Mɛ e ɖó “ninɔmɛ ayi mɛ tɔn e sɔgbe” lɛ́ é ná yí wɛn ɔ

1. Nɛ̌ mɛ lɛ́ ka nɔ gbɔn vo ɖo ali e nu yě nɔ yí wɛn ɖagbe ɔ ɖe é gbɔn? (Mɛsɛ́dó 13:47, 48; 16:14, 15)

ÐO XWE kanweko nukɔntɔn ɔ mɛ ɔ, mɛ gěgé yí gbe nú nǔgbó ɔ, ée yě se wɛn e klisánwun lɛ́ jlá é tlóló é. (Xa Mɛsɛ́dó 13:47, 48; 16:14, 15.) Mɔ̌ ɖokpó ɔ ɖo égbé ɔ, xomɛ nɔ hun mɛ ɖé lɛ́ hwenu e yě se wɛn ɖagbe ɔ azɔn nukɔntɔn é. Mɛ ɖěɖěe ma tlɛ yí wɛn Axɔ́súɖuto ɔ tɔn ɖo bǐbɛ́mɛ ǎ lɛ́ é sixú wá ɖe xlɛ́ nyi wɛn ɖo nukɔnmɛ ɖɔ émí ba ná se. Étɛ́ mǐ ka ɖó ná wa hwenu e mǐ mɔ mɛ e ɖó “ninɔmɛ ayi mɛ tɔn e sɔgbe” é ɖo sinsɛnzɔ́ mǐtɔn mɛ é?

2. Ali tɛ́ nu nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ mǐtɔn ka cí jikpájíkpɔ́ntɔ́ ɖé sín azɔ̌ ɖɔhun ɖe?

² Nǔjlɛ́dónǔwú ɖé ɖíe. È sixú sɔ́ nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ mǐtɔn jlɛ́ dó azɔ̌ e jikpájíkpɔ́ntɔ́ ɖé nɔ wa é wú. Ényí atín ɖé sín sínsɛ́n lɛ́ myá ɔ, é ɖo wɛn ɖɔ, jikpájíkpɔ́ntɔ́ ɔ ná gbɛ yě nú é ná bo tlɛ kpo ɖo ayǐkúngban ɔ jíjé wɛ alǒ ɖo atín tun wɛ ɖo jikpá ɔ sín awa ɖěvo xwé ɔ nɛ́. Mɔ̌ ɖokpó ɔ, ényí mǐ mɔ mɛɖé b’ɛ ɖo gbesisɔmɛ bo ná yí wɛn mǐtɔn ɔ, mǐ nɔ ba ná d’alɔ b’ɛ ná húzú ahwanvú Klísu tɔn lěe é nyɔ́ bló gbɔn é. Ðo hwe ɖokpó ɔ nu ɔ, mǐ nɔ kpo ɖo afɔ dó nú jlǒ mɛ ɖěɖěe ɖó hudó hwenu tɔn hú gǎn bá dó mɔ nǔ jɛ lě do nǔ e se wɛ yě ɖe é xɔ akwɛ́ sɔ é wú lɛ́ é wɛ. (Jaan 4:35, 36) Ayiɖote ná d’alɔ mǐ bɔ mǐ ná xwlé nǔ e ná d’alɔ tóɖómǐtɔ́ lɛ́ hú gǎn é yě. Din ɔ, mi nú mǐ ní gbéjé nǔ e mǐ sixú wa ɖo xóɖɔɖókpɔ́ mǐtɔn nukɔntɔn ɔ hwenu bá d’alɔ mɛ ɖěɖěe ɖo gbesisɔmɛ bá yí wɛn ɔ lɛ́ é kpɔ́n. Mǐ ná lɛ́ gbéjé lěe mǐ sixú d’alɔ mɛ mɔ̌hun lɛ́ bɔ yě ná kpo ɖo nukɔn yi wɛ gbɔn é kpɔ́n.

