Nɔ acéjí dó mɛtɛ́nkpɔ́n lɛ́ wú

1-2. (a) Akpá tɛ́ Jezu ka gba nú ahwanvú tɔn lɛ́? (b) Étɛ́wú ahwanvú lɛ́ ka jó Jezu dó? (Kpɔ́n ɖiɖe lɛ́ lɔmɔ̌.)

“NǓGBÓ ɔ, ayi gbɛtɔ́ tɔn ɖó jlǒ syɛ́nsyɛ́n, amɔ̌, agbaza ɖó gǎn ɖé ǎ.”a (Mat. 26:41b) Kpó xógbe énɛ́ lɛ́ kpó ɔ, Jezu xlɛ́ ɖɔ émí mɔ nǔ jɛ wú ɖɔ mǐ nyí hwɛhutɔ́ bo ná nɔ wa nǔ nyi do. Amɔ̌, akpágbanúmɛ ɖé lɛ́vɔ́ ɖo xó tɔn mɛ, é wɛ nyí ɖɔ: Mǐ ɖó ná cɔ́ mǐɖée dó ji ɖiɖe dó mǐɖée wú zɛ xwé wú wú. Ganxixo kpɛɖé jɛ nukɔn nú hwenu e Jezu ɖɔ xó énɛ́ lɛ́ é ɔ, ahwanvú lɛ́ ɖɔ kpó jiɖiɖe kpó ɖɔ émí kún ná jó gǎn émítɔn dó gbeɖé ó. (Mat. 26:35) Yě ba ná wa nǔ ɖagbe. Amɔ̌, yě ɖ’ayi lěe yě sixú yá wǔ vɔ́ da ɖo kɔgbídínúmɛ nukɔn gbɔn é wú ǎ. Énɛ́ wú ɔ, Jezu gba akpá nú yě bo ɖɔ: “Mi nɔ wunzɛn, bo nɔ ɖo ɖɛ xo wɛ, lobo ma wá jɛ tɛ́nkpɔ́n mɛ ó.”—Mat. 26:41a.

² É blá wǔ ɖɔ ahwanvú lɛ́ kún kpé wú bo nɔ wunzɛn ó. Hwenu e è wlí Jezu é ɔ, yě ka nɔ kpɔ́ xá ɛ a? Alǒ, yě ɖi xɛsi bo hɔn? Ðó ahwanvú lɛ́ ma nɔ wunzɛn ǎ wútu ɔ, nǔ e yě gbɛ́ ɖɔ émí kún ná wa gbeɖé ó é pɛ́pɛ́pɛ́ wɛ yě wa, yě jó Jezu dó.—Mat. 26:56.

3. (a) Bo ná dó kpo ɖo gbejí nú Jexóva ɔ, étɛ́wú mǐ ka ɖó ná nyi alɔ nú ji ɖiɖe dó mǐɖée wú zɛ xwé wú? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Mǐ ɖó ná nɔ lin ɖɔ mǐ ná kpé wú hwebǐnu bo ná nɔ wa nǔ e sɔgbe é ǎ. Nǔgbó wɛ ɖɔ mǐ kán ɖ’é jí ɖɔ mǐ kún ná lɔn bónú nǔ ɖěbǔ ná ɖe mǐ sín Jexóva sín ali jí ó. Amɔ̌, mǐ lɛ́ nyí hwɛhutɔ́, bo sixú yá wǔ jɛ nǔnyanyawiwa sín tɛ́nkpɔ́n mɛ. (Hlɔ̌. 5:12; 7:21-23) Mǐ sixú wá mɔ mǐɖée ɖo ninɔmɛ ɖěɖěe mɛ nǔnyanyawiwa sixú cí nǔ e dɔn mɛ tawun é ɖé ɖɔhun é mɛ, hwenu e mǐ ma ɖó nukún tɔn dó ǎ é. Bo ná dó kpo ɖo gbejí nú Jexóva kpó Vǐ tɔn kpó ɔ, mǐ ɖó ná xwedó wě e Jezu ɖe xá mɛ ɖɔ è ní nɔ acéjí dó mɛtɛ́nkpɔ́n e ná zɔ́n bɔ è ná hu hwɛ lɛ́ é wú é. Xóta élɔ́ sixú d’alɔ mǐ ɖo ali énɛ́ nu. Jɛ nukɔn hwɛ̌ ɔ, mǐ ná gbéjé ali ɖěɖěe nu mǐ ɖó ná nɔ acéjí ɖe tawun lɛ́ é kpɔ́n. Énɛ́ gúdo ɔ, mǐ ná ɖɔ xó dó lěe mǐ sixú nɔ acéjí dó mɛtɛ́nkpɔ́n lɛ́ wú gbɔn é wú. Gǔdo mɛ ɔ, mǐ ná gbéjé lěe mǐ sixú kpo ɖo acéjí nɔ wɛ gbɔn é kpɔ́n.

