‘Ylɔ̌ mɛxó agun tɔn lɛ́’

1. Nɛ̌ Jexóva ka xlɛ́ ɖɔ lɛ̌ngbɔ́ émítɔn lɛ́ xɔ akwɛ́ nú émí gbɔn?

LƐ̌NGBƆ́ Jexóva tɔn lɛ́ xɔ akwɛ́ n’i. É sɔ́ hun Jezu tɔn dó xɔ yě, bo zɔ́n azɔ̌ mɛxó agun tɔn lɛ́ ɖɔ yě ní kpé nukún dó lɛ̌ngbɔ́kpó émítɔn wú. (Mɛ. 20:28) Mawu ba ɖɔ è ní wa nǔ xá lɛ̌ngbɔ́ émítɔn lɛ́ kpó xomɛnyínyɔ́ kpó. Klísu nɔ xlɛ́ ali mɛxó agun tɔn lɛ́ bɔ yě nɔ fá kɔ nú lɛ̌ngbɔ́ lɛ́ bo nɔ lɛ́ nya xɛ ɖo yě jí sín nǔ e sixú wa nǔ dó yě wú ɖo gbigbɔ lixo lɛ́ é sí.—Eza. 32:1, 2.

2. Mɛ ɖětɛ́ lɛ́ sín nǔ ka nɔ ɖu ayi mɛ nú Jexóva ɖo ali bǔnɔ ɖé nu? (Ezekiyɛ́li 34:15, 16)

² Lɛ̌ngbɔ́ Jexóva tɔn lɛ́ bǐ sín nǔ wɛ nɔ ɖu ayi mɛ n’i tawun, amɔ̌, é nɔ kpé nukún dó ɖěɖěe ɖo wǔvɛ́ se wɛ lɛ́ é wú ɖo ali tají ɖé nu. É nɔ gbɔn mɛxó agun tɔn lɛ́ jí bo nɔ d’alɔ mɛ ɖěɖěe ɖo wǔvɛ́ se wɛ ɖo gbigbɔ lixo lɛ́ é. (Xa Ezekiyɛ́li 34:15, 16.) É ɖo mɔ̌ có, é ba ɖɔ mǐ ní nɔ ba alɔdó hwenu e mǐ ɖó hudó tɔn é. Ðo hwe mɔ̌hun lɛ́ nu ɔ, gɔ́ nú ɖɛ vívɛ́ e mǐ nɔ xo sɛ́dó Mawu bo nɔ byɔ́ alɔdó é ɔ, mǐ nɔ lɛ́ ba alɔdó ɖo “lɛ̌ngbɔ́nyitɔ́ kpó nǔkplɔ́nmɛtɔ́ kpó” éé ɖo agun ɔ mɛ lɛ́ é gɔ́n.—Efɛ́. 4:11, 12.

3. Nɛ̌ azɔ̌ mɛxó agun tɔn lɛ́ tɔn gbígbéjé kpɔ́n ka sixú hɛn le wá nú mǐ mɛ bǐ gbɔn?

³ Ðo xóta élɔ́ mɛ ɔ, mǐ ná gbéjé tuto e Mawu bló bo ná nɔ d’alɔ mǐ ɖo gbigbɔ lixo gbɔn mɛxó agun tɔn lɛ́ gblamɛ é kpɔ́n. Mǐ ná ná xósin nú nǔkanbyɔ́ élɔ́ lɛ́: Hwetɛ́nu mǐ ka ɖó ná byɔ́ alɔdó mɛxó agun tɔn lɛ́ tɔn? Étɛ́wú mǐ ka ɖó ná wa mɔ̌? Gɔ́ ná ɔ, nɛ̌ mɛxó agun tɔn lɛ́ ka nɔ d’alɔ mǐ gbɔn? Ényí mǐ ná bo ma tlɛ ɖo tagba ɖé ɖí xwi xá wɛ din ǎ ɔ, xósin nǔkanbyɔ́ énɛ́ lɛ́ tɔn biba ná zɔ́n bɔ tuto Mawu tɔn ná lɛ́ su nukún mǐtɔn mɛ d’é jí bo sixú wá xɔ gbɛ nú mǐ gbe ɖokpó.

HWETƐ́NU MǏ KA ÐÓ NÁ “YLƆ́ MƐXÓ AGUN TƆN LƐ́”?

4. Étɛ́wú mǐ ka wá gbeta ɔ kɔn ɖɔ Jaki 5:14-16, 19, 20 ɖo xó ɖɔ dó azɔn jijɛ ɖo gbigbɔ lixo wú wɛ? (Kpɔ́n ɖiɖe lɛ́ lɔmɔ̌.)

