TÀN 111
Nyaví Ðé D’amlɔ
YEEGÈ! Etɛ ka ɖò jijɛ wɛ ɖò finɛ? Nyaví e ɖò ayimimlɔ finɛ é gblewu tawun wɛ à? Kpɔ́n! Pɔlu ɖò mɛ e tɔ́n sín xɔ ɔ mɛ ja lɛ é mɛ. A ka mɔ Timɔtée lɔmɔ̌ à? Ayǐ wɛ nyaví ɔ ka jɛ sín flɛtɛli ɔ nu à? Ɛɛn. Nɛ nǔ ka nyí mɔ̌ gbɔn? Mǐ ni kpɔ́n.
“Wɛnɖagbe” jijla sín tomɛyiyi atɔngɔ ɔ wɛ Pɔlu fó tlolo. Tomɛyiyi enɛ hwenu ɔ, Pɔlu nɔ Efɛzi nú xwè atɔn. Tò mɛ atɔngɔ enɛ hɛn ɛ hú wegɔ ɔ. Enɛ gudo ɔ, Pɔlu yì Tolowasi, bo sɔ́ xóɖiɖɔ ɖé xwlé ahwanvu lɛ. É tuùn ɖɔ có emi na lɛ́vɔ mɔ ye ɔ, azǎn na jɛ, ɖó é na dó tɔjihun ayihɔngbe tɔn bo na yì. Enɛ wu ɔ, é ɖò xó ɖɔ nú ye wɛ kaka bɔ zǎn vlɔ ɖó wè.
Nyaví enɛ e nɔ nyí Etukusi é junjɔn flɛtɛli ɔ nu, bo jɛ amlɔ dɔ jí. É j’ayǐ sín flɛtɛli ɔ nu sín síngbó atɔngɔ ɔ jí! Nǔ e wu a mɔ bɔ ado hu gbɛtɔ́ lɛ sɔmɔ̌ é nɛ. Ee ye wá nyaví ɔ zé gbé é ɔ, é ko kú!
Ee Pɔlu mɔ ɖɔ nyaví ɔ ko kú é ɔ, é mlɔ́ jǐ tɔn bo dɔn ɛ dó awa mɛ. Enɛ gudo ɔ, é ɖɔ: ‘Mi ma lin nǔ ó. É ɖò ganji!’ É ka ɖò ganji nugbǒ. Nùjiwǔ ɖé wɛ! Pɔlu fɔ́n ɛ sín kú! Togun ɔ bǐ jɛ awǎ.
Ye bǐ lɛ́vɔ lɛkɔ yì síngbó ɔ jí bo ɖu nǔ. Pɔlu kpò ɖò xó ɖɔ nú ye wɛ kaka bɔ ayǐ hɔ́n. Amɔ̌, Etukusi sɔ́ lɔn bo d’amlɔ ɖě ǎ. Enɛ gudo ɔ, Pɔlu, Timɔtée kpo mɛ e xwedó ye lɛ é kpo byɔ tɔjihun mɛ. A ka tuùn fí e ye ɖido é à?
Ee ye gosin Tolowasi é ɔ, tɔjihun ɔ nɔte kpɛɖé ɖò Milɛ. Kilomɛtlu yɔywɛ ɖé jɛn Efɛzi ɖó dó finɛ, bɔ Pɔlu gbɔn yɛkan enɛ mɛ bo sɛ́ wɛn dó mɛxo agun ɔ tɔn lɛ ɖɔ ye ni wá Milɛ, bɔ é mɔ tɛn dó ɖɔ xó gudo tɔn lɛ nú ye. Ee Pɔlu byɔ tɔjihun ɔ mɛ bo ɖido é ɔ, kpɔ́n lee wǔ na ko kú mɛxo enɛ lɛ sɔ́ é!
Gudo mɛ ɔ, tɔjihun ɔ lɛkɔ wá Sezalee, bɔ Pɔlu yì ahwanvu Filipu sín xwégbe. Ee é ɖò finɛ é ɔ, gbeyiɖɔ Agabusi gbò nǔ e ɖò na jɛ dó wutu tɔn wɛ lɛ é sín akpá n’i. É ɖɔ ɖɔ enyi Pɔlu jɛ Jeluzalɛmu ɔ, è na sɔ́ ɛ dó gankpa mɛ. Nǔ e ka jɛ nugbǒ é nɛ. Ee Pɔlu nɔ gankpa mɛ nú xwè wè ɖò Sezalee gudo é ɔ, è sɛ́ ɛ dó Hlɔma, bɔ é yì hwɛ nukɔn ɖò axɔsu Hlɔma tɔn Sezaa nukɔn. Mi nú mǐ ni kpɔ́n nǔ e jɛ ɖò Hlɔma li jí é.