Lěe mɛxó agun tɔn lɛ́ nɔ ɖe wǎnyíyí kpó nǔbláwǔkúnúmɛ kpó xlɛ́ hwɛhutɔ́ lɛ́ gbɔn é

1. Nukúnɖíɖó ɖé ka ɖe nú mɛ e hu hwɛ syɛ́nsyɛ́n ɖé é a?

ÐO XÓTA e wá yi é mɛ ɔ, mǐ mɔ lěe mɛsɛ́dó Pɔ́lu ɖe ɖɛ hwɛ syɛ́nsyɛ́n huhu sín xó ɖé gbɔn ɖo Kɔlɛ́nti é. Hwɛhutɔ́ ɔ sín hwɛ vɛ́ n’i ǎ, bɔ è sɔ́ ɛ ɖó kɛ́n nú agun ɔ. Amɔ̌, lěe wěmafɔ e jí xóta mǐtɔn jínjɔ́n é xlɛ́ gbɔn é ɔ, Mawu sixú d’alɔ mɛɖé bɔ hwɛ tɔn lɛ́ ná vɛ́ n’i. (Hlɔ̌. 2:4) Nɛ̌ mɛxó agun tɔn lɛ́ ka sixú d’alɔ mɛɖé bɔ hwɛ tɔn lɛ́ ná vɛ́ n’i gbɔn?

2-3. Ényí nǔɖitɔ́ hǎtɔ́ ɖé hu hwɛ syɛ́nsyɛ́n ɖé bónú mǐ tuun ɔ, étɛ́ mǐ ka ɖó ná wa? Aniwú?

² Cóbónú mɛxó agun tɔn lɛ́ ná d’alɔ ɔ, é byɔ́ ɖɔ yě ní mɔ nǔ jɛ nǔ e jɛ é wú. Énɛ́ wú ɔ, ényí mǐ tuun ɖɔ nǔɖitɔ́ hǎtɔ́ ɖé hu hwɛ syɛ́nsyɛ́n ɖé, énɛ́ wɛ nyí ɖɔ, é wa nǔ e sixú zɔ́n bɔ è ná sɔ́ ɛ ɖó kɛ́n nú agun ɔ é ɖé ɔ, étɛ́ mǐ ka ɖó ná wa? Mǐ ɖó ná dó wǔsyɛ́n lanmɛ nú nǔwanyidotɔ́ ɔ ɖɔ é ní yi mɔ mɛxó agun tɔn lɛ́ bo byɔ́ alɔdó.—Eza. 1:18; Mɛ. 20:28; 1 Pi. 5:2.

³ Amɔ̌, ényí nǔwanyidotɔ́ ɔ gbɛ́ ɖɔ émí kún ná yi ɖɔ xó ɔ nú mɛxó agun tɔn lɛ́ ó ɔ ka lo? Mǐɖésúnɔ ná yi mɔ mɛxó agun tɔn lɛ́, bo ná tɛ́n kpɔ́n bɔ mɛ ɔ ná mɔ alɔdó e sín hudó é ɖó é. Wǎnyíyí núwiwa wɛ nǔ mɔ̌hun ná nyí, ɖó mǐ ba ɖɔ nɔví súnnu mǐtɔn, alǒ nɔví nyɔ̌nu mǐtɔn ní bú ǎ. Ényí nǔwanyidotɔ́ ɔ ma lɛ́ kɔ sín gbɛ e zán wɛ é ɖe é gúdo ǎ ɔ, é ná ɖo nǔ wa dó xɔ́ntɔn e é zun xá Jexóva é wú wɛ. É sixú lɛ́ wa nǔ dó nyǐkɔ ɖagbe agun ɔ tɔn wú. Énɛ́ wú ɔ, mǐ nɔ kpankɔ́n bo nɔ wa nǔɖé, ɖó wǎnyíyí e mǐ ɖó nú Jexóva kpó nǔwanyidotɔ́ ɔ kpó é wú.—Ðɛh. 27:14.

