D’alɔ Biblu kplɔ́ntɔ́ towe bónú é ní wá gbeta ɔ kɔn bá sɛn Jexóva

1-2. (a) Étɛ́wú Biblu kplɔ́ntɔ́ ɖé lɛ́ ka nɔ xo nǔ kpɔ́n dó Kúnnuɖetɔ́ Jexóva tɔn nyínyí wú? (b) Étɛ́ mǐ ka ná gbéjé kpɔ́n ɖo xóta élɔ́ mɛ?

ADO ka hu we dó Kúnnuɖetɔ́ Jexóva tɔn nyínyí wú wɛ a? Bóyá xɛsi ɖi we ɖɔ azɔ̌gbɛ́ towe lɛ́, xɔ́ntɔn towe lɛ́ alǒ xwédo towe ná húzú kpan nukɔn we. Alǒ, vlafo a mɔ ɖɔ émí kún ná kpé wú bo zán gbɛ sɔgbe xá nǔgbódodó Mawu tɔn lɛ́ gbeɖé ó. Ényí mɔ̌ wɛ ɔ, a sixú mɔ nǔ jɛ lěe nǔ nɔ cí nú Biblu kplɔ́ntɔ́ ɖěɖěe é cí ɖɔ yě ɖo yonu dɔn dó gǔdo wɛ dó Kúnnuɖetɔ́ Jexóva tɔn nyínyí wú lɛ́ é mɛ.

² Jezu tuun ɖɔ é sixú bɔ wǔ bɔ xɛsi mɔ̌hun lɛ́ ná gbo kpo nyi ali jí nú susu ɖo gbigbɔ lixo. (Mat. 13:20-22) Amɔ̌, é jó gbe dó mɛ ɖěɖěe xo nǔ kpɔ́n dó xwixwedó è wú lɛ́ é wú ǎ. É nyɔ́ wa ɔ, é sɔ́ kpɔ́ndéwú lěe mǐ ná d’alɔ mɛ mɔ̌hun lɛ́ bɔ yě ná wa nǔ élɔ́ lɛ́ gbɔn é tɔn ɖ’ayǐ nú mǐ gbɔn nǔ e é wa lɛ́ é gblamɛ: (1) Ayi ɖíɖó nǔ ɖěɖěe gbo kpo nyi ali jí nú nukɔnyiyi yětɔn é wú, (2) blǒbló bónú wǎn e yě yí nú Jexóva é ní gɔ́ngɔ́n d’é jí, (3) azɔ̌ wiwa ɖo nǔ e ɖo tají nú yě lɛ́ é wú kpó (4) wǔvɛ́ yětɔn lɛ́ jí ɖuɖu ɖe kpó. Nɛ̌ mǐ ka sixú xwedó ali e nu Jezu kplɔ́n nǔ mɛ ɖe é sín kpɔ́ndéwú hwenu e mǐ ɖo wěma Ðu gbɛ víví káká sɔ́yi! ɔ zán dó d’alɔ Biblu kplɔ́ntɔ́ ɖé wɛ bónú é ná sɔ́ nǔgbó ɔ dó ɖó étɔn é gbɔn?

D’ALƆ BIBLU KPLƆ́NTƆ́ TOWE BÓNÚ É NÍ ÐÓ AYI NǓ ÐĚÐĚE GBO KPO NYI ALI JÍ NÚ NUKƆNYIYI TƆN É WÚ

3. Étɛ́ ka zɔ́n bɔ Jezu xwixwedó ka vɛ́ wǔ nú Nikodɛ́mu?

³ Nikodɛ́mu e nyí gǎn nukúnɖéjí Jwifu lɛ́ tɔn ɖé é ɖí xwi xá wǔvɛ́ ɖé hwenu e é jló ná húzú ahwanvú Jezu tɔn é. Ée Jezu bɛ́ sinsɛnzɔ́ tɔn b’ɛ ná ɖó sun ayizɛ́n mɔ̌ é jɛ́n Nikodɛ́mu ɖ’ayi wú ɖɔ afɔsɔ́ɖótetɔ́ Mawu tɔn wɛ Jezu nyí. (Jaan 3:1, 2) É ɖo mɔ̌ có, Nikodɛ́mu ba ná mɔ Jezu ɖo nǔglɔ́ ɖó é “ɖo xɛsi ɖi nú Jwifugán lɛ́ wɛ.” (Jaan 7:13; 12:42) É sixú ko lin ɖɔ ényí émí húzú ahwanvú Jezu tɔn ɔ, nǔ gěgé ná lá émí.a

