Lěe Jexóva nɔ d’alɔ mǐ bɔ mǐ nɔ dɛ gbɔn é

1. Étɛ́wú mǐ ka ɖó hudó didɛ tɔn? Alɔdó tɛ́ mǐ ka ɖó? (1 Piyɛ́ɛ 5:10)

TOGUN Jexóva tɔn ɖó hudó didɛ tɔn ɖo azǎn gǔdo gúdo tɔn élɔ́ lɛ́ e vɛ́ wǔ é mɛ. Mɛɖé lɛ́ ɖo azɔn syɛ́nsyɛ́n jɛ wɛ. Mɛ ɖěvo lɛ́ ɖo xwi ɖí xá kú mɛ vívɛ́ná ɖé tɔn wɛ. É ɖo mɔ̌ có, mɛ ɖěvo lɛ́ ɖo xwi ɖí xá gbeklánxámɛ hǎgbɛ́ xwédo yětɔn tɔn lɛ́, alǒ gǎntosɔ́ lɛ́ tɔn wɛ. (Mat. 10:18, 36, 37) Kú d’é jí ɖɔ ényí a na bo tlɛ ɖo xwi ɖí xá wǔvɛ́ ɖěbǔ wɛ ɔ, Jexóva hɛn ɔ é ná d’alɔ we bɔ a ná dɛ.—Xa 1 Piyɛ́ɛ 5:10.

2. Mɛ̌ ka nɔ zɔ́n bɔ mǐ mɛ klisánwun lɛ́ nɔ kpé wú bo nɔ dɛ?

² Didɛ ɔ, nǔwúkpíkpé e nɔ zɔ́n bɔ è nɔ ɖó kan dó nǔ wú bo nɔ kpo ɖo nukún ɖó nǔ wɛ ɖo wǔvɛ́ lɛ́, gbeklánxámɛ lɛ́ alǒ mɛtɛ́nkpɔ́n lɛ́ nukɔn é wɛ. Mǐ mɛ klisánwun lɛ́ ɔ, hlɔ̌nhlɔ́n mǐtɔn kɛ́ɖɛ́ sixú zɔ́n bónú mǐ ɖó nǔwúkpíkpé didɛ tɔn ǎ; é nyɔ́ wa ɔ, Jexóva e nɔ ná “hlɔ̌nhlɔ́n e . . . zɛ gbɛtɔ́ tɔn wú” é mǐ é gɔ́n wɛ é nɔ gosín. (2 Kɔ. 4:7) Ðo xóta élɔ́ mɛ ɔ, mǐ ná ɖɔ xó dó nǔ ɖěɖěe Jexóva sɔ́ nǔ ná bɔ yě nɔ d’alɔ mǐ bɔ mǐ nɔ dɛ lɛ́ é ɛnɛ jí. Mǐ ná lɛ́ mɔ lěe mǐ sixú ɖu nǔ énɛ́ lɛ́ ɖokpó ɖokpó sín le gbɔn é.

ÐƐ

3. Étɛ́wú mǐ ka sixú ɖɔ ɖɔ nǔjíwǔ ɖé wɛ ɖɛ nyí?

³ Jexóva sɔ́ nǔ nú nǔɖé ɖo nǔjíwǔ linu b’ɛ sixú d’alɔ mǐ bɔ mǐ ná dɛ. Ninɔmɛ hwɛhuhu tɔn mǐtɔn ɖo fínɛ́ có, é hun ali nú mǐ bɔ mǐ nɔ ɖɔ xó xá ɛ. (Ebl. 4:16) Dǒ nukún mɛ kpɔ́n: Mǐ sixú xo ɖɛ sɛ́dó Jexóva hweɖébǔnu, dó nǔ ɖěbǔ wú. Mǐ ná bo ɖo fí ɖěbǔ bo xo ɖɛ sɛ́dó è dó gbe ɖěbǔ mɛ ɔ, é sixú ɖótó mǐ, é ná bo tlɛ nyí ɖɔ mǐ ɖo mǐɖokpó, alǒ mǐ ɖo gan mɛ ɔ nɛ́. (Joná. 2:2, 3; Mɛ. 16:25, 26) Ényí ado na bo tlɛ hu mǐ káká bónú mǐ ma tuun nǔ e mǐ ná ɖɔ dó ɖe lěe nǔ cí nú mǐ é tɔ́n ǎ ɔ, Jexóva hɛn ɔ, é ná mɔ nukúnnú jɛ nǔ e mǐ jló ná ɖɔ é mɛ. (Hlɔ̌. 8:26, 27) Nǔgbó ɔ, nǔjíwǔ ɖé wɛ ɖɛ nyí nǔgbó!