LĚE MƐXÓ AGUN TƆN LƐ́ NƆ D’ALƆ MƐ ÐĚÐĚE HU HWƐ SYƐ́NSYƐ́N LƐ́ É GBƆN É

4. Ényí mɛxó agun tɔn lɛ́ jínjɔ́n ayǐ xá mɛ e hu hwɛ syɛ́nsyɛ́n ɖé é ɔ, étɛ́ gbé yě ka nɔ nya?

⁴ Ényí mɛɖé hu hwɛ syɛ́nsyɛ́n ɖé ɖo agun ɔ mɛ ɔ, kplékplé mɛxó lɛ́ tɔn ná sɔ́ mɛxó e jɛxá é atɔn bɔ yě ná jínjɔ́n ayǐ xá ɛ.a É byɔ́ ɖɔ súnnu énɛ́ lɛ́ ní nɔ jlɛ̌ jí, bo lɛ́ sɔ́ yěɖée hwe. Ée yě ná ɖo tíntɛ́nkpɔ́n wɛ bá d’alɔ mɛ e ɖo bǔbú wɛ é ɖé bónú hwɛ tɔn lɛ́ ná vɛ́ n’i é ɔ, yě nɔ tuun ɖɔ émí kún sixú hɛn mɛɖé gǎnnugǎnnu bónú é ná húzú ó. (Sɛ́n. 30:19) Mɛxó agun tɔn lɛ́ tuun ɖɔ é kún nyí nǔwanyidotɔ́ lɛ́ bǐ wɛ ná wa nǔ lěe é jɛxá gbɔn é axɔ́sú Davídi ɖɔhun ó. (2 Sam. 12:13) Nǔwanyidotɔ́ ɖé lɛ́ sixú wá gbeta ɔ kɔn bá xo wěɖexámɛ Jexóva tɔn nyi kɛ́n. (Bǐb. 4:6-8) É ɖo mɔ̌ có, nǔ e gbé mɛxó agun tɔn lɛ́ nɔ nya é wɛ nyí ɖɔ yě ná bló gbɔn alɔkpa lɛ́ bǐ mɛ bo ná d’alɔ nǔwanyidotɔ́ ɔ bɔ hwɛ tɔn lɛ́ ná vɛ́ n’i. Nǔgbódodó tɛ́ lɛ́ ka nɔ xlɛ́ ali yě hwenu e yě jínjɔ́n ayǐ xá nǔwanyidotɔ́ ɔ é?

5. Wěɖexámɛ tɛ́ mɛxó agun tɔn lɛ́ ka ná hɛn ayi mɛ, hwenu e yě jínjɔ́n ayǐ xá nǔwanyidotɔ́ ɔ é? (2 Timɔtée 2:24-26) (Kpɔ́n ɖiɖe ɔ lɔmɔ̌.)

⁵ Mɛxó agun tɔn lɛ́ nɔ mɔ ɖɔ nǔwanyidotɔ́ ɔ ɔ, lɛ̌ngbɔ́ xɔ akwɛ́ e bú é ɖé wɛ. (Luk. 15:4, 6) Énɛ́ wú ɔ, ényí yě jínjɔ́n ayǐ xá mɛ ɔ ɔ, yě nɔ dó gbe vɛ́sin n’i, alǒ wa nǔ xá ɛ kpó xomɛsin kpó ǎ; mɔ̌ jɛ́n yě ma ka nɔ lin ɖɔ nǔ e yě ɖó ná wa é bǐ jɛ́n nyí ɖɔ yě ní kan nǔ byɔ́ bo mɔ kúnnuɖenú lɛ́ ǎ é nɛ́. É nyɔ́ wa ɔ, yě ná ɖe jijɔ ɖěɖěe xó è ɖɔ ɖo 2 Timɔtée 2:24-26 mɛ lɛ́ é xlɛ́. (Xa.) Mɛxó agun tɔn lɛ́ nɔ kpo ɖo xomɛ fá wɛ, bo nɔ lɛ́ kpo ɖo xomɛ nyɔ́ wɛ, ée yě nɔ ɖo tíntɛ́nkpɔ́n wɛ bá d’alɔ nǔwanyidotɔ́ ɔ bónú hwɛ tɔn lɛ́ ná vɛ́ n’i é.

