Ali ɖagbe hú gǎn e nu è sixú ɖí xwi xá nǔagɔwaxámɛ ɖe é

1-2. Nɛ̌ mɛ gěgé ka nɔ wa nǔ gbɔn dó nǔagɔwaxámɛ wú? Nǔ tɛ́ lɛ́ mǐ ka sixú kanbyɔ́ mǐɖée d’é wú?

MǏ ÐO gbɛ nɔ wɛ ɖo gbɛ e mɛ nǔagɔwiwa kpa zinkpo ɖe é ɖé mɛ. È nɔ wa nǔ xá mɛ lɛ́ ɖo ali agɔ nu ɖó hwɛjijɔ gěgé wú, ɖi ninɔmɛ yětɔn ɖo akwɛ́ linu, mɛ̌ yětɔn, akɔ yětɔn, alǒ sinmɛ agbaza tɔn yětɔn. Yě nɔ se xɔxɔ ninɔmɛ ayǐ mɛ tɔn sín tagba e acɛkpatɔ́ e akwɛ́ kɛ́ɖɛ́ wɛ nɔ gbo vɛ̌ lɛ́ é kpó gǎn nǔɖuɖonǔmɛtɔ́ lɛ́ kpó dɔn nyi ayǐ, alǒ bló b’ɛ lɛ́ nylá d’é jí lɛ́ é tɔn. Nǔagɔwaxámɛ énɛ́ lɛ́ kpó ɖěvo lɛ́ kpó nɔ wa nǔ dó mǐ bǐ wú; é sixú nyí tlɔlɔ, alǒ gbɔ.

² É sɔ́ kpácá mɛ ǎ ɖɔ mɛ gěgé nɔ sin xomɛ, ɖó nǔagɔwaxámɛ e yě nɔ mɔ ɖo gbɛ ɔ mɛ ɖo égbé é wú. Gbɛ e mɛ ayijayǐ ɖe, bɔ è nɔ lɛ́ wa nǔ xá mɛ kpó hwɛjijɔ kpó ɖe é mɛ wɛ mǐ bǐ nɔ ba ná nɔ. Mɛ ɖé lɛ́ nɔ byɔ́ gbɛ̌ta e ɖo gǎn dó wɛ bo ná bló bónú nǔ lɛ́ ná kpɔ́n te lɛ́ é mɛ. Yě nɔ d’alɔ wěma mɛ, bo nɔ byɔ́ nǔ bǔnɔ ɖé acɛkpikpa ɔ, nɔ xo ama, bo nɔ lɛ́ nɔ gǔdo nú toxóɖɔtɔ́ ɖěɖěe d’akpá ɖɔ émí ná tɔ́n ahwan nǔagɔwaxámɛ lɛ́ é. É ɖo mɔ̌ có, è kplɔ́n mǐ mɛ klisánwun lɛ́ ɖɔ mǐ kún “nyí gbɛ ɔ tɔn [ó],” bo lɛ́ kplɔ́n mǐ ɖɔ mǐ ní nɔ te kpɔ́n Axɔ́súɖuto Mawu tɔn bónú é ná sú kún dó nú nǔagɔwaxámɛ lɛ́ bǐ. (Jaan 17:16) É ɖo mɔ̌ có, ényí mǐ mɔ bɔ è ɖo nǔ agɔ wa xá mɛɖé wɛ ɔ, xɛsi sixú ɖi mǐ bɔ xomɛ tlɛ sixú sin mǐ. Mǐ sixú kanbyɔ́ mǐɖée ɖɔ: ‘Étɛ́ un ka sixú wa? Un ka sixú wa nǔɖé dó nǔagɔwaxámɛ wú din a?’ Bá dó ná xósin nǔkanbyɔ́ énɛ́ lɛ́ tɔn ɔ, mi nú mǐ ní bɛ́ kpó lěe nǔ nɔ cí nú Jexóva kpó Jezu kpó dó nǔagɔwaxámɛ wú é gbígbéjé kpɔ́n kpó.