⁴ Ahwanvú Jaki bɛ́ xó ɖɔ dó tuto e Mawu bló dó alɔ dídó mɛ ɖo gbigbɔ lixo wú é wú gbɔn lě: “Mɛɖé ɖo azɔn jɛ wɛ ɖo mi mɛ wɛ a? Mi nú é ní ylɔ́ mɛxó agun tɔn lɛ́.” (Xa Jaki 5:14-16, 19, 20.) Nǔ e lɛ́ lɛ̌ dó wěmafɔ ɔ lɛ́ é xlɛ́ ɖɔ azɔn jijɛ ɖo gbigbɔ lixo xó ɖɔ wɛ Jaki ɖe. Ði kpɔ́ndéwú ɔ, mɛxó agun tɔn lɛ́ wɛ è ɖɔ nú mɛ e ɖo azɔn jɛ wɛ é ɖɔ é ní ylɔ́, é nyí dotóo ǎ. Gɔ́ ná ɔ, azɔn jijɛ ɖo gbigbɔ lixo xó wá byɔ́ xó ɔ mɛ, ɖó azɔn gbigbɔ ɔ sixú byɔ́ ɖɔ è ní sɔ́ hwɛ kɛ mɛ. Ðo ninɔmɛ ɖé lɛ́ mɛ ɔ, afɔ ɖěɖěe é byɔ́ ɖɔ è ní ɖe bo ná dó gbɔ azɔn nú mɛ ɖo gbigbɔ lixo lɛ́ é nɔ ɖibla nyí ɖokpó ɔ lɛ́ xá ɖěɖěe è ɖó ná ɖe bo ná dó gbɔ azɔn nú mɛ ɖo agbaza lixo é. Ényí mǐ ɖo azɔn jɛ wɛ ɖo agbaza lixo ɔ, mǐ nɔ yi dotóo gɔ́n bo nɔ tínmɛ nǔ e ɖo mǐ wa wɛ é, lobo nɔ xwedó wě e é ɖe xá mǐ lɛ́ é. Mɔ̌ ɖokpó ɔ, ényí mǐ ɖo azɔn jɛ wɛ ɖo gbigbɔ lixo ɔ, mǐ ɖó ná yi mɛxó agun tɔn ɖé gɔ́n, tínmɛ ninɔmɛ mǐtɔn, bo xwedó wě e é ɖe xá mǐ bɔ é júnjɔ́n Biblu jí lɛ́ é.