4. Étɛ́wú mǐ ka sixú ɖɔ ɖɔ ɖɛ e mǐ nɔ xo bá dó dɛ lɛ́ é sɔgbe xá jlǒ Jexóva tɔn?

⁴ Jexóva ná jiɖe mǐ ɖo Xó tɔn mɛ ɖɔ ‘nǔ ɖěbǔ e mǐ byɔ́ sɔgbe xá jlǒ émítɔn é ɔ, émí nɔ ɖótó mǐ.’ (1 Jaan 5:14) Mǐ ka sixú byɔ́ alɔdó Jexóva bá dó dɛ a? Ganjí! Mɔ̌ wiwa sɔgbe xá jlǒ tɔn. Étɛ́wú mǐ ka sixú ɖɔ mɔ̌? Ényí mǐ dɛ ɖo mɛtɛ́nkpɔ́n lɛ́ nu ɔ, mǐ nɔ hun ali nú Jexóva bɔ é nɔ kɛ nu nú Satáan Awǒvi e ɖo nǔ tɔn ɖɔ wɛ é. (Nǔx. 27:11) Gɔ́ nú énɛ́ ɔ, Biblu ɖɔ ɖɔ Jexóva ɖo gbesisɔmɛ bo ná “dó wǔsyɛ́n lanmɛ nú mɛ e yí wǎn n’i kpó ayixa yětɔn bǐ kpó lɛ́” é. (2 Tan 16:9) Énɛ́ wú ɔ, mǐ sixú kú d’é jí ɖɔ Jexóva ɖó hlɔ̌nhlɔ́n kpó jlǒ kpó bo ná d’alɔ mǐ bɔ mǐ ná dɛ.—Eza. 30:18; 41:10; Luk. 11:13.

5. Nɛ̌ ɖɛ ka sixú ná mǐ fífá ayi mɛ tɔn gbɔn? (Ezayíi 26:3)

⁵ Biblu ɖɔ ɖɔ ényí mǐ xo ɖɛ vívɛ́ vívɛ́ dó linkpɔ́n mǐtɔn lɛ́ wú ɔ, “fífá Mawu tɔn e zɛ nukúnnúmɔjɛnǔmɛ bǐ wú é ná nya xɛ ɖo ayi [mǐtɔn] kpó linlin [mǐtɔn] kpó jí.” (Filí. 4:7) Énɛ́ nɔ su nukún mǐtɔn mɛ tawun. Mɛ ɖěɖěe ma ɖo Jexóva sɛn wɛ ǎ lɛ́ é lɔ nɔ ɖí xwi xá ninɔmɛ syɛ́nsyɛ́n lɛ́, bo sixú tɛ́n wlɛnwín vovo lɛ́ kpɔ́n bá dó ɖó fífá ayi mɛ tɔn. Amɔ̌, fífá e Jexóva nɔ ná mǐ hwenu e mǐ xo ɖɛ sɛ́dó è é yi aga tawun hú fífá alɔkpa ɖěbǔ. Ényí mǐ xo ɖɛ sɛ́dó Jexóva ɔ, mǐ nɔ ɖe xlɛ́ ɖɔ é wɛ mǐ kpɛn zɔn bǐ mlɛ́mlɛ́, bɔ é nɔ kpo ɖo “ayi jɛ ayǐ” ná mǐ wɛ. (Xa Ezayíi 26:3.) Ali e nu Jexóva nɔ wa mɔ̌ ɖe é ɖokpó wɛ nyí alɔ dídó mǐ bónú mǐ ná flín nǔgbó ɖěɖěe mǐ ko kplɔ́n ɖo Xó tɔn mɛ, bɔ yě nɔ ná jiɖe mǐ lɛ́ é. Nǔgbó énɛ́ lɛ́ nɔ zɔ́n bɔ ayi mǐtɔn nɔ j’ayǐ, ɖó mǐ tuun ɖɔ nǔ mǐtɔn nɔ ɖu ayi mɛ nú Jexóva, bɔ é lɛ́ ba ɖɔ é ní kpa mǐ.—Ðɛh. 62:2, 3.