4. Nɛ̌ Jezu ka d’alɔ Nikodɛ́mu bɔ é mɔ nukúnnú jɛ nǔ e Mawu ba ɖɔ é ní wa é wú gbɔn?

⁴ Nikodɛ́mu tuun sɛ́n e Mawu ná Izlayɛ́li ví lɛ́ é ganjí, amɔ̌, é byɔ́ ɖɔ è ní d’alɔ ɛ bónú é ní mɔ nukúnnú jɛ nǔ e ɖó nukún wɛ Jexóva ɖe ɖo así tɔn é wú. Nɛ̌ Jezu ka d’alɔ ɛ gbɔn? Jezu ɖo gbesisɔmɛ bá zán hwenu ɖó kpɔ́ xá Nikodɛ́mu, bo ná lɛ́ ɖɔ xó xá ɛ, é ná bo tlɛ nyí ɖo zǎnmɛ ɔ nɛ́. Gɔ́ ná ɔ, Jezu ɖɔ nǔ e Nikodɛ́mu ɖó ná wa bá dó húzú ahwanvú é n’i nyi wɛn, é wɛ nyí ɖɔ hwɛ tɔn lɛ́ ná vɛ́ n’i, é ná bló batɛ́mu ɖo sin mɛ, lobo ná ɖe xlɛ́ ɖɔ émí ɖi nǔ nú Vǐ súnnu Mawu tɔn.—Jaan 3:5, 14-21.

5. Nɛ̌ mǐ ka sixú d’alɔ Biblu kplɔ́ntɔ́ ɖé b’ɛ ná ɖ’ayi nǔ e ɖo dindɔn ɛ dó gǔdo wɛ é wú gbɔn?

⁵ Ényí Biblu kplɔ́ntɔ́ ɖé ná bo tlɛ mɔ nukúnnú jɛ Biblu ɔ mɛ ganjí ɔ, é sixú byɔ́ ɖɔ è ní d’alɔ ɛ bónú é ní ɖó ayi nǔ e ɖo kpo gbo nyi ali jí nú nukɔnyiyi tɔn wɛ é wú. Agbazazɔ́, alǒ gbeklánxámɛ xwédo tɔn sixú fɛ́ ayi tɔn sín nǔ gbigbɔ tɔn lɛ́ gbé nyinya jí. Énɛ́ wú ɔ, ba hwenu dó d’alɔ nǔkplɔ́ntɔ́ towe. A sixú byɔ́ ɛ ɖɔ é ní wá nú mi ná ɖu nǔ kléwún ɖé ɖó kpɔ́, alǒ ɖi sa ɖó kpɔ́. Nǔ mɔ̌hun lɛ́ wiwa ɖó kpɔ́ ná zɔ́n bɔ é ná ɖɔ xó nú we dó gbɛzán tɔn wú hú gǎn, bɔ a ná tuun wǔvɛ́ e mɔ wɛ é ɖe lɛ́ é. Dǒ wǔsyɛ́n lanmɛ nú nǔkplɔ́ntɔ́ towe bónú é ní bló hǔzúhúzú ɖěbǔ e ɖo dandan é, é ní ma ka nyí bo ná dó nyɔ́ ɖo así we ó, loɔ, bá dó ɖe wǎn e é yí nú Jexóva é xlɛ́.

6. Nɛ̌ a ka sixú d’alɔ Biblu kplɔ́ntɔ́ ɖé b’ɛ ná mɔ hlɔ̌nhlɔ́n bo zán nǔ e kplɔ́n wɛ é ɖe é gbɔn? (1 Kɔlɛ́ntinu lɛ́ 16:13)

⁶ Ényí Biblu kplɔ́ntɔ́ ɖé kú d’é jí ɖɔ Jexóva ná d’alɔ émí bɔ émí ná zán gbɛ sɔgbe xá nǔgbódodó Biblu tɔn lɛ́ ɔ, é ná mɔ hlɔ̌nhlɔ́n bá zán nǔ e kplɔ́n wɛ é ɖe lɛ́ é. (Xa 1 Kɔlɛ́ntinu lɛ́ 16:13.) È sixú jlɛ́ azɔ̌ towe dó azɔ̌ e mɛ̌si nǔkplɔ́nmɛtɔ́ ɖé nɔ wa é wú. Flín hwenu e a ɖo wěmaxɔmɛ yi wɛ é, mɛ̌si towe lɛ́ ɖětɛ́ a ka yí wǎn ná hú gǎn? É ná ɖibla nyí mɛ̌si e nɔ ɖó suúlu bo nɔ d’alɔ we nú a ná ɖeji dó nǔwúkpíkpé towe lɛ́ wú é. Mɔ̌ ɖokpó ɔ, Biblu kplɔ́nmɛtɔ́ ɖagbe ɖé nɔ kplɔ́n nǔ e Mawu ba ɖɔ mǐ ní wa é mɛ kpowun ǎ, loɔ, é nɔ lɛ́ ná jiɖe nǔkplɔ́ntɔ́ tɔn ɖɔ kpó alɔdó Jexóva tɔn kpó ɔ, é hɛn ɔ, é ná bló hǔzúhúzú ɖěɖěe ɖo dandan lɛ́ é ɖo gbɛzán tɔn mɛ. Nɛ̌ a ka sixú wa énɛ́ gbɔn?