NƆ ACÉJÍ DÓ NǓ E NƆ TƐ́N WE KPƆ́N HÚ GǍN LƐ́ É WÚ

4-5. Étɛ́wú mǐ ka ɖó ná nɔ acéjí dó hwɛ e ma tlɛ syɛ́n sɔmɔ̌ ǎ lɛ́ é huhu wú?

⁴ Hwɛ ɖé lɛ́ tíin bo syɛ́n sɔmɔ̌ ǎ, amɔ̌, yě sixú vɔ́ da nú xɔ́ntɔn e mǐ zun xá Jexóva é. Gɔ́ ná ɔ, yě sixú zɔ́n bɔ mǐ ná hu hwɛ e syɛ́n hú gǎn lɛ́ é.

⁵ Mǐ mɛ bǐ wɛ nɔ ɖí xwi xá mɛtɛ́nkpɔ́n e nɔ zɔ́n bɔ mǐ ná hu hwɛ lɛ́ é. Amɔ̌, mǐ bǐ wɛ ɖó gǎnmaɖó vovo lɛ́, énɛ́ wú ɔ, nǔɖé lɛ́ ná tɛ́n mǐ kpɔ́n hú gǎn, bónú mǐ ná wa nǔ nyanya. Ði kpɔ́ndéwú ɔ, mɛɖé sixú ɖo za li xá mɛtɛ́nkpɔ́n e ná zɔ́n bɔ é ná lɛ aga é wɛ. Mɛ ɖěvo ka sixú ɖo za li xá nǔwalɔ blíblí lɛ́ wɛ, ɖi mɛ̌ sísɔ́ dó d’ayihún alǒ fɔtóo nǔblíblíwiwa tɔn kpínkpɔ́n. Mɔ̌ jɛ́n mɛ ɖěvo ka sixú ɖo za li xá xɛsi ɖi nú gbɛtɔ́, jlokokomɛninɔ, xomɛsin alǒ nǔ ɖěvo lɛ́ wɛ é nɛ́. Lěe Jaki ɖɔ gbɔn é ɔ, “mɛ ɖokpó ɖokpó nɔ jɛ tɛ́nkpɔ́n mɛ hwenu e jlǒ mɛɖésúnɔ tɔn dɔn mɛ, bo lú mɛ é.”—Ja. 1:14.

6. Étɛ́ lɛ́ wú mǐ ka ɖó ná nɔ ɖɔ nǔgbó nú mǐɖée dó?

⁶ A ka tuun nǔ ɖěɖěe nɔ yá wǔ tɛ́n we kpɔ́n hú gǎn lɛ́ é a? Awǒvinú wɛ é ná nyí ɖɔ mǐ ní wɔn ya nú gǎnmaɖó mǐtɔn lɛ́, alǒ lin ɖɔ agbɔ̌n ɖo mǐ wú tawun bɔ mǐ ná nyi alɔ nú hwɛhuhu. (1 Jaan 1:8) Flín ɖɔ Pɔ́lu ɖɔ ényí mɛ ɖěɖěe tlɛ “ɖó nǔwúkpíkpé ɖo gbigbɔ lixo lɛ́ é” ma nɔ acéjí ǎ ɔ, yě sixú jɛ tɛ́nkpɔ́n mɛ. (Ga. 6:1) Mǐ ɖó ná nɔ ɖɔ nǔgbó nú mǐɖée, bo tuun fí ɖěɖěe mǐ ma ɖó gǎn ɖe ǎ lɛ́ é.—2 Kɔ. 13:5.

7. Étɛ́ lɛ́ wú mǐ ka ɖó ná nɔ ɖó ayi te dó hú gǎn? Jlɛ̌ dó nǔɖé wú.