JEXÓVA KPÓ JEZU KPÓ GBƐ́ WǍN NÚ NǓAGƆWAXÁMƐ

3. Étɛ́wú è ka sixú mɔ nǔ jɛ xomɛ e nɔ sin mǐ ɖó nǔagɔwaxámɛ wú é mɛ? (Ezayíi 5:7)

³ Biblu ná mǐ hwɛjijɔ e wú nǔagɔwaxámɛ hɛn ɔ, é ná vɛ́ nú mǐ é. É tínmɛ ɖɔ Jexóva dá mǐ ɖo akpajlɛ́ éɖésúnɔ tɔn mɛ, bo ka “yí wǎn nú hwɛjijɔ kpó nǔjlɔ́jlɔ́wiwa kpó.” (Ðɛh. 33:5; Bǐb. 1:26) É nɔ wa nǔ agɔ gbeɖé ǎ, é ka nɔ lɛ́ ba ɖɔ mɛ ɖěbǔ ní wa nǔ gbɔn mɔ̌ ǎ! (Sɛ́n. 32:3, 4; Micée 6:8; Zak. 7:8, 9) Ði kpɔ́ndéwú ɔ, ɖo gbeyíɖɔ Ezayíi hwenu ɔ, Jexóva se “gbɛvíhan” Izlayɛ́li ví mɔ̌kpán e táfú wɛ to yětɔn mɛ nu lɛ́ ɖe lɛ́ é tɔn. (Xa Ezayíi 5:7.) Jexóva dɔn tó nú mɛ ɖěɖěe wɔn ya nú Sɛ́n tɔn azɔn mɔ̌kpán, bo wa nǔ agɔ xá mɛ ɖěvo lɛ́ é.—Eza. 5:5, 13.

4. Nɛ̌ nǔ ka cí nú Jezu hwenu e è wa nǔ agɔ xá nya ɖé é? (Kpɔ́n ɖiɖe ɔ lɔmɔ̌.)

⁴ Jexóva ɖɔhun ɔ, Jezu yí wǎn nú nǔjlɔ́jlɔ́wiwa, bo gbɛ́ wǎn nú nǔagɔwaxámɛ. Ðo ninɔmɛ ɖé mɛ ɖo sinsɛnzɔ́ tɔn ayǐkúngban jí tɔn ɔ hwenu ɔ, é mɔ nya e ɖó blɔ̌ é ɖé, alɔkúnánɔ wɛ n’i. Jezu ba ná d’alɔ ɛ, amɔ̌, sinsɛngán nǔbláwǔmakúnúmɛtɔ́ lɛ́ ba ɖěbǔ ǎ. Gbɔjɛzán sín sɛ́n e yě nɔ hɛn gángángán é ɖu ayi mɛ nú yě hú alɔ dídó nya énɛ́ e ɖě ma ɖo ɖě ná ǎ é. Nɛ̌ nǔ ka cí nú Jezu dó lěe yě wa nǔ gbɔn é wú? “Wǔ kú i tawun ɖó ayi yětɔn syɛ́n wútu.”—Mak. 3:1-6.

5. Étɛ́ mǐ ka ɖó ná flín dó xomɛ e sixú sin mǐ dó nǔagɔwaxámɛ ɖé wú é wú?

⁵ Ðó xomɛ nɔ sin Jexóva kpó Jezu kpó bǐ dó nǔagɔwaxámɛ wú wútu ɔ, é nylá ɖɔ nǔ ní cí mɔ̌ nú mǐ lɔmɔ̌ ǎ. (Efɛ́. 4:26) É ɖo mɔ̌ có, mǐ ɖó ná flín ɖɔ ényí mǐ ná bo tlɛ sin xomɛ ɔ, é kún ná ɖe ɖɛ nǔagɔwaxámɛ ó. Nǔgbó ɔ, xomɛ sinsin dín, alǒ xomɛsin e jí mǐ ma ɖu ɖe ǎ é sixú wa nǔ dó mǐ wú ɖo lěe nǔ nɔ cí nú mɛ é kpó agbaza kpó lixo. (Ðɛh. 37:1, 8; Ja. 1:20) Nɛ̌ mǐ ka ɖó ná ɖí xwi xá nǔagɔwaxámɛ gbɔn lo? Kpɔ́ndéwú Jezu tɔn sixú kplɔ́n nǔ mǐ.

