn wu.

¹¹ Gbeyiɖɔ Daniyɛli mɔ Mɛxo Azǎn lɛ tɔn, bɔ é jinjɔn axɔ́suzinkpo Tɔn jixwé tɔn jí, bɔ wɛnsagun “afatɔ́n donu afatɔ́n ɖò azɔ̌ wà n’i wɛ, bɔ afatɔ́n wǒ donu afatɔ́n wǒ ɖò te ɖò nukɔn tɔn.” (Dan. 7:10, nwt) Biblu ɖɔ dó ahwangɔnu wɛnsagun lɛ tɔn enɛ wu ɖɔ “[gbigbɔ] wɛ ye bǐ nyí, bo ɖò azɔ̌ wá nú Mawu wɛ, bɔ Mawu sɛ́ ye dó nú ye na wá dó alɔ mɛ e ɖó na mɔ hwlɛngán lɛ” é. (Ebl. 1:14) È bló tuto nú wɛnsagun enɛ lɛ bǐ bɔ ye ɖò tɛn acɛkpikpa tɔn mɛ ɖò tutoblonunu Mawu tɔn mɛ.—Kolo. 1:16.

¹² Enyi mǐ zán hwenu bo dó nukún lee è sɔnǔ nú tutoblonunu Jehovah tɔn sín akpáxwé jixwé tɔn ɔ gbɔn é mɛ kpɔ́n ɔ, mǐ sixu mɔ nukúnnú jɛ lee nǔ cí nú Ezayíi hwenu e é ‘mɔ Jehovah ɖò ayijinjɔn ɖò axɔ́suzinkpo tɔn e yì jǐ kaka é jí,’ bɔ “[selafɛ́ɛn] lɛ ɖò ta tɔn nu” é wu. Ezayíi ɖɔ: ‘Yéége gbɛ̀ ce vɔ! Ðó nu ce mɛ́ ǎ, togun e mɛ un jɔ ɖè ɔ lɔ sín nu mɛ́ ǎ, nyi ɖíe ka mɔ Axɔ́su, Jehovah ahwangɔnu lɛ tɔn ɔ ɖó nukún wu è!’ Nǔgbo ɔ, hwenu e Ezayíi mɔ lee tutoblonunu Jehovah tɔn d’agba sɔ é ɔ, é jiwǔ dó è, bɔ é lɛ́ hwíhwɛ́ éɖée. Nǔ enɛ e Ezayíi mɔ é byɔ ayi mɛ n’i sɔmɔ̌ bɔ hwenu e gbè ɖé gosin jixwé bo kúnkplá hwɛɖónúmɛ Jehovah tɔn jijla e nyí azɔ̌ bǔnɔ ɖé é ɔ, é ɖɔ: “Nyɛ na yì, sɛ́ mì dó.”—Eza. 6:1-5, 8.

¹³ Nú mɛ Jehovah tɔn lɛ tuùn tutoblonunu tɔn bonu é sù nukún yetɔn mɛ ɔ, nǔ nɔ cí mɔ̌ nú ye lɔ. Ee tutoblonunu ɔ ɖò nukɔn yì wɛ é ɔ, mǐ nɔ tɛ́n kpɔ́n bo na zɔn kpɔ́ xá ɛ. Mǐ nɔ dó gǎn bo nɔ ɖexlɛ́ ɖɔ mǐ ɖeji dó tutoblonunu Jehovah tɔn wu ɖò égbé.

TUTOBLONUNU JEHOVAH TƆN ÐÒ NUKƆN YÌ WƐ

¹⁴ Ðò nǔɖɔɖ’ayǐ Ezekiyɛli tɔn sín wemata 1 mɛ ɔ, è xlɛ́ Jehovah b’ɛ ɖò ahwankɛkɛ jixwé tɔn ɖaxó ɖé kun wɛ. Ahwankɛkɛ jiwǔ enɛ nɔte nú tutoblonunu Jehovah tɔn sín akpáxwé e nukún ma nɔ mɔ ǎ é. É ɖò kɛkɛ enɛ kun wɛ bo nɔ xlɛ́ ali i kpo xomɛnyínyɔ́ kpo, bo nɔ lɛ́ kun sɔgbe xá linlin tɔn.—Ðɛh. 103:20.