⁷ Ényí mǐ tuun nǔ ɖěɖěe nɔ tɛ́n mǐ kpɔ́n hú gǎn lɛ́ é gúdo ɔ, étɛ́ mǐ ka ɖó ná wa? Mǐ ɖó ná w’azɔ̌ syɛ́nsyɛ́n bá kpé wú hú gǎn bá dó gbí dɔn ɖo mɛtɛ́nkpɔ́n énɛ́ lɛ́ nukɔn! Kpɔ́ndéwú ɖé ɖíe. Ðo Biblu sín táan mɛ ɔ, fí e dǒ toxo ɖé tɔn nɔ vɔ́ da ɖe hú gǎn lɛ́ é wɛ nyí hɔntogbó tɔn lɛ́. Énɛ́ wú ɔ, hɔntogbó lɛ́ wɛ nyí fí e è nɔ cɔ́ hú gǎn é. Ðo ali ɖokpó ɔ nu ɔ, é ɖo tají tawun ɖɔ mǐ ní ɖ’ayi fí ɖěbǔ e mǐ tuun ɖɔ mǐ vɔ́ da ɖe hú gǎn é wú.—1 Kɔ. 9:27.

LĚE MǏ SIXÚ NƆ ACÉJÍ GBƆN É

8-9. Nɛ̌ nyaví e xó è ɖɔ ɖo Nǔnywɛ́xó wěmata 7 mɛ é ka sixú ko nyi alɔ nú hwɛ syɛ́nsyɛ́n ɖé huhu gbɔn? (Nǔnywɛ́xó 7:8, 9, 13, 14, 21)

⁸ Nɛ̌ mǐ ka sixú nya xɛ ɖo mǐɖée jí gbɔn? Ð’ayi nǔ e kpɔ́ndéwú nyaví e xó è ɖɔ ɖo Nǔnywɛ́xó wěmata 7 mɛ é tɔn sixú kplɔ́n mǐ é wú. É lɛ aga xá nyɔ̌nu agalɛtɔ́ ɖé. Wěmafɔ 22​gɔ́ ɔ ɖɔ “nyaví ɔ jɛ gǔdo tɔn.” É cí ɖɔ ajijimɛ kpowun ɔ, é yá wǔ jɛ mɔ mɛ. Amɔ̌, lěe wěmafɔ ɖěɖěe jɛ nukɔn lɛ́ é xlɛ́ gbɔn é ɔ, é ko ɖe afɔ gěgé nyi do jɛ nukɔn nú énɛ́, bɔ kpɛɖé kpɛɖé ɔ, yě zɔ́n bɔ é wá hu hwɛ.

⁹ Étɛ́ ka dɔn ɛ dó hwɛ e é hu é mɛ? Jɛ nukɔn hwɛ̌ ɔ, gbadanu ɔ, é “wlí ali ɖé, ali ɔ gbɔn fí e [nyɔ̌nu agalɛtɔ́ ɔ] nɔ nɔ é kpá.” Énɛ́ gúdo ɔ, é wlí ali e yi nyɔ̌nu ɔ xwé é. (Xa Nǔnywɛ́xó 7:8, 9.) Gɔ́ ná ɔ, hwenu e é mɔ nyɔ̌nu ɔ é ɔ, é lɛ́ kɔ ǎ. É nyɔ́ wa ɔ, é jó è dó b’ɛ kísi n’i, bo ɖótó è hwenu e é ɖo lěe é sá kɔnɖókpɔ́vɔ́ lɛ́ gbɔn é xó ɖɔ wɛ é; bóyá tíntɛ́nkpɔ́n wɛ nyɔ̌nu ɔ ɖe bo ná bló bɔ nyaví ɔ ná lin ɖɔ émí kún nyí mɛ nyanya ɖé ó. (Xa Nǔnywɛ́xó 7:13, 14, 21.) Ényí nyaví ɔ ko nyi alɔ nú awǒvinú ɖěɖěe ná dɔn ɛ dó hwɛhuhu mɛ lɛ́ é wɛ ɔ, é ná ko nya xɛ ɖo éɖée jí sín mɛtɛ́nkpɔ́n lɛ́ kpó hwɛhuhu kpó sí.