HWENU E MƐ LƐ́ ÐO GBESISƆMƐ BO NÁ YÍ WƐN Ɔ É

3. Étɛ́ mǐ ka ɖó ná wa hwenu e mǐ mɔ jlǒɖótɔ́ lɛ́ ɖo sinsɛnzɔ́ ɔ mɛ é? (1 Kɔlɛ́ntinu lɛ́ 9:26)

³ Ényí mǐ mɔ jlǒɖótɔ́ lɛ́ ɖo sinsɛnzɔ́ mǐtɔn mɛ ɔ, mǐ nɔ ba ná d’alɔ yě bɔ yě ná mlɛ́ gbɛli ɔ azɔn ɖokpó. Ðo ninɔmɛ mɔ̌hun lɛ́ mɛ ɔ, mǐ ɖó ná dán lɛjɛlɛjɛ dó Biblu kplɔ́nkplɔ́n ɖé xwíxwlé yě kpó yě yíylɔ́ wá kplé mǐtɔn lɛ́ domɛ kpó ɖo xóɖɔɖókpɔ́ nukɔntɔn ɔ hwenu wú ǎ.—Xa 1 Kɔlɛ́ntinu lɛ́ 9:26.

4. Ðɔ lěe mɛɖé ɖo gbesisɔmɛ bo ná bɛ́ Biblu kplɔ́nkplɔ́n afɔjíafɔjí gbɔn é.

⁴ Xwlé Biblu kplɔ́nkplɔ́n mɛ. Mɛ e mǐ nɔ ɖɔ xó xá lɛ́ é ɖé lɛ́ nɔ ɖo gbesisɔmɛ nú Biblu kplɔ́nkplɔ́n afɔjíafɔjí. Ði kpɔ́ndéwú ɔ, ɖo jeudi ɖokpó ɔ, ɖyɔ̌vǐ ɖé sɛkpɔ́ kɛkɛ́ví e è nɔ dó ɖɔ mawuxó ná é ɖé ɖo Canada bo sɔ́ alɔnuwéma Ðu gbɛ víví káká sɔ́yi! ɖokpó. Nɔví nyɔ̌nu e ɖo kɛkɛ́ví ɔ kɔn é tínmɛ n’i ɖɔ è nɔ zán alɔnuwéma ɔ dó kplɔ́n Biblu xá mɛ vɔ̌nu. Énɛ́ dɔn ɖyɔ̌vǐ ɔ bɔ é ná ɛ alǒkankɛ́n tɔn. Nukɔnmɛ ɖo gbe énɛ́ gbe ɔ, ɖyɔ̌vǐ ɔ wlán nǔ sɛ́dó nɔví nyɔ̌nu ɔ dó nǔkplɔ́nkplɔ́n ɔ wú. Hwenu e nɔví nyɔ̌nu ɔ ɖɔ émí ná wá ɖo aklúnɔzángbla fífó é ɔ, ɖyɔ̌vǐ ɔ kanbyɔ́ ɛ ɖɔ: “Sɔ ka lo? Un ná vo.” Yě kplɔ́n nǔ ɖo vendredi énɛ́. Ðyɔ̌vǐ ɔ yi kplé nukɔntɔn aklúnɔzángbla fífó énɛ́ bo kpo ɖo nukɔn yi wɛ wunnáwúnná.

5. Ényí mǐ mɔ ɖɔ mɛ ɔ kún ko ɖo gbesisɔmɛ bo ná kplɔ́n Biblu xá mǐ ó ɔ, étɛ́ mǐ ka ɖó ná wa? (Kpɔ́n ɖiɖe lɛ́ lɔmɔ̌.)

⁵ É ɖo wɛn ɖɔ mǐ kún nɔ ɖó nukún ɖɔ akpakpa ná sɔ́ mɛ e nɔ ɖótó wɛn mǐtɔn lɛ́ é bǐ ɖyɔ̌vǐ énɛ́ ɖɔhun ó. Mɛ ɖé lɛ́ sixú ɖó hudó hwenu tɔn hú gǎn. É sixú byɔ́ ɖɔ mǐ ní bɛ́ xóɖɔɖókpɔ́ ɖé xá mɛ ɔ dó xóta e ná dɔn ɛ é ɖé jí jɛ nukɔn. É ɖo mɔ̌ có, ényí mǐ kpo ɖo linlin ɖagbe ɖó wɛ bɔ nǔ mɛ ɔ tɔn lɛ́ kpo ɖo ayi mɛ ɖu nú mǐ wɛ ɔ, táan kléwún ɖé gúdo ɔ, mǐ hɛn ɔ, mǐ ná bɛ́ Biblu kplɔ́nkplɔ́n xá ɛ. Étɛ́ mǐ ka sixú ɖɔ hwenu e mǐ ɖo Biblu kplɔ́nkplɔ́n xwlé mɛ wɛ é? È kan nǔ énɛ́ byɔ́ nɔví súnnu kpó nɔví nyɔ̌nu kpó e Biblu kplɔ́nkplɔ́n bíbɛ́ xá mɛ bí alɔ ná lɛ́ é gěgé.