5. Nɛ̌ mǐ ka sixú wa gbɔn bo tuun ɖɔ ényí mǐ ma nyɔ́ bló ǎ ɔ, mǐ ná jɛ azɔn ɖo gbigbɔ lixo?

⁵ Tuto e xó è ɖɔ ɖo Jaki wěmata 5 mɛ é dó wǔsyɛ́n lanmɛ nú mǐ ɖɔ mǐ ní yi mɔ mɛxó agun tɔn lɛ́ hwenu e mǐ mɔ ɖɔ mǐ kún ɖo ganjí ɖo gbigbɔ lixo ó é. Amɔ̌, kpɔ́n lěe é nyí nǔnywɛ́nú sɔ ɖɔ mǐ ní yi ba alɔdó cóbɔ xɔ́ntɔn e mǐ zun xá Mawu é ná wá xo akpa bǐ é! Mǐ ɖó ná nɔ ɖɔ nǔgbó nú mǐɖésúnɔ mɛtún ɔ. Mawuxówéma ɔ gba akpá nú mǐ ɖɔ mǐ hɛn ɔ, mǐ ná wa yɛ nú mǐɖée dó lěe mǐ ɖe gbɔn ɖo gbigbɔ lixo é wú. (Ja. 1:22) Klisánwun bǐbɛ́mɛ tɔn e ɖo Sáadu lɛ́ é ɖé lɛ́ ɖe afɔ énɛ́ nyi do, bɔ Jezu gba akpá nú yě dó lěe yě ɖe gbɔn ɖo gbigbɔ lixo é wú. (Nǔɖe. 3:1, 2) Ali e nu mǐ sixú gbéjé lěe mǐ ɖe gbɔn ɖo gbigbɔ lixo é kpɔ́n ɖe é ɖokpó wɛ nyí ɖɔ mǐ ná jlɛ́ akpakpa e nɔ sɔ́ mǐ din dó mawusinsɛn wú é dó akpakpa e ko nɔ sɔ́ mǐ d’é wú ɖ’ayǐ é wú. (Nǔɖe. 2:4, 5) Mǐ sixú kan nǔ élɔ́ lɛ́ byɔ́ mǐɖée: ‘Akpakpa e nɔ sɔ́ mì dó Biblu xixa kpó tamɛ linlin d’é jí kpó wú é ka ɖe kpo wɛ a? Nǔ e un nɔ sɔ́ nú kplé lɛ́ é kpó lěe un nɔ yi kplé lɛ́ gbɔn é kpó ka wá húzú vlafonú wɛ a? Akpakpa e nɔ sɔ́ mì dó sinsɛnzɔ́ ɔ wú é ka ɖe kpo wɛ a? Gbɛɖuɖu alǒ nǔɖókan lɛ́ wɛ nɔ ɖu hwenu ce hú gǎn a, alǒ yě jí wɛ un nɔ lin tamɛ dó hú gǎn a?’ Ényí xósin nǔkanbyɔ́ énɛ́ lɛ́ tɔn lɛ́ ɖě nyí ɛɛn hǔn, é sixú ko nyí gǎnmaɖó ɖé ɖe xlɛ́ wɛ énɛ́ ɖe, bɔ ényí è ma yá wǔ ɖe afɔ ǎ ɔ, é sixú wá nylá d’é jí. Ényí mǐ ma kpé wú bo ɖe ɖɛ gǎnmaɖó ɔ mǐɖésúnɔ ǎ, alǒ ényí é ko zɔ́n bɔ mǐ t’afɔ nǔgbódodó Mawu tɔn lɛ́ jí ɔ, mǐ ɖó ná byɔ́ alɔdó mɛxó agun tɔn lɛ́ tɔn.

6. Étɛ́ mɛ ɖěɖěe hu hwɛ syɛ́nsyɛ́n lɛ́ é ka ɖó ná wa?

⁶ É ɖo wɛn ɖɔ, mɛ ɖěɖěe hu hwɛ syɛ́nsyɛ́n e sixú zɔ́n bɔ è ná ɖe mɛɖé sín agun mɛ lɛ́ é ɖé é ɖó ná yi mɔ mɛxó lɛ́. (1 Kɔ. 5:11-13) Mɛ ɖěbǔ e hu hwɛ syɛ́nsyɛ́n ɖé é ɖó hudó alɔdó tɔn bá dó bló bónú xɔ́ntɔn e é zun xá Jexóva é ná lɛ́ jɛ ganjí. Bo ná dó ɖu hwɛ e Jexóva nɔ sɔ́ kɛ mɛ gbɔn gbɛxixɔ ɔ gblamɛ é sín le ɔ, mǐ ɖó ná nɔ wa “nǔ e jɛxá hwɛvɛ́númɛ lɛ́ é.” (Mɛ. 26:20) Mɛxó lɛ́ gɔ́n yiyi hwenu e mǐ hu hwɛ syɛ́nsyɛ́n ɖé é ɖo nǔ énɛ́ lɛ́ mɛ.

7. Mɛ ɖěvo tɛ́ lɛ́ ka ɖó hudó alɔdó mɛxó lɛ́ tɔn tɔn?

⁷ Ényí mɛ ɖěɖěe hu hwɛ syɛ́nsyɛ́n lɛ́ é kɛ́ɖɛ́ wɛ mɛxó lɛ́ nɔ d’alɔ ǎ, loɔ, yě nɔ lɛ́ d’alɔ mɛ ɖěɖěe ba gǎn kpo ɖo gbigbɔ lixo lɛ́ é. (Mɛ. 20:35) Ði kpɔ́ndéwú ɔ, xɛsi sixú jɛ ɖiɖi we jí ɖɔ a kún sɔ́ ɖo kpíkpé wú bo ɖu ɖo xwi e ɖí xá jlǒ nyanya lɛ́ wɛ a ɖe é jí wɛ ó. Gǎn e dó wɛ a ɖe é sixú vɛ́ wǔ tawun, ényí jɛ nukɔn nú hwenu e a kplɔ́n nǔgbó ɔ é ɔ, a ko nyí kannumɔ nú azɔ, fɔtóo nǔblíblíwiwa tɔn kpínkpɔ́n, alǒ gbɛ blíblí zínzán ɔ nɛ́. É byɔ́ ɖɔ a ní ɖí xwi xá tagba énɛ́ lɛ́ hwiɖóɖó ǎ. A hɛn ɔ, a ná wá gbeta ɔ kɔn bo ná ɖɔ xó xá mɛxó ɖé; é ná ɖótó nǔ e ɖo ayi mɛ ɖu nú we wɛ lɛ́ é, ɖe wě tawun tawun lɛ́ xá we, bo lɛ́ ná gǎnjɛwú we ɖɔ nǔ towe hɛn ɔ, é ná nyɔ́ Jexóva nukúnmɛ, ényí hwi ma wa nǔ sɔgbe xá jlǒ nyanya lɛ́ ǎ ɔ nɛ́. (Nǔt. 4:12) Ényí awakanmɛ kú we dó gǎn e dó wɛ a ɖe é wú ɔ, mɛxó lɛ́ sixú flín we ɖɔ énɛ́ sixú ko ɖo xlɛ́xlɛ́ wɛ ɖɔ hwi kún ɖo xɔ́ntɔn e hwi zun xá Jexóva é dó d’ayihún wɛ ɖěbǔ ó, bo lɛ́ ɖo alɔ nyi nú jiɖe ɖíɖó dó mɛɖée wú zɛ xwé wú wɛ.—1 Kɔ. 10:12.