LĚE JEZU ÐÍ XWI XÁ NǓAGƆWAXÁMƐ GBƆN É

6. Nǔagɔwaxámɛ tɛ́ lɛ́ ka gba kpé hwenu e Jezu ɖo ayǐkúngban jí é? (Kpɔ́n ɖiɖe ɔ lɔmɔ̌.)

⁶ Nǔagɔwaxámɛ gěgé wɛ Jezu mɔ hwenu e é ɖo ayǐkúngban jí é. É mɔ lěe sinsɛngán lɛ́ nɔ gbídí kɔ nú mɛ lɛ́ gbɔn é. (Mat. 23:2-4) É tuun lěe acɛkpatɔ́ Hlɔ̌ma tɔn lɛ́ nɔ wa nǔ xá mɛ lɛ́ kpó hunnylánylá kpó gbɔn é. Jwifu gěgé ɖo biba wɛ vɛ́návɛ́ná bo ná jɛ yěɖée sí sín Hlɔ̌ma sí. Mɛ ɖé lɛ́, ɖi gǔfɔ́ntɔ́ lɛ́ ɖo gbesisɔmɛ bo ná fun ahwan dó ta tɔn mɛ. É ɖo mɔ̌ có, Jezu ɖó gbɛ̌ta lɛ́ ayǐ alǒ nɔ gǔdo nú yě bónú nǔ lɛ́ ní dó húzú ǎ. Hwenu e Jezu se ɖɔ mɛ lɛ́ ɖo wě ɖe wɛ bo ná sɔ́ émí axɔ́sú é ɔ, é hɔn sín tɛ́ntin yětɔn.—Jaan 6:15.

7-8. Étɛ́wú Jezu ma ka tɛ́n kpɔ́n bo sú kún dó nú nǔagɔwaxámɛ hwenu e é ɖo ayǐkúngban jí é ǎ? (Jaan 18:36)

⁷ Hwenu e Jezu ɖo ayǐkúngban jí é ɔ, é tɛ́n kpɔ́n bá w’azɔ̌ ɖó kpɔ́ xá tuto toxóɖiɖɔ tɔn hwetɔnnu tɔn lɛ́ bá dó wínnyɔ́ ɖɔ nú nǔagɔwaxámɛ ǎ. Étɛ́wú? É tuun ɖɔ gbɛtɔ́ lɛ́ kún ɖó acɛ kpó nǔwúkpíkpé ɔ kpó bá kp’acɛ nú yěɖée ó. (Ðɛh. 146:3; Jel. 10:23) Yě ka lɛ́ ɖó nǔwúkpíkpé ɔ bá hu ɖɔ nú nǔagɔwaxámɛ ǎ. Satáan Awǒvi sín acɛ mɛ wɛ gbɛ ɔ ɖe, nǔɖíɖó gbigbɔ tɔn mɛhutɔ́ e nɔ zán acɛ tɔn dó flɔ́ zo dó glɔ̌ nú nǔagɔwaxámɛ é wɛ n’i. (Jaan 8:44; Efɛ́. 2:2) Gɔ́ ná ɔ, hwɛhuhu gbaza mǐtɔn zɔ́n bɔ gbɛtɔ́ e tlɛ ɖó linlin ɖagbe hú gǎn bá wa nǔ jlɔ́jlɔ́ hwebǐnu lɛ́ é nɔ kpé wú ǎ.—Nǔt. 7:20.

⁸ Jezu tuun ɖɔ Axɔ́súɖuto Mawu tɔn kɛ́ɖɛ́ jɛ́n ná wínnyɔ́ ɖɔ nú nǔagɔwaxámɛ bǐ mlɛ́mlɛ́. Hwɛjijɔ énɛ́ wú wɛ Jezu zán hwenu tɔn kpó hlɔ̌nhlɔ́n tɔn kpó, bo nɔ “ɖo wɛn ɖagbe Axɔ́súɖuto Mawu tɔn tɔn jlá wɛ.” (Luk. 8:1) É ná jiɖe “mɛ e nǔjlɔ́jlɔ́wiwa sín xovɛ́ nɔ sin, bɔ kɔ tɔn nɔ lɛ́vɔ́ xú lɛ́ é” ɖɔ nǔɖuɖonǔmɛ kpó nǔagɔwaxámɛ kpó ná wá vivɔnu. (Mat. 5:6; Luk. 18:7, 8) É ɖo mɔ̌ có, hǔzúhúzú e gbɛtɔ́ lɛ́ ná bló é wɛ ná zɔ́n bɔ nǔ ná nyí mɔ̌ ǎ, loɔ, acɛkpikpa Mawu tɔn e ɖo jǐxwé, bo ma “nyí gbɛ élɔ́ tɔn ǎ” é wɛ ná nyí tɔn bɔ nǔ ná nyí mɔ̌.—Xa Jaan 18:36.

