Nɛ̌ do nyǐkɔ Jexóva tɔn ka ɖo tají nú Jezu sɔ?

1-2. (a) Étɛ́ Jezu ka wa ɖo zǎn e jɛ nukɔn nú kú tɔn é mɛ? (b) Nǔkanbyɔ́ tɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

JEUDI 14 Nisáan xwe 33 H.M. tɔn sín zǎn xóxó mɛ wɛ; è ná sa Jezu, ɖɔ hwɛ xá ɛ, ɖó hwɛ n’i, dó ya n’i, bo lɛ́ hu i ɖo malínmálín mɛ. Nǔɖuɖu bǔnɔ ɖé wɛ é ɖu xá mɛsɛ́dó tɔn gbejínɔtɔ́ lɛ́ fó kɛ́ɖɛ́ ɖo xɔ aga tɔn ɖé mɛ. Ðo nǔɖuɖu ɔ gúdo ɔ, Jezu ɖɔ xó gǔdo tɔn e dó wǔsyɛ́n lanmɛ nú mɛ é ɖé lɛ́ nú mɛsɛ́dó tɔn lɛ́. Cóbónú yě bǐ ná gosín xɔ aga tɔn énɛ́ mɛ ɔ, Jezu nɔ te bo xo ɖɛ agbɔ̌nnɔ ɖé. Mɛsɛ́dó Jaan wlán ɖɛ énɛ́ ɖ’ayǐ, bɔ é ɖo Jaan wěmata 17 mɛ.

² Étɛ́ ɖɛ e Jezu xo é ka ɖe xlɛ́ mǐ dó nǔ e ɖo ayi mɛ ɖu n’i wɛ ɖo hwe énɛ́ nu é wú? Nɛ̌ ɖɛ énɛ́ ka xlɛ́ nǔ e ɖo tají n’i ɖo sinsɛnzɔ́ tɔn ayǐkúngban jí tɔn ɔ bǐ hwenu é gbɔn? Mi nú mǐ ní ɖɔ xó dó xósin nǔkanbyɔ́ énɛ́ lɛ́ tɔn jí.

“UN BLÓ BƆ YĚ TUUN NYǏKƆ TOWE”

3. Étɛ́ Jezu ka ɖɔ dó nyǐkɔ Jexóva tɔn wú? Étɛ́ ɖɔ wɛ é ka ɖe? (Jaan 17:6, 26)

³ Ðo ɖɛ e Jezu xo é mɛ ɔ, é ɖɔ: “Un bló bɔ yě tuun nyǐkɔ towe.” Nǔgbó ɔ, azɔn we wɛ é ɖɔ ɖɔ émí bló bɔ ahwanvú émítɔn lɛ́ tuun nyǐkɔ Jexóva tɔn. (Xa Jaan 17:6, 26.) Étɛ́ ɖɔ gbé é ka ja? Nyǐkɔ e yě ma tuun ɖ’ayǐ ǎ é ɖé wɛ é ɖe xlɛ́ yě a? Jwifu wɛ ahwanvú Jezu tɔn lɛ́ nyí, énɛ́ wú ɔ, yě ko tuun nyǐkɔ Mawu tɔn Jexóva ɔ. Nyǐkɔ énɛ́ tɔ́n azɔn afatɔ́n donu mɔ̌kpán ɖo nǔwlánwlán mímɛ́ Ebléegbe tɔn lɛ́ mɛ. Énɛ́ wú ɔ, ɖiɖɔ wɛ Jezu ɖe ɖɔ émí ɖe nyǐkɔ Mawu tɔn ɖésúnɔ xlɛ́ yě ǎ, é nyɔ́ wa ɔ, ɖiɖɔ wɛ é ɖe ɖɔ émí kplɔ́n nǔ yě dó Mawu alɔkpa e Jexóva nyí é wú. Jezu ɖe mɛ alɔkpa e Jexóva nyí é xlɛ́ ahwanvú tɔn lɛ́ ɖo ali e nu mɛɖé ma sixú wa mɔ̌ ɖe gbeɖé ǎ é; linlin Jexóva tɔn lɛ́, azɔ̌ tɔn lɛ́ kpó jijɔ tɔn lɛ́ kpó ɖo nǔ e é ɖe xlɛ́ yě lɛ́ é mɛ.