8. Hwɛhuhu alɔkpa tɛ́ lɛ́ é ma ka byɔ́ ɖɔ mǐ ní yi mɔ mɛxó agun tɔn lɛ́ ná ǎ?

⁸ É byɔ́ ɖɔ mǐ ní yi mɔ mɛxó lɛ́ dó nǔ e sixú ko hɛn hǔn nú mǐ ɖo lěe mǐ ɖe gbɔn ɖo gbigbɔ lixo lɛ́ é bǐ wú ǎ. Ði kpɔ́ndéwú ɔ, mǐ ní ɖɔ ɖɔ a ɖɔ nǔɖé b’ɛ dó xomɛsin nú nɔví súnnu ɖé alǒ nɔví nyɔ̌nu ɖé, bóyá a tlɛ kpé wú bo ɖu ɖo lěe nǔ cí nú we é jí ǎ. É byɔ́ ɖɔ a ní mɔ mɛxó agun tɔn ɖé ǎ, é nyɔ́ wa ɔ, a hɛn ɔ, a ná xwedó wěɖexámɛ Jezu tɔn e ɖɔ ɖɔ a ní xo fífá kan xá nɔví súnnu alǒ nɔví nyɔ̌nu towe é é. (Mat. 5:23, 24) A hɛn ɔ, a ná ba do nú nǔ dó xomɛfífá, suúlu kpó mɛɖéejíɖuɖe kpó jí, énɛ́ ɔ, a hɛn ɔ, a ná ɖe jijɔ ɖagbe énɛ́ lɛ́ xlɛ́ hú gǎn hweɖévonu. É ɖo wɛn ɖɔ, ényí a ma kpé wú bo ɖe ɖɛ tagba ɔ ǎ ɔ, a hɛn ɔ a ná ba alɔdó mɛxó agun tɔn ɖé tɔn. Ðo wěma e mɛsɛ́dó Pɔ́lu sɛ́ dó Filípunu lɛ́ é mɛ ɔ, é byɔ́ nɔví súnnu e è ma tuun nyǐkɔ tɔn ǎ é ɖé ɖɔ é ní d’alɔ Enísi kpó Sɛntíci kpó bónú yě ní ɖe ɖɛ gbemanɔkpɔ́ yětɔn lɛ́. Mɛxó agun tɔn e ɖo agun towe mɛ é ɖé hɛn ɔ, é ná d’alɔ hwi lɔ bɔ hwi lɔ ná wa nǔ ɖokpó ɔ.—Filí. 4:2, 3.

ÉTƐ́WÚ MǏ KA ÐÓ NÁ YLƆ́ MƐXÓ AGUN TƆN LƐ́?

