Jezu Ði Zɔnlin Gbɔn Tɔ̀ Jí

Enyi azɔn kɛɖɛ wɛ Jezu kpéwú bo nɔ gbɔ ǎ, é ka lɛ́ nyí mɛ kɛɖɛ wɛ é kpéwú bo nɔ fɔ́n sín kú ǎ, loɔ, é lɛ́ ɖ’acɛ dó jɔhɔn kpo jǐ kpo jí. Ee é xoɖɛ ɖò só ɖé jí gudo é ɔ, é kpɔ́n Galilée Xù ɔ jí sɛ́dó bo mɔ jɔhɔn ɖaxó ɖé ɖò nyinyi wɛ. Mɛsɛ́dó tɔn lɛ ɖò tɔjihun yetɔn mɛ, bo ɖò xwi ɖí xá jɔhɔn ɔ wɛ. Jezu jɛte sín só ɔ jí bo jɛ zɔnlin ɖi gbɔn xù ɔ jí jí ɖido tɔjihun ɔ kɔn. Hwenu e mɛsɛ́dó lɛ mɔ ɖɔ mɛɖé ɖò zɔnlin ɖi wɛ ɖò xú ɔ jí é ɔ, xɛsi jɛ ye jí. Amɔ̌, Jezu ɖɔ nú ye ɖɔ: ‘Nyɛ wɛ. Mi ma ɖi xɛsi ó.’

Piyɛ́ɛ ɖɔ: ‘Aklunɔ, enyi hwi jɛn wɛ nugbǒ hǔn, nǎ gbè mì nú má wá gɔ̌n towe.’ Jezu ɖɔ nú Piyɛ́ɛ ɖɔ: ‘Bo wá gɔ̌n ce.’ Enɛ wu ɔ, Piyɛ́ɛ tɔ́n sín tɔjihun ɔ mɛ ɖò jɔhɔn ɔ tɛntin, bo ɖi zɔnlin ɖò xù ɔ jí ɖido Jezu gɔ́n. Amɔ̌, ee Piyɛ́ɛ ɖò sisɛkpɔ Jezu wɛ é ɔ, é kpɔ́n jɔhɔn ɔ bɔ xɛsi ɖi i. É mɔ ɖɔ emi ɖò syɔsyɔ wɛ. Piyɛ́ɛ d’axwá ɖɔ: ‘Aklunɔ, hwlɛn mì!’ Jezu hɛn alɔ tɔn bo ɖɔ: ‘Etɛwu a ka jɛ nǔ xò kpɔ́n jí? Fitɛ nùɖiɖi towe ka ɖè?’

Jezu kpo Piyɛ́ɛ kpo byɔ tɔjihun ɔ mɛ, bɔ tlolo kpowun ɔ, jɔhɔn ɔ nɔte. A sixu dó nukún mɛ, bo kpɔ́n lee nǔ na ko cí nú mɛsɛ́dó lɛ é à? Ye ɖɔ: “Mawu ví wɛ a nyí nugbǒ.”

Azɔn ɖokpo géé e Jezu ɖexlɛ́ ɖɔ emi ɖó acɛ dó jɔhɔn, jǐ kpo nǔ mɔhun lɛ kpo jí é nɛ ǎ. Hweɖevonu ɔ, Jezu kpo mɛsɛ́dó tɔn lɛ kpo ɖò tɔjihun mɛ xwè xù ɔ sín awa ɖevo jí, bɔ Jezu ɖò amlɔ dɔ́ wɛ ɖò tɔjihun ɔ mɛ ɖò gudo. Hwenu e é ɖò amlɔ dɔ́ wɛ é ɔ, jɔhɔn ɖaxó ɖé jɛ nyinyi jí. Aslɔkɛ́ lɛ nɔ wá xò dó tɔjihun ɔ wu bɔ sìn gɔ́ tɔjihun ɔ mɛ bǐ. Mɛsɛ́dó lɛ fɔ́n Jezu bo d’axwá ɖɔ: ‘Mɛ̌si, mǐ ja kúkú gbé! D’alɔ mǐ!’ Jezu fɔ́n bo ɖɔ nú xù ɔ ɖɔ: ‘Cí xwii!’ Tlolo kpowun ɔ, jɔhɔn ɔ kpo xù ɔ kpo bǐ cí tóo. Jezu kanbyɔ mɛsɛ́dó lɛ ɖɔ: ‘Fitɛ nùɖiɖi mitɔn ka ɖè?’ Ye ɖɔ nú yeɖée ɖɔ: “Jɔhɔn kpodo xù kpo nɔ sè gbè n’i [lá].” Mɛsɛ́dó lɛ kplɔ́n ɖɔ enyi emi ɖeji dó Jezu wu bǐ mlɛ́mlɛ́ ɔ, é kún na byɔ ɖɔ emi ni ɖi xɛsi ó.