4-5. (a) Nɛ̌ nyǐkɔ mɛɖé tɔn ka sixú wá xɔ akwɛ́ nú mǐ hú gǎn gbɔn? Jlɛ̌ dó nǔɖé wú. (b) Ali tɛ́ nu ahwanvú Jezu tɔn lɛ́ ka wá tuun nyǐkɔ Jexóva tɔn ɖe?

⁴ Mǐ ní ɖɔ ɖɔ mɛxó agun tɔn towe lɛ́ ɖokpó nɔ nyí David bo nyí dotóo mɛzɛtɔ́. A tuun nɔví énɛ́ din é ɔ, xwe ko jɛ. Amɔ̌, gbe ɖokpó wá su bɔ gbɛ towe ɖo axɔ́ nu bɔ a ɖó hudó dotóo tɔn bónú é ná d’alɔ we. A yi dotóoxwé e nɔví énɛ́ nɔ w’azɔ̌ ɖe é bɔ é hwlɛ́n gbɛ towe gán. Din ɔ, a yí wǎn nú nɔví énɛ́ hú ɖ’ayǐ tɔn, bɔ ényí a se nyǐkɔ tɔn ɔ, a nɔ flín nǔ e é wa nú we é. David sɔ́ nyí mɛxó agun tɔn e a tuun ɖ’ayǐ é kpowun ǎ, é lɛ́ nyí dotóo mɛzɛtɔ́ e hwlɛ́n gbɛ towe é.

⁵ Ðo ali ɖokpó ɔ nu ɔ, ahwanvú Jezu tɔn lɛ́ ko tuun nyǐkɔ Jexóva tɔn ɖ’ayǐ. Amɔ̌, nyǐkɔ énɛ́ wá xɔ akwɛ́ nú yě hú gǎn, ɖó Jezu d’alɔ yě bɔ yě tuun Jexóva d’é jí. Étɛ́wú mǐ ka sixú ɖɔ mɔ̌? Ðó Jezu nɔ wa nǔ Tɔ́ tɔn ɖɔhun ɖo nǔ e é nɔ ɖɔ lɛ́ é kpó nǔ e é nɔ wa lɛ́ é kpó bǐ mɛ. Énɛ́ wú ɔ, ée mɛsɛ́dó Jezu tɔn lɛ́ nɔ ɖo lěe Jezu nɔ kplɔ́n nǔ mɛ gbɔn é mɔ wɛ, bo nɔ ɖo lěe é nɔ wa nǔ xá mɛ ɖěvo lɛ́ gbɔn é kpɔ́n wɛ é ɔ, yě wá “tuun” Jexóva hú gǎn.—Jaan 14:9; 17:3.

“NYǏKƆ TOWE E A NÁ MÌ É”

6. Étɛ́ ɖɔ wɛ Jezu ka ɖe bo ɖɔ Jexóva ná nyǐkɔ tɔn émí? (Jaan 17:11, 12)