6. Nɛ̌ mǐ ka sixú byɔ́ jlǒɖótɔ́ ɖé ɖɔ mǐ ná gbɛ kan dó xóɖɔɖókpɔ́ ɔ nu xá ɛ gbɔn?

⁶ Wɛnjlátɔ́ kpó gběxosín-alijítɔ́ kpó e è kan nǔ byɔ́ dó Biblu kplɔ́nkplɔ́n bíbɛ́ wú lɛ́ é tínmɛ ɖɔ ɖo xá ɖé lɛ́ mɛ ɔ, é nɔ nyɔ́ hú gǎn ɖɔ è ní nyi alɔ nú xókwín kpó xógbe kpó lěhun lɛ́ hwenu e è ɖo lěe nǔkplɔ́nkplɔ́n ɔ nɔ yi gbɔn é tínmɛ wɛ é: “Nǔkplɔ́nkplɔ́n,” “Biblu kplɔ́nkplɔ́n,” alǒ “è ná kplɔ́n nǔ we.” Yě ɖ’ayi wú ɖɔ xókwín kpó xógbe kpó lěhun lɛ́ zínzán nɔ w’azɔ̌ hú gǎn: “Xóɖɔɖókpɔ́” kpó “a ná kplɔ́n bo tuun Biblu” kpó. Bo ná dó d’alɔ mɛ ɔ nú é ná ba ná ɖɔ xó xá we hweɖévonu ɔ, a hɛn ɔ, a ná ɖɔ nǔ lěhun lɛ́: “É jí wǔ tawun ɖɔ nǔkanbyɔ́ tají gbɛ mɛ tɔn lɛ́ sín xósin ɖo Biblu mɛ,” alǒ “Biblu nyí wěma sinsɛn tɔn ɖé kpowun ǎ; é nɔ d’alɔ mǐ ɖo ali tawun tawun lɛ́ nu.” A sixú ɖɔ gɔ́ ná ɖɔ: “É nɔ ɖu hwenu gěgé ǎ, cɛ́jú 10 jɛ 15 ko kpé bɔ a ná kplɔ́n nǔ xɔ akwɛ́ ɖé.” È sixú ɖɔ mɔ̌ ma zán xógbe “ɖo gbesisɔmɛ,” alǒ “aklúnɔzángbla ɖokpó ɖokpó mɛ,” ɖó xógbe énɛ́ lɛ́ sixú zɔ́n bɔ mɛ ɔ ná mɔ ɖɔ dandan wɛ é nyí ɖɔ émí ní nɔ mɔ mǐ.

7. Hwetɛ́nu ka nyí azɔn nukɔntɔn e mɛ ɖé lɛ́ mɔ ɖɔ nǔgbó Biblu tɔn lɛ́ kplɔ́n wɛ émí ɖe é? (1 Kɔlɛ́ntinu lɛ́ 14:23-25)

⁷ Ylɔ̌ yě wá kplé. É cí ɖɔ ɖo mɛsɛ́dó Pɔ́lu sín hwenu ɔ, azɔn nukɔntɔn e mɛ ɖé lɛ́ yi kplé é jɛ́n yě mɔ ɖɔ nǔgbó ɔ kplɔ́n wɛ émí ɖé. (Xa 1 Kɔlɛ́ntinu lɛ́ 14:23-25.) Hwɛhwɛ wɛ nǔ ɖokpó ɔ nɔ jɛ ɖo égbé. Jlǒɖótɔ́ gěgé nɔ yá wǔ yi nukɔn ɖo gbigbɔ lixo hwenu e yě jɛ kplé mǐtɔn lɛ́ wá jí é. Hwetɛ́nu a ka ɖó ná ylɔ́ yě? È ɖɔ mɛylɔ́ylɔ́ nú kplé lɛ́ xó ɖo nǔkplɔ́nkplɔ́n 10​gɔ́ wěma Ðu gbɛ víví káká sɔ́yi! tɔn mɛ, amɔ̌, é byɔ́ ɖɔ a ní nɔ te káká jɛ wěma ɔ sín akpáxwé énɛ́ hwɛ̌ cóbó wa mɔ̌ ǎ. Ðo xóɖɔɖókpɔ́ mitɔn nukɔntɔn ɔ hwenu ɔ, a hɛn ɔ a ná ylɔ́ tóɖówetɔ́ ɔ wá kplé aklúnɔzángbla fífó tɔn. A sixú ɖɔ xóta xóɖiɖɔ nú mɛ lɛ́ bǐ tɔn ɔ alǒ nǔ tají e ɖo Atɔxwɛ kplɔ́nkplɔ́n aklúnɔzángbla ɔ tɔn mɛ é ɖé n’i.