D’ALƆ NǓKPLƆ́NTƆ́ TOWE BÓNÚ WǍN E É YÍ NÚ JEXÓVA É NÍ GƆ́NGƆ́N D’É JÍ

7. Nɛ̌ Jezu ka d’alɔ mɛ ɖěɖěe ɖótó xó tɔn lɛ́ é bɔ wǎn e yě yí nú Jexóva é jɛjí gbɔn?

⁷ Jezu tuun ɖɔ wǎn yí nú Mawu wɛ ná sísɛ́ ahwanvú émítɔn lɛ́ bɔ yě ná zán nǔ e yě kplɔ́n lɛ́ é. Hwɛhwɛ ɔ, é nɔ kplɔ́n nǔ ɖěɖěe ná d’alɔ ahwanvú tɔn lɛ́ bɔ wǎn e yě yí nú Tɔ́ yětɔn jǐxwé tɔn ɔ é ná jɛjí lɛ́ é yě. Ði kpɔ́ndéwú ɔ, é jlɛ́ Jexóva dó nya e nɔ ná nǔ ɖagbe lɛ́ vǐ tɔn lɛ́ é ɖé wú. (Mat. 7:9-11) Mɛ e ɖo tó ɖó Jezu wɛ é ɖé lɛ́ sixú nɔ ma ɖó tɔ́ wǎnyíyínɔ mɔ̌hun. Dǒ nukún lěe nǔ ná ko cí nú yě hwenu e Jezu ná nǔjlɛ́dónǔwú tɔ́ nǔbláwǔkúnúmɛtɔ́, éé dó doo nú vǐ tɔn e wlí ali nyanya bo lɛ́ lɛ́ kɔ wá é tɔn é mɛ kpɔ́n. Jezu d’alɔ mɛ lɛ́ bɔ yě mɔ ɖɔ Jexóva yí wǎn nú émí tawun bo ba ná d’alɔ émí.—Luk. 15:20-24.

8. Nɛ̌ a ka sixú d’alɔ Biblu kplɔ́ntɔ́ ɖé b’ɛ ná bló bɔ wǎn e é yí nú Jexóva é ná gɔ́ngɔ́n d’é jí gbɔn?

⁸ Hwi lɔ sixú d’alɔ Biblu kplɔ́ntɔ́ ɖé bɔ é ná bló bɔ wǎn e é yí nú Jexóva é ná gɔ́ngɔ́n d’é jí gbɔn ɖɛ̌ titɛ jijɔ Mawu tɔn lɛ́ jí ɖo nǔkplɔ́nkplɔ́n mitɔn hwenu gblamɛ. Ðo nǔkplɔ́nkplɔ́n ɖokpó ɖokpó hwenu hǔn, d’alɔ ɛ bónú é ní tuun kancícá e ɖo nǔ e kplɔ́n wɛ é ɖe é kpó wǎnyíyí Jexóva tɔn kpó tɛ́ntin é. Ényí mi ɖo xó ɖɔ dó gbɛxixɔ ɔ wú wɛ hǔn, tɛ ɖɛ̌ lěe é kan ɛ gbɔn é jí. (Hlɔ̌. 5:8; 1 Jaan 4:10) Ényí nǔkplɔ́ntɔ́ ɖé mɔ nukúnnú jɛ lě do Jexóva yí wǎn n’i sɔ é mɛ ɔ, énɛ́ sixú d’alɔ ɛ bɔ é ná yí wǎn nú Jexóva hú gǎn.—Ga. 2:20.

9. Étɛ́ ka d’alɔ nya e nɔ nyí Michael é bɔ é húzú gbɛzán tɔn?

⁹ Kpɔ́n kpɔ́ndéwú Michael e gosín Indonésie é tɔn. Nǔgbó ɔ mɛ wɛ é su ɖe, amɔ̌, é bló batɛ́mu ǎ. Hwenu e é ɖó xwe 18 é ɔ, é yi to ɖěvo mɛ bo nɔ kun agbanhún. Nukɔnmɛ ɔ, é wlí alɔ, amɔ̌, é jó xwédo tɔn dó nyi xwé bo gbɛ kan dó azɔ̌ tɔn nu ɖo togúdo. Ðo hwenɛ́nu ɔ, asi tɔn kpó vǐ nyɔ̌nu tɔn kpó jɛ Biblu kplɔ́n jí bo ɖo nukɔn yi wɛ. Hwenu e Michael sín nɔ kú é ɔ, Michael wá gbeta ɔ kɔn bá lɛ́ kɔ yi xwé bá kpé nukún dó tɔ́ tɔn wú, bo lɛ́ yí gbe nú Biblu kplɔ́nkplɔ́n. Hwenu e Michael ɖo akpáxwé “Ba do nú nǔ d’é jí” nǔkplɔ́nkplɔ́n 27 wěma Ðu gbɛ víví káká sɔ́yi! ɔ tɔn gbéjé kpɔ́n wɛ é ɔ, é byɔ́ ayi mɛ n’i tawun. Hwenu e Michael lin tamɛ dó lěe nǔ ɖó ná ko cí nú Jexóva hwenu e é mɔ bɔ Vǐ súnnu tɔn ɖo wǔvɛ́ se wɛ é jí é ɔ, ɖasin wá yi dó è. Gbɛxixɔ ɔ su nukún tɔn mɛ, bo sísɛ́ ɛ bɔ é húzú gbɛzán tɔn bo bló batɛ́mu.

