Nɛ̌ Wema Kplɔnkplɔn Gbɔn Ɛntɛnɛti Jí ka Sixu Kpa Mì Gbɔn?

Égbé ɔ, wemaxɔmɛví gegě nɔ gbɛkan dó wema kplɔnkplɔn yetɔn nu ɖò “klási” e gbɔn vo é ɖé, enɛ wɛ nyí ɖò xwé yetɔn gbè. Enyi ninɔmɛ enɛ mɛ wɛ hwi lɔ ɖè ɔ, nɛ̌ é ka sixu kpa we gbɔn? Wěɖexámɛ ɖé lɛ ɖò fí.a

• Wěɖexámɛ e na d’alɔ we, b’ɛ na kpa we é atɔ́ɔ́n

• Nǔ e gbɛ̌ towe lɛ nɔ ɖɔ é

Wěɖexámɛ e na d’alɔ we, b’ɛ na kpa we é atɔ́ɔ́n

• Blǒ tuto e a na nɔ xwedó é ɖé. Tɛ́n kpɔ́n bo ɖó tuto gbesisɔ tɔn ɖé, cí nǔ ɖɔ wemaxɔmɛ wɛ a ɖè ɖɔhun. Blǒ tuto hwenu e a na nɔ wà wemaxɔmɛzɔ́ lɛ, xwégbezɔ́ lɛ kpo azɔ̌ taji ɖevo lɛ kpo dó é tɔn. Nú é byɔ ɔ, a sixu bló huzuhuzu ɖé lɛ ɖò tuto towe mɛ.

  Nǔgbododó Biblu tɔn: “È ni bló nǔ lɛ bǐ . . . kpo tito kpo.”—1 Kɔlɛntinu lɛ 14:40.

  “Blǒ tuto nǔ e a na wà ɖò azǎn ɔ jí lɛ é tɔn, cí nǔ ɖɔ wemaxɔmɛ wɛ a ɖè ɖɔhun. A ɖó na nɔ bló nǔ lɛ dó gan yetɔn yetɔn mɛ.”—Katie.

  Ðò tamɛ lin d’ewu wɛ: Etɛwu é ka nyɔ́ ɖɔ è ni bló tuto nǔ e è jló na wà lɛ é tɔn dó wema ɖé jí bo tɛ́ ɖó fí e é na bɔwǔ bɔ è na nɔ mɔ ɖè é ɖé?

• Sɔnǔ nú nǔ gbigbɛ́ nú mɛɖée. Enyi a ba na nyí mɛxo e zin é ɖé ɔ, a ɖó na nɔ wà azɔ̌ towe lɛ, akpakpa na bo ma tlɛ nɔ sɔ́ we dó ye wiwa wu ǎ ɔ nɛ. Ma nɔ sɔ́ nǔ ɖó nǎ nǎ mɛ ó!

  Nǔgbododó Biblu tɔn: “Mi nɔ bí dó azɔ̌ wu; mi ma nɔ ɖi fɔnlín ó.”—Hlɔmanu lɛ 12:11.

  “Nǔ gbigbɛ́ nú mɛɖée wɛ nyí nǔ e nɔ vɛwǔ hugǎn é. É nɔ bɔwǔ nú è na ba hwɛjijɔ bo ɖɔ, ‘Un na wà wemaxɔmɛzɔ́ ce hweɖevonu.’ Gudo mɛ ɔ, è sɔ́ nɔ kpéwú ǎ, bɔ azɔ̌ nɔ wá sukpɔ́ dó mɛ.”—Alexandra.

  Ðò tamɛ lin d’ewu wɛ: Nɛ̌ wemaxɔmɛzɔ́ towe lɛ wiwa gbè bǐ gbè ɖò fí ɖokpo ɔ, ɖò hwe ɖokpo ɔ nu, ka sixu d’alɔ we bɔ a na nɔ gbɛ́ nǔ nú hwiɖée hugǎn gbɔn?

• Sɔnǔ nú fí e a na nɔ kplɔ́n nǔ ɖè é ɖé. Nǔ nǔ e sín hudo a ɖó lɛ é bǐ ni ɖò alɔ jí nú we. Blǒ bonu fí e a nɔ kplɔ́n nǔ ɖè é ni nyɔ́ nɔ, ma ka nú fí ɔ ni na vivo we kaka bonu amlɔ didɔ́ nɔ jló we ó. Azɔ̌ wà gbé wɛ a tɔ́n bo wá finɛ, a tɔ́n amlɔ dɔ́ gbé ǎ. Enyi fí e hwiɖokponɔ na nɔ bo wà wemaxɔmɛzɔ́ towe lɛ é ma ɖè ǎ ɔ, a sixu nɔ nɔ fí e ɖò xwíi é ɖé ɖò atín ɖé sá, alǒ xɔnɔnɔ towe mɛ bo kplɔ́n nǔ ɖò kéze ɔ mɛ.