8. Akpáxwé kplé mǐtɔn lɛ́ tɔn tɛ́ lɛ́ jí mǐ ka sixú sɔ́ ayi ɖó hwenu e mǐ ɖo mɛɖé ylɔ́ wá kplé mǐtɔn lɛ́ wɛ é? (Ezayíi 54:13)

⁸ Ényí a ylɔ́ jlǒɖótɔ́ ɖé hǔn, tínmɛ lěe kplé mǐtɔn lɛ́ gbɔn vo nú amǐsa e é sixú ko nɔ yi é gbɔn é n’i. Hwenu e Biblu kplɔ́ntɔ́ ɖé wá Atɔxwɛ kplɔ́nkplɔ́n domɛ azɔn nukɔntɔn ɔ é ɔ, é kanbyɔ́ nǔkplɔ́nmɛtɔ́ tɔn ɖɔ: “Mɛ e ɖo nukún kpé dó Atɔxwɛ kplɔ́nkplɔ́n ɔ wú wɛ é tuun mɛ lɛ́ bǐ sín nyǐkɔ wɛ a?” Nɔví nyɔ̌nu ɔ tínmɛ n’i ɖɔ mǐ bǐ nɔ tɛ́n kpɔ́n bo nɔ tuun mɛ e ɖo agun mǐtɔn mɛ lɛ́ é sín nyǐkɔ lěe mǐ nɔ tuun mɛ e ɖo xwédo mǐtɔn mɛ lɛ́ é sín nyǐkɔ gbɔn é ɖɔhun. Nǔkplɔ́ntɔ́ ɔ mɔ ɖɔ énɛ́ gbɔn vo tawun nú lěe nǔ lɛ́ nɔ yi gbɔn ɖo amǐsa émítɔn é. Mɔ̌ ɖokpó ɔ, linlin e wú mǐ nɔ bló kplé mǐtɔn lɛ́ é nɔ nyí nǔ yɔ̌yɔ́ nú mɛ gěgé. (Xa Ezayíi 54:13.) Mǐ nɔ kplé bo nɔ sɛ́n Jexóva, nɔ kplɔ́n nǔ dó wǔtu tɔn, bo nɔ lɛ́ dó wǔsyɛ́n lanmɛ nú mǐɖée lɛ́. (Ebl. 2:12; 10:24, 25) Wǎgbɔ tɔn ɔ, è nɔ bló tuto nú kplé mǐtɔn lɛ́ bo ná dó d’alɔ mǐ bɔ mǐ ná kplɔ́n nǔ, é nɔ nyí yɛsu bɔ è nɔ fɔ ǎ. (1 Kɔ. 14:40) Gɔ́ ná ɔ, fí e mǐ nɔ bló kplé mǐtɔn lɛ́ ɖe é nɔ ɖo jlɛ̌ jí, bɔ è sɔ́ nǔ ná ɖo ali ɖé nu bo ná dó bló bónú é ná bɔ wǔ nú mǐ nú mǐ ná kplɔ́n nǔ. Mǐ nɔ lɛ́ sɔ́ toxóɖɔgbɛ́ta ɖé ɖ’ajo gbeɖé ǎ, ɖó mǐ nɔ ɖ’alɔ ɖo toxóɖiɖɔ mɛ ǎ, mǐ ka nɔ lɛ́ zun nǔvɛ́mɛwú zɔnlin alǒ ɖ’alɔ ɖo hunnyahunnya mɛ ǎ. Ényí è xlɛ́ video Nɛ̌ nǔ lɛ́ ka nɔ yi gbɔn ɖo kpléxɔ Axɔ́súɖuto ɔ tɔn ɖé mɛ? nǔkplɔ́ntɔ́ ɔ jɛ nukɔn ɔ, é sixú wa ɖagbe. Mɔ̌ mɛ ɔ, é ná tuun nǔ e é ná ɖó nukún é.