D’ALƆ NǓKPLƆ́NTƆ́ TOWE BÓNÚ É NÍ W’AZƆ̌ ÐO NǓ E ÐO TAJÍ N’I LƐ́ É WÚ

10. Étɛ́ Jezu ka wa dó d’alɔ ahwanvú tɔn lɛ́ bɔ yě bló hǔzúhúzú lɛ́ bá dó sɛn Jexóva d’é jí? (Luki 5:5-11) (Kpɔ́n ɖiɖe ɔ lɔmɔ̌.)

¹⁰ Ahwanvú nukɔntɔn lɛ́ yá wǔ ɖ’ayi wú ɖɔ Jezu wɛ nyí Mɛsíya e sín akpá è dó é, amɔ̌, è ɖó ná d’alɔ yě bɔ sinsɛnzɔ́ ɔ ná nɔ tɛn nukɔntɔn ɔ mɛ nú yě. Piyɛ́ɛ kpó Andlé kpó ko nyí ahwanvú nú hwenu ɖé cóbɔ Jezu wá byɔ́ yě ɖɔ yě ní nɔ xwedó émí hwebǐnu. (Mat. 4:18, 19) Yě kpó Jaki kpó, kpódó Jaan kpán nɔ nɔ kpɔ́ bo nɔ wa hwehuhuzɔ́, bɔ azɔ̌ yětɔn ɖo nukɔn yi wɛ tawun. (Mak. 1:16-20) Hwenu e Piyɛ́ɛ kpó Andlé kpó “jó ɖɔ yětɔn lɛ́ dó” é ɔ, yě ná ko bló tuto lěe yě ná kpé nukún dó xwédo yětɔn lɛ́ wú gbɔn, hwenu e yě kpó Jezu kpó ná ɖo yiyi wɛ é tɔn. Étɛ́ ka sísɛ́ yě bɔ yě w’azɔ̌ ɖo nǔ e ɖo tají nú yě lɛ́ é wú? Tan e ɖo wěma Luki tɔn mɛ é ɖɔ nú mǐ ɖɔ Jezu bló nǔjíwǔ ɖé b’ɛ ná hlɔ̌nhlɔ́n kú e yě kú d’é jí ɖɔ Jexóva kpé wú bá kpé nukún dó yě wú é.—Xa Luki 5:5-11.

11. Nɛ̌ mǐ ka sixú zán nǔ e jɛ dó mǐɖésúnɔ jí lɛ́ é dó ná hlɔ̌nhlɔ́n nǔɖiɖi Biblu kplɔ́ntɔ́ ɖé tɔn gbɔn?

¹¹ Mǐ sixú bló nǔjíwǔ Jezu ɖɔhun ǎ, amɔ̌, mǐ hɛn ɔ, mǐ ná má nǔ ɖěɖěe jɛ bo xlɛ́ lěe Jexóva nɔ nɔ gǔdo nú mɛ ɖěɖěe sɔ́ ɛ ɖó tɛn nukɔntɔn ɔ mɛ ɖo gbɛzán yětɔn mɛ lɛ́ é gbɔn é xá yě. Ði kpɔ́ndéwú ɔ, a ka flín lěe Jexóva d’alɔ we gbɔn hwenu e a jɛ kplé lɛ́ yi jí é a? É sixú ko byɔ́ ɖɔ a ná mɔ gǎn towe bo tín nǔ e wú ényí azɔ̌ ganmɛ lɛ́ jɛ kplé lɛ́ sín ganmɛ mɛ ɔ, a ma sɔ́ ná sixú wa gangúdozɔ́ ɖě ǎ é mɛ n’i. Ée a ná ɖo nǔ e jɛ dó jǐ we lɛ́ é má xá Biblu kplɔ́ntɔ́ towe wɛ é ɔ, tínmɛ lěe mɔ e a mɔ bɔ Jexóva nɔ gǔdo nú gbeta e kɔn a wá bá zé sinsɛn ɛ ɖó tɛn nukɔntɔn ɔ mɛ é ná hlɔ̌nhlɔ́n nǔɖiɖi towe gbɔn é.