XWEDÓ KPƆ́NDÉWÚ JEZU TƆN HWENU E A ÐO XWI ÐÍ XÁ NǓAGƆWAXÁMƐ WƐ É

9. Étɛ́ ka zɔ́n bɔ a kú d’é jí ɖɔ Axɔ́súɖuto Mawu tɔn kɛ́ɖɛ́ jɛ́n ná wínnyɔ́ ɖɔ nú nǔagɔwaxámɛ bǐ?

⁹ Égbé ɔ, mǐ tlɛ nɔ mɔ nǔagɔwaxámɛ hú ɖěɖěe Jezu mɔ hwenu e é ɖo ayǐkúngban jí é. Amɔ̌, Satáan kpó gbɛtɔ́ hwɛhutɔ́ e ɖo acɛ tɔn mɛ lɛ́ é kpó wɛ kpo ɖo ɖɔ nǔagɔwaxámɛ tɔn nyí wɛ ɖo “azǎn gǔdo gúdo tɔn” élɔ́ lɛ́ mɛ. (2 Tim. 3:1-5, 13; Nǔɖe. 12:12) Jezu ɖɔhun ɔ, mǐ tuun ɖɔ Axɔ́súɖuto Mawu tɔn kɛ́ɖɛ́ wɛ ná hu ɖɔ nú nǔagɔwaxámɛ. Ðó mǐ nɔ nɔ gǔdo nú Axɔ́súɖuto énɛ́ bǐ mlɛ́mlɛ́ wútu ɔ, mǐ nɔ gbɛ́ ɖɔ mǐ kún ná ɖ’alɔ ɖo nǔvɛ́mɛwú zɔnlin e gbɛ élɔ́ nɔ ɖi é, ama e é nɔ xo é kpó gǎn ɖěvo e é nɔ dó bá dó li fɛn nú nǔagɔwaxámɛ é mɛ ó. Kpɔ́n nǔ e jɛ dó nɔví nyɔ̌nu e nɔ nyí Stacya é jí é. Cóbónú Stacy ná kplɔ́n nǔgbó ɔ ɔ, é nɔ gɔ́ so nú mɛ lɛ́ hwɛhwɛ bɔ yě nɔ dó gǎn bónú nǔ lɛ́ ná húzú. Amɔ̌, é wá jɛ nǔ xo kpɔ́n dó nǔ e wa wɛ é ɖe é wú jí. É ɖɔ: “Ðo gǔfínfɔ́n lɛ́ hwenu ɔ, un nɔ kanbyɔ́ nyiɖée ɖɔ akpá ɖagbe ɔ xwé jɛ́n un ka ɖe a jí. Din e un nɔ nɔ gǔdo nú Axɔ́súɖuto Mawu tɔn é ɔ, un tuun ɖɔ akpá ɖagbe ɔ xwé wɛ un ɖe. Un tuun ɖɔ Jexóva ná jɛ hun dó mɛ ɖěbǔ e è gbídí kɔ ná é jí hú lěe nyɛ sixú bló gbɔn é.”—Ðɛh. 72:1, 4.

10. Ali tɛ́ nu gbɛ̌ta ɖěɖěe nɔ jɛ hun dó hǔzúhúzú lɛ́ jí é ma ka nɔ wa nǔ sɔgbe xá nǔ e Jezu ɖɔ ɖo Matíe 5:43-48 mɛ é ǎ ɖe? (Kpɔ́n ɖiɖe ɔ lɔmɔ̌.)