6. Nɛ̌ a ka sixú zán nǔníná e ɖɛ nyí é bǐ mlɛ́mlɛ́ gbɔn? (Kpɔ́n ɖiɖe ɔ lɔmɔ̌.)

⁶ Nǔ e a sixú wa é. Ényí a ɖo nǔ e nɔ tɛ́n nǔɖiɖi mɛ tɔn kpɔ́n é ɖé ɖí xwi xá wɛ hǔn, ‘sɔ́ nǔ linlin towe dó alɔ mɛ nú Jexóva,’ bo xo ɖɛ dó byɔ́ fífá tɔn. (Ðɛh. 55:23) Lɛ̌ xo ɖɛ bo byɔ́ nǔnywɛ́ e sín hudó a ɖó, bá dó sixú ɖí xwi xá wǔvɛ́ towe é. (Nǔx. 2:10, 11) Ma ka lɛ́ wɔn bo gɔn kú dó nú Jexóva ɖo ɖɛ towe lɛ́ mɛ ó. (Filí. 4:6) Nɔ ba nǔ ɖěɖěe xlɛ́ ɖɔ Jexóva ɖo alɔ dó we wɛ ɖo wǔvɛ́ towe mɛ lɛ́ é, bo nɔ dó kú n’i ɖó alɔ e dó we wɛ é ɖe é wú. Ma lɔn nú wǔvɛ́ towe cyɔ́n yɛ nyɔ̌ná ɖěɖěe a ko mɔ lɛ́ é jí ó.—Ðɛh. 16:5, 6.

XÓ MAWU TƆN

7. Nɛ̌ Biblu kplɔ́nkplɔ́n ka sixú d’alɔ mǐ bɔ mǐ ná dɛ gbɔn?

⁷ Jexóva ná Xó tɔn mǐ bá dó d’alɔ mǐ bɔ mǐ ná dɛ. Akpáxwé gěgé ɖo Biblu mɛ bo ná gǎnjɛwú mǐ ɖɔ Jexóva ná d’alɔ mǐ. Kpɔ́ndéwú ɖokpó kpowun ɖíe. Matíe 6:8 ɖɔ: “Tɔ́ mitɔn tlɛ ko tuun nǔ e hudó mi é cóbɔ mi byɔ́ ɛ.” Jezu wɛ ɖɔ xó énɛ́ lɛ́, é ka tuun Jexóva ganjí hú mɛ ɖěvo ɖěbǔ. Énɛ́ wú ɔ, é byɔ́ ɖɔ mǐ ní xo nǔ kpɔ́n ɖɔ hudó mǐtɔn lɛ́ ka nɔ ɖu ayi mɛ nú Jexóva hwenu e mǐ ɖo wǔvɛ́ lɛ́ mɛ é a jí ǎ. Linlin mɔ̌hun lɛ́ gěgé ɖo Biblu mɛ bo sixú ná hlɔ̌nhlɔ́n kán e mǐ kán ɖ’é jí bá dɛ é.—Ðɛh. 94:19.

