Yǒzo ɖo syɛ́nsyɛ́n d’é jí wɛ b’ɛ vɛ́ jlɛ́ gbɔn gbɛ ɔ bǐ mɛ: Étɛ́ Biblu ka ɖɔ?

Ðo sun juillet 2022 tɔn mɛ ɔ, gbeɖíɖó lɛ́ xlɛ́ ɖɔ gbɔn gbɛ ɔ bǐ mɛ ɔ, yǒzo ɖo syɛ́nsyɛ́n d’é jí wɛ b’ɛ vɛ́ jlɛ́:

• “Ðo sun élɔ́ mɛ ɖo Chine ɔ, azɔn wegɔ́ ɔ nɛ́ gǎn lɛ́ ko gb’akpá nú mɛ lɛ́ ɖɔ yǒzo ná gbɛ́ ɖo toxo 70 mɔ̌ mɛ b’ɛ ná vɛ́ jlɛ́ nɛ́.”—25 juillet 2022, xójlágɔnu CNN Wire Service.

• “Zungbó lɛ́ ɖo zo ji wɛ mɔ̌hunkɔtɔn gbɔn Elɔ́pu gbé ɔ bǐ jí, ɖó yǒzo fɔ́n bo ɖo gbígbɛ́ d’é jí wɛ tawun wútu.”—17 juillet 2022, xójláwéma The Guardian.

• “Ðo dimanche ɔ, yǒzo gbɛ́ tawun ɖo toxo États-Unis tɔn gěgé mɛ, b’ɛ ko syɛ́n sɔmɔ̌ kpɔ́n ǎ, hwenu e yǒzo alǔun mɛ tɔn gba kpé zǎnzǎnhwe jí, bo lɛ́ gba kpé tofɔligbé kpó gbadahwe jí kpó sín akpáxwé ɖé lɛ́ é.”—24 juillet 2022, xójláwéma The New York Times.

Étɛ́ ka nyí tínmɛ nǔ énɛ́ lɛ́ bǐ tɔn? Gbɛ ninɔ ɖo ayǐkúngban ɔ jí ná wá gló gbe ɖokpó wɛ a? Étɛ́ Biblu ka ɖɔ?

Biblu ka ɖɔ ɖ’ayǐ ɖɔ yǒzo ná syɛ́n d’é jí wɛ a?

Ɛɛn. Yǒzo e fɔ́n bo ɖo syɛ́nsyɛ́n d’é jí wɛ gbɔn gbɛ ɔ bǐ mɛ é sɔgbe kpó nǔ ɖěɖěe ná jɛ ɖo hwe mǐtɔn nu bɔ Biblu ɖɔ ɖ’ayǐ lɛ́ é kpó. Ði kpɔ́ndéwú ɔ, Jezu ɖɔ ɖ’ayǐ ɖɔ “gbɛtɔ́ lɛ́ ná mɔ nǔ e ná dó xɛsi yě lɛ́ é,” énɛ́ wɛ nyí nǔ ma mɔ kpɔ́n e ná hu ado nú mɛ lɛ́ é. (Luki 21:11) Yǒzo e fɔ́n bo ɖo syɛ́nsyɛ́n d’é jí wɛ gbɔn gbɛ ɔ bǐ mɛ é zɔ́n bɔ xɛsi ɖi mɛ gěgé ɖɔ gbɛtɔ́ lɛ́ ná sú kún dó nú ayǐkúngban ɔ.

Ayǐkúngban ɔ jí ninɔ ná wá gló wɛ a?

Éǒ. Mawu dá ayǐkúngban ɔ bónú é ná nyí xwé gbɛtɔ́ lɛ́ tɔn káká sɔ́yi wɛ. (Ðɛhan 115:16; Nǔnywɛ́tɔ́xó 1:4) Lěe é ko d’akpá tɔn gbɔn é ɔ, é ná jó gbɛtɔ́ lɛ́ dó bónú yě ná sú kún dó nú ayǐkúngban ɔ ǎ, é nyɔ́ wa ɔ, é ná “vívá mɛ e nɔ hɛn ayǐkúngban ɔ gblé lɛ́ sín kún dó.”—Nǔɖexlɛ́mɛ 11:18.

Nǔɖɔɖayǐ we kpowun ɖíe bo xlɛ́ nǔ ɖěvo e sín akpá Mawu dó lɛ́ é:

• “Gbětótló kpó ayǐkúngban xúxú kpó ní j’awǎ. Nǔ ní víví nú to e mɛ sin ma ɖe ǎ é, bónú é ní gba sɛ́ folówa ɖɔhun.” (Ezayíi 35:1) Mawu ná jó ayǐkúngban ɔ dó bónú é ná wá cí gbětótló e mɛ nǔɖé ma sixú nɔ ǎ é ɖɔhun ǎ, é nyɔ́ wa ɔ, é ná jlá ayǐkúngban ɔ sín akpáxwé e è hɛn gblé lɛ́ é ɖó.

• “A nɔ kpé nukún dó ayǐkúngban ɔ wú, bo nɔ hú sin ná, bɔ é nɔ kpé. A nɔ ná dɔkun wɔ̌búwɔ́bú ayǐkúngban.” (Ðɛhan 65:10) Mawu ná wá bló bɔ ayǐkúngban ɔ ná húzú palaɖísi.

Ninɔmɛ ayǐ mɛ tɔn e nɔ fɔ́n bo nɔ ɖyɔ́ɖyɔ́ wɛ é ɔ, nǔɖɔɖayǐ Biblu tɔn wɛ ɖo jijɛnu wɛ gbɔn mɔ̌. Nú a ná ɖó mɔjɛmɛ dó lěe nǔ nyí mɔ gbɔn é wú d’é jí hǔn, xa xóta “Etẹ Biblu Dọ Gando Ninọmẹ Aimẹ Tọn He Nọ Diọ lẹ po Ṣogodo Mítọn po Go.”

Biblu d’akpá ɖɔ Mawu ná wá jlá ayǐkúngban ɔ ɖó. Nú a ná ɖó mɔjɛmɛ d’é jí hǔn, kpɔ́n xóta “Qui sauvera la terre ?”