NǓKPƆ́NNÚMƐ 20

Tasuna Ðagbe

Nǔnywɛtɔ́xó 12:13, 14

SIN SƐ̀ XWÈ NA: Ðò tasunaxó towe lɛ mɛ hǔn, d’alɔ tóɖówetɔ́ lɛ bonu ye ni yí gbè nú nǔ e ye kplɔ́n lɛ é lobo lɛ́ zán.

Cá tasunaxó towe xá xóta e a gbajɛ̌mɛ na é. Vɔ̌ nǔ taji ɖěɖee jí a ɖɔ xó dó lɛ é kpo xóta towe kpo jí gbɔn.
Dǒ wusyɛn lanmɛ nú tóɖówetɔ́ lɛ. Xlɛ́ nǔ e tóɖówetɔ́ lɛ na wà lɛ é ye, kpo hwɛjijɔ ɖagbe e wu ye na wà mɔ̌ lɛ é kpo. Xóɖiɖɔ towe ni xlɛ́ ɖɔ a ɖi nǔ nú nǔ e ɖɔ wɛ a ɖè é, b’ɛ lɛ ɖò taji.
Tasunaxó towe ni bɔkun bo lɛ́ ɖò klewun. Ma sɔ́ nǔ taji yɔyɔ̌ ɖevo lɛ d’emɛ ó. Zǎn xókwín klewun ɖé lee é na byɔ ɖó é dó dó wusyɛn lanmɛ nú tóɖówetɔ́ lɛ bonu ye na wà nǔ.

Ma nɔ kplakpla jí ɖò tasunaxó towe mɛ ó, gbè towe ni ma ka ɖò dò yì wɛ kaka bo wá yì xwɛ kpowun ó. Zǎn xógbe tasuna tɔn lɛ dó xwlé nukɛgbe gudo tɔn lɛ mɛ.