10. Nɛ̌ mɛɖé ka sixú wa nǔ ɖokpó ɔ nyi do nyaví ɔ ɖɔhun gbɔn ɖo égbé?

¹⁰ Tan énɛ́ xlɛ́ nǔ e sixú jɛ dó mɛsɛntɔ́ Jexóva tɔn ɖěbǔ jí é. É sixú hu hwɛ syɛ́nsyɛ́n bo ná wá mɔ ɖo nukɔnmɛ ɖɔ nǔ lɛ́ bǐ jɛ ɖo ajijimɛ. Alǒ é sixú ɖɔ: “Un ɖó nukún tɔn cóbónú é jɛ ǎ.” Amɔ̌, ényí é lin tamɛ dó nǔ e jɛ é jí gúdo ɔ, é ná ɖibla wá mɔ ɖɔ émí ko ɖe afɔ e nǔnywɛ́ ma kpé ǎ é ɖé lɛ́ nyi do bɔ yě zɔ́n bɔ émí hu hwɛ. Gbɛ̌ nyanya dídó, ayiɖeɖayǐ e ma sɔgbe ǎ lɛ́ é, alǒ fí e ma nyɔ́ nú klisánwun ná yi ǎ lɛ́ é, é sixú nyí tlɔlɔ alǒ ɖo Ɛntɛnɛ́ti jí sixú ko ɖo afɔ énɛ́ lɛ́ e é ɖe nyi do lɛ́ é mɛ. Bóyá, é sixú ko lɛ́ ɖó ɖɛxixo, Biblu xixa, kplé lɛ́ yiyi alǒ alɔ ɖíɖó ɖo sinsɛnzɔ́ ɔ mɛ te. Lěe é nyí gbɔn nú nyaví e xó è ɖɔ ɖo Nǔnywɛ́xó mɛ é ɖɔhun ɔ, kpó nǔ e ko jɛ lɛ́ é bǐ kpó ɔ, hwɛ e é hu é sixú nɔ ma nyí nǔfyánmɛnú ɖé.

11. Bónú mǐ ma ná wá hu hwɛ ǎ ɔ, étɛ́ mǐ ka ɖó ná nyi alɔ ná?

¹¹ Étɛ́ ka nyí nǔkplɔ́nmɛ ɔ? É nyí hwɛhuhu kɛ́ɖɛ́ wɛ mǐ ɖó ná hɔn ná ǎ, loɔ, mǐ ɖó ná lɛ́ hɔn nú afɔɖiɖe e ná dɔn mǐ yi jó nú hwɛhuhu lɛ́ é. Nǔ e Salomɔ́ɔ tínmɛ hwenu e é ɖɔ nǔ e jɛ dó nyaví ɔ kpó nyɔ̌nu agalɛtɔ́ ɔ kpó jí é gúdo tlóló é pɛ́pɛ́pɛ́ nɛ́. Hwenu e é ɖo xó ɖɔ dó nyɔ̌nu ɔ wú wɛ é ɔ, é ɖɔ: “Mi ma ɖo bǔbú wɛ lɔ bo yi gbɔn ali tɔn jí ó.” (Nǔx. 7:25) É tlɛ lɛ́ ɖɔ dó nyɔ̌nu banáwatɔ́ énɛ́ wú ɖɔ: “Hɔn nú nyɔ̌nu mɔ̌hun, ma gbɔn hɔn tɔn to lɔ vɔ́vɔ́ ó.” (Nǔx. 5:3, 8) Ɛɛn, mǐ nɔ nya xɛ ɖo mǐɖée jí sín hwɛhuhu sí gbɔn zɔ ninɔ nú ninɔmɛ ɖěɖěe ná dɔn mǐ yi jó n’i lɛ́ é gblamɛ.b Alɔ nyinyi nú ninɔmɛ, alǒ nǔwiwa ɖěɖěe ma vɛ́ klisánwun lɛ́ ɖo kpaa mɛ ǎ, bɔ mǐ ka tuun ɖɔ yě ná dɔn mǐ dó tɛ́nkpɔ́n mɛ lɛ́ é sixú ɖo nǔ énɛ́ lɛ́ mɛ.—Mat. 5:29, 30.