8. (a) Nǎ nǔgbódodó Biblu tɔn e sixú d’alɔ mǐ bɔ mǐ ná dɛ é ɖé sín kpɔ́ndéwú. (b) Étɛ́ ka sixú d’alɔ mǐ bɔ mǐ ná flín nǔgbódodó Biblu tɔn lɛ́ hwenu e mǐ ná ɖó hudó yětɔn é?

⁸ Nǔgbódodó Biblu tɔn lɛ́ sixú d’alɔ mǐ bɔ mǐ ná dɛ. È ná ɖɔ ɔ, nǔnywɛ́ e nyɔ́ zán lɛ́ é ɖo yě mɛ, bo sixú d’alɔ mǐ bɔ mǐ ná wá gbeta ɖagbe lɛ́ kɔn. (Nǔx. 2:6, 7) Ði kpɔ́ndéwú ɔ, Biblu dó wǔsyɛ́n lanmɛ nú mǐ ɖɔ mǐ ní nɔ ɖɔ kéze ɖokpó ɖokpó tɔn, bo ma nú ado ní nɔ hu mǐ zɛ xwé wú dó nǔ e sixú wá jɛ, alǒ nǔ e ma sixú wá jɛ sɔ ǎ lɛ́ é wú ó. (Mat. 6:34) Ényí mǐ ko ɖó walɔ ɔ, bo nɔ xa Mawuxówéma ɔ, bo nɔ lin tamɛ d’é jí ɔ, é ná ɖibla bɔ wǔ nú mǐ hú gǎn bɔ mǐ ná flín nǔgbódodó e sín hudó mǐ ɖó lɛ́ é, hwenu e mǐ ɖó hudó yětɔn dó é.

9. Nɛ̌ tan e ɖo Biblu mɛ lɛ́ é ka nɔ ná hlɔ̌nhlɔ́n jiɖe e mǐ ɖó dó alɔdó Jexóva tɔn wú é gbɔn?

⁹ Gbɛtɔ́ kpaa e nɔ gbɛ mǐɖɔhun, bo ɖeji dó Jexóva wú, b’ɛ d’alɔ yě lɛ́ é sín tan lɛ́ ɖo Biblu mɛ. (Ebl. 11:32-34; Ja. 5:17) Ényí mǐ nɔ lin tamɛ dó tan mɔ̌hun lɛ́ jí ɔ, jiɖe e mǐ ɖó dó Jexóva e nyí ‘bibɛtɛn nú mǐ, bo lɛ́ nyí ahohó mǐtɔn é’ wú é ná jɛjí. “Adǎngbomɛ hwenu ɔ, è nɔ ba ɛ kpo gbeɖé ɖo gǔdo ǎ.” (Ðɛh. 46:2) Ényí mǐ ɖ’ayi gbejíninɔnú e mɛsɛntɔ́ Jexóva tɔn lɛ́ wa ɖo hwexónu é wú ɔ, é nɔ sísɛ́ mǐ bɔ mǐ nɔ lin nǔ yěɖɔhun, bo nɔ lɛ́ dɛ yěɖɔhun.—Ja. 5:10, 11.