⁶ Ðo ɖɛ e Jezu xo é mɛ ɔ, é xo ɖɛ dó ahwanvú tɔn lɛ́ tamɛ bo ɖɔ: “Kpɔ́n dó nyǐkɔ towe e a ná mì é wú, bo kpɔ́n yě jí.” (Xa Jaan 17:11, 12.) Xlɛ́xlɛ́ wɛ énɛ́ ɖe ɖɔ è ná nɔ ylɔ́ Jezu ɖɔ Jexóva din a? Éǒ. Hwenu e Jezu ɖɔ xó dó nyǐkɔ Jexóva tɔn wú é ɔ, é ɖɔ “nyǐkɔ towe.” Énɛ́ wú ɔ, Jexóva sín nyǐkɔ wá húzú Jezu sín nyǐkɔ ǎ. Bɔ étɛ́ ɖɔ gbé Jezu ka ja lo, hwenu e é ɖɔ è ná nyǐkɔ Mawu tɔn émí é? Jɛ nukɔn hwɛ̌ ɔ, afɔsɔ́ɖótetɔ́ Jexóva tɔn wɛ Jezu nyí, bo lɛ́ nyí Ðɛ̌mɛnu tɔn. Tɔ́ tɔn nyíkɔ mɛ wɛ é wá dó, bo bló nǔjíwǔ lɛ́ ɖo nyǐkɔ énɛ́ mɛ. (Jaan 5:43; 10:25) Gɔ́ ná ɔ, nyǐkɔ Jezu ɔ sín tínmɛ wɛ nyí “Jexóva nyí hwlɛngán.” Hǔn, Jexóva sín nyǐkɔ mɛ wɛ è ɖe Jezu sín nyǐkɔ sín.

7. Étɛ́wú Jezu ka hɛn ɔ é ná ɖɔ xó ɖo nyǐkɔ Jexóva tɔn mɛ? Jlɛ̌ dó nǔɖé wú.

⁷ Nǔjlɛ́dónǔwú ɖé ɖíe: Afɔsɔ́ɖótetɔ́ ɖé nɔ sɔ́ afɔ gǎn ɖé tɔn ɖó te, hǔn, é hɛn ɔ, é ná ɖɔ xó ɖo gǎn ɔ nyíkɔ mɛ. Énɛ́ wú ɔ, agbɔ̌n e xó gǎn ɔ tɔn lɛ́ ɖó é wɛ afɔsɔ́ɖótetɔ́ ɔ tɔn lɛ́ lɔ nɔ ɖó. Ðo ali ɖokpó ɔ nu ɔ, Jezu sɔ́ afɔ Jexóva tɔn ɖó te, bo ɖɔ xó nú mɛ lɛ́ ɖo nyǐkɔ Tɔn mɛ.—Mat. 21:9; Luk. 13:35.

8. Étɛ́wú Jexóva ka ɖɔ ɖɔ Jezu w’azɔ̌ ɖo nyǐkɔ émítɔn “mɛ” hwenu e é ma tlɛ ko wá ayǐkúngban jí ǎ é? (Tíntɔ́n 23:20, 21)

⁸ Ðó Jezu nyí Xó ɔ wútu ɔ, é nyí Ðɛ̌mɛnu Jexóva tɔn bo nɔ dó wɛn Mawu tɔn vǐ gbigbɔ tɔn Mawu tɔn ɖě lɛ́ kpó gbɛtɔ́ lɛ́ kpó, bo nɔ lɛ́ ɖɔ wěɖexámɛ tɔn lɛ́ nú yě. (Jaan 1:1-3) É cí ɖɔ Jezu wɛ nyí wɛnsagun e Jexóva sɛ́ dó bɔ é kpé nukún dó Izlayɛ́li ví lɛ́ wú hwenu e yě ɖo gbětótló mɛ é ɖɔhun. Hwenu e Jexóva ɖo ɖiɖɔ nú Izlayɛ́li ví lɛ́ wɛ ɖɔ yě ní se tónú nú wɛnsagun énɛ́ é ɔ, É ɖɔ: “Ðó nyǐkɔ ce mɛ wa azɔ̌ dó wɛ é ɖe.”a (Xa Tíntɔ́n 23:20, 21.) Nyǐkɔ Jexóva tɔn “mɛ” w’azɔ̌ dó wɛ Jezu ɖe, ɖó é sɔ́ afɔ Jexóva tɔn ɖó te, bo lɛ́ nyí mɛ nukɔntɔn e jɛ hun dó nyǐkɔ Tɔ́ tɔn tɔn jí, lobo klɔ́ cí sín wú é.