¹⁰ Gbigbɔ jlokoko mɛ ninɔ kpó hunnylánylá kpó tɔn, éé sɔ́ ta kpɔ́ndéwú Jezu tɔn kpó nǔkplɔ́nmɛ tɔn lɛ́ kpó é wɛ nɔ dó gesí gbɛ̌ta ɖěɖěe nɔ jɛ hun dó hǔzúhúzú lɛ́ jí ɖo gbɛ élɔ́ mɛ é hwɛhwɛ. (Efɛ́. 4:31) Nɔví súnnu ɖé nɔ nyí Jeffrey bo ɖɔ: “Un tuun ɖɔ cɛ́jú mɛ jɛ́n nǔvɛ́mɛwú zɔnlin e é cí ɖɔ fífá mɛ zun ɖe wɛ è ɖe ɖɔhun lɛ́ é sixú wá húzú alǎnnúwiwa kpó ajojija kpó.” Jezu ka kplɔ́n mǐ ɖɔ mǐ ní nɔ wa nǔ xá mɛ lɛ́ bǐ kpó wǎnyíyí kpó, káká jɛ mɛ ɖěɖěe nɔ klán gbe xá mǐ, alǒ nɔ dó ya nú mǐ lɛ́ é jí. (Xa Matíe 5:43-48.) Mǐ mɛ klisánwun lɛ́ nɔ wa nǔ e wú mǐ kpé é bǐ bo nɔ ny’alɔ nú nǔ ɖěbǔ e ma sɔgbe xá kpɔ́ndéwú e Jezu sɔ́ ɖ’ayǐ nú mǐ é ǎ é.

11. Étɛ́ ka sixú tɛ́n kán e mǐ kán ɖ’é jí bo ma ná nɔ gǔdo nú gbɛ̌ta ɖěɖěe nɔ jɛ hun dó hǔzúhúzú lɛ́ jí é ǎ é kpɔ́n?

¹¹ Mǐ tuun ɖɔ Axɔ́súɖuto Mawu tɔn ná sú kún dó nú nǔagɔwaxámɛ bǐ mlɛ́mlɛ́ có, é sixú vɛ́ wǔ nú mǐ bɔ mǐ ná xwedó kpɔ́ndéwú Jezu tɔn hwenu e è wa nǔ agɔ xá mǐ é. Kpɔ́n nǔ e jɛ dó Janiya wú é; é se wǔvɛ́ ɖó mɛ ɖe ɖó vo ɖo mɛ mɛ wú. É yí gbe ɖɔ: “Xomɛ sin mì gba dó, akpɔ lɛ́ ɖó mì, bɔ un ba ná ba hlɔn nǔagɔwaxámɛ ɔ tɔn. Énɛ́ gúdo ɔ, un lin tamɛ dó gǔdo ninɔ nú gbɛ̌ta e nɔ zun nǔvɛ́mɛwú zɔnlin ɖó akɔ kínklán kpó mɛ ɖe ɖó vo ɖo mɛ mɛ kpó wú é jí. Un lin ɖɔ ali ɖagbe e nu un sixú ɖe xomɛsin ce xlɛ́ ɖe é ɖokpó nɛ́.” Amɔ̌ nukɔnmɛ ɔ, Janiya wá ɖ’ayi wú ɖɔ émí ɖó ná bló hǔzúhúzú lɛ́. É ɖɔ: “Un ɖo tɛn ná mɛ ɖěvo lɛ́ wɛ, bɔ yě ɖo acɛ ɖó dó linlin ce jí wɛ nú má ɖeji dó gbɛtɔ́ wú, ní ma nyí dó Jexóva wú ó. Un wá gbeta ɔ kɔn bo sɛ́n kan nú nǔwaɖókpɔ́ xá gbɛ̌ta ɔ bǐ mlɛ́mlɛ́.” Mǐ ɖó ná ɖ’ayi te bo ná lɔn nú xomɛsin nǔjlɔ́jlɔ́wiwa tɔn ɖěbǔ ná zɔ́n bónú mǐ ná gɔn wǔ ɖó zɔ bǐ mlɛ́mlɛ́ nú toxóɖiɖɔ gbɛ élɔ́ tɔn kpó tagba gbɛ élɔ́ tɔn lɛ́ kpó ǎ.—Jaan 15:19.