12. (a) Étɛ́wú mǐ ka ɖó ná nɔ kplá wɛnjlátɔ́ vovo lɛ́ yi Biblu kplɔ́nkplɔ́n ɖé domɛ? (b) Nɛ̌ a ka sixú zán video lɛ́ dó kplɔ́n nǔ nǔkplɔ́ntɔ́ towe ganjí gbɔn? Nǎ kpɔ́ndéwú ɖé.

¹² Lěe klisánwun ɖěvo lɛ́ ko húzú nǔ e ɖo tají nú yě lɛ́ é gbɔn é lɔmɔ̌ sise sixú hɛn le wá nú nǔkplɔ́ntɔ́ towe. Énɛ́ wú ɔ, nɔ byɔ́ nǔɖitɔ́ hǎtɔ́ e mɔ nǔ vovo kpɔ́n lɛ́ é bónú yě ní nɔ xwedó we yi nǔkplɔ́nkplɔ́n ɔ domɛ. Nɔ byɔ́ yě ɖɔ yě ní tínmɛ lěe yě wá nǔgbó ɔ mɛ gbɔn é kpó nǔ ɖěɖěe yě wa dó sɔ́ Jexóva sinsɛn ɖó tɛn nukɔntɔn ɔ mɛ ɖo gbɛzán yětɔn mɛ é kpó. Gɔ́ ná ɔ, nɔ ba hwenu bónú hwi kpó nǔkplɔ́ntɔ́ towe kpó ní nɔ kpɔ́n video ɖěɖěe ɖo akpáxwé “Ba do nú nǔ d’é jí” alǒ “Kíjé” mɛ ɖo wěma Ðu gbɛ víví káká sɔ́yi! mɛ lɛ́ é. Ði kpɔ́ndéwú ɔ, ée mi ná ɖo xó ɖɔ ɖó kpɔ́ dó nǔkplɔ́nkplɔ́n 37​gɔ́ ɔ jí wɛ é ɔ, a sixú tɛ ɖɛ̌ nǔgbódodó ɖěɖěe ɖo video Jexóva ná kpé nukún dó hudó mǐtɔn lɛ́ wú ɔ mɛ lɛ́ é jí.

D’ALƆ NǓKPLƆ́NTƆ́ TOWE NÚ É NÍ NƆ ÐU ÐO WǓVƐ́ LƐ́ JÍ

13. Nɛ̌ Jezu ka sɔ́ nǔ nú ahwanvú tɔn lɛ́ nú gbeklánxámɛ gbɔn?

¹³ Jezu ɖɔ nú ahwanvú tɔn lɛ́ azɔn mɔ̌kpán ɖɔ mɛ ɖěvo lɛ́, káká jɛ hɛ̌nnumɔ yětɔn lɛ́ jí ná klán gbe xá yě. (Mat. 5:11; 10:22, 36) Hwenu e sinsɛnzɔ́ Jezu tɔn ɖo vivɔnu sɛkpɔ́ wɛ é ɔ, é gba akpá nú ahwanvú tɔn lɛ́ ɖɔ è sixú hu yě ɖó yě ɖo Jexóva sɛn wɛ wútu. (Mat. 24:9; Jaan 15:20; 16:2) É byɔ́ yě ɖɔ yě ní nɔ ɖ’ayi te ɖo sinsɛnzɔ́ ɔ mɛ. É ɖe wě xá yě ɖɔ yě ní ma nɔ dɔn nǔ xá mɛ ɖěɖěe nɔ klán gbe xá yě lɛ́ é ó, lé yě ní nɔ ɖó ayi te dó nǔ e yě nɔ ɖɔ lɛ́ é kpó nǔ e yě nɔ wa lɛ́ é kpó wú bá dó sixú kpo ɖo wɛn ɔ jlá wɛ.