“TƆ́, SƆ́ NYǏKƆ TOWE SU”

9. Nɛ̌ do nyǐkɔ Jexóva tɔn ka ɖo tají nú Jezu sɔ? Tínmɛ.

⁹ Lěe mǐ ko ɖɔ gbɔn wá yi é ɔ, cóbónú Jezu ná wá ayǐkúngban jí ɔ, Jexóva sín nyǐkɔ ko ɖo tají tawun n’i. Hwenu e é ɖo ayǐkúngban jí é ɔ, é lɛ́ xlɛ́ ɖo nǔ e é wa lɛ́ é bǐ mɛ ɖɔ nyǐkɔ Jexóva tɔn ɖo tají tawun nú émí. Xweyǐgbe sinsɛnzɔ́ Jezu tɔn sín vivɔnu ɔ, é byɔ́ Jexóva ɖɔ: “Tɔ́, sɔ́ nyǐkɔ towe su.” Bɔ Tɔ́ tɔn sín gbe ɖi sín jǐxwé tɛn tɔn mɛ bo ɖɔ: “Un ko sɔ́ su, bo ka ná lɛ́ sɔ́ su.”—Jaan 12:28.

10-11. (a) Nɛ̌ Jezu ka sɔ́ nyǐkɔ Jexóva tɔn su gbɔn? (Kpɔ́n ɖiɖe ɔ lɔmɔ̌.) (b) Étɛ́wú é ka byɔ́ ɖɔ è ní klɔ́ cí sín nyǐkɔ Jexóva tɔn wú?

¹⁰ Jezu lɔ sɔ́ nyǐkɔ Tɔ́ tɔn tɔn su. Gbɔn nɛ̌ é? Ali e nu é wa mɔ̌ ɖe é ɖokpó wɛ nyí ɖɔ, é ɖe jijɔ ɖagbe Tɔ́ tɔn tɔn lɛ́ xlɛ́, bo lɛ́ ɖɔ nǔjíwǔ e é wa lɛ́ é nú mɛ ɖěvo lɛ́. Amɔ̌, é lɛ́ wa nǔ ɖěvo. È ɖó ná klɔ́ cí sín nyǐkɔ Jexóva tɔn wú. Jezu ɖe lě do énɛ́ ɖo tají sɔ é xlɛ́ hwenu e é kplɔ́n ɖɛ kpɔ́ndéwú tɔn ɔ ahwanvú tɔn lɛ́ é. É ɖɔ: “Tɔ́ mǐtɔn e ɖo jǐxwé é, nyǐkɔ towe ní nyí nǔ mímɛ́.”—Mat. 6:9.

¹¹ Étɛ́wú é ka byɔ́ ɖɔ è ní klɔ́ cí sín nyǐkɔ Jexóva tɔn wú? Ðó ɖo jikpá Edɛ́ni tɔn mɛ ɔ, Satáan Awǒvi kɔn cí dó nyǐkɔ Jexóva Mawu tɔn wú. Satáan ɖɔ ɖɔ Jexóva nyí adingbannɔ bo ɖo nǔ ɖagbe ɖé sɔ́ hwlá dó Adámu kpó Ɛvu kpó wɛ. (Bǐb. 3:1-5) Mɔ̌ mɛ ɔ, Satáan ɖo ɖiɖɔ wɛ ɖɔ lěe Jexóva nɔ wa nǔ lɛ́ gbɔn é kún sɔgbe ó. Hwɛ énɛ́ e Satáan dó Jexóva é ɔ, cí wɛ é nyí bɔ é kɔn dó nyǐkɔ tɔn wú. Nukɔnmɛ ɖo Jɔbu sín hwenu ɔ, Satáan ɖɔ ɖɔ nǔ e mɛ e nɔ sɛn Jexóva lɛ́ é nɔ mɔ ɖo gɔ̌n tɔn é kɛ́ɖɛ́ jɛ́n zɔ́n bɔ yě nɔ sɛn ɛ. Adingban énɛ́ lɛ́vɔ́ ɖo ɖiɖɔ wɛ ɖɔ ényí gbɛtɔ́ lɛ́ ɖo wǔvɛ́ mɔ wɛ ɔ, yě ná jó Jexóva sinsɛn dó ɖó yě kún yí wǎn n’i nǔgbó nǔgbó ɖě ó. (Jɔb. 1:9-11; 2:4) É byɔ́ hwenu cóbɔ è wá tuun mɛ e ɖo adingban ɖó wɛ ɖo Jexóva kpó Satáan kpó tɛ́ntin é.