  Nǔgbododó Biblu tɔn: “Mɛ e nɔ kú hǔn bo nɔ tò nǔ e wà gbé é ja ɔ, nɔ mɔ nǔ gegě ɖ’emɛ.”—Nǔnywɛxó 21:5.

  “Sɔ́ balɔ́ɔn, ayihundanú lɛ kpo nǔxonú lɛ kpo ɖó kɛ́n ɖokpo, bo lɛ́ sɔ́ alokan towe ɖó alɔ e jí é na nɔ bo ma na ɖɔ nǔ ǎ é. Fí e ɖò tóó bɔ nǔɖe ma na fɛ́ ayi mɛtɔn ɖè ǎ é ɖé ɖò taji.”—Elizabeth.

  Ðò tamɛ lin d’ewu wɛ: Huzuhuzu tɛ lɛ a ka sixu bló bɔ fí e a nɔ kplɔ́n nǔ ɖè é na jɛxa nǔkplɔnkplɔn?

• Kplɔ́n bo nɔ sɔ́ ayi ɖó fí ɖokpo. Nɔ sɔ́ ayi ɖó nǔ e wà wɛ a ɖè é jí, bo ma nɔ fɔ azɔ̌ gegě ɖ’agba ó. Enyi a nɔ tɛ́n kpɔ́n bo na nɔ wà azɔ̌ gegě ɖò hwe ɖokpo ɔ nu zɛɛn ɔ, xó na ɖibla ɖò azɔ̌ lɛ wu, bɔ a ka na lɛ́ zán hwenu gegě cobo na fó ye.

  Nǔgbododó Biblu tɔn: “Mi hwlɛndó hwenu lɛ, bo wà nǔ.”—Efɛzinu lɛ 5:16.

  “Nú alokan ce ɖò akpá ce ɔ, é nɔ vɛwǔ nú mì nú má sɔ́ ayi ɖó fí ɖokpo. Un nɔ gú hwenu gegě dó wà nǔ e ma nɔ na nǔɖe ǎ lɛ é.”—Olivia.

  Ðò tamɛ lin d’ewu wɛ: A ka sixu bló bɔ kpɛɖé kpɛɖé ɔ, táan nabi e a nɔ zán dó sɔ́ ayi ɖó azɔ̌ ɖokpo jí é na jɛji à?

• Nɔ yí gbɔjɛ. Nɔ dɛn afɔkanmɛ, nɔ kun kɛkɛ afɔdókwín, alǒ nɔ ba lanmɛ kpɔ́n. Ayihun e a yí wǎn na é ɖé dida sixu zɔ́n bɔ gbɛ̀ na lɛ́ wá wǔ we. Wema School Power ɖɔ: “Amɔ̌, tò wà azɔ̌ towe fó jɛ nukɔn hwɛ̌. Enyi azɔ̌ ɖě ma sɔ́ kpò ɖò kɔ jí nú mɛ ǎ ɔ, è nɔ vo bo nɔ gbɔjɛ hugǎn.”

  Nǔgbododó Biblu tɔn: “È ɖó nǔ kpɛɖé bo na agbɔ̌n mɛɖée ɔ, é nyɔ́ hú è ɖò azɔ̌ wà wɛ hwebǐnu, kaka bo ba agbɔ̌n kpò.”—Nǔnywɛtɔ́xó 4:6.

  “Ðò wemaxɔmɛ ɔ, hwɛhwɛ wɛ è nɔ kplɔ́n nǔxonú lɛ zinzán alǒ alɔlyɛnzɔ́ lɛ wiwa. Nǔ enɛ lɛ ko yì tɛ́ mì cobɔ un wá mɔ lě dò un ɖó hudo yetɔn sɔ é. É nyɔ́ ɖɔ è ni nyɔ́ alɔnuzɔ́ ɖé wà gɔ́ nú wema kplɔnkplɔn.”—Taylor.

  Ðò tamɛ lin d’ewu wɛ: Gbɔjɛ alɔkpa tɛ lɛ ka na d’alɔ we bɔ a na mɔ hlɔnhlɔn dó wà wemaxɔmɛzɔ́ towe lɛ?