6. Nɛ̌ mɛxó agun tɔn lɛ́ ka ná zán hwenu bo ba do nú linlin Jexóva tɔn, lobo hɛn ayi mɛ cóbó jínjɔ́n ayǐ xá nǔwanyidotɔ́ ɖé gbɔn? (Hlɔ̌manu lɛ́ 2:4)

⁶ Mɛxó agun tɔn lɛ́ nɔ zán hwenu bo nɔ tuun linlin Jexóva tɔn, bo nɔ hɛn ayi mɛ. Yě nɔ tɛ́n kpɔ́n bo nɔ xwedó kpɔ́ndéwú Jexóva tɔn, ɖo ali e nu yě nɔ wa nǔ xá hwɛhutɔ́ ɖé ɖe é lɛ́ é bǐ mɛ, bo nɔ flín xó mɛsɛ́dó Pɔ́lu tɔn élɔ́ lɛ́: “Mawu ɔ, ɖo xomɛnyínyɔ́ tɔn mɛ ɔ, tíntɛ́nkpɔ́n wɛ é ɖe bo ná d’alɔ we bónú hwɛ towe lɛ́ ná vɛ́ nú we.” (Xa Hlɔ̌manu lɛ́ 2:4.) Mɛxó agun tɔn lɛ́ ɖó ná flín ɖɔ lɛ̌ngbɔ́nyitɔ́ lɛ́ wɛ émí nyí, bɔ Klísu wɛ ɖo ali xlɛ́ émí wɛ. (Eza. 11:3, 4; Mat. 18:18-20) Cóbónú wěɖegbɛ́ ɔ ná jínjɔ́n ayǐ xá nǔwanyidotɔ́ ɔ, é ná xo ɖɛ bo lin tamɛ dó nǔ e gbé nya wɛ é ɖe é jí: d’alɔ nǔwanyidotɔ́ ɔ bónú hwɛ tɔn lɛ́ ná vɛ́ n’i. Yě ná ba do nú nǔ ɖo Biblu kpó wěma mǐtɔn lɛ́ kpó mɛ, bo ná lɛ́ xo ɖɛ dó byɔ́ nukúnnúmɔjɛnǔmɛ. Yě ná lin tamɛ dó nǔ e é byɔ́ ɖɔ yě ní tuun dó mɛ ɔ wú, b’ɛ sixú ko zɔ́n bɔ é lin nǔ gbɔn mɔ̌, bo lɛ́ wa nǔ gbɔn mɔ̌ é jí.—Nǔx. 20:5.

7-8. Nɛ̌ mɛxó agun tɔn lɛ́ ka sixú xwedó suúlu Jexóva tɔn sín kpɔ́ndéwú gbɔn, hwenu e yě jínjɔ́n ayǐ xá nǔwanyidotɔ́ ɖé é?

⁷ Mɛxó agun tɔn lɛ́ nɔ xwedó suúlu Jexóva tɔn sín kpɔ́ndéwú. Yě nɔ hɛn lěe Jexóva wa nǔ xá nǔwanyidotɔ́ lɛ́ gbɔn ɖo hwexónu é ayi mɛ. Ði kpɔ́ndéwú ɔ, Jexóva zɔ́n tamɛ lin Kanyɛ́ɛ kpó suúlu kpó, gba akpá n’i dó nǔ e hwɛhuhu nɔ ji lɛ́ é wú, bo hun nukúnɖíɖó sín ali n’i. (Bǐb. 4:6, 7) Jexóva ɖe wě xá Davídi gbɔn gbeyíɖɔ Natáan jí. Natáan zán nǔjlɛ́dónǔwú ɖé bɔ é byɔ́ ayi axɔ́sú ɔ tɔn mɛ. (2 Sam. 12:1-7) Gɔ́ ná ɔ, Jexóva “fɔ́n ɔ” é nɔ ɖo gbeyíɖɔ tɔn lɛ́ sɛ́ dó akɔta Izlayɛ́li tɔn tótlítɔ́ ɔ wɛ. (Jel. 7:24, 25) É nɔ te bónú mɛ e ɖo togun tɔn mɛ lɛ́ é sín hwɛ lɛ́ ní to vɛ́ nú yě hwɛ̌ cóbónú é jɛ alɔ dó yě jí ǎ. É nyɔ́ wa ɔ, é ɖe afɔ nukɔntɔn ɔ gbɔn byɔ̌byɔ́ yě ɖɔ hwɛ yětɔn lɛ́ ní vɛ́ nú yě gblamɛ.

