2022: Xwe hunnyahunnya tɔn ɖé: Étɛ́ Biblu ka ɖɔ?

Ðo 2022 ɔ, ahwan, akwɛ́yózo, kpó adla j’ayǐ lɛ́ kpó sín xó wɛ è se hú gǎn ɖo ɖɔnúese lɛ́ mɛ. Biblu kɛ́ɖɛ́ wɛ tínmɛ nǔ e wú nǔ énɛ́ lɛ́ ɖo jijɛ wɛ tawun é.

Nǔ e wú nǔ e jɛ ɖo 2022 lɛ́ é dó jɛ é

Nǔ ɖěɖěe jɛ ɖo xwe e wá yi é mɛ lɛ́ é lɔ xlɛ́ nyi wɛn ɖɔ mǐ ɖo gbɛ ɖo hwenu e Biblu ylɔ́ ɖɔ “azǎn gǔdo gúdo tɔn lɛ́” é mɛ. (2 Timɔtée 3:1) Azǎn gǔdo gúdo tɔn énɛ́ lɛ́ bɛ́ ɖo 1914. Ð’ayi lěe nǔ e jɛ agaɖanu lɛ́ é sɔgbe xá nǔ e Biblu ɖɔ ɖ’ayǐ dó hwenu mǐtɔn wú lɛ́ é gbɔn é wú:

“Ahwanfunfun sín zǐngídi.”—Matíe 24:6.

• “2022 wɛ nyí xwe e mɛ xɛsi ɖaxó ahwanfunfun tɔn lɛ́ kɔ wá Elɔ́pu é.”a

“Nǔɖuɖu ná hwe dó mɛ.”—Matíe 24:7.

• “2022: Xwe e mɛ adɔ gba nǔ hú gǎn é.”b

“Jɛmɛjí ná ɖe.”—Luki 21:11.

• “Kplíbɔ́zɔn e lɛ́ wá xwetɔ́n hwenu e variole de singe ɖo kan vun wɛ tawun bɔ COVID-19 lɔ ɖo étɔn wú é zɔ́n bɔ azɔn sísɔ́ lɛ́vɔ́ bɔ wǔ hú gǎn, lobɔ gbɛtɔ́ sɔ́ ɖó alɔcyɔ́nmɛjí káká ɖé ɖo azɔnkwín lɛ́ nukɔn ǎ.”c

“Gbɛtɔ́ lɛ́ ná mɔ nǔ e ná dó xɛsi yě lɛ́ é.”—Luki 21:11.

• “Yǒzo syɛ́nsyɛ́n, akú, sinɖanǔ, kpó tɔgbamɛ kpó. É ɖo wɛn ɖɔ alǔun 2022 tɔn e wá yi é ná nɔ flín mɛ ninɔmɛ ayǐ mɛ tɔn syɛ́nsyɛ́n tobutóbú ɖěɖěe hɛn nǔ gblé gbɔn gbɛ ɔ bǐ mɛ, bo zɔ́n bɔ gbɛtɔ́ afatɔ́n mɔ̌ kú bɔ xwé mɛ lǐvi mɔ̌kpán tɔn lɛ́ gblé é.”d

“Hunnyahunnya [alǒ, “gǔfínfɔ́n,” tínmɛ e ɖo do é].”—Luki 21:9.

• “Xomɛsin toví lɛ́ tɔn e ɖo jijɛjí wɛ ɖó akwɛ́yózo wútu, ɖo tají ɔ, ɖó akwɛ́ e nɔ ɖo nǔ lɛ́ jí jɛ wɛ é wútu é zɔ́n bɔ nǔvɛ́mɛwú zɔnlin e yě ɖi lɛ́ é sukpɔ́ tawun ɖo 2022.”e

Étɛ́ ka ná jɛ ɖo xwe e jawě é mɛ?

Mɛɖé sixú ɖɔ nǔ e ná jɛ ɖo 2023 lɛ́ é pɛ́pɛ́pɛ́ ǎ. Nǔ e mǐ ka tuun é wɛ nyí ɖɔ zaanɖé