14. Nɛ̌ mǐ ka sixú d’alɔ nǔkplɔ́ntɔ́ ɖé nú é ná sɔ́ nǔ ɖ’ayǐ nú gbeklánxámɛ gbɔn? (2 Timɔtée 3:12)

¹⁴ Mǐ sixú d’alɔ Biblu kplɔ́ntɔ́ ɖé nú é ná sɔ́ nǔ ɖ’ayǐ nú gbeklánxámɛ gbɔn nǔ e azɔ̌watɔ́gbɛ́ lɛ́, xɔ́ntɔn lɛ́ kpó hɛ̌nnumɔ lɛ́ kpó sixú ɖɔ lɛ́ é tíntínmɛ n’i gblamɛ. (Xa 2 Timɔtée 3:12.) Azɔ̌gbɛ́ nǔkplɔ́ntɔ́ ɔ tɔn ɖé lɛ́ sixú ɖɔ slamɛ wǔ tɔn ɖó gbɛzínzán tɔn yɔ̌yɔ́ ɔ wú. Mɛ ɖěvo lɛ́, káká jɛ hɛ̌nnumɔ tɔn e kpó é kpó vɛ́ lɛ́ é jí, sixú mɔ xó ɖɔ dó nǔ e kplɔ́n wɛ é ɖe ɖo Biblu mɛ lɛ́ é wú. Lě do mǐ yá wǔ sɔ́ nǔ nú nǔkplɔ́ntɔ́ mǐtɔn lɛ́ bónú yě ná ɖí xwi xá gbeklánxámɛ sɔ é ɔ, mɔ̌ do wɛ yě ná ɖo gbesisɔmɛ hwenu e é ná wá xwetɔ́n é sɔ.

15. Étɛ́ ka sixú d’alɔ Biblu kplɔ́ntɔ́ ɖé bɔ é ná ɖí xwi xá gbeklánxámɛ xwédo tɔn?

¹⁵ Ényí è ɖo gbe klán xá nǔkplɔ́ntɔ́ towe wɛ hǔn, d’alɔ ɛ bónú é ní lin tamɛ dó nǔ e wú hɛ̌nnumɔ tɔn ɖé lɛ́ ɖo xomɛ sin wɛ é jí. Yě sixú lin ɖɔ ali bú wɛ é ɖe, alǒ yě sixú ko nɔ ɖó linlin agɔ dó Kúnnuɖetɔ́ Jexóva tɔn lɛ́ wú. Mɛ e Jezu yí wǎn ná lɛ́ é tlɛ ɖó linlin agɔ dó wǔ tɔn. (Mak. 3:21; Jaan 7:5) Kplɔ́n nǔkplɔ́ntɔ́ towe ɖɔ é ní nɔ ɖó suúlu bo nɔ ɖɔ xó kpó xomɛnyínyɔ́ kpó nú mɛ ɖěvo lɛ́, kpó mɛ e ɖo xwédo tɔn mɛ lɛ́ é kpó.

16. Nɛ̌ mǐ ka sixú d’alɔ Biblu kplɔ́ntɔ́ ɖé b’ɛ ná nyɔ́ xomɛ bo lɛ́ nɔ jlɛ̌ jí dó ɖɔ xó dó nǔ e é ɖi nǔ ná lɛ́ é wú gbɔn?

¹⁶ Ényí hɛ̌nnumɔ lɛ́ tlɛ ba ná tuun nǔ dó Biblu wú d’é jí ɔ, nǔnywɛ́nú wɛ é ná nyí ɖɔ Biblu kplɔ́ntɔ́ ɖé ní ma tínmɛ nǔ lɛ́ bǐ ɖo zǔndo ɖokpó mɛ ó. É ma nyí mɔ̌ ǎ ɔ, é sixú hú agbɔ̌n yě, bɔ wǎgbɔ tɔn ɔ, yě sɔ́ ná ba ná ɖɔ xó xá ɛ dó nǔ e é ɖi nǔ ná lɛ́ é jí hweɖévonu ǎ. Énɛ́ wú ɔ, nɔ dó wǔsyɛ́n lanmɛ nú Biblu kplɔ́ntɔ́ towe ɖɔ é ní nɔ ɖɔ xó dó nǔ e é ɖi nǔ ná lɛ́ é wú ɖo ali ɖé nu bo nɔ hun xóɖɔɖókpɔ́ sín ali ɖó te nú hweɖévonu. (Koló. 4:6) Bóyá, é sixú nɔ byɔ́ hɛ̌nnumɔ tɔn lɛ́ ɖɔ yě ní yi jw.org jí. Énɛ́ ná zɔ́n bɔ yě ná kplɔ́n nǔ dó Kúnnuɖetɔ́ Jexóva tɔn lɛ́ wú d’é jí lěe yě ba gbɔn é.

17. Nɛ̌ a ka sixú d’alɔ nǔkplɔ́ntɔ́ ɖé b’ɛ ná ɖí xwi xá linlin agɔ e mɛ ɖěvo lɛ́ sixú ɖó dó Kúnnuɖetɔ́ Jexóva tɔn lɛ́ wú é gbɔn? (Kpɔ́n ɖiɖe ɔ lɔmɔ̌.)