9-10. Ényí mǐ ɖo mɛɖé ylɔ́ nú kplé wɛ ɔ, étɛ́ mǐ ka sixú wa dó kú d’é jí ɖɔ mǐ kún ná dó cɔcɔ n’i bónú é ná xo kpóɖó nú mǐ alǒ ɖ’alɔ ɖo kplé ɔ mɛ ó? (Kpɔ́n ɖiɖe ɔ lɔmɔ̌.)

⁹ Mɛ ɖé lɛ́ nɔ xo nǔ kpɔ́n dó kplé lɛ́ wíwá wú, ɖó yě nɔ ɖi xɛsi ɖɔ è táá wá byɔ́ yě ɖɔ yě “ní bɛ́ sinsɛn mɛtɔn.” Nǎ gǎnjɛwú mɛ ɔ ɖɔ ényí jǒnɔ wá ba mǐ ɔ, é nɔ víví nú mǐ, mǐ kún ka nɔ dó cɔcɔ nú mɛ lɛ́ ɖɔ yě ní wá xo kpóɖó nú mǐ alǒ ɖ’alɔ ɖo kplé ɔ mɛ ó. Xwédo lɛ́ sixú wá, káká jɛ xwédo e ɖó vǐ kpɛví lɛ́ é jí. È nɔ kplɔ́n nǔ vǐ lɛ́ ɖó vo ɖo kplé mǐtɔn lɛ́ jí ǎ. É nyɔ́ wa ɔ, mɛjitɔ́ lɛ́ kpó vǐ lɛ́ kpó nɔ jínjɔ́n kpɔ́ bo nɔ kplɔ́n nǔ ɖó kpɔ́. Mɔ̌ mɛ ɔ, mɛjitɔ́ lɛ́ nɔ tuun mɛ e kpó vǐ yětɔn lɛ́ kpó ɖo kpɔ́ é kpó nǔ e kplɔ́n yě wɛ è ɖe lɛ́ é kpó. (Sɛ́n. 31:12) Mǐ nɔ yí agbǎnmɛkwɛ́ ɖo kplé mǐtɔn lɛ́ jí ǎ. É nyɔ́ wa ɔ, mǐ nɔ xwedó gbeɖiɖe Jezu tɔn élɔ́: “Vɔ̌nu wɛ è ná mi, mi lɔ ní ná mɛ vɔ̌nu.” (Mat. 10:8) A hɛn ɔ, a ná lɛ́ ɖɔ nú mɛ ɔ ɖɔ é kún byɔ́ ɖɔ è ní dó akwɛ́núvɔ cóbó wá ó. Ényí lěe mɛɖé cí ɖo wěxo é wɛ Mawu nɔ kpɔ́n ǎ, loɔ, ayi tɔn mɛ wɛ é nɔ kpɔ́n.—1 Sam. 16:7.

¹⁰ Ényí mɛ ɔ wá hǔn, wa nǔ e wú a kpé é bo bló bónú é ní vo. Dǒ è gesí nú mɛxó agun tɔn lɛ́ kpó wɛnjlátɔ́ ɖěvo lɛ́ kpó. Ényí é mɔ ɖɔ xwégbe wɛ émí ɖe ɔ, é ná bɔ wǔ n’i hú gǎn b’ɛ ná ba ná lɛ́ lɛ́ kɔ wá. Ðo kplé ɔ hwenu ɔ, ényí é ma hɛn Biblu ǎ hǔn, nǔ é ní kpɔ́n towe xá we, bónú a ní lɛ́ xlɛ́ ɛ lěe é ná mɔ wěmafɔ e zán wɛ xóɖɔtɔ́ ɔ ɖe lɛ́ é gbɔn é, bo lɛ́ xlɛ́ wěma e kplɔ́n wɛ mǐ ɖe é bónú é ná dó sixú xwedó mǐ ɖo nǔkplɔ́nkplɔ́n ɔ hwenu.