12. Gbeta tɛ́ kɔn Jɔbu ka wá? Nɛ̌ é ka d’alɔ ɛ bɔ é nɔ acéjí dó mɛtɛ́nkpɔ́n lɛ́ wú gbɔn? (Jɔbu 31:1)

¹² Bo ná dó nyi alɔ nú ninɔmɛ ɖěɖěe ná zɔ́n bɔ mǐ ná hu hwɛ lɛ́ é ɔ, mǐ ɖó ná kán ɖ’é jí bǐ mlɛ́mlɛ́ bá nɔ acéjí. Nǔ e Jɔbu wa é nɛ́. É “nu alɛ xá nukún tɔn” bo ná kpɔ́n nyɔ̌nu ɖěvo lɛ́ kpó jlǒ masɔgbe lɛ́ kpó gbeɖé ǎ. (Xa Jɔbu 31:1.) Títɛ́dó gbeta énɛ́ e kɔn é wá é wú ná zɔ́n bɔ é sɔ́ ná yi ba nyɔ̌nu ɖěvo ǎ. Mǐ lɔ sixú kán ɖ’é jí bá nyi alɔ nú nǔ ɖěbǔ e sixú zɔ́n bɔ mǐ ná jɛ tɛ́nkpɔ́n mɛ lɛ́ é.

13. Étɛ́wú mǐ ka ɖó ná nya xɛ ɖo linlin mǐtɔn lɛ́ jí? (Kpɔ́n ɖiɖe lɛ́ lɔmɔ̌.)

¹³ Mǐ ɖó ná lɛ́ nya xɛ ɖo linlin mǐtɔn lɛ́ jí. (Tín. 20:17) Mɛɖé lɛ́ nɔ lin ɖɔ, ényí émí ná bo lin tamɛ dó nǔnyanyawiwa jí bo ma ka ko wa ǎ ɔ, é kún ɖó xó ɖé ó. Amɔ̌, linlin mɔ̌hun sɔgbe ǎ. Mɛ e nɔ fɔ́n bo nɔ ɖo tamɛ lin dó nǔnyanyawiwa jí wɛ é nɔ bló bɔ jlǒ ɔ nɔ lɛ́ syɛ́n d’é jí. Ényí é ɖo mɔ̌ wa wɛ ɔ, dɔn gbígbí ɖo nǔnyanyawiwa nukɔn ná vɛ́ wǔ n’i hú gǎn. É ɖo wɛn ɖɔ, linlin nyanya lɛ́ ná wá ayi mǐtɔn mɛ hweɖélɛ́nu. Ényí é jɛ mɔ̌ ɔ, é ɖo tají ɖɔ è ní nya linlin énɛ́ lɛ́ dó gbě afɔjíafɔjí, bo sɔ́ linlin ɖagbe lɛ́ ɖó tɛn yětɔn mɛ. Ényí mǐ wa mɔ̌ ɔ, linlin nyanya lɛ́ sɔ́ nɔ dó ɖɔ do ɖo ayi mǐtɔn mɛ, bo nɔ wá húzú jlǒ syɛ́nsyɛ́n e ná vɛ́ wǔ bɔ mǐ ná liza xá, bo tlɛ sixú zɔ́n bɔ mǐ ná hu hwɛ syɛ́nsyɛ́n ɖé é ǎ.—Filí. 4:8; Koló. 3:2; Ja. 1:13-15.

14. Nǔ ɖěvo tɛ́ ka sixú d’alɔ mǐ bɔ mǐ ná nya xɛ ɖo mǐɖée jí sín mɛtɛ́nkpɔ́n lɛ́ sí?

¹⁴ Nǔ ɖěvo tɛ́ mǐ ka sixú wa bo ná nya xɛ ɖo mǐɖée jí sín mɛtɛ́nkpɔ́n lɛ́ sí? Mǐ ɖó ná kú d’é jí bǐ mlɛ́mlɛ́ ɖɔ tónú sise nú sɛ́n Jexóva tɔn lɛ́ ná hɛn le wá nú mǐ hwebǐnu. Hweɖélɛ́nu ɔ, é sixú vɛ́ wǔ nú mǐ bɔ mǐ ná bló bɔ linlin mǐtɔn lɛ́ kpó jlǒ mǐtɔn lɛ́ kpó ná sɔgbe xá nǔ e nɔ nyɔ́ Mawu nukúnmɛ lɛ́ é. Amɔ̌, ényí mǐ dó gǎn syɛ́nsyɛ́n bo wa mɔ̌ ɔ, mǐ ná ɖó awǎjijɛ jɔ awǎjijɛ.