⁸ Mɛxó agun tɔn lɛ́ nɔ xwedó kpɔ́ndéwú Jexóva tɔn hwenu e yě ɖo tíntɛ́nkpɔ́n wɛ bá d’alɔ mɛ ɖěɖěe hu hwɛ syɛ́nsyɛ́n lɛ́ é é. Yě nɔ wa nǔ “kpó suúlu ɖaxó kpó” lěe 2 Timɔtée 4:2 ɖɔ gbɔn é. Énɛ́ wú ɔ, é byɔ́ ɖɔ mɛxó agun tɔn ɖé ní nɔ fá xomɛ bo nɔ lɛ́ ɖó suúlu hwebǐnu bá dó d’alɔ hwɛhutɔ́ ɔ bónú é ná ba ná wa nǔ ɖagbe. Ényí mɛxó agun tɔn ɔ sin xomɛ ɔ, mɛ ɔ sixú gɔn tó ɖó wěɖexámɛ ɔ, alǒ hwɛ tɔn lɛ́ sixú gɔn vǐvɛ́ n’i.”

9-10. Nɛ̌ mɛxó agun tɔn lɛ́ ka sixú d’alɔ hwɛhutɔ́ ɖé, bɔ é ná lin tamɛ dó gbɛzán tɔn jí gbɔn?

⁹ Mɛxó agun tɔn lɛ́ nɔ tɛ́n kpɔ́n bá tuun ninɔmɛ e dɔn mɛ ɔ dó hwɛ mɛ lɛ́ é. Ði kpɔ́ndéwú ɔ, gǎn jɛ vivɔ jí ɖo mɛ ɔ wú kpɛɖé kpɛɖé káká b’ɛ ba gǎn kpo bǐ ɖó é nɔ dó vɛ̌ nú nǔkplɔ́nkplɔ́n mɛɖésúnɔ tɔn, alǒ sinsɛnzɔ́ ɔ wú wɛ a? É sɔ́ nɔ xo ɖɛ sɛ́dó Jexóva hwɛhwɛ, alǒ xo ɖɛ sín ayi mɛ ǎ ka wɛ a? É ka sɔ́ nɔ tɛ́n kpɔ́n bo nɔ gbí dɔn ɖo jlǒ nyanya lɛ́ nukɔn ǎ ka wɛ a? Gbeta e nǔnywɛ́ ma kpé ǎ lɛ́ é kɔn wɛ é ka wá dó gbɛ̌ e é nɔ dó lɛ́ é, alǒ ayiɖeɖayǐ tɔn lɛ́ wú a? Nɛ̌ gbeta mɔ̌hun lɛ́ ka sixú ko wa nǔ dó ayi tɔn wú gbɔn? É ka mɔ nǔ jɛ lěe nǔ cí nú Jexóva dó gbeta e kɔn é wá agaɖanu din lɛ́ é kpó nǔ e é wa lɛ́ é kpó wú é a?

¹⁰ Mɛxó agun tɔn lɛ́ sixú kan nǔ ɖěɖěe ná d’alɔ mɛ ɔ lɛ́ é byɔ́ ɛ, b’ɛ ná lin tamɛ dó nǔ ɖěɖěe vɔ́ da nú xɔ́ntɔn e é zun xá Jexóva, bo zɔ́n bɔ é hu hwɛ lɛ́ é jí. Yě nɔ wa nǔ kpó xomɛnyínyɔ́ kpó, bo ka nɔ kan nǔ byɔ́ dó kpáxó e é ma byɔ́ ɖɔ mɛxó agun tɔn lɛ́ ní tuun ǎ é wú ǎ. (Nǔx. 20:5) Gɔ́ ná ɔ, yě sixú zán nǔjlɛ́dónǔwú lɛ́ dó d’alɔ mɛ ɔ, b’ɛ ná lin tamɛ, bo mɔ lěe nǔ e é wa lɛ́ é nylá sɔ é, lěe Natáan bló nú Davídi gbɔn é ɖɔhun. Bóyá ɖo azɔn nukɔntɔn e è jínjɔ́n ayǐ xá mɛ ɔ é hwenu ɔ, nǔ e é wa nyi do é sixú jɛ vǐvɛ́ n’i jí. Hwɛ tɔn lɛ́ tlɛ sixú vɛ́ n’i.