“UN SƆ́ GBƐ CE JÓ”

12. Étɛ́ Jezu ka ɖo gbesisɔmɛ bo wa ɖó wǎn e é yí nú nyǐkɔ Jexóva tɔn é wú?

¹² Ðó Jezu yí wǎn nú Jexóva wútu ɔ, é ba ná wa nǔ e wú é kpé é bǐ bá klɔ́ cí sín nyǐkɔ Jexóva tɔn wú. Jezu ɖɔ: “Un sɔ́ gbɛ ce jó.” (Jaan 10:17, 18) Ɛɛn, é tlɛ ɖo gbesisɔmɛ bá kú dó nyǐkɔ Jexóva tɔn tamɛ.b Adámu kpó Ɛvu kpó e nyí gbɛtɔ́ maɖóblɔ̌ we nukɔntɔn lɛ́ é dó gǔdo Jexóva, bo nɔ Satáan sín ahwan mɛ. Amɔ̌, Jezu ɖo gbesisɔmɛ bo wá ayǐkúngban jí, bo ɖe wǎn e é yí nú Jexóva é xlɛ́. Jezu wa mɔ̌, gbɔn gbejíninɔ sín gbɛ e é zán é gblamɛ. (Ebl. 4:15; 5:7-10) É nɔ gbejí káká jɛ kú, bo kú wǔvɛ́ kú ɖo yatín ɖé jí. (Ebl. 12:2) Mɔ̌ mɛ ɔ, é ɖe wǎn e é yí nú Jexóva kpó nyǐkɔ tɔn kpó é xlɛ́.

13. Étɛ́wú Jezu wɛ ka nyí mɛ e jɛxá hú gǎn bá ɖe xlɛ́ ɖɔ Satáan wɛ nyí adingbannɔ é? (Kpɔ́n ɖiɖe ɔ lɔmɔ̌.)

¹³ Jezu ɖe xlɛ́ nyi wɛn gbɔn gbɛ e é zán é gblamɛ ɖɔ Satáan wɛ nyí adingbannɔ, é kún nyí Jexóva ó. (Jaan 8:44) Jezu tuun Jexóva ganjí hú mɛ e nɔ gbɛ kpɔ́n é ɖěbǔ. Ényí hwɛ e Satáan dó Jexóva lɛ́ é ɖě ko nyí nǔgbó ɖ’é mɛ wɛ ɔ, Jezu ná ko tuun. Amɔ̌, Jezu jɛ hun dó nyǐkɔ Jexóva tɔn jí majómájó. É ná bo tlɛ nyí hwenu e é cí ɖɔ Jexóva jó Jezu dó ɖɔhun é ɔ, Jezu dó gǔdo Tɔ́ tɔn wǎnyíyínɔ ɔ ǎ, loɔ, é ɖo gbesisɔmɛ bá kú.—Mat. 27:46.c

“UN . . . WA AZƆ̌ E A SƆ́ D’ASÍ NÚ MÌ É YI FÓ”