10. Nɛ̌ a ka sixú zán Biblu ɖo ali ɖagbe hú gǎn ɔ nu gbɔn?

¹⁰ Nǔ e a sixú wa é. Nɔ xa Biblu ɔ gbe bǐ gbe, bo nɔ sɔ́ kɛ́n wěmafɔ ɖěɖěe a mɔ ɖɔ yě sixú d’alɔ we ɖo ali tawun tawun lɛ́ nu é tɔn. Mɛ gěgé ko mɔ ɖɔ tɛ́si gbe bǐ gbe tɔn ɔ, ali e nu è ná bɛ́ kéze ɔ ɖe kpó linlin wǔsyɛ́n dó lanmɛ nú mɛ tɔn Biblu tɔn ɖé ɖe é kpó wɛ é nyí. Nɔví nyɔ̌nu ɖé nɔ nyí Marie,a bo mɔ ɖɔ xó nǔgbó wɛ xó énɛ́ nyí hwenu e è mɔ kansɛ́ɛzɔn nú mɛjitɔ́ tɔn we lɛ́ bǐ é. Étɛ́ ka d’alɔ ɛ b’ɛ dɛ hwenu e é ɖo nukún kpé dó yě wú wɛ ɖo sun gǔdo gúdo tɔn yětɔn lɛ́ mɛ é? É ɖɔ: “Zǎnzǎn tɛgbɛ ɔ, un nɔ xa wěmafɔ tɛ́si ɔ tɔn ɖo Nɔ kíjé Mawuxówéma ɔ gbe bǐ gbe mɛ, bo nɔ lin tamɛ d’é jí. Énɛ́ zɔ́n bɔ linlin Mawuxówéma ɔ tɔn ɖé nɔ ɖo ayi ce mɛ, bo nɔ d’alɔ mì bɔ un nɔ sɔ́ ayi ɖó nǔ e ɖo tají hú nyiɖésúnɔ kpó ninɔmɛ adohu adohu tɔn e ɖí xwi xá wɛ un ɖe é kpó é jí.”—Ðɛh. 61:3.

NǓÐITƆ́ HǍTƆ́ LƐ́

11. Étɛ́wú tuuntuun ɖɔ mǐ kún ɖo mǐɖokpó ó hwenu e mǐ ɖo wǔvɛ́ lɛ́ ɖí xwi xá wɛ é ka nɔ dó wǔsyɛ́n lanmɛ nú mǐ?

¹¹ Jexóva sɔ́ nǔ nú kplékplé nɔví lɛ́ tɔn mǐtɔn bónú é ná d’alɔ mǐ bónú mǐ ná dɛ. Tuuntuun ɖɔ “kplékplé nɔví lɛ́ tɔn [mǐtɔn] . . . lɔ ɖo wǔvɛ́ ɖokpó ɔ lɛ́ se wɛ” kɔ́kɔ́ɖɔ́kɔ́ nɔ ná gǎnjɛwú mǐ ɖɔ mǐ kún ɖo mǐɖokpó ó. (1 Pi. 5:9) Nǔgbó ɔ, mǐ sixú kú d’é jí ɖɔ ninɔmɛ ɖěbǔ ná bo xwetɔ́n ɖo nukɔn mǐtɔn ɔ, mɛ ɖěvo lɛ́ ko ɖí xwi xá ninɔmɛ mɔ̌hun, bo ko dɛ. Énɛ́ xlɛ́ ɖɔ mǐ lɔ sixú dɛ!—Mɛ. 14:22.

12. Nɛ̌ nǔɖitɔ́ hǎtɔ́ mǐtɔn lɛ́ ka sixú d’alɔ mǐ gbɔn? Étɛ́ mǐ ka sixú wa nú yě? (2 Kɔlɛ́ntinu lɛ́ 1:3, 4)

¹² Ényí mǐ ɖo didɛ wɛ ɔ, nǔɖitɔ́ hǎtɔ́ mǐtɔn lɛ́ sixú dó wǔsyɛ́n lanmɛ nú mǐ. Mɛsɛ́dó Pɔ́lu mɔ ɖɔ nǔgbó wɛ xó énɛ́ nyí. É nɔ ɖe nǔsumɛnukúnmɛ xlɛ́ mɛ ɖěɖěe d’alɔ ɛ hwenu e è sú i dó xwé ɖé gbe lɛ́ é hwɛhwɛ gbɔn nyǐkɔ yětɔn lɛ́ ylɔ́ylɔ́ gblamɛ. Yě dó gbɔ nú Pɔ́lu, dó wǔsyɛ́n lanmɛ n’i, bo lɛ́ d’alɔ ɛ ɖo ali tawun tawun lɛ́ nu. (Filí. 2:25, 29, 30; Koló. 4:10, 11) Égbé ɔ, mǐ lɔ sixú ɖu vǐví nǔ ɖokpó ɔ lɛ́ tɔn. Ényí mǐ ɖó hudó alɔdó tɔn bá dɛ ɔ, nɔví súnnu kpó nɔví nyɔ̌nu kpó mǐtɔn lɛ́ nɔ ɖo fínɛ́ nú mǐ; ényí yě lɔ ɖó hudó alɔdó tɔn ɔ, mǐ lɔ nɔ ɖo fínɛ́ nú yě.—Xa 2 Kɔlɛ́ntinu lɛ́ 1:3, 4.