¹⁷ A sixú zán xóta ɖěbɔdóɖěwú “Nǔ e mɛ lɛ́ nɔ yá wǔ kanbyɔ́ lɛ́ é,” éé nɔ tɔ́n ɖo jw.org jí lɛ́ é dó d’alɔ nǔkplɔ́ntɔ́ towe bónú é ná sɔ́ nǔ nú xósin e bɔkun lɛ́ é nú nǔ e hɛ̌nnumɔ lɛ́ alǒ azɔ̌watɔ́gbɛ́ lɛ́ sixú kanbyɔ́ lɛ́ é. (2 Tim. 2:24, 25) Ðo vivɔnu nǔkplɔ́nkplɔ́n ɖokpó ɖokpó tɔn hǔn, mi nɔ bló akpáxwé “Mɛɖé lɛ́ ɖɔ,” éé ɖo wěma Ðu gbɛ víví káká sɔ́yi! ɔ mɛ é. Dǒ wǔsyɛ́n lanmɛ nú nǔkplɔ́ntɔ́ towe ɖɔ é ní nɔ vɔ́ nǔ e é ná ɖɔ lɛ́ é jí gbɔn nú é ní má ɛ. Ma xo nǔ kpɔ́n dó wě ɖiɖe xá ɛ dó lěe é sixú bló gbɔn bɔ xósin tɔn ná kpɔ́n te d’é jí é wú ó. Nǔ sísɔ́ ɖ’ayǐ gbɔn mɔ̌ ná d’alɔ ɛ bɔ é ná jɛ hun dó nǔɖiɖi tɔn jí kpó jiɖiɖe kpó.

18. Nɛ̌ a ka sixú dó wǔsyɛ́n lanmɛ nú nǔkplɔ́ntɔ́ ɖé b’ɛ ná húzú wɛnjlátɔ́ e ma ko bló batɛ́mu ǎ é ɖé gbɔn? (Matíe 10:27)

¹⁸ Jezu ɖe gbe nú ahwanvú tɔn lɛ́ ɖɔ yě ní nɔ jlá wɛn ɔ ɖo agbawungba. (Xa Matíe 10:27.) Lě do nǔkplɔ́ntɔ́ ɖé yá wǔ jɛ nǔ e é ɖi nǔ ná lɛ́ é sín xó ɖɔ nú mɛ ɖěvo lɛ́ jí sɔ é ɔ, mɔ̌ do wɛ é ná yá wǔ kplɔ́n bo ná nɔ gán jɛ Jexóva wú sɔ. Nɛ̌ a ka sixú d’alɔ nǔkplɔ́ntɔ́ ɖé bɔ é ná sɔ́ énɛ́ dó ɖó nǔ e gbé é ná nya é gbɔn? Ényí è ɖɔ nǔjlájlá ɖé xó ɖo kplé jí hǔn, dǒ wǔsyɛ́n lanmɛ nú nǔkplɔ́ntɔ́ towe ɖɔ é ní lin tamɛ dó nǔ e é sixú wa bo ná jɛxá, bá nyí wɛnjlátɔ́ é jí. Tínmɛ nǔ e wú é ko bɔ wǔ nú mɛ gěgé bɔ yě bɛ́ wɛn ɔ jíjlá ɖo nǔjlájlá mɔ̌hun lɛ́ hwenu é n’i. É sixú lɛ́ ɖu le azɔ̌ e è nɔ kplɔ́n mɛ ɖo kplé aklúnɔzángbla tɛ́ntin tɔn jí é tɔn. Ée é ná ɖo tíntɛ́nkpɔ́n wɛ bá jɛxá é ɔ, é ná kplɔ́n bo ná nɔ tínmɛ nǔ e é ɖi nǔ ná lɛ́ é kpó jiɖiɖe kpó.

ÐE XLƐ́ NǓKPLƆ́NTƆ́ TOWE ÐƆ ÉMÍ ÐEJI DÓ WǓ TƆN

19. Nɛ̌ Jezu ka ɖe xlɛ́ ɖɔ émí ɖeji dó ahwanvú émítɔn lɛ́ wú gbɔn? Nɛ̌ mǐ ka sixú xwedó kpɔ́ndéwú tɔn gbɔn?

¹⁹ Cóbónú Jezu ná yi jǐxwé ɔ, é ɖɔ nú ahwanvú tɔn lɛ́ ɖɔ émí kpó yě kpó ná lɛ́ wá nɔ kpɔ́. Yě mɔ nukúnnú jɛ wú ɖɔ jǐxwé yiyi yětɔn xó ɖɔ wɛ Jezu ɖe ǎ. É ɖo mɔ̌ có, é sɔ́ ayi ɖó gbejíninɔ yětɔn jí, ényí ɖó nǔxokpɔ́n yětɔn lɛ́ jí ǎ. (Jaan 14:1-5, 8) É tuun ɖɔ é ná byɔ́ hwenu cóbɔ yě ná mɔ nukúnnú jɛ nǔɖé lɛ́ wú, ɖi nukúnɖíɖó jǐxwé tɔn. (Jaan 16:12) Mǐ lɔ sixú ɖeji ɖɔ nǔkplɔ́ntɔ́ mǐtɔn ɖó jlǒ ɔ bá nyɔ́ Jexóva nukúnmɛ.