14. Nɛ̌ Jexóva ka d’ajɔ Jezu ɖó gbejíninɔ tɔn wú gbɔn?

¹⁴ Ðo ɖɛ e Jezu xo ɖo zǎn e jɛ nukɔn nú kú tɔn é mɛ ɔ, é ɖɔ: “Un . . . wa azɔ̌ e a sɔ́ d’así nú mì é yi fó.” É ɖeji ɖɔ Jexóva ná d’ajɔ émí ɖó gbejíninɔ émítɔn wú. (Jaan 17:4, 5) Ji e Jezu ɖe dó Tɔ́ tɔn wú é nyí ali bɔ é bú ǎ. Jexóva lɔn nú é cí yɔdo mɛ ǎ. (Mɛ. 2:23, 24) É fɔ́n Jezu sín kú bo sɔ́ ɛ ɖó tɛn ɖaxó ɖé mɛ ɖo jǐxwé. (Filí. 2:8, 9) Wǎgbɔ tɔn ɔ, Jezu húzú Axɔ́sú nú Axɔ́súɖuto Mawu tɔn. Étɛ́ Axɔ́súɖuto énɛ́ ka ná wa? Ðɛ kpɔ́ndéwú tɔn ɔ sín akpáxwé wegɔ́ ɔ ɖɔ: “Axɔ́súɖuto towe ní wá. Jlǒ towe [Jexóva tɔn] ní nyí wiwa ɖo ayǐkúngban ɔ lɔmɔ̌ jí, lěe é nɔ nyí wiwa ɖo jǐxwé gbɔn é ɖɔhun.”—Mat. 6:10.

15. Nǔ ɖěvo tɛ́ lɛ́ Jezu ka ná wa?

¹⁵ Ðo malínmálín mɛ ɔ, Jezu ná fun ahwan xá kɛntɔ́ Mawu tɔn lɛ́, bo ná sú kún dó nú mɛ nyanya lɛ́ ɖo Aamagedɔ́ni. (Nǔɖe. 16:14, 16; 19:11-16) Énɛ́ gúdo zaan ɔ, é ná sɔ́ Satáan nyi dó “domaɖó-azan ɔ” mɛ, fí e é ma sɔ́ ná sixú wa nǔtí ɖe ǎ é. (Nǔɖe. 20:1-3) Ðo Axɔ́súɖuɖu xwe afatɔ́n tɔn Jezu tɔn hwenu ɔ, é ná bló bɔ gbɛtɔ́ lɛ́ ná ɖó fífá, bo lɛ́ húzú mɛ maɖóblɔ̌. É ná fɔ́n mɛkúkú lɛ́. É ná bló bɔ ayǐkúngban ɔ bǐ ná húzú palaɖísi. Linlin Jexóva tɔn ná jɛnu!—Nǔɖe. 21:1-4.

16. Nɛ̌ gbɛ ka ná cí ɖo Axɔ́súɖuɖu xwe afatɔ́n tɔn ɔ gúdo?

¹⁶ Étɛ́ mǐ ka sixú ɖó nukún ɖo vivɔnu Axɔ́súɖuɖu xwe afatɔ́n tɔn ɔ tɔn? Hwɛhuhu gbɛtɔ́ lɛ́ tɔn kpó gǎnmaɖó yětɔn lɛ́ kpó ná blí bú. É sɔ́ ná byɔ́ ɖɔ gbɛtɔ́ lɛ́ ní gbɔn vɔ̌sísá gbɛxɔnúmɛ tɔn ɔ jí bo byɔ́ hwɛsɔ́kɛ hwɛ e yě hu lɛ́ é tɔn ɖě ǎ; mɔ̌ jɛ́n yě ma sɔ́ ná ɖó hudó hwɛdógbɔtɔ́ ɖé, alǒ vɔ̌sánúxwlémawutɔ́ ɖé tɔn ǎ é nɛ́. Bɔ “kɛntɔ́ gǔdo tɔn” ɔ, “kú” sɔ́ ná tíin ǎ. Yɔdo lɛ́ ná jɛ vɔ̌. È ná ko fɔ́n mɛkúkú lɛ́ nɛ́. Mɛ e ɖo ayǐkúngban ɔ jí lɛ́ é bǐ ná nyí mɛ maɖóblɔ̌.—1 Kɔ. 15:25, 26.