15. Étɛ́wú jlǒ syɛ́nsyɛ́n ɖíɖó bá wa nǔ ɖagbe ka sixú nya xɛ ɖo mǐ jí sín mɛtɛ́nkpɔ́n lɛ́ sí?

¹⁵ É byɔ́ ɖɔ mǐ ní tɛ́n kpɔ́n bo ɖó jlǒ ɖagbe lɛ́. Ényí mǐ kplɔ́n bo nɔ “gbɛ́ wǎn nú nǔnyanyawiwa” bo nɔ “yí wǎn nú nǔɖagbewiwa” ɔ, mǐ ná ná hlɔ̌nhlɔ́n kán e mǐ kán ɖ’é jí bo ná nɔ wa nǔ ɖagbe é, lobo ná nyi alɔ nú ninɔmɛ ɖěɖěe ná zɔ́n bɔ mǐ ná hu hwɛ lɛ́ é. (Amɔ́. 5:15) Jlǒ ɖagbe lɛ́ ɖíɖó ná lɛ́ ná hlɔ̌nhlɔ́n mǐ bɔ mǐ ná gbí dɔn hwenu e mǐ wá mɔ mǐɖée ɖo ninɔmɛ e mǐ ma ɖó nukún tɔn ǎ bɔ é ka ná tɛ́n mǐ kpɔ́n é ɖé mɛ é.

16. Nɛ̌ nǔ gbigbɔ tɔn lɛ́ wiwa ka sixú d’alɔ mǐ bɔ mǐ ná kpo ɖo acéjí nɔ wɛ gbɔn? (Kpɔ́n ɖiɖe lɛ́ lɔmɔ̌.)

¹⁶ Nɛ̌ mǐ ka sixú tɛ́n kpɔ́n bo ɖó jlǒ ɖagbe lɛ́ gbɔn? Mǐ ɖó ná sɔ́ mǐɖée jó nú nǔ gbigbɔ tɔn lɛ́ bǐ mlɛ́mlɛ́ lěe é nyɔ́ bló gbɔn é. Ényí mǐ nɔ yi kplé agun tɔn lɛ́ bo nɔ ɖ’alɔ ɖo sinsɛnzɔ́ ɔ mɛ ɔ, mǐ nɔ ná hlɔ̌nhlɔ́n jlǒ e mǐ ɖó bo ná bló bɔ nǔ mǐtɔn ná nyɔ́ Jexóva nukúnmɛ é, bɔ mǐ sɔ́ nɔ jɛ nǔnyanyawiwa sín mɔ mɛ ǎ. (Mat. 28:19, 20; Ebl. 10:24, 25) Ényí mǐ nɔ xa Xó Mawu tɔn, nɔ kplɔ́n bo nɔ lɛ́ lin tamɛ d’é jí ɔ, mǐ nɔ ná hlɔ̌nhlɔ́n wǎn e mǐ yí nú nǔɖagbewiwa é kpó wǎn e mǐ gbɛ́ nú nǔnyanyawiwa é kpó. (Joz. 1:8; Ðɛh. 1:2, 3; 119:97, 101) Flín ɖɔ Jezu ɖɔ xó élɔ́ nú ahwanvú tɔn lɛ́: “Mi . . . nɔ ɖo ɖɛ xo wɛ, lobo ma wá jɛ tɛ́nkpɔ́n mɛ ó.” (Mat. 26:41) Ényí mǐ nɔ xo ɖɛ sɛ́dó Tɔ́ mǐtɔn jǐxwé tɔn ɔ ɔ, mǐ nɔ hun ali n’i b’ɛ nɔ d’alɔ mǐ, bɔ mǐ nɔ ná hlɔ̌nhlɔ́n kán e mǐ kán ɖ’é jí bo ná bló bɔ nǔ mǐtɔn ná nyɔ́ nukún tɔn mɛ é.—Ja. 4:8.