11. Nɛ̌ Jezu ka wa nǔ xá hwɛhutɔ́ lɛ́ gbɔn?

¹¹ Mɛxó agun tɔn lɛ́ nɔ tɛ́n kpɔ́n bo nɔ xwedó kpɔ́ndéwú Jezu tɔn. Hwenu e Jezu e fɔ́n sín kú é ɖo nǔ wa xá Sólu Táasinu ɔ wɛ é ɔ, é kan nǔnywɛ́nú élɔ́ byɔ́ ɛ: “Sólu, Sólu, étɛ́wú a ka ɖo ya dó nú mì wɛ?” Jezu gbɔn mɔ̌ mɛ bo d’alɔ ɛ bónú é ná lin tamɛ dó ali nyanya e é wlí é jí. (Mɛ. 9:3-6) Gɔ́ ná ɔ, ɖo ninɔmɛ “nyɔ̌nu Jezabɛ́li énɛ́” tɔn mɛ ɔ, Jezu ɖɔ: “Un ná ɛ hwenu bónú hwɛ tɔn lɛ́ ní vɛ́ n’i.”—Nǔɖe. 2:20, 21.

12-13. Nɛ̌ mɛxó agun tɔn lɛ́ ka sixú ná hwenu nǔwanyidotɔ́ ɖé bónú hwɛ tɔn lɛ́ ná vɛ́ n’i gbɔn? (Kpɔ́n fɔtóo ɔ lɔmɔ̌.)

¹² Mɛxó agun tɔn lɛ́ nɔ xwedó kpɔ́ndéwú Jezu tɔn, bo nɔ zɔn kplakpla jí dó wá gbeta ɔ kɔn ɖɔ nǔwanyidotɔ́ ɖé sín hwɛ lɛ́ kún sixú vɛ́ n’i ó ǎ. Hwɛ mɛɖé lɛ́ tɔn sixú vɛ́ nú yě hwenu e wěɖegbɛ́ ɔ jínjɔ́n ayǐ xá yě azɔn nukɔntɔn ɔ é, có é ka sixú byɔ́ hwenu gěgé nú mɛ ɖěvo lɛ́. Énɛ́ wú ɔ, mɛxó agun tɔn lɛ́ sixú bló tito bo ná jínjɔ́n ayǐ xá hwɛhutɔ́ ɔ hú azɔn ɖokpó. Bóyá ée è jínjɔ́n ayǐ xá klisánwun e ɖo bǔbú wɛ é ɖé azɔn nukɔntɔn énɛ́ gúdo é ɔ, é ná jɛ tamɛ lin dó nǔ e è ɖɔ n’i é wú jí dó nǔjɔnǔ mɛ. É sixú xo ɖɛ sɛ́dó Jexóva kpó mɛɖéesɔ́hwe kpó, bo byɔ́ ɛ ɖɔ é ní sɔ́ hwɛ e émí hu é kɛ émí. (Ðɛh. 32:5; 38:19) Mɔ̌ mɛ ɔ, ɖo ayǐ ɖěvo e è ná jínjɔ́n xá hwɛhutɔ́ ɔ é hwenu ɔ, é sixú ɖe xlɛ́ ɖɔ linlin e é ɖó din é gbɔn vo nú linlin e é ɖó hwenu e è jínjɔ́n ayǐ xá ɛ azɔn nukɔntɔn ɔ é.

¹³ Bo ná dó d’alɔ hwehutɔ́ ɔ bónú hwɛ tɔn lɛ́ ná vɛ́ n’i ɔ, mɛxó agun tɔn lɛ́ nɔ ɖe wǔvɛ́sexámɛ kpó xomɛnyínyɔ́ kpó xlɛ́. Yě nɔ xo ɖɛ sɛ́dó Jexóva ɖɔ é ní kɔn nyɔ̌ná dó gǎn e dó wɛ yě ɖe lɛ́ é jí, bo nɔ ɖó nukún ɖɔ nɔví yětɔn ná wá byɔ́ éɖée mɛ, bɔ hwɛ tɔn lɛ́ ná vɛ́ n’i.—2 Tim. 2:25, 26.