12. Étɛ́wú é ka nyí nǔnywɛ́nú ɖɔ mǐ ní nɔ cyán nǔ ɖěɖěe mǐ nɔ xa, nɔ ɖótó, bo nɔ lɛ́ kpɔ́n lɛ́ é?

¹² Étɛ́ ka sixú d’alɔ mǐ bɔ mǐ ná ɖu ɖo xomɛ e sixú sin mǐ ɖó nǔagɔwaxámɛ ɖé wú é jí? Mɛ gěgé mɔ ɖɔ nǔ e yě nɔ xa lɛ́ é, ɖótó lɛ́ é kpó nǔ e yě nɔ kpɔ́n lɛ́ é kpó cyáncyán nɔ d’alɔ. Nǔagɔwaxámɛ e mɛ lɛ́ nɔ sɔ́ ɖó tɛn Ɛntɛnɛ́ti tɔn e jí è nɔ zun xɔ́ntɔn ɖe é ɖé lɛ́ jí é nɔ báɖá tawun bo nɔ flɔ́ zo dó glɔ̌ nú gbɛ̌ta ɖěɖěe nɔ jɛ hun dó hǔzúhúzú lɛ́ jí é. Hwɛhwɛ ɔ, ɖɔnúesegɔnu lɛ́ nɔ xwlé nǔ e ma sɔgbe bǐ ǎ lɛ́ é mɛ. Mǐ ná bo tlɛ ɖótó nǔ e jɛ ɖo to é ɖé dó nǔ agɔ e è wa xá mɛ nǔgbó nǔgbó é ɖé wú ɔ, tamɛ linlin d’é jí kpó xó ɖiɖɔ d’é wú xá mɛ ɖěvo lɛ́ kpó ka ná d’alɔ mǐ dóó a? Ényí mǐ nɔ zán hwenu gěgé ɖo nǔ mɔ̌hun lɛ́ kɔn ɔ, akpɔ sixú wá ɖó mǐ, alǒ awakanmɛ sixú wá kú mǐ dó wǔvɔ́. (Nǔx. 24:10) Nyla hú bǐ ɔ, ayi mǐtɔn sixú wá gosín nǔ ɖokpó e ná ɖe ɖɛ nǔagɔwaxámɛ lɛ́ bǐ mlɛ́mlɛ́ é jí, énɛ́ wɛ nyí Axɔ́súɖuto Mawu tɔn.

13. Nɛ̌ Biblu xixa gbe bǐ gbe sín walɔ ɖagbe e mǐ ɖó é ka sixú d’alɔ mǐ bɔ mǐ ná kpo ɖo linlin ɖagbe ɖó wɛ hwenu e mǐ mɔ nǔagɔwaxámɛ é gbɔn?

¹³ Ényí mǐ ɖó walɔ ɔ, bo nɔ xa Biblu gbe bǐ gbe, bo nɔ lɛ́ lin tamɛ d’é jí ɔ, é sixú d’alɔ mǐ bɔ mǐ ná ɖí xwi xá nǔagɔwaxámɛ. Nɔví nyɔ̌nu ɖé nɔ nyí Alia, bɔ nǔ agɔ e è wa xá mɛ e ɖo xá tɔn mɛ lɛ́ é dó ayimɛya n’i tawun. É cí ɖɔ mɛ ɖěɖěe nɔ nǔagɔwaxámɛ ɔ nu bo wa lɛ́ é wa bɔ é dɔn. É ɖɔ: “Un ɖó ná júnjɔ́n ayǐ bo kanbyɔ́ nyiɖée ɖɔ: ‘Un ka kú d’é jí dóó ɖɔ Jexóva ná ɖe ɖɛ tagba énɛ́ lɛ́ a?’ Hwenɛ́nu wɛ un xa Jɔbu 34:22-29. Wěmafɔ énɛ́ lɛ́ flín mì ɖɔ mɛ ɖěbǔ kún sixú hɔn hwlá dó Jexóva ó. Éɖokpónɔ wɛ ɖó linlin e nǔ bǐ bɔ ɖ’é wú é dó nǔjlɔ́jlɔ́wiwa wú, gɔ́ ná ɔ, éɖokpónɔ wɛ ná ɖe ɖɛ nǔ lɛ́ bǐ mlɛ́mlɛ́.” É ɖo mɔ̌ có, ée mǐ ɖo te kpɔ́n Axɔ́súɖuto Mawu tɔn b’ɛ ná hɛn nǔjlɔ́jlɔ́wiwa adodwé ɔ wá é ɔ, mǐ ɖó ná ɖí xwi xá nǔagɔwaxámɛ din hwɛ̌. Gbɔn nɛ̌ é?

