NǓKPƆ́NNÚMƐ 14

Nǔ Taji lɛ Zawě

Eblée lɛ 8:1

SIN SƐ̀ XWE NA: D’alɔ tóɖówetɔ́ lɛ bonu ye ni xwedó we ɖò xóɖiɖɔ towe hwenu, bo xlɛ́ lee nǔ taji ɖokpo ɖokpo cá kan xá nǔ e gbé nya wɛ a ɖè é kpo xóta towe kpo gbɔn é céɖécéɖé.

LEE È SIXU BLÓ GBƆN É:

Nya nǔɖe gbé. Kpɔ́n ɖɔ è sɔnǔ nú xóɖiɖɔ towe bo na dó ɖɔ xó ɖé nú xósetɔ́ lɛ, ɖu ɖò ye jí, alǒ dó wusyɛn lanmɛ nú ye wɛ à jí, lobo gbajɛ̌mɛ nú xóɖiɖɔ ɔ sɔgbe xá. Tɛ́n kpɔ́n bonu nǔ taji lɛ bǐ ni d’alɔ we nú a kpé nǔ e gbé nya wɛ a ɖè é wu.

Kanbyɔ hwiɖée ɖɔ: ‘Nǔkanbyɔ alǒ nǔxokpɔ́n tɛ lɛ xósetɔ́ ce lɛ ka sixu ko ɖó dó xóta elɔ jí? Nǔkanbyɔ alǒ nǔxokpɔ́n tɛ ye ka na ɖó jɛ nukɔn? Ðětɛ ka na bɔ d’ewu?’ Enɛ gudo hǔn, tò nǔ taji e jí a na ɖɔ xó dó lɛ é ɖò ali ɖokpo ɔ nu, bonu xósetɔ́ towe lɛ na dó sixu xwedó we, mɔ nukúnnú jɛ mɛ, lobo yí wɛn ɔ.
Tɛɖɛ̌ xóta xóɖiɖɔ towe tɔn jí. Nɔ vɔ́ xókwín taji e ɖò xóta towe mɛ lɛ é alǒ xókwín e ɖɔ nǔ ɖokpo ɔ xá xókwín enɛ lɛ é ɖɔ dó dó gesí xóta ɔ ɖò xóɖiɖɔ towe bǐ hwenu.
Nǔ taji lɛ ni zawě bo lɛ́ bɔkun. Cyan nǔ taji ɖěɖee cá kan xá xóta towe bɔ a sixu lɛ́ xwlé mɛ ganji ɖò ganmɛ e è na é mɛ lɛ é kɛɖɛ. Ðǒ dogbó nú nǔ taji nabi e a na zán é, ɖɔ nǔ taji ɖokpo ɖokpo nyi wɛn, nɔ yì agbɔ̌n jí ɖò avla yetɔn mɛ, bo nɔ gosin ɖě jí jɛ ɖevo jí ɖò ali e bɔkun é nu.

A sixu ɖɔ nǔ taji lɛ ɖò xónusɔ́ɖóte towe mɛ dó d’alɔ xósetɔ́ lɛ bonu ye na xwedó we, alǒ a sixu vɔ́ ye ɖɔ ɖò tasunaxó towe mɛ dó d’alɔ xósetɔ́ lɛ bonu ye na flín.