14. Ényí hwɛhutɔ́ ɖé sín hwɛ lɛ́ vɛ́ n’i ɔ, mɛ̌ è ka nɔ xɔ susu ná? Étɛ́wú?

¹⁴ Ényí nǔwanyidotɔ́ ɔ sín hwɛ lɛ́ vɛ́ n’i ɔ, énɛ́ nɔ hɛn awǎjijɛ ɖaxó wá. (Luk. 15:7, 10) Mɛ̌ è ka ɖó ná xɔ susu ná? Mɛxó agun tɔn lɛ́ wɛ a? Flín nǔ élɔ́ e Pɔ́lu wlán dó hwɛhutɔ́ lɛ́ wú é: “Bóyá Mawu sixú bló bɔ hwɛ yětɔn lɛ́ ná vɛ́ nú yě.” (2 Tim. 2:25) Énɛ́ wú ɔ, Jexóva wɛ nyí mɛ e nɔ d’alɔ klisánwun ɖé, b’ɛ nɔ húzú linlin tɔn kpó nǔwalɔ tɔn kpó é, é nyí gbɛtɔ́ ɖěbǔ wɛ ǎ. Pɔ́lu tínmɛ nǔ ɖagbe ɖěɖěe nɔ jɛ, hwenu e mɛɖé sín hwɛ lɛ́ vɛ́ n’i gúdo é. Mɛ énɛ́ sixú ɖó nukúnnúmɔjɛnǔmɛ e sɔgbe é dó nǔgbó ɔ wú d’é jí, byɔ́ éɖée mɛ, bo sixú xo gló mɔ Satáan tɔn lɛ́.—2Tim. 2:26.

15. Nɛ̌ mɛxó agun tɔn lɛ́ ka sixú kpo ɖo alɔ dó nǔwanyidotɔ́ e hwɛ tɔn lɛ́ vɛ́ ná é ɖé wɛ gbɔn?

¹⁵ Ényí mɛɖé sín hwɛ lɛ́ vɛ́ n’i ɔ, mɛxó agun tɔn lɛ́ ɖó ná kpo ɖo biba ɛ kpɔ́n wɛ, bo ná d’alɔ ɛ bónú é ná ná hlɔ̌nhlɔ́n nǔɖiɖi tɔn, bo lɛ́ d’alɔ ɛ bónú é ná kpo ɖo dɔn gbí wɛ ɖo mɔ Satáan tɔn lɛ́ nukɔn, lobo wa nǔ ɖagbe. (Ebl. 12:12, 13) É ɖo wɛn ɖɔ mɛxó agun tɔn lɛ́ kún nɔ ɖɔ gǒflɛ́mɛ e kunkplá hwɛ e mɛ ɔ hu lɛ́ é nú mɛɖé ó. Amɔ̌, étɛ́ é ka sixú byɔ́ ɖɔ è ní ɖɔ nú agun ɔ?

“GBƐ̌ NǓ NÚ MƐ . . . ÐO MƐ BǏ NUKƆN”