KPO ÐO ACÉJÍ NƆ WƐ

17. Gǎnmaɖó tɛ́ Piyɛ́ɛ ka ɖí xwi xá ɖo ninɔmɛ gěgé mɛ?

¹⁷ Mǐ sixú kpé wú bo ɖu ɖo gǎnmaɖó mǐtɔn ɖé lɛ́ jí bǐ mlɛ́mlɛ́. Amɔ̌, é sixú byɔ́ ɖɔ mǐ ní kpo ɖo za li xá gǎnmaɖó ɖěvo lɛ́ wɛ nú hwenu línlín. Ð’ayi kpɔ́ndéwú mɛsɛ́dó Piyɛ́ɛ tɔn wú. É gbɛ́ Jezu azɔn atɔn ɖó xɛsi ɖi nú gbɛtɔ́ wú. (Mat. 26:69-75) É cí ɖɔ Piyɛ́ɛ ɖu ɖo xɛsi mɔ̌hun jí hwenu e é ɖe kúnnu kpó adɔgbígbó kpó ɖo Hwɛɖɔxɔsá ɖaxó Jwifu lɛ́ tɔn é. (Mɛ. 5:27-29) É ɖo mɔ̌ có, ɖo xwe ɖé lɛ́ gúdo ɔ, “ɖó é ɖo xɛsi ɖi nú mɛ e nɔ jɛ hun dó adagbigbo jí lɛ́ é wɛ” wútu ɔ, é sɔ́ nɔ ɖu nǔ xá klisánwun e ma nyí Jwifu ǎ lɛ́ é ǎ nú hwenu ɖé. (Ga. 2:11, 12) Piyɛ́ɛ ko lɛ́ jɛ xɛsi ɖi jí. Bóyá, é ko kpé wú bo ɖu ɖ’é jí bǐ mlɛ́mlɛ́ ǎ.

18. Ényí mǐ ná bo tlɛ lin ɖɔ mǐ ko ɖu ɖo gǎnmaɖó ɖé lɛ́ jí ɔ, étɛ́ ka sixú lɛ́ wá jɛ?

¹⁸ Mǐ lɔ sixú wá mɔ mǐɖée ɖo ninɔmɛ mɔ̌hun ɖé mɛ. Gbɔn nɛ̌ é? Gǎnmaɖó e mǐ lin ɖɔ mǐ ko ɖu ɖ’é jí é ɖé sixú lɛ́ wá tɛ́n mǐ kpɔ́n. Ði kpɔ́ndéwú ɔ, nɔví súnnu ɖé ɖɔ: “Un gɔn fɔtóo nǔblíblíwiwa tɔn lɛ́ kpɔ́n nú xwe wǒ, bo kú d’é jí ɖɔ un kún sɔ́ ná jɛ mɔ tɔn mɛ gbeɖé ó. Amɔ̌, gǎnmaɖó ce lɛ́ cí gběkanlin baɖabaɖa e tɔwu bo ɖo te kpɔ́n hwenu ɖagbe hú gǎn ɔ bá wlí nǔ ɖu é ɖɔhun.” Amɔ̌, é nyɔ́ tawun ɖɔ nɔví ɔ kún jó gbe ó. É mɔ nǔ jɛ wú ɖɔ émí ɖó ná kpo ɖo gǎn dó wɛ hwebǐnu bo ná ɖo za li xá gǎnmaɖó énɛ́ wɛ, bóyá nú gbɛhwenu tɔn e kpo ɖo gbɛ nyanya élɔ́ mɛ é bǐ. Alɔ e asi tɔn kpó mɛxó agun tɔn lɛ́ kpó dó è é zɔ́n bɔ é ɖe afɔ tawun tawun e ná zɔ́n bɔ é ná liza xá fɔtóo nǔblíblíwiwa tɔn lɛ́ kpínkpɔ́n é.