HWENU E BIBLU KPLƆ́NKPLƆ́N ÐÉ BƐ́ É

11. Nɛ̌ a ka sixú ɖe xlɛ́ ɖɔ émí nɔ ɖó sísí nú ganmɛ kpó tuto kpó xwétɔ́ émítɔn tɔn gbɔn?

¹¹ Étɛ́ lɛ́ mǐ ka ɖó ná hɛn dó ayi mɛ dó Biblu kplɔ́nkplɔ́n xá mɛ lɛ́ ɖo xwégbe wú? Ðǒ sísí nú ganmɛ xwétɔ́ ɔ tɔn kpó tuto xwétɔ́ ɔ tɔn kpó. Ði kpɔ́ndéwú ɔ, ényí a bló tuto xá ɛ hǔn, nɔ ganmɛ jí, ényí mɛ e ɖo xá towe mɛ lɛ́ é ná bo tlɛ nɔ ɖó linlin ɖěbǔ dó ganmɛ jí ninɔ wú ɔ nɛ́. Gɔ́ ná ɔ, é ná nyɔ́ tawun ɖɔ a ní nɔ kléwún ɖo nǔkplɔ́nkplɔ́n nukɔntɔn ɔ hwenu. Wɛnjlátɔ́ e ko mɔ nǔ kpɔ́n é ɖé lɛ́ ɖɔ ɖɔ è ní nɔ yá wǔ fó, ényí mɛ ɔ tlɛ ba ná se nǔ ɖěvo lɛ́ d’é jí ɔ nɛ́. Gɔ́ ná ɔ, ma nɔ ɖɔ xó dín ó. Nǎ tɛn xwétɔ́ ɔ nú é ní nɔ ɖɔ linlin tɔn.—Nǔx. 10:19.

12. Étɛ́ gbé mǐ ka ɖó ná nya sín bǐbɛ́mɛ hwenu e mǐ jɛ Biblu kplɔ́n xá mɛɖé jí ɖo xwégbe é?

¹² Nǔ e gbé a ɖó ná nya sín bǐbɛ́mɛ é wɛ nyí ɖɔ a ɖó ná d’alɔ xwétɔ́ towe b’ɛ ná kplɔ́n bo tuun Jexóva kpó Jezu kpó, bo lɛ́ tɛ́n kpɔ́n bo yí wǎn nú yě. A ná wa mɔ̌ gbɔn ayi dindɔn yi Xó Mawu tɔn jí gblamɛ, ényí wá hwiɖésúnɔ kpó nǔ e a tuun dó Biblu wú é kpó jí ǎ. (Mɛ. 10:25, 26) Hwɛhwɛ wɛ mɛsɛ́dó Pɔ́lu nɔ sɔ́ nǔkplɔ́nmɛ tɔn lɛ́ jínjɔ́n Jezu Klísu éé nyí mɛ ɖokpó e Jexóva sɛ́ dó bo ná dó d’alɔ mǐ bónú mǐ ná tuun I bo lɛ́ yí wǎn n’I é jí. (1 Kɔ. 2:1, 2) Pɔ́lu lɛ́ tínmɛ lě do alɔ dídó ahwanvú yɔ̌yɔ́ lɛ́ bónú yě ná ɖó jijɔ ɖaaɖagbe ɖěɖěe è sixú sɔ́ jlɛ́ dó siká, kpatágan kpó awǐnnya xɔ akwɛ́ lɛ́ kpó wú é ɖo tají sɔ é nyi wɛn. (1 Kɔ. 3:11-15) Nǔɖiɖi, nǔnywɛ́, ayiɖote kpó sísí ɖó nú Jexóva kpó ɖo jijɔ xɔ akwɛ́ mɔ̌hun lɛ́ mɛ. (Ðɛh. 19:10, 11; Nǔx. 3:13-15; 1 Pi. 1:7) Zǎn wlɛnwín mɛkplɔ́nkplɔ́n tɔn Pɔ́lu tɔn gbɔn alɔ dídó nǔkplɔ́ntɔ́ towe lɛ́ bónú yě ná tɛ́n kpɔ́n bo ɖó nǔɖiɖi syɛ́nsyɛ́n nú Tɔ́ yětɔn jǐxwé tɔn wǎnyíyínɔ ɔ bo lɛ́ zun xɔ́ntɔn vívɛ́ xá ɛ gblamɛ.—2 Kɔ. 1:24.

13. Nɛ̌ mǐ ka sixú ɖe suúlu kpó nukúnnúmɔjɛnǔmɛ kpó xlɛ́ hwenu e mǐ ɖo alɔ dó jlǒɖótɔ́ lɛ́ wɛ é gbɔn? (2 Kɔlɛ́ntinu lɛ́ 10:4, 5) (Kpɔ́n ɖiɖe ɔ lɔmɔ̌.)