16. Sɔgbe xá 1 Timɔtée 5:20 ɔ, mɛ̌ mɛ̌ e dó gesí wɛ xógbe “mɛ bǐ” é Pɔ́lu zán é ka ɖe?

¹⁶ Xa 1 Timɔtée 5:20. Pɔ́lu wlán xó énɛ́ lɛ́ sɛ́dó mɛxó agun tɔn gbɛ̌ tɔn Timɔtée dó lěe é ná ɖe ɖɛ “mɛ e nɔ fɔ́n bo nɔ ɖo hwɛ hu wɛ lɛ́ é” sín xó gbɔn é wú. Étɛ́ ɖɔ wɛ é ka ɖe? É nyí agun ɔ blěbú wɛ nyí “mɛ bǐ” e xó ɖɔ wɛ é ɖe é dandan ǎ. É nyɔ́ wa ɔ, mɛ kpɛ e sixú ko tuun hwɛ e mɛ ɔ hu é lɛ́ é dó gesí wɛ é ɖe. É sixú ko nyí mɛ ɖěɖěe nyí kúnnuɖetɔ́ nǔ e jɛ lɛ́ é tɔn lɛ́ é, alǒ mɛ ɖěɖěe nǔwanyidotɔ́ ɔ sixú ko ɖɔ nǔ e jɛ lɛ́ é ná lɛ́ é. Mɛ énɛ́ lɛ́ kɛ́ɖɛ́ wɛ mɛxó agun tɔn lɛ́ ná ɖɔ ná ɖɔ è ko ɖe ɖɛ xó ɔ, bo kún jó nǔwanyidotɔ́ ɔ dó nyi mɔ̌ ó.

17. Ényí mɛ gěgé tuun hwɛ syɛ́nsyɛ́n e mɛɖé hu é ɖo agun ɔ mɛ, alǒ ná wá tuun ɔ, ɖɔnúese tɛ́ è ka ná xwlé agun ɔ? Étɛ́wú?

¹⁷ Ðo ninɔmɛ ɖé lɛ́ mɛ ɔ, mɛ gěgé sixú ko tuun nǔwanyido ɔ ɖo agun ɔ mɛ, alǒ ná wá tuun. Ðo ninɔmɛ mɔ̌hun mɛ ɔ, agun ɔ blěbú ná ɖo “mɛ bǐ” ɔ mɛ. Énɛ́ wú ɔ, mɛxó agun tɔn ɖé ná xwlé ɖɔnúese ɖé agun ɔ ɖɔ è gbɛ́ nǔ nú nɔví súnnu ɔ alǒ nɔví nyɔ̌nu ɔ. Aniwú? Pɔ́lu ná xósin ɔ bo ɖɔ: “Bónú é ní nyí akpágbanúmɛ nú mɛ e kpo lɛ́ é” bónú yě ní ma jɛ hwɛ mɛ ó.

18. Ényí mɛ e ko bló batɛ́mu, bo ma ka ko ɖó xwe 18 ǎ é ɖé hu hwɛ syɛ́nsyɛ́n ɖé ɔ, étɛ́ mɛxó agun tɔn lɛ́ ka nɔ wa? (Kpɔ́n fɔtóo ɔ lɔmɔ̌.)

¹⁸ Bɔ mɛ ɖěɖěe ka ko bló batɛ́mu, bo ma ko ɖó mɛxóxwe ǎ, énɛ́ wɛ nyí, ma ko ɖó xwe 18 ǎ bo ka hu hwɛ syɛ́nsyɛ́n é ka lo? Kplékplé mɛxó lɛ́ tɔn ná bló tuto, bɔ mɛxó agun tɔn we ná mɔ vǐ ɔ kpó mɛjitɔ́ tɔn klisánwun lɛ́ kpó, alǒ vǐ ɔ kpó mɛ e gɔ́n é ɖe é kpó. Mɛxó agun tɔn lɛ́ ná kpɔ́n afɔ ɖěɖěe mɛjitɔ́ lɛ́ ko ɖe, dó d’alɔ vǐ yětɔn bónú hwɛ tɔn lɛ́ ná vɛ́ n’i é. Ényí vǐ ɔ ɖó linlin ɖagbe, bo ɖo nǔ wa sɔgbe xá alɔ e dó è wɛ mɛjitɔ́ tɔn lɛ́ ɖe é wɛ ɔ, mɛxó agun tɔn we lɛ́ sixú wá gbeta ɔ kɔn ɖɔ é kún sɔ́ ɖo dandan bónú è ná ɖe afɔ ɖěvo ó. Mɛjitɔ́ lɛ́ wɛ Mawu sɔ́ azɔ̌ dó así ná bónú yě ná gbɛ́ nǔ nú vǐ yětɔn lɛ́ kpó wǎnyíyí kpó. (Sɛ́n. 6:6, 7; Nǔx. 6:20; 22:6; Efɛ́. 6:2-4) Sín hweɖénu jɛ hweɖénu ɔ, mɛxó agun tɔn lɛ́ ná nɔ mɔ mɛjitɔ́ lɛ́ bo ná kpɔ́n ɖɔ è ka ɖo alɔ e sín hudó vǐ ɔ ɖó lɛ́ é dó è wɛ a jí. Amɔ̌, ényí vǐ e bló batɛ́mu é ɖé sín hwɛ ma vɛ́ n’i ǎ, bɔ é kpo ɖo hwɛ ɔ hu wɛ ɔ ka lo? Ðo ninɔmɛ énɛ́ mɛ ɔ, mɛxó agun tɔn lɛ́ sín wěɖegbɛ́ ɖé ná mɔ é kpó mɛjitɔ́ tɔn klisánwun lɛ́ kpó, alǒ é kpó mɛ e gɔ́n é ɖe é kpó.