9. Étɛ́wú mǐ ma ka ɖó ná lɔn bónú winnyá ná gbo kpo nyi ali jí nú mǐ bónú mǐ ná gɔn mɛxó lɛ́ ylɔ́ ǎ? (Nǔnywɛ́xó 28:13)

⁹ Mǐ ɖó hudó nǔɖiɖi kpó akɔ́nkpinkpan kpó tɔn cóbá byɔ́ alɔdó hwenu e mǐ hu hwɛ syɛ́nsyɛ́n ɖé, alǒ hwenu e mǐ mɔ ɖɔ xwi e ɖi xá gǎnmaɖó mǐɖésúnɔ tɔn ɖé wɛ mǐ ɖe é kún ɖo mǐ kpa wɛ ó é. Mǐ ɖó ná lɔn bónú winnyá ná zɔ́n bónú mǐ ná gɔn mɛxó lɛ́ ylɔ́ ǎ. Aniwú? Mǐ nɔ ɖe xlɛ́ ɖɔ mǐ ɖeji dó Jexóva wú, bo lɛ́ ɖeji dó wě e é nɔ ɖe xá mǐ bónú mǐ ná ɖo ganjí bo lɛ́ lí dǒ ɖo nǔɖiɖi mɛ lɛ́ é wú gbɔn tuto e é ɖ’ayǐ é xwixwedó gblamɛ. Ényí mǐ ɖo ayǐ ná jɛ wɛ ɔ, mǐ nɔ tuun ɖɔ mǐ ɖó hudó alɔdó tɔn tɔn. (Ðɛh. 94:18) Gɔ́ ná ɔ, ényí mǐ ko hu hwɛ wɛ ɔ, mǐ ná ɖu nǔbláwǔkúnúmɛ Mawu tɔn sín le hwenu e mǐ ɖɔ hwɛ mǐtɔn bo lɛ́ kɔ sín gúdo é.—Xa Nǔnywɛ́xó 28:13.

10. Ényí mǐ nɔ ɖo tíntɛ́nkpɔ́n wɛ bá hwlá hwɛ mǐtɔn lɛ́ ɔ, étɛ́ ka sixú jɛ?

¹⁰ Xó ɖiɖɔ xá mɛxó ɖé hwenu e mǐ ɖó hudó alɔdó tɔn é nɔ hɛn le gěgé wá, amɔ̌, ényí mǐ tɛ́n kpɔ́n bá hwlá hwɛ e mǐ hu lɛ́ é ɔ, ninɔmɛ ɔ sixú vántán d’é jí. Hwenu e axɔ́sú Davídi tɛ́n kpɔ́n bá hwlá hwɛ tɔn lɛ́ é ɔ, é se wǔvɛ́ ɖo gbigbɔ kpó lěe nǔ nɔ cí nú mɛ é kpó lixo, bo tlɛ lɛ́ se wǔvɛ́ ɖo agbaza lixo. (Ðɛh. 32:3-5) Azɔn e jɛ wɛ è ɖe ɖo agbaza lixo, alǒ akpa e è jɛ dó wǔ é ɖé ɖɔhun ɔ, hwɛhwɛ ɔ, tagba e mɛ mǐ ɖe ɖo gbigbɔ lixo é nɔ nylá d’é jí, ényí mǐ ma kpé nukún d’é wú ganjí ǎ ɔ nɛ́. Jexóva tuun énɛ́, énɛ́ wú ɔ, é byɔ́ mǐ ɖɔ mǐ ní wá bónú mǐ kpó émí kpó “ná ɖe ɖɛ nǔ lɛ́ ɖo mǐɖée lɛ́ tɛ́ntin” gbɔn tuto e é zé ɖ’ayǐ bónú azɔn ná gbɔ nú mǐ ɖo gbigbɔ lixo é gblamɛ.—Eza. 1:5, 6, 18.

11. Ényí mǐ nɔ hwlá hwɛ syɛ́nsyɛ́n e mǐ hu lɛ́ é ɔ, nɛ̌ é ka sixú wa nǔ dó mɛ ɖěvo lɛ́ wú gbɔn?

¹¹ Ényí mǐ hwlá hwɛhuhu syɛ́nsyɛ́n ɖé ɔ, mǐ sixú wa nǔ dó mɛ ɖěvo lɛ́ wú. Mǐ sixú sú ali dó gbigbɔ Mawu tɔn b’ɛ sɔ́ ná wa azɔ̌ dó agun ɔ jí ǎ, bɔ mǐ sixú lɛ́ d’avaja fífá e ɖo nɔví lɛ́ tɛ́ntin é mɛ. (Efɛ́. 4:30) Ðo ali ɖokpó ɔ nu ɔ, ényí mǐ se ɖɔ mɛ e ɖo agun ɔ mɛ é ɖé hu hwɛ syɛ́nsyɛ́n ɖé ɔ, mǐ ɖó ná byɔ́ ɛ ɖɔ é ní yi ɖɔ xó ɔ nú mɛxó lɛ́.a Ényí mǐ hwlá hwɛ syɛ́nsyɛ́n e mɛ ɖěvo hu é ɔ, mǐ lɔ ná húzú hwɛhutɔ́. (Lev. 5:1) Wǎn e mǐ yí nú Jexóva é ɖó ná sísɛ́ mǐ bɔ mǐ ná yi ɖɔ nǔgbó ɔ. Mɔ̌ mɛ ɔ, mǐ ná d’alɔ bɔ agun ɔ ná nɔ mǐmɛ́ jí, bo lɛ́ d’alɔ bɔ mɛ mɔ̌hun e ko zɛ gbě lɛ́ é ná lɛ́ wá zun xɔ́ntɔn vívɛ́ xá Jexóva.