¹³ Nɔ kplɔ́n nǔ mɛ Jezu ɖɔhun gbɔn suúlu kpó nukúnnúmɔjɛnǔmɛ kpó ɖiɖexlɛ́ gblamɛ. Nyi alɔ nú nǔ ɖěɖěe sixú zɔ́n bɔ mɛ ɔ ma ná vo ǎ lɛ́ é kinkanbyɔ́. Ényí é byɔ́ ɖó mɔ̌ hǔn, jǒ nǔ ɖěɖěe é vɛ́ wǔ n’i bɔ é ná mɔ nukúnnú jɛ mɛ din lɛ́ é dó, lobo lɛ́ kɔ wá yě jí ɖo nukɔnmɛ. Ma tɛ́n kpɔ́n bo ná zín jǐ tɔn bónú é ná yí gbe nú nǔkplɔ́nmɛ e é ma ko ɖo gbesisɔmɛ ná ǎ é ɖé ó, é nyɔ́ wa hǔn, nǎ ɛ hwenu bónú nǔgbó ɔ ní dó ɖɔ do ɖo ayi tɔn mɛ. (Jaan 16:12; Koló. 2:6, 7) Biblu jlɛ́ adingban núkplɔ́nmɛ ɖěɖěe mǐ ɖo tíntɛ́nkpɔ́n wɛ bo ná ɖu ɖ’é jí lɛ́ é dó ahohó wú. (Xa 2 Kɔlɛ́ntinu lɛ́ 10:4, 5.) Ma hɔ́ ahohó nǔkplɔ́ntɔ́ towe tɔn kɔn nyi jǐ tɔn ó, é nyɔ́ wa hǔn, d’alɔ ɛ bónú é ní sɔ́ Jexóva dó ɖó Bibɛtɛn tɔn.—Ðɛh. 91:9.

HWENU E JLǑÐÓTƆ́ LƐ́ WÁ KPLÉ MǏTƆN LƐ́ É

14. Nɛ̌ mǐ ka ɖó ná nɔ wa nǔ gbɔn xá jlǒɖótɔ́ e nɔ wá kplé mǐtɔn lɛ́ é?

¹⁴ Jexóva nɔ ɖó nukún ɖɔ mǐ ní ma nɔ ɖe mɛɖé ɖó vo ɖo mɛɖé mɛ ɖo lěe mǐ nɔ wa nǔ gbɔn xá jlǒɖótɔ́ e nɔ wá kplé lɛ́ é kpáxwé ó, ényí yě ná bo tlɛ gosín xá ɖěbǔ mɛ, jɛ dɔkun alǒ ji ya, abǐ gosín akɔta ɖěbǔ mɛ ɔ nɛ́. (Ja. 2:1-4, 9) Énɛ́ wú ɔ, nɛ̌ mǐ ka sixú ɖe xlɛ́ ɖɔ mǐ yí wǎn nú jlǒɖótɔ́ e nɔ wá kplé mǐtɔn lɛ́ é gbɔn?

15-16. Nɛ̌ mǐ ka sixú d’alɔ jǒnɔ lɛ́ bɔ yě ná mɔ ɖɔ è yí émí ganjí ɖo kplé mǐtɔn lɛ́ jí gbɔn?

¹⁵ Mɛ ɖé lɛ́ sixú nɔ wá kplé mǐtɔn lɛ́ ɖó yě ɖo nǔ do ba wɛ kpowun wútu, kabǐ mɛ e nɔ nɔ xá ɖěvo mɛ é ɖé wɛ dó wǔsyɛ́n lanmɛ nú yě ɖɔ yě ní yi. Énɛ́ wú ɔ, mǐ ɖó ná xo nǔ kpɔ́n dó mɛ mɔ̌hun e wá kplé mǐtɔn lɛ́ é sisɛkpɔ́ wú ǎ. Dǒ doo nú yě, ma ka lɔn bo wa nǔɖé bónú yě gɔn vivo ó. Byɔ̌ yě ɖɔ yě ní wá jínjɔ́n akpá émítɔn. Nǔ yě ní kpɔ́n Biblu kpó wěma e zán wɛ è ɖe lɛ́ é kpó xá we, alǒ yǐ nú yě. Lɛ̌ lin tamɛ dó ali ɖěvo ɖěɖěe nu a sixú bló bɔ yě ná vo ɖe lɛ́ é jí. Nya e wá kplé mǐtɔn lɛ́ ɖokpó jí é ɖɔ nú nɔví súnnu e dó doo n’i é ɖɔ émí kún vo ó, ɖó émí kún sɔ́ nǔ ganjí mɛ lɛ́ bǐ ɖɔhun ó. Nɔví súnnu ɔ bló bɔ agbɔ̌n tɔn jɛ do, bo tínmɛ n’i ɖɔ Kúnnuɖetɔ́ Jexóva tɔn lɛ́ ɔ, gbɛtɔ́ bǐ ɖɔhun jɛ́n yě cí. Nya ɔ wá yi nukɔn ɖo gbigbɔ lixo bo bló batɛ́mu, amɔ̌, é wɔn xósin e nɔví súnnu ɔ ná ɛ é gbeɖé ǎ. Amɔ̌, ayiɖote xó ɖé ɖíe: Ényí a ɖo xó ɖɔ xá jǒnɔ lɛ́ wɛ jɛ nukɔn nú kplé lɛ́ alǒ kplé lɛ́ gúdo hǔn, nǔ nǔ yětɔn ní nɔ ɖu ayi mɛ nú we, ma ka dó nu xó mɛɖésúnɔ tɔn yětɔn lɛ́ mɛ ó.—1 Pi. 4:15.