19. Nɛ̌ mǐ ka sixú liza xá gǎnmaɖó e nɔ lɛ́ wá xwetɔ́n é ɖé gbɔn?

¹⁹ Nɛ̌ mǐ ka sixú liza xá gǎnmaɖó e nɔ fɔ́n bo nɔ ɖo xwixwetɔ́n wɛ é ɖé, bɔ é ma ná zɔ́n bónú mǐ ná wa nǔ nyanya ǎ gbɔn? Wě élɔ́ e Jezu ɖe xá mɛ dó mɛtɛ́nkpɔ́n wú é wɛ mǐ ɖó ná xwedó: “Mi nɔ wunzɛn.” Ényí é ná bo tlɛ nyí hwe ɖěɖěe nu a nɔ mɔ ɖɔ agbɔ̌n ɖo émí wú é ɔ, nɔ kpo ɖo alɔ nyi nú ninɔmɛ ɖěɖěe sixú zɔ́n bɔ a ná jɛ tɛ́nkpɔ́n mɛ lɛ́ é wɛ. (1 Kɔ. 10:12) Kpo ɖo wlɛnwín ɖěɖěe a zán bɔ yě zɔ́n bɔ a ɖu ɖo gǎnmaɖó ɔ jí lɛ́ é zán wɛ. Nǔnywɛ́xó 28:14 ɖɔ: “Awǎjijɛnɔ wɛ nyí mɛ e nɔ ɖo acéjí hwebǐnu é.”—2 Pi. 3:14.

LE ÐĚÐĚE È NƆ MƆ ÐO ACÉJÍNINƆ MƐ É ÐÉ LƐ́

20-21. (a) Ényí mǐ kpo ɖo acéjí nɔ dó mɛtɛ́nkpɔ́n lɛ́ wú wɛ ɔ, le tɛ́ lɛ́ mǐ ka ná mɔ? (b) Ényí mǐ wa éé nyí mǐtɔn é ɔ, étɛ́ Jexóva ka ná wa nú mǐ? (2 Kɔlɛ́ntinu lɛ́ 4:7)

²⁰ Mǐ sixú kú d’é jí ɖɔ acéjíninɔ dó mɛtɛ́nkpɔ́n lɛ́ wú nɔ wa ɖagbe nú mǐ hwebǐnu. Ényí mǐ hu hwɛ ɔ, mǐ sixú mɔ “vǐví e ɖo hwɛhuhu mɛ nú hwenu kléwún ɖé” é, amɔ̌, ényí mǐ nɔ zán gbɛ lěe Jexóva ba gbɔn é ɔ, mǐ ná ɖó awǎjijɛ hú gǎn. (Ebl. 11:25; Ðɛh. 19:9) Nǔ nyí mɔ̌, ɖó é bló mǐ bónú mǐ ná nɔ zán gbɛ sɔgbe xá ali tɔn lɛ́. (Bǐb. 1:27) Mɔ̌ mɛ ɔ, mǐ ná ɖu vǐví ayixa mímɛ́ ɖé tɔn, bo ná lɛ́ kpo ɖo gbɛ mavɔmavɔ sín ali ɔ jí.—1 Tim. 6:12; 2 Tim. 1:3; Ju. 20, 21.

²¹ Nǔgbó wɛ ɖɔ “agbaza ɖó gǎn ɖé ǎ.” Amɔ̌, énɛ́ ɖo xlɛ́xlɛ́ wɛ ɖɔ mǐ kún sixú wa nǔ ɖěbǔ ɖo gǎnmaɖó mǐtɔn lɛ́ wú ó ǎ. Jexóva ɖo gbesisɔmɛ bo ná ná mǐ hlɔ̌nhlɔ́n e sín hudó mǐ ɖó é. (Xa 2 Kɔlɛ́ntinu lɛ́ 4:7.) É ɖo mɔ̌ có, hlɔ̌nhlɔ́n e zɛ gbɛtɔ́ tɔn wú é wɛ Mawu nɔ ná mɛ. Amɔ̌ jɛ nukɔn hwɛ̌ ɔ, mǐ wɛ ɖó ná wa nǔ e wú mǐ kpé é bǐ dó liza xá mɛtɛ́nkpɔ́n ɔ. Ényí mǐ wa éé nyí mǐtɔn é ɔ, mǐ sixú ɖeji ɖɔ Jexóva ná ná sin nú ɖɛ mǐtɔn lɛ́, lobo ná ná mǐ hlɔ̌nhlɔ́n e sín hudó mǐ ɖó é dó hwetɔnnu. (1 Kɔ. 10:13) Ɛɛn, kpó alɔdó Jexóva tɔn kpó ɔ, mǐ sixú kpo ɖo acéjí nɔ wɛ dó mɛtɛ́nkpɔ́n lɛ́ wú.