17-18. (a) Étɛ́ ka ná jɛ ɖo vivɔnu Axɔ́súɖuɖu xwe afatɔ́n tɔn ɔ tɔn? (b) Nɛ̌ Jezu ka ná wa nǔ gbɔn hwenu e acɛkpikpa tɔn ná wá vivɔnu é? (1 Kɔlɛ́ntinu lɛ́ 15:24, 28) (Kpɔ́n ɖiɖe ɔ lɔmɔ̌.)

¹⁷ Nǔ ɖěvo tɛ́ ka ná jɛ ɖo vivɔnu Axɔ́súɖuɖu xwe afatɔ́n tɔn ɔ tɔn? Hwenɛ́nu ɔ, nǔ bǔnɔ ɖé ná jɛ. Nǔdindɔn e dɔn cí klɔ́klɔ́ sín nyǐkɔ Jexóva tɔn wú sín xó wá é ná wá vivɔnu. Gbɔn nɛ̌ é? Ðo jikpá Edɛ́ni tɔn mɛ ɔ, Satáan ɖɔ ɖɔ Jexóva nyí adingbannɔ, bo kún nɔ kp’acɛ dó gbɛtɔ́ lɛ́ jí kpó wǎnyíyí kpó ó. Sín hwenɛ́nu ɔ, mɛ e sɛn Jexóva wá yi lɛ́ é ko ɖe xlɛ́ azɔn mɔ̌kpán ɖɔ lěe Jexóva nɔ wa nǔ lɛ́ gbɔn é wɛ nyɔ́. Énɛ́ wú ɔ, ɖo Axɔ́súɖuɖu xwe afatɔ́n tɔn ɔ sín vivɔnu ɔ, è ná klɔ́ cí sín nyǐkɔ Jexóva tɔn wú bǐ mlɛ́mlɛ́. Jexóva ná ko ɖe xlɛ́ nyi wɛn ɖɔ émí nyí Tɔ́ jǐxwé tɔn wǎnyíyínɔ ɖé.

¹⁸ È ná ɖe adingban Satáan tɔn lɛ́ bǐ gba bɔ xó ná fó. Nɛ̌ Jezu ka ná wa nǔ gbɔn hwenu e acɛkpikpa tɔn ná wá vivɔnu é? É ná wa nǔ Satáan ɖɔhun, bo fɔ́n gǔ dó Jexóva jí wɛ a? Gbeɖé kpɔ́n! (Xa 1 Kɔlɛ́ntinu lɛ́ 15:24, 28.) Jezu ná sɔ́ Axɔ́súɖuto ɔ jó nú Tɔ́ tɔn. É ná hwihwɛ́ éɖée dó acɛkpikpa Jexóva tɔn glɔ́. Jezu gbɔn vo nú Satáan, bo ɖo gbesisɔmɛ bá jó nǔ bǐ dó ɖó é yí wǎn nú Jexóva wú.

19. Nɛ̌ do nyǐkɔ Jexóva tɔn ka ɖo tají nú Jezu sɔ?

¹⁹ Yǎyá wú wɛ Jexóva ɖo gbesisɔmɛ bo ná nyǐkɔ tɔn Jezu ǎ! Jezu wa afɔsɔ́ɖótetɔ́ Jexóva tɔn e é nyí é sín azɔ̌ bɔ nǔ bǐ vɔ ɖ’é wú. Hǔn, nɛ̌ do nyǐkɔ Jexóva tɔn ka ɖo tají nú Jezu sɔ? É ɖo tají nú Jezu hú nǔ ɖěvo ɖěbǔ. É ɖo gbesisɔmɛ bo kú ɖó nyǐkɔ énɛ́ wú, bo ná lɛ́ ɖo gbesisɔmɛ bá bɛ́ nǔ lɛ́ bǐ dó alɔ mɛ nú Jexóva ɖo vivɔnu Axɔ́súɖuɖu xwe afatɔ́n tɔn ɔ tɔn. Nɛ̌ mǐ ka sixú wa nǔ Jezu ɖɔhun gbɔn? Mǐ ná ɖɔ xó dó xósin nǔkanbyɔ́ énɛ́ tɔn jí ɖo xóta e bɔ d’é wú é mɛ.