13. Étɛ́ ka d’alɔ nɔví nyɔ̌nu e nɔ nyí Maya é bɔ é dɛ?

¹³ Kplékplé nɔví lɛ́ tɔn nyí jɔtɛn wǔsyɛ́n dó lanmɛ nú mɛ tɔn ɖaxó ɖé nú nɔví nyɔ̌nu e nɔ nɔ Russie, bo nyí Maya é. È kíjé xwé tɔn ɖo 2020, bɔ nukɔnmɛ ɔ, è kplá ɛ yi hwɛ nukɔn ɖó é ɖɔ xó dó nǔɖiɖi tɔn wú nú mɛ ɖěvo lɛ́ wútu. Maya ɖɔ: “Hwenu e agbɔ̌n kpé mì, ado hu mì, bɔ wǔ lɛ́ kú mì é ɔ, nɔví súnnu lɛ́ kpó nɔví nyɔ̌nu lɛ́ kpó nɔ ylɔ́ mì, lobo nɔ lɛ́ wlán nǔ sɛ́dó mì, bo nɔ ná gǎnjɛwú mì ɖɔ émí yí wǎn nú nyi. Un tuun tɛgbɛ ɖɔ nɔví súnnu kpó nɔví nyɔ̌nu kpó ce lɛ́ yí wǎn nú mì, bo lɛ́ nyí xwédo ce. Amɔ̌, bɛ́ sín 2020 ɔ, un wá kú d’é jí tawun.”

14. Nɛ̌ mǐ ka sixú ɖu alɔdó nǔɖitɔ́ hǎtɔ́ mǐtɔn lɛ́ tɔn sín le gbɔn, ée mǐ ná ɖo didɛ wɛ é? (Kpɔ́n ɖiɖe ɔ lɔmɔ̌.)

¹⁴ Nǔ e a sixú wa é. Hwenu e a ná ɖo didɛ wɛ é ɔ, ma sɛ yi zɔ nú nɔví súnnu kpó nɔví nyɔ̌nu kpó towe lɛ́ ó. Ma xo nǔ kpɔ́n dó alɔdó mɛxó agun tɔn lɛ́ tɔn byɔ́byɔ́ wú ó. Yě sixú cí “fí e è nɔ bɛ yɛ ɖe bo nɔ gló jɔhɔn é ɖɔhun; yě ná cí fí e è nɔ bɛ sin ɖe é ɖɔhun.” (Eza. 32:2) Lɛ̌ flín ɖɔ klisánwun hǎtɔ́ towe lɛ́ lɔ ɖo wǔvɛ́ lɛ́ nu dɛ ɖe wɛ. Xomɛnyínyɔ́nú wiwa nú mɛ e ɖo hudó mɛ é ɖé ná d’alɔ we bɔ a ná kpo ɖo jlɛ̌ jí, bo lɛ́ kpo ɖo linlin ɖagbe ɖó wɛ, ée a ná ɖo tagba hwiɖésúnɔ tɔn nu dɛ ɖe wɛ é.—Mɛ. 20:35.