20. Nɛ̌ nɔví nyɔ̌nu e nɔ nɔ Malawi é ɖé ka ɖe xlɛ́ ɖɔ émí ɖeji dó nǔkplɔ́ntɔ́ émítɔn wú gbɔn?

²⁰ Mǐ nɔ kpo ɖo nukún ɖó wɛ ɖɔ nǔkplɔ́ntɔ́ mǐtɔn ba ná wa nǔ e sɔgbe é. Kpɔ́n kpɔ́ndéwú Chifundo e nyí nɔví nyɔ̌nu ɖé bo nɔ nɔ Malawi é tɔn. É jɛ Biblu kplɔ́n xá nǎwe e nɔ yi sinsɛn Katolíka tɔn bo nɔ nyí Alinafe é jí ɖo wěma Ðu gbɛ víví káká sɔ́yi! mɛ. Ée yě kplɔ́n wěmata 14​gɔ́ ɔ fó é ɔ, Chifundo kanbyɔ́ nǔkplɔ́ntɔ́ tɔn ɖɔ étɛ́ é ka lin dó ɖiɖe lɛ́ zínzán dó sɛn Mawu wú a jí. Xomɛ sin Alinafe káká bɔ é ɖɔ: “Gbeta mɛɖésúnɔ tɔn wɛ!” Chifundo kanbyɔ́ éɖée ɖɔ énɛ́ ná zɔ́n bɔ Biblu kplɔ́nkplɔ́n ɔ ná nɔ te ǎ é jí. Amɔ̌, é ɖó suúlu bo kpo ɖo nǔ kplɔ́n xá Alinafe wɛ, bo ɖo nukún ɖó wɛ ɖɔ, nukɔnmɛ ɔ, é ná wá wlí nǔkplɔ́nmɛ ɔ. Sun yɔywɛ ɖé gúdo ɔ, Chifundo kan nǔ élɔ́ e ɖo nǔkplɔ́nkplɔ́n 34​gɔ́ ɔ mɛ é byɔ́ ɛ: “Káká jɛ din ɔ, le tɛ́ lɛ́ nǔ e a ko kplɔ́n dó Biblu kpó Mawu nǔgbó ɔ Jexóva kpó wú lɛ́ é ka ko hɛn wá nú we?” Chifundo tínmɛ lěe Alinafe ná xósin gbɔn é bo ɖɔ: “É ɖɔ nǔ ɖagbe ɖagbe gěgé xó, ɖokpó wɛ nyí ɖɔ Kúnnuɖetɔ́ lɛ́ kún nɔ ɖ’alɔ ɖo walɔ ɖěɖěe Biblu gbɛ́ lɛ́ é mɛ ó.” Énɛ́ gúdo zaan ɔ, Alinafe sɔ́ nɔ zán ɖiɖe lɛ́ ɖě ǎ, bo bló batɛ́mu.

21. Nɛ̌ mǐ ka sixú d’alɔ Biblu kplɔ́ntɔ́ mǐtɔn b’ɛ ná wá gbeta ɔ kɔn bá sɛn Jexóva gbɔn?

²¹ Nǔgbó wɛ ɖɔ Jexóva wɛ nyí mɛ e “nɔ bló bɔ é nɔ su” é, amɔ̌, azɔ̌ mǐdɛɛ lɛ́ tɔn wɛ nyí ɖɔ mǐ ná d’alɔ nǔkplɔ́ntɔ́ ɖé b’ɛ ná yi nukɔn. (1 Kɔ. 3:7) Mǐ nɔ wa nǔ hú nǔ e Mawu ba ɖɔ é ní wa lɛ́ é kplɔ́nkplɔ́n ɛ. Mǐ nɔ d’alɔ ɛ bɔ é nɔ tɛ́n kpɔ́n bo nɔ bló bɔ wǎn e é yí nú Jexóva é nɔ gɔ́ngɔ́n d’é jí. Mǐ nɔ lɛ́ dó wǔsyɛ́n lanmɛ n’i ɖɔ é ní ɖe wǎn e é yí nú Jexóva é xlɛ́ gbɔn sísɔ́ ɛ ɖó tɛn nukɔntɔn ɔ mɛ gblamɛ. Mǐ nɔ lɛ́ kplɔ́n ɛ lěe é ná gán jɛ Jexóva wú ɖo wǔvɛ́ lɛ́ nukɔn gbɔn é. Ényí mǐ nɔ ɖe xlɛ́ Biblu kplɔ́ntɔ́ mǐtɔn ɖɔ mǐ ɖeji ɖɔ é ba ná wa nǔ e ná nyɔ́ Jexóva nukúnmɛ lɛ́ é ɔ, mǐ nɔ d’alɔ ɛ bɔ é nɔ kpan akɔ́n bo nɔ wá gbeta ɔ kɔn bá sɛn Jexóva.