Mawu Sè Ðɛ E Nawe Nukúntíntɔ́nnɔ ɖé Xò lɛ É

Yanmei e nyí Kúnnuɖetɔ́ ɖé ɖò Azíi é d’alɔ nawe nukúntíntɔ́nnɔ e nɔ nyí Mingjie é b’ɛ sɛ́n ali.a Mingjie ɖɔ: “É na cɛ́ nú we. Mawu ni dó nú we!” Enɛ gudo ɔ, Yanmei kanbyɔ Mingjie ɖɔ é ba ɖɔ emi kpo é na mɔ emiɖée bo ɖɔ xó dó Biblu jí à jí. Mingjie wá ɖɔ ɖò nukɔnmɛ ɖɔ emi ko nɔ xoɖɛ gbè bǐ gbè ɖɔ mɛɖé ni wá d’alɔ emi bonu emi na mɔ agun nǔgbo Mawu tɔn. Etɛwu é ka ɖò alɔdó mɔ̌hun ba wɛ?

Mingjie tinmɛ ɖɔ ɖò 2008 ɔ, emi yí gbè nú ylɔ̌ e xɔ́ntɔn emitɔn nukúntíntɔ́nnɔ ɖé ylɔ́ emi ɖɔ emi ni wá amǐsa wɔ̌nɖowǔnanɔ lɛ tɔn ɖé é. Ee Mingjie ɖótó Mawuxó ɔ kpé gudo é ɔ, é kan wema e mɛ yɛhwenɔ ɔ ɖè xó sín é byɔ ɛ. É ɖɔ n’i ɖɔ Xó nǔgbo Mawu tɔn Biblu ɔ wɛ. Mingjie jló tawun bá xà. Enɛ wu ɔ, é yí Biblu ɖokpo dó nukúntɔ́nnɔ lɛ sín nǔwlanwlán lɔ jí ɖò Chine-gbè mɛ, bo xà Biblu enɛ e ɖó akpáxwé 32 é ɖò sun ayizɛ́n mɔ̌ vlamɛ. Ee Mingjie ɖò nukɔn yì wɛ ɖò Biblu xixa tɔn mɛ é ɔ, é wá mɔ ɖɔ sinsɛn-núkplɔnmɛ Atɔnɖobǔ tɔn e è kplɔ́n mɛ ɖò amǐsa e é yì é kún nyí nǔgbo ó, é lɛ́ kplɔ́n ɖɔ Mawu ɖó nyikɔ ɖé, é wɛ nyí Jehovah.

Ðò nukɔnmɛ ɔ, nǔ e mɛ e ɖò sinsɛn ɔ mɛ lɛ é nɔ wà lɛ é wá jɛ akpɔ ɖó nú Mingjie jí. É mɔ ɖɔ ye kún nɔ zán gbɛ̀ sɔgbe xá nǔ e emi nɔ xà ɖò Biblu mɛ lɛ é ó. Ði kpɔ́ndéwú ɔ, ye nɔ na nǔɖuɖu ɖukpo lɛ nukúntíntɔ́nnɔ lɛ, bo ka nɔ na nǔɖuɖu ɖagbe lɛ mɛ ɖěɖee ɖò nukún te lɛ é. Nǔagɔwiwa mɔ̌hun lɛ ɖ’akpɔ nú Mingjie, enɛ wu ɔ, é jɛ dò ba nú amǐsa ɖevo lɛ jí ɖò xá tɔn mɛ. Nǔ e wu Mingjie nɔ ɖò ɖɛ xò wɛ, bo na dó mɔ agun nǔgbo Klisanwun tɔn é nɛ.

Xomɛnyínyɔ́-núwiwa Yanmei tɔn sísɛ́ Mingjie bɔ é yí gbè nú Biblu kplɔnkplɔn. Nukɔnmɛ ɔ, Mingjie wá kplé Kúnnuɖetɔ́ Jehovah tɔn lɛ tɔn azɔn nukɔntɔn ɔ. Mingjie ɖɔ: “Na wɔn kplé nukɔntɔn e un yì é kpɔ́n ǎ. Nɔví sunnu lɛ kpo nɔví nyɔnu lɛ kpo bǐ yawǔ dó mì kpo akpakpa sɔ́ mɛ kpo. É byɔ lanmɛ nú mì tawun. Un nyí nukúntíntɔ́nnɔ có, un mɔ wanyiyi e ma nɔ ɖè mɛɖé ɖó vo ǎ é ɖò finɛ.”

Mingjie ɖò nukɔn yì wɛ ganji, bo jɛ kplé lɛ yì jí ɖò gbesisɔmɛ. Taji hugǎn ɔ, é nɔ ɖu han Axɔ́suɖuto ɔ tɔn lɛ jiji sín vivǐ, amɔ̌, é nɔ vɛwǔ n’i, ɖó hanwema ɔ ɖè ɖò nukúntɔ́nnɔ lɛ sín nǔwlanwlán e é nɔ xà é lɔ jí ǎ. Enɛ wu ɔ, kpo alɔdó agun ɔ tɔn kpo ɔ, Mingjie bló hanwema éɖesunɔ tɔn. É byɔ ganxixo 22 ɖò así tɔn cobɔ é wlán han 151 lɛ bǐ! Ðò avril 2018 ɔ, Mingjie jɛ alɔ ɖó ɖò kúnnuɖiɖe agbawungba tɔn mɛ jí, bɔ enɛ gudo ɔ, é nɔ zán ganxixo 30 mɔ̌ sunmɛ sunmɛ dó ɖɔ Mawuxó.

Bo na dó d’alɔ Mingjie bonu é na sɔnǔ nú baptɛm ɔ, Yanmei xà nǔkanbyɔ lɛ kpo wemafɔ Biblu tɔn lɛ kpo e ɖò wema Tutoblonunu Ee Nɔ Wà Jlǒ Jehovah Tɔn É mɛ lɛ é dó kan jí. Ðò juillet 2018 ɔ, Mingjie bló baptɛm. É ɖɔ: “Wanyiyi e nɔví sunnu lɛ kpo nɔví nyɔnu lɛ kpo ɖexlɛ́ mì ɖò kpléɖókpɔ́ ɖaxó enɛ jí é byɔ lanmɛ nú mì tawun. Xomɛ hun mì kaka bɔ un bɛ́ avǐ, ɖó un wá mɔ agun nǔgbo Mawu tɔn lo.” (Jaan 13:34, 35) Dìn ɔ, Mingjie nyí gbexosin-alijitɔ́ hwebǐnu tɔn, bo kánɖeji bá ɖè wanyiyi ɖokpo ɔ e è ɖexlɛ́ ɛ é xlɛ́ mɛ ɖevo lɛ.