NƐ̌ MƐXÓ AGUN TƆN LƐ́ KA NƆ D’ALƆ MǏ GBƆN?

12. Nɛ̌ mɛxó agun tɔn lɛ́ ka nɔ d’alɔ mɛ ɖěɖěe ba gǎn kpo ɖo gbigbɔ lixo lɛ́ é gbɔn?

¹² È ko kplɔ́n azɔ̌ mɛxó lɛ́ bɔ yě ná nɔ gǔdo nú mɛ ɖěɖěe ba gǎn kpo ɖo gbigbɔ lixo lɛ́ é. (1 Tɛ. 5:14) Ényí a ko zɛ gbě wɛ ɔ, yě hɛn ɔ, yě ná hɛn ayi dó kan nǔɖé lɛ́ byɔ́ dó “dɔn” nǔ e ɖo ayi towe mɛ lɛ́ é “tɔ́n,” bo lɛ́ mɔ nǔ jɛ lěe nǔ cí nú we é wú. (Nǔx. 20:5) A sixú d’alɔ yě gbɔn xó ɖiɖɔ nyi wɛn gblamɛ, ényí énɛ́ ná bo tlɛ vɛ́ wǔ nú we ɖó xá e mɛ a su ɖe é, mɛ alɔkpa e a nyí é, alǒ vo e a ma vo ǎ ɖó nǔ e ɖí xwi xá wɛ a ɖe é wú wútu ɔ nɛ́. Ma ɖi xɛsi ɖɔ xó towe lɛ́ sixú cí “nǔwláɖɔ” ɖɔhun ó. (Jɔb. 6:3) Mɛxó lɛ́ ná nɔ kplakpla jí dó wá gbeta ɖé kɔn ǎ, é nyɔ́ wa ɔ, yě ná ɖótó we kpó sɔxwixwe kpó bo mɔ nǔ jɛ nǔ lɛ́ bǐ wú hwɛ̌ cóbó ɖe wě xá we. (Nǔx. 18:13) Yě tuun ɖɔ nukúnkpíkpé dó lɛ̌ngbɔ́kpó ɔ wú nɔ byɔ́ hwenu, énɛ́ wú ɔ, yě nɔ ɖó nukún ɖɔ émí ná ɖe ɖɛ tagba syɛ́nsyɛ́n lɛ́ ɖo ayǐjínjɔ́n ɖokpó domɛ ǎ.

13. Nɛ̌ mɛxó agun tɔn lɛ́ ka sixú d’alɔ mǐ gbɔn ɖɛ yětɔn lɛ́ kpó wěɖexámɛ e jínjɔ́n Biblu jí lɛ́ é kpó gblamɛ gbɔn? (Kpɔ́n ɖiɖe lɛ́ lɔmɔ̌.)

¹³ Ényí a ylɔ́ mɛxó lɛ́ ɔ, yě ná bló bónú hwɛ e dó hwiɖée wɛ a ɖe é ná lɛ́ jɛjí ǎ. É nyɔ́ wa ɔ, yě ná xo ɖɛ xá we. É sixú kpácá we ɖɔ ɖɛ yětɔn lɛ́ “w’azɔ̌ tawun.” ‘Ami e yě ná kɔn dó ta nú we ɖo nyǐkɔ Jexóva tɔn mɛ’ é lɔ ɖo alɔ e yě ná dó we é mɛ. (Ja. 5:14-16) Nǔgbó e ɖo Biblu mɛ é dó gesí wɛ “ami” énɛ́ ɖe. Gbɔn Biblu e mɛxó lɛ́ ná zán kpó azɔ̌ tuuntuun kpó é gblamɛ ɔ, yě sixú xo hwihwɛ́ we bo lɛ́ dó gbɔ nú we, lobo d’alɔ we bɔ hwi kpó Jexóva kpó ná lɛ́ wá vɛ́. (Eza. 57:18) Wěɖexámɛ yětɔn sixú ná hlɔ̌nhlɔ́n nǔ e sɔgbe e wiwa sín jlǒ e a ɖó é. A sixú se gbe Jexóva tɔn gbɔn yě jí b’ɛ ná ɖɔ nú we ɖɔ: ‘Ali ɔ ɖíe. Ði zɔnlin gbɔn jí.’—Eza. 30:21.