¹⁵ Ahwankɛkɛ ɔ sín afɔ lɛ ɖokpo ɖokpo nɔ ɖó afɔ ɖevo ɖò xomɛ; kɛkɛfɔ e ɖò xomɛ é sín gblo nɔ sɔgbe pɛ́pɛ́pɛ́ xá ee xomɛ é ɖè é. Mɔ̌ mɛ ɔ, è sixu ɖɔ ɖɔ kɛkɛfɔ lɛ na “yì ɖisi, amyɔ, gudo, nukɔn.” (Ezek. 1:17) Kɛkɛfɔ lɛ hɛn ɔ, ye na lilɛ ajijimɛ. É ɖò mɔ̌ có, ahwankɛkɛ enɛ nɔ yì fí e jló è ɖé kpowun mɛɖé mɛvo ǎ. Jehovah nɔ lɔn bonu tutoblonunu tɔn nɔ yì fí e jló tutoblonunu ɔ é kpowun ǎ. Ezekiyɛli 1:20 ɖɔ: “Ye nɔ yì fí e gbigbɔ ɔ jló ɖɔ ye ni yì é.” (Lẹdogbedevomẹ Aihọn Yọyọ Tọn) Enɛ wu ɔ, Jehovah wɛ nɔ sísɛ́ tutoblonunu tɔn yì fí ɖebǔ e éyɛ ba é, gbɔn gbigbɔ tɔn gblamɛ. Nǔ e mǐ ɖó na kanbyɔ mǐɖée é ɖíe: ‘Un ka ɖò xúsúxusu xá ɛ à?’

¹⁶ Xúsúxusu zinzɔn xá tutoblonunu Jehovah tɔn nyí kplé lɛ yiyi kpo alɔɖiɖó ɖò sinsɛnzɔ́ kúnnuɖegbé tɔn mɛ kpo sín xó kpowun ǎ. Jɛ nukɔn hwɛ̌ ɔ, mɔ̌ wiwa byɔ ɖɔ mǐ ni yì nukɔn bo lɛ́ sù ɖò gbigbɔ lixo. Mǐ nɔ “mɔ dò nú nǔ e nyí nǔjɔnǔ hugǎn lɛ é,” bo nɔ lɛ́ tuùn nǔ yɔyɔ̌ e ɖò nǔɖuɖu gbigbɔ tɔn sín tuto ɔ mɛ lɛ é. (Fili. 1:10, nwt; 4:8, 9; Jaan 17:3) Mǐ ɖó na lɛ́ flín ɖɔ, fí e tutoblonunu ɖè é ɔ, nǔ tito kpo nǔwaɖókpɔ́ ɖagbe mɛ e ɖ’emɛ lɛ é tɔn kpo wɛ nɔ zɔ́n. Enɛ wu ɔ, mǐ ɖó na zán hwenu, hlɔnhlɔn, nǔwukpíkpé, kpo nǔɖokan kpo e Jehovah na mǐ lɛ é ganji, bá dó wà azɔ̌ tɔn. Ee mǐ ɖò xúsúxusu zɔn xá ahwankɛkɛ jixwé tɔn Jehovah tɔn wɛ é ɔ, gbɛzán mǐtɔn ɖó na nɔ sɔgbe xá wɛn e jla wɛ mǐ ɖè é.

¹⁷ Kpo alɔdó tutoblonunu Jehovah tɔn tɔn kpo ɔ, mǐ nɔ yì nukɔn ɖò jlǒ Mawu tɔn wiwa mɛ. Flín ɖɔ Jehovah wɛ nyí Mɛ e ɖò ahwankɛkɛ jixwé tɔn enɛ kun wɛ é. Enɛ wu ɔ, xúsúxusu zinzɔn xá ahwankɛkɛ Jehovah tɔn na xlɛ́ ɖɔ mǐ ɖó sísí n’i, bo ɖeji ɖɔ é wɛ nyí Só mǐtɔn. (Ðɛh. 18:32) Biblu d’akpá ɖɔ: ‘Jehovah na na hlɔnhlɔn togun tɔn; Jehovah na xoɖɛ dó jǐ tɔn bɔ é na vo.’ (Ðɛh. 29:11) Ðó mǐ ɖò tutoblonunu Jehovah tɔn mɛ égbé wutu ɔ, mǐ nɔ mɔ hlɔnhlɔn e é nɔ na mɛ é, bo nɔ lɛ́ ɖu vivǐ fífá e é nɔ na togun tɔn e ɖò tuto jí é tɔn. Nǔgbo ɔ, é ɖò wɛn ɖɔ mǐ na kpó ɖò nyɔna gegě sín lè ɖu wɛ, hwenu e mǐ na ɖò jlǒ Jehovah tɔn wà wɛ dìn bo na lɛ́ kpó ɖ’ewu kaka sɔyi é.