NǓ E MǏ SIXÚ WA DÓ NǓAGƆWAXÁMƐ WÚ DIN É

14. Étɛ́ mǐ ka sixú wa bo ma ná gɔ́ so nú nǔagɔwaxámɛ gbɛ élɔ́ tɔn lɛ́ ǎ? (Kolósinu lɛ́ 3:10, 11)

¹⁴ Mǐ sixú nɔ ma ɖó acɛ dó nǔ agɔ e mɛ ɖěvo lɛ́ nɔ wa lɛ́ é jí, amɔ̌, mǐ hɛn ɔ mǐ ná ɖó acɛ dó nǔ e mǐɖésúnɔ nɔ wa lɛ́ é jí. Lěe mǐ ko ɖɔ gbɔn wá yi é ɔ, mǐ nɔ xwedó kpɔ́ndéwú Jezu tɔn gbɔn wǎnyíyí ɖiɖexlɛ́ gblamɛ. Wǎnyíyí mɔ̌hun sixú sísɛ́ mǐ bɔ mǐ ná wa nǔ xá mɛ ɖěvo lɛ́ kpó sísí kpó, káká jɛ mɛ ɖěɖěe nɔ dɔn nǔagɔwaxámɛ nyi ayǐ lɛ́ é jí. (Mat. 7:12; Hlɔ̌. 12:17) Ényí mǐ nɔ wa nǔ xá mɛ lɛ́ bǐ kpó xomɛnyínyɔ́ kpó, bo nɔ lɛ́ wa nǔ jlɔ́jlɔ́ xá yě ɔ, é nɔ hun xomɛ nú Jexóva.—Xa Kolósinu lɛ́ 3:10, 11.

15. Étɛ́ nǔgbó Biblu tɔn e mǐ nɔ má xá mɛ lɛ́ é ka nɔ wa dó nǔagɔwaxámɛ e tíin din lɛ́ é wú?

¹⁵ Ali tají hú gǎn e nu mǐ sixú ɖí xwi xá nǔagɔwaxámɛ ɖe é wɛ nyí ɖɔ mǐ ná nɔ má nǔgbó Biblu tɔn lɛ́ xá mɛ ɖěvo lɛ́. Aniwú mǐ ka ɖɔ mɔ̌? Ðó “nǔtuuntuun dó Jexóva wú” sixú húzú mɛ e ko nyí hunnylámɔnɔ kpó alǎnnúwatɔ́ kpó ɖ’ayǐ é b’ɛ ná húzú xomɛnyɔ́tɔ́ kpó fífákanxotɔ́ kpó. (Eza. 11:6, 7, 9) Cóbónú nya e nɔ nyí Jemal é ná kplɔ́n nǔgbó ɔ ɔ, é xo kpóɖó nú gbɛ̌ta gǔfɔ́ntɔ́ lɛ́ tɔn ɖé bá dó dó gǎ gɔmɛ xá acɛkpikpa e é mɔ ɖɔ é nɔ hɛn gbɔ̌gúngún kangúngún mɛtɔn é. É ɖɔ: “È sixú hɛn mɛ lɛ́ gǎnnugǎnnu bónú yě ná húzú ǎ. È hɛn nyɛ gǎnnugǎnnu bónú un húzú ǎ, loɔ, nǔgbó Biblu tɔn e kplɔ́n wɛ un ɖe é wɛ húzú mì.” Nǔ e Jemal kplɔ́n é sísɛ́ ɛ b’ɛ ɖó gǔfínfɔ́n te. Ényí mɛ e nǔgbó Biblu tɔn lɛ́ húzú lɛ́ é ɖo kpɔ́ su wɛ ɔ, nǔagɔwaxámɛtɔ́ égbé tɔn lɛ́ ná ɖe kpo.