NUKÚNÐÍÐÓ MǏTƆN

15. Étɛ́ nukúnɖíɖó ka ko wa nú gbejínɔtɔ́ lɛ́, káká jɛ Jezu jí? (Eblée lɛ́ 12:2)

¹⁵ Jexóva ko ná mǐ nukúnɖíɖó e ɖó gǎnjɛwú é ɖé dó d’alɔ mǐ nú mǐ ná dɛ. (Hlɔ̌. 15:13) Flín ɖɔ Jezu dɛ ɖo azǎn e vɛ́ wǔ hú gǎn n’i ɖo gbɛzán tɔn ayǐkúngban jí tɔn ɔ mɛ é nu ɖó nukúnɖíɖó e é ɖó é wú. (Xa Eblée lɛ́ 12:2.) Jezu tuun ɖɔ gbejíninɔ émítɔn ná nɔ gǔdo nú cí klɔ́klɔ́ sín nyǐkɔ Jexóva tɔn wú. Jezu lɛ́ ɖo nukún ɖó wɛ bo ná xo kpóɖó nú Tɔ́ tɔn, bɔ ɖo nukɔnmɛ ɔ, é ná wa sinsɛnzɔ́ xá nɔví tɔn lɛ́ ɖo Axɔ́súɖuto jǐxwé tɔn ɔ mɛ. Mɔ̌ ɖokpó ɔ, nukúnɖíɖó gbɛ ninɔ káká sɔ́yi ɖo gbɛ yɔ̌yɔ́ Mawu tɔn mɛ tɔn e mǐ ɖó é nɔ d’alɔ mǐ bɔ mǐ nɔ dɛ ɖo wǔvɛ́ ɖěbǔ e gbɛ Satáan tɔn nɔ dó nú mǐ é nu.

16. Nɛ̌ nukúnɖíɖó ka d’alɔ nɔví nyɔ̌nu ɖé b’ɛ dɛ gbɔn? Étɛ́ xó e é ɖɔ é ka kplɔ́n we?

¹⁶ Kpɔ́n lěe nukúnɖíɖó Axɔ́súɖuto ɔ tɔn d’alɔ nɔví nyɔ̌nu e nɔ nɔ Russie, bo nɔ nyí Alla, bɔ è wlí asú tɔn dó gan, bɔ é ɖo te kpɔ́n hwenu e è ná ɖɔ hwɛ tɔn é gbɔn é. Ée nǔ énɛ́ jɛ é ɔ, Alla ɖɔ: “Ðɛ xixo dó nukúnɖíɖó sɔgúdo tɔn mǐtɔn wú kpó tamɛ linlin d’é jí kpó zɔ́n bɔ awakanmɛ sɔ́ kú mì zɛ xwé wú ǎ. Un mɔ nukúnnú jɛ wú ɖɔ xó bǐ kún ko fó ó. Jexóva ná ɖó ɖuɖéjí, bɔ mǐ lɔ ná ɖó ɖuɖéjí.”

17. Nɛ̌ mǐ ka sixú ɖe xlɛ́ ɖɔ nukúnɖíɖó mǐtɔn e jínjɔ́n Biblu jí é su nukún mǐtɔn mɛ gbɔn? (Kpɔ́n ɖiɖe ɔ lɔmɔ̌.)

¹⁷ Nǔ e a sixú wa é. Nɔ ba hwenu bo nɔ lin tamɛ dó nukúnɖíɖó ɖaaɖagbe e Jexóva sɔ́ ɖó sɛxwetɛn nú mǐ é jí. Nɔ kpɔ́n hwiɖée sɛ́dó gbɛ yɔ̌yɔ́ Mawu tɔn mɛ, nɔ lin tamɛ dó nyɔ̌ná ɖěɖěe mǐ ná mɔ lɛ́ é jí. Mɔ̌ mɛ ɔ, wǔvɛ́ ɖěbǔ e nu a sixú dɛ ɖe din é ná cí “hwenu kpɛɖé tɔn” ɖɔhun bo ná lɛ́ “hwɛ́n nǔ káká ɖé ǎ.” (2 Kɔ. 4:17) Gɔ́ ná ɔ, wa nǔ e wú a kpé é bo jlá nǔɖiɖi towe mɛ ɖěvo lɛ́. Dǒ nukún lěe xwi ɖíɖí xá gbɛ Satáan tɔn sín wǔvɛ́ lɛ́ ma tuun linlin e Mawu ɖó nú sɔgúdo é ná ko cí nú yě é mɛ kpɔ́n. A tlɛ sixú gbɔn xóɖɔɖókpɔ́ kléwún ɖé sín yɛkan mɛ dó bló bɔ nukúnɖíɖó Axɔ́súɖuto ɔ tɔn mǐtɔn ná dɔn yě.