14. Sɔgbe xá Galátinu lɛ́ 6:1 ɔ, nɛ̌ mɛxó agun tɔn lɛ́ ka nɔ d’alɔ mɛ ɖěbǔ e ɖe “afɔ nyi do” é gbɔn? (Kpɔ́n ɖiɖe lɛ́ lɔmɔ̌.)

¹⁴ Xa Galátinu lɛ́ 6:1. Klisánwun e “ɖe afɔ nyi do” é ɖo gbɛ zán wɛ sɔgbe xá jlǒ Mawu tɔn ǎ. É sixú nyí ɖɔ é wá gbeta e nǔnywɛ́ ma kpé ǎ é ɖé kɔn alǒ hu hwɛ syɛ́nsyɛ́n ɖé. Wǎnyíyí nɔ sísɛ́ mɛxó lɛ́ bɔ yě nɔ “tɛ́n kpɔ́n bo lɛ́ kɔ nú mɛ mɔ̌hun wá ali jlɔ́jlɔ́ ɔ jí kpó xomɛfífá kpó.” Xókwín Glɛ̌kigbe tɔn e è tínmɛ dó “lɛ́ kɔ nú . . . wá ali jlɔ́jlɔ́ ɔ jí” é sixú dó gesí xú e sɛ bɔ è lɛ́ sɛ ɖó tɛn tɔn mɛ bónú mɛ ɔ ní ma ɖó blɔ̌ káká sɔ́yi ó é. Lěe dotóo alɔsekpɛ́nnánɔ ɖé nɔ kpé xú e wɛ́n é ɖé ma dó wǔvɛ́ káká ɖé nú mɛ gbɔn é ɔ, mɛxó lɛ́ nɔ sɔ́ ayi ɖó azɔn gbigbɔ nú mǐ ɖo gbigbɔ lixo ma dó wǔvɛ́ wǔvɛ́ jí nú mǐ jí. È lɛ́ kplɔ́n azɔ̌ yě bónú yě ná “nɔ acéjí.” Ényí mɛxó lɛ́ ɖo alɔ dó mǐ wɛ bónú afɔ mǐtɔn lɛ́ ná xwe ali ɔ, yě nɔ tuun ɖɔ hwɛhutɔ́ wɛ émí lɔmɔ̌ nyí bo nɔ wa nǔ nyi do. Yě nɔ ɖe xlɛ́ ɖɔ émí hú gǎn mɛ ɖěvo lɛ́, émí jɛ́n nyí nǔjlɔ́jlɔ́watɔ́, alǒ nɔ ɖó hwɛ nú mɛ ɖěvo lɛ́ ɖěbǔ lɔ ǎ, é nyɔ́ wa ɔ, yě nɔ se wǔvɛ́ xá mɛ.—1 Pi. 3:8.

15. Ényí mǐ ɖo tagba ɖé mɛ ɔ, étɛ́ mǐ ka sixú wa?

¹⁵ Mǐ hɛn ɔ, mǐ ná ɖeji dó mɛxó lɛ́ wú. È ko kplɔ́n azɔ̌ yě bónú yě ná hɛn kpáxó mǐtɔn lɛ́, sɔ́ wěɖexámɛ yětɔn lɛ́ júnjɔ́n Biblu jí b’ɛ nɔ nyí dó linlin yěɖésúnɔ tɔn lɛ́ jí ǎ, bo ná lɛ́ ɖo alɔ dó mǐ wɛ bónú mǐ ná hɛn wǔvɛ́gban mǐtɔn lɛ́. (Nǔx. 11:13; Ga. 6:2) Jijɔ yětɔn lɛ́ kpó nǔ e yě mɔ kpɔ́n lɛ́ é kpó gbɔn vovo, amɔ̌, mǐ hɛn ɔ, mǐ ná sɛkpɔ́ mɛxó ɖěbǔ ɖó tagba ɖé wú. É ɖo wɛn ɖɔ, mǐ kún ná nɔ gosín mɛxó ɖě jí jɛ ɖěvo jí bo ná nɔ ɖo wěɖexámɛ ba wɛ kpó linlin ɔ kpó ɖɔ yě mɛ ɖě ná ɖɔ nǔ e ba ná se wɛ mǐ ɖe é nú mǐ ó. Ényí mǐ nɔ wa mɔ̌ ɔ, mǐ ná cí mɛ ɖěɖěe nɔ ba ɖɔ è ní “ɖɔ xó víví dó tó mɛ” nú émí b’ɛ ma nyí “nǔkplɔ́nmɛ ɖagbe” Xó Mawu tɔn tɔn ba ná kplɔ́n wɛ yě ɖe ǎ lɛ́ é ɖɔhun. (2 Tim. 4:3) Ényí mǐ hɛn xó ɖé yi mɛxó ɖé gɔ́n ɔ, é sixú kanbyɔ́ mǐ ɖɔ mǐ ka ko ɖɔ xó d’é wú xá mɛxó ɖěvo lɛ́ wɛ a jí, bo lɛ́ kan wě e yě ɖe xá mǐ lɛ́ é byɔ́. Jlɛ̌jíninɔ sixú lɛ́ sísɛ́ ɛ b’ɛ ná ba wěɖexámɛ ɖo mɛxó ɖěvo gɔ́n.—Nǔx. 13:10.

