TÀN 112
Tɔjihun ɔ Gbà Ðò Tɔtɛntinto Ðé Kpá
KPƆ́N! Tɔjihun ɔ ɖò gbigba hánnyá wɛ! A ka mɔ mɛ e ko lɔ́n jɛ tɔ̀ ɔ mɛ lɛ é à? Mɛɖé lɛ ko jɛ agě jí. Pɔlu nɛ ɖò finɛ nɛ à cé? Mi nú mǐ ni ba dò nú nǔ e jɛ dó wutu tɔn é.
Pɔlu ko nɔ gankpa mɛ nú xwè wè ɖò Sezalee. Enɛ gudo ɔ, è bɛ́ é kpo gantɔ́ ɖevo lɛ kpo dó tɔjihun mɛ ɖido Hlɔma. Ee ye gbɔn tɔtɛntinto Klɛti tɔn kpá é ɔ, jɔhɔn ɖaxó ɖé jɛ ya dó nú ye jí. Jɔhɔn ɔ syɛn kaka, bɔ tɔjihunkúntɔ́ lɛ sɔ́ kpé tɔjihun ɔ wu ǎ. Ye sɔ́ mɔ hwesivɔ kéze ǎ, ye ka sɔ́ lɛ́ mɔ sunví lɛ zǎnmɛ ǎ kaka nú azǎn mɔkpan. Mɛ e ɖò tɔjihun ɔ mɛ lɛ é sɔ́ ɖó nukún ɖɔ emi na gán ǎ.
Pɔlu wá site bo ɖɔ: ‘Mɛɖebǔ na kú ɖò mi mɛ ǎ; tɔjihun ɔ kɛɖɛ jɛn na lá mɛ. Wɛnsagun Mawu tɔn ɖokpo wá ɖɔ nú mì égbé zǎnmɛ bo ɖɔ: “Pɔlu, ma ɖi xɛsi ó! A ɖó na yì axɔsu Hlɔma tɔn Sezaa nukɔn. Mawu na hwlɛn mɛ e ɖò tɔ̀ ɔ jí xá we lɛ é bǐ.”’
Jɔhɔn ɔ bɛ́ nyinyi, bɔ é jɛ azǎn tɔn 14 gɔ́ ɔ gbè zǎn xwete é ɔ, tɔjihunkúntɔ́ lɛ ɖ’ayi wu ɖɔ tɔ̀ ɔ kún sɔ́ yì dò dín ó. Ye dó gandotɔnu yetɔn lɛ tɔ̀, ɖó ye ɖò xɛsi ɖi wɛ ɖɔ tɔjihun ɔ taa wá yì gbà dó só ɖé wu ablu ɔ mɛ. Ayihɔngbe tɔn zǎnzǎn ɔ, ye mɔ xùgbado ɖé sɛ́dó. Ye ɖɔ ɖɔ emi na tɛnkpɔn bo kun tɔjihun ɔ jɛ xù ɔ tó.
Ee ye sɛkpɔ agě jí é ɔ, tɔjihun ɔ dó ta nyɛkɛ́n mɛ, bo sɔ́ sixu sɛ̀ tɛn ǎ. Aslɔkɛ́ lɛ jɛ xixo dó tɔjihun ɔ wu jí, bɔ tɔjihun ɔ jɛ gbigba hánnyá jí. Sɔjakanwekogán e ɖò ye nu é ɖɔ: ‘Mi mɛ e nyɔ́ tɔ̀ lin lɛ é bǐ ni jɛ tɔ̀ dó nukɔn, bo lin tɔ̀ yì agě jí. Mɛ e kpò lɛ é ni zunfan tɔjihun ɔ sín fínfɛ́n lɛ, bo jɛ ye gudo.’ Nǔ e ye wà é nɛ. Mɛ 276 e ɖò tɔjihun ɔ mɛ lɛ é bǐ jɛ agě jí wuyɛyɛ̌-afɔyɛ́yɛ́, lee wɛnsagun ɔ d’akpá tɔn gbɔn é.
È nɔ ylɔ tɔtɛntinto ɔ ɖɔ Maluti. Tò ɔ mɛ nu lɛ nyɔ́ xomɛ ɖesu. Ye kpé nukún dó mɛ e tɔjihun gbà dó lɛ é wu. Ee ayǐ mɛ nyɔ́ é ɔ, è sɔ́ Pɔlu dó tɔjihun ɖevo mɛ ɖido Hlɔma.