¹⁶ Mǐ hɛn ɔ, mǐ ná lɛ́ bló bɔ jǒnɔ lɛ́ ná mɔ ɖɔ è yí émí ganjí gbɔn nǔ élɔ́ lɛ́ wiwa gblamɛ: Xó ɖiɖɔ xá yě kpó sísí kpó, xósin níná kpó sísí kpó, gɔ́ nú alɔ ɖíɖó ɖo akpáxwé kplé ɔ tɔn e ɖɔ xó dó mɛ e ma nyí Kúnnuɖetɔ́ ǎ lɛ́ é alǒ nǔ e yě ɖi nǔ ná lɛ́ é wú é mɛ kpó sísí kpó. Nyi alɔ nú xógbe ɖěɖěe sixú nyí afɔklɛ́nnú nú yě alǒ cí mɛzunzun ɖɔhun lɛ́ é. (Ti. 2:8; 3:2) Ði kpɔ́ndéwú ɔ, mǐ ná nɔ cá nǔ e mɛ e kpó mǐ kpó ma ɖi nǔ nú nǔ ɖokpó ɔ lɛ́ ǎ é ɖi nǔ ná lɛ́ é gbeɖé ǎ. (2 Kɔ. 6:3) Ðo akpá énɛ́ xwé ɔ, nɔví súnnu e nɔ xwlé xóɖiɖɔ nú mɛ bǐ mɛ lɛ́ é ɖó ná nɔ ɖ’ayi te tawun. Yě nɔ lɛ́ xlɛ́ ɖɔ émí hɛn mɛ e ma nyí Kúnnuɖetɔ́ ǎ bo ɖo mɛ e wá kplé ɔ lɛ́ é mɛ é ayi mɛ gbɔn xókwín kpó xóta kpó ɖěɖěe mɛ lɛ́ ma ná mɔ nukúnnú jɛ mɛ ǎ lɛ́ é tíntínmɛ gblamɛ.

17. Étɛ́ gbé mǐ ka nɔ nya hwenu e mǐ mɔ mɛ e “ɖó ninɔmɛ ayi mɛ tɔn e sɔgbe” lɛ́ é ɖo sinsɛnzɔ́ ɔ mɛ é?

¹⁷ Ayǐ ɖokpó hɔ́n ɔ, nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ mǐtɔn nɔ lɛ́ myá nukún d’é jí, bɔ mǐ nɔ kpo ɖo mɛ e “ɖó ninɔmɛ ayi mɛ tɔn e sɔgbe bo ná dó sixú mɔ gbɛ mavɔmavɔ lɛ́ é” ba wɛ. (Mɛ. 13:48) Ényí mǐ ɖo mɔ̌ wa wɛ ɔ, mǐ ɖó ná xo nǔ kpɔ́n dó Biblu kplɔ́nkplɔ́n ɖé xwíxwlé yě, alǒ yě yíylɔ́ wá kplé mǐtɔn lɛ́ domɛ wú ǎ. Mɔ̌ mɛ ɔ, mǐ sixú d’alɔ yě bɔ yě ná ɖe afɔ nukɔntɔn lɛ́ ɖo ali e “è nɔ gbɔn bo nɔ yi gbɛ mɛ” é jí.—Mat. 7:14.