“JEXÓVA NƆ KÚ NǓBLÁWǓ NÚ MƐ, BO NƆ LƐ́ YÍ WǍN NÚ MƐ TITEWUNGBE”

19. Nɛ̌ mɛxó agun tɔn lɛ́ ka nɔ tɛ́n kpɔ́n bo nɔ xwedó kpɔ́ndéwú Jexóva tɔn, hwenu e yě jínjɔ́n ayǐ xá nǔwanyidotɔ́ lɛ́ é gbɔn?

¹⁹ Mɛxó agun tɔn ɖěɖěe nɔ nɔ wěɖegbɛ́ mɛ lɛ́ é ɖó azɔ̌ tají ɖé ɖo Jexóva nukɔn, bo ná bló bɔ agun ɔ ná nɔ mǐmɛ́ jí. (1 Kɔ. 5:7) Yě nɔ lɛ́ ba ná d’alɔ nǔwanyidotɔ́ lɛ́, bɔ nú é nyɔ́ bló ɔ, hwɛ yětɔn lɛ́ ná vɛ́ nú yě. Énɛ́ wú ɔ, mɛxó agun tɔn lɛ́ nɔ ɖó linlin ɖagbe, bo nɔ kpo ɖo nukún ɖó wɛ ɖɔ mɛ ɔ ná húzú. Aniwú? Ðó yě nɔ ba ná xwedó kpɔ́ndéwú Jexóva, éé “nɔ kú nǔbláwǔ nú mɛ, bo nɔ lɛ́ yí wǎn nú mɛ titewungbe” é tɔn. (Ja. 5:11) Ð’ayi lěe mɛsɛ́dó mɛxómɔ Jaan wa nǔ gbɔn mɔ̌ gbɔn é wú. É wlán ɖɔ: “Vǐ ce vívɛ́ná lɛ́ mi, un ɖo nǔ élɔ́ lɛ́ wlán sɛ́dó mi wɛ bónú mi ní ma hu hwɛ ó. É ɖo mɔ̌ có, ényí mɛɖé ka wá hu hwɛ ɔ, mǐ ɖó alɔgɔ́númɛtɔ́ ɖokpó ɖo Tɔ́ ɔ gɔ́n, é wɛ nyí Jezu Klísu, mɛ e nɔ wa nǔ jlɔ́jlɔ́ ɖo Mawu nukúnmɛ é.”—1 Jaan 2:1.

20. Étɛ́ jí mǐ ka ná ɖɔ xó dó ɖo xóta gǔdo tɔn xóta ɖěbɔdóɖěwú élɔ́ tɔn mɛ?

²⁰ É blá wǔ ɖɔ hweɖélɛ́nu ɔ, è nɔ wa nǔ e wú è kpé é bǐ có, hwɛ klisánwun ɖé tɔn nɔ gɔn vǐvɛ́ n’i. Ényí nǔ mɔ̌hun jɛ ɔ, è ɖó ná sɔ́ ɛ ɖó kɛ́n nú agun ɔ. Alɔ tɛ́ mɛxó agun tɔn lɛ́ ka nɔ sɔ́ dó ɖu ninɔmɛ syɛ́nsyɛ́n mɔ̌hun lɛ́ ná? Mǐ ná ɖɔ xó dó xó énɛ́ jí ɖo xóta gǔdo tɔn xóta ɖěbɔdóɖěwú élɔ́ tɔn mɛ.