18. Étɛ́wú mǐ ka sixú ɖeji dó akpá Jexóva tɔn lɛ́ wú?

¹⁸ Ée Jɔbu dɛ ɖo mɛtɛ́nkpɔ́n gěgé nu b’ɛ kpa ɛ gúdo é ɔ, é ɖɔ nú Jexóva ɖɔ: “Un mɔ ɖɔ a kpé nǔ bǐ wú; un tuun ɖɔ a nɔ bló nǔ e jló we ɔ bǐ.” (Jɔb. 42:2) Jɔbu kplɔ́n ɖɔ nǔ ɖěbǔ kún sixú gbo kpo nyi ali jí nú linlin Jexóva tɔn bónú é ná gɔn jijɛnu ó. Nǔgbó énɛ́ sixú ná hlɔ̌nhlɔ́n mǐ hwenu e mǐ ná ɖo didɛ wɛ é. Ði kpɔ́ndéwú ɔ, mǐ ní ɖɔ ɖɔ awakanmɛ kú nǎwe e ɖo azɔn jɛ wɛ é ɖé, ɖó dotóo mɔ̌kpán ko tɛ́n kpɔ́n bá gbɔ azɔn e jɛ wɛ é ɖe é n’i, yě mɛ ɖě ka kpé wú ǎ. Amɔ̌, dotóo e ko mɔ nǔ kpɔ́n, bo lɛ́ ɖó jiɖe é ɖé mɔ azɔn ɔ, bo tínmɛ lěe é ná gbɔ n’i gbɔn é n’i; nyɔ̌nu ɔ sín ayi ná j’ayǐ ényí é ná bo tlɛ byɔ́ ɖɔ é ná bló táan kpɛɖé cóbɔ azɔn tɔn ná xwɛ ɔ nɛ́. É ná bɔ wǔ n’i hú gǎn din bɔ é ná kpo ɖo didɛ ɖo azɔn tɔn nu wɛ, ɖó é tuun ɖɔ é ná gbɔ. Mɔ̌ ɖokpó ɔ, gǎn e mǐ gán jɛ nukúnɖíɖó e mǐ ɖó ɖɔ palaɖísi ɔ ná wá é wú é nɔ d’alɔ mǐ, bɔ mǐ nɔ dɛ.

19. Étɛ́ sín hudó mǐ ka ɖó bá dó dɛ?

¹⁹ Lěe mǐ ko mɔ gbɔn é ɔ, Jexóva nɔ d’alɔ mǐ bɔ mǐ nɔ dɛ ɖo mɛtɛ́nkpɔ́n mǐtɔn lɛ́ nu gbɔn ɖɛ, Xó tɔn, nǔɖitɔ́ hǎtɔ́ mǐtɔn lɛ́ kpó nukúnɖíɖó mǐtɔn kpó gblamɛ. Ényí mǐ zán nǔ énɛ́ lɛ́ bǐ mlɛ́mlɛ́ ɔ, Jexóva ná d’alɔ mǐ bɔ mǐ ná gbɔn wǔvɛ́ ɖěbǔ e mǐ sixú kpan nukɔn é mɛ, káká jɛ hwenu e gbɛ Satáan tɔn sín wǔvɛ́ lɛ́ bǐ ná blí bú é.—Filí. 4:13.