AZƆ̌ E MǏÐÉSÚNƆ ÐÓ NÁ WA É

16. Azɔ̌ tɛ́ mǐ ka ɖó?

¹⁶ Ðó lɛ̌ngbɔ́ Mawu tɔn lɛ́ wɛ mǐ nyí wútu ɔ, mɛxó lɛ́ nɔ nya xɛ ɖo mǐ jí, amɔ̌, yě nɔ ɖɔ nǔ e mǐ ɖó ná wa é nú mǐ ǎ. Mǐɖésúnɔ wɛ ná wá gbeta ɔ kɔn bo zán gbɛ sɔgbe xá zě e mǐ zé mǐɖée jó nú Mawu é. Mǐ ɖó ná ɖó nǔ e mǐ ɖɔ lɛ́ é kpó nǔ e mǐ wa lɛ́ é kpó sín gbe nú Mawu. Kpó alɔdó tɔn kpó ɔ, mǐ hɛn ɔ, mǐ ná dɛ ɖo mɛtɛ́nkpɔ́n mǐtɔn lɛ́ nu. (Hlɔ̌. 14:12) Énɛ́ wú ɔ, mɛxó lɛ́ nɔ ɖɔ lěe mǐ ɖó ná wa nǔ gbɔn é nú mǐ ǎ, é nyɔ́ wa ɔ, yě nɔ dɔn ayi mǐtɔn yi linlin Mawu tɔn jí. Gbɔn wěɖexámɛ yětɔn e jínjɔ́n Biblu jí lɛ́ é xwixwedó gblamɛ ɔ, mǐ ná kplɔ́n azɔ̌ “nǔwúkpíkpé nukúnnúmɔjɛnǔmɛ tɔn” mǐtɔn bɔ nǔnywɛ́ ná kpé gbeta mǐtɔn lɛ́.—Ebl. 5:14.

17. Étɛ́ jí mǐ ka ɖó ná kú dó?

¹⁷ Wǔjɔmɛ bǔnɔ ɖé wɛ mǐ ɖó bo nyí lɛ̌ngbɔ́ Jexóva tɔn lɛ́! Jexóva sɛ́ Jezu e nyí “lɛ̌ngbɔ́nyitɔ́ ɖagbe” ɔ é dó b’ɛ wá xɔ gbɛ nú mǐ, bɔ gbɛ ninɔ káká sɔ́yi sín ali sixú hun nú mǐ. (Jaan 10:11) Jexóva gbɔn mɛxó lɛ́ sín yɛkan mɛ bo ɖe akpá élɔ́: “Un ná ná mi lɛ̌ngbɔ́nyitɔ́ e nɔ wa nǔ e jló mì lɛ́. Yě ná nɔ mi nu kpó nǔnywɛ́ kpó.” (Jel. 3:15) Ényí gǎn vɔ ɖo mǐ wú, alǒ ényí mǐ ɖo azɔn jɛ wɛ ɖo gbigbɔ lixo ɔ, mǐ ɖó ná xo nǔ kpɔ́n cóbó ylɔ́ mɛxó lɛ́ nú alɔdó ǎ. Mi nú mǐ ní kán ɖ’é jí bá ɖu le tuto mɛxó lɛ́ tɔn e Jexóva bló é tɔn bǐ mlɛ́mlɛ́.