16. Étɛ́wú akpakpa ka nɔ sɔ́ we dó nukúnɖíɖó Axɔ́súɖuto ɔ tɔn jlájlá wú?

¹⁶ Jezu ɖɔhun ɔ, akpakpa nɔ sɔ́ mǐ ɖɔ mǐ ní ɖɔ nú mɛ ɖěvo lɛ́ ɖɔ Axɔ́súɖuto Mawu tɔn wɛ nyí nǔ ɖokpó e ná ɖó nǔ nǔagɔwaxámɛ nu bǐ mlɛ́mlɛ́ é. Nukúnɖíɖó énɛ́ sixú dó wǔsyɛ́n lanmɛ nú mɛ ɖěɖěe è ko wa nǔ agɔ xá lɛ́ é. (Jel. 29:11) Stacy e xó mǐ ɖɔ wá yi é tínmɛ ɖɔ: “Nǔgbó ɔ kplɔ́nkplɔ́n d’alɔ mì bɔ un ɖí xwi xá nǔagɔwaxámɛ ɖěɖěe un mɔ lɛ́ é kpó ɖěɖěe è wa xá mì lɛ́ é kpó. Jexóva nɔ zán wɛn e ɖo Biblu mɛ é dó dó gbɔ nú mɛ.” Bo ná dó jlá wɛn hwɛɖónúmɛ tɔn e ɖo Biblu mɛ bo ɖɔ xó dó nǔ e ná ɖó nǔ nǔagɔwaxámɛ nu é wú é ɔ, a ɖó ná sɔ́ nǔ ganjí. Lě do a kú d’é jí ɖɔ linlin Biblu tɔn e mǐ gbéjé kpɔ́n ɖo xóta élɔ́ mɛ lɛ́ é nyí nǔgbó sɔ é ɔ, mɔ̌ do wɛ a ná ɖo gbesisɔmɛ sɔ bo ná ɖɔ xó dó xóta énɛ́ jí kpó ayiɖote kpó ényí é wá xwetɔ́n ɖo wěmaxɔmɛ, alǒ ɖo azɔ̌mɛ ɔ nɛ́.b

17. Nɛ̌ Jexóva ka nɔ d’alɔ mǐ bɔ mǐ nɔ ɖí xwi xá nǔagɔwaxámɛ din tɔn lɛ́ gbɔn?

¹⁷ Mǐ tuun ɖɔ ényí Satáan kpo ɖo “axɔ́sú gbɛ élɔ́ tɔn” nyí wɛ jɛ́n wɛ ɔ, mǐ ná kpo ɖo xwi ɖí xá nǔagɔwaxámɛ wɛ. Amɔ̌, ée mǐ ná ɖo te kpɔ́n hwenu e è ná “nya ɛ tɔ́n” é ɔ, mǐ ná ba alɔdó kpó nukúnɖíɖó kpó kpo ǎ. (Jaan 12:31) É nyí nǔ e wú nǔagɔwaxámɛ tíin sɔmɔ̌ é kɛ́ɖɛ́ wɛ Jexóva gbɔn nǔwlánwlán mímɛ́ lɛ́ gblamɛ bo ɖe xlɛ́ mǐ ǎ, loɔ, é lɛ́ ɖe lěe nǔ nɔ cí n’i dó aluwɛ e mɛ yě nɔ dɔn mǐ dó é wú é xlɛ́. (Ðɛh. 34:17-19) Jexóva gbɔn Vǐ súnnu tɔn jí bo kplɔ́n mǐ lěe mǐ ná ɖí xwi xá nǔagɔwaxámɛ din tɔn lɛ́ gbɔn é kpó lěe Axɔ́súɖuto tɔn ná ɖó nǔ nǔagɔwaxámɛ nu káká sɔ́yi zaanɖé din gbɔn é. (2 Pi. 3:13) Mi nú mǐ ní kpo ɖo wɛn ɖagbe Axɔ́súɖuto énɛ́ tɔn jlá wɛ kpó kanɖódónǔwú kpó, bo kpo ɖo nukún ɖó hwenu e “hwɛjijɔ kpó nǔjlɔ́jlɔ́wiwa kpó” ná gɔ́ ayǐkúngban ɔ jí é wɛ kpó akpakpa sɔ́ mɛ kpó.—Eza. 9:7.