Sɔ́ nǔ ɖ’ayǐ din nú dotóoxwéxó e ná wá xwetɔ́n ajijimɛ lɛ́ é

Étɛ́wú è ka ɖó ná sɔ́ nǔ ɖ’ayǐ? Dotóoxwéxó ajijimɛ tɔn lɛ́ kpó mɛ glɔ́nglɔ́n dó dotóoxwé kpó sixú wá xwetɔ́n hwenu e è ma ɖó nukún tɔn dó ǎ é. Énɛ́ wu ɔ, cóbónú dotóoxwéxó ɖé ná wá xwetɔ́n ajijimɛ hǔn, sɔ́ nǔ ɖ’ayǐ ganjí bá dó sixú ɖu vǐví nukúnkpémɛwú dotóoxwé tɔn ɖagbe ɖé tɔn, lěe é nyɔ́ bló gbɔn é. Mɔ̌ wiwa ná xlɛ́ ɖɔ a nɔ ɖó sísí nú gbɛ, bo nɔ lɛ́ se tónú nú sɛ́n e Jexóva dó dó hun wú é.—Mɛ 15:28, 29.

Étɛ́ lɛ́ a ka sixú wa dó sɔ́ nǔ ɖ’ayǐ?

• A xo ɖɛ gúdo hǔn, xwe sɔ bo wlán nǔ dó káti Instructions médicales / Désignation d’une personne de confiance (DPA) ɖokpó jí.a Wɛnjlátɔ́ e ko bló batɛ́mu lɛ́ é sixú byɔ́ DPA ɖokpó ɖo mɛ e nɔ kpé nukún dó wěma lɛ́ wú é gɔ́n. Yě sixú lɛ́ yí káti Document d’identité médical (ic) nú vǐ yětɔn kpɛví lɛ́

• Nú xo wɛ a ɖe ɔ, byɔ̌ wěma Nǔflínmɛ ɖé lɛ́ nú nyɔ̌nu e ɖo xo lɛ́ é (S-401) ɖokpó ɖo mɛxó agun tɔn lɛ́ gɔ́n. Wěma énɛ́ ná d’alɔ we bɔ a ná wá gbeta ɖagbe lɛ́ kɔn dó nukúnkpédómɛwú dotóoxwé tɔn e ná kpan nukɔn we ɖo xo ɔ hwenu kpó vǐjiji hwenu kpó lɛ́ é wú

• Ényí é byɔ́ ɖɔ a ná zán wlɛnwín nukúnkpédómɛwú dotóozɔ́wiwa tɔn, éé ná byɔ́ hun zínzán, alǒ éé ná byɔ́ ɖɔ è ní glɔ́n we dó dotóoxwé lɛ́ é hǔn, ɖɔ nú mɛxó agun tɔn towe lɛ́ dó mɛhwenu, bo tínmɛ nú dotóoxwé ɔ ɖɔ émí jló ɖɔ lɛ̌ngbɔ́nyitɔ́ Kúnnuɖetɔ́ Jexóva tɔn lɛ́ tɔn ní nɔ wá ba émí kpɔ́n

Nɛ̌ mɛxó agun tɔn lɛ́ ka sixú d’alɔ gbɔn? Yě sixú d’alɔ we bɔ a ná wlán nǔ dó káti DPA towe mɛ. Amɔ̌, yě ná wá gbeta e kúnkplá dotóoxwéxó lɛ́ é kɔn dó tɛn towe mɛ ǎ, mɔ̌ jɛ́n yě ma ka ná lɛ́ ɖɔ linlin yětɔn dó nǔ e kúnkplá gbeta mɛɖésúnɔ tɔn lɛ́ é wú ǎ é nɛ́. (Hlɔ̌ 14:12; Ga 6:5) Ényí a ɖɔ nú mɛxó agun tɔn towe lɛ́ ɖɔ è jló ná w’azɔ̌ nú we ɖo dotóoxwé bɔ é sixú byɔ́ hun zínzán ɔ, yě ná yá wǔ ylɔ́ Wěɖegbɛ́ e nɔ kpé nukún dó dotóoxwéxó lɛ́ wú é (WKND) nú we.

Nɛ̌ WKND ka sixú d’alɔ gbɔn? È kplɔ́n azɔ̌ nɔví e ɖo WKND mɛ lɛ́ é bɔ yě nɔ d’alɔ dotóozɔ́watɔ́ lɛ́ kpó sɛ́nzɔ́watɔ́ lɛ́ kpó, bɔ yě nɔ tuun nǔ e mǐ ɖi nǔ ná dó hun zínzán wú é. Yě sixú ɖɔ xó xá dotóo towe dó wlɛnwín nukúnkpédómɛwú tɔn e è sixú zán, bo nyi alɔ nú hundídó lɛ́ é wú. Ényí é byɔ́ ɖó mɔ̌ ɔ, yě sixú d’alɔ we bɔ a ná mɔ dotóo e nɔ ɖó gbe kpɔ́ xá mǐ é ɖé.

KPƆ́N VIDEO LĚE È SIXÚ WÁ LANMƐ NÁ NƆ GANJÍ SÍN GBETA E KÚNKPLÁ HUN LƐ́ É KƆN GBƆN É Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́:

• Étɛ́ a ka mɔ ɖo video élɔ́ mɛ bɔ é sixú d’alɔ we, hwenu e a ɖo nǔ sɔ́ nú dotóoxwéxó ajijimɛ tɔn e ná byɔ́ hun zínzán lɛ́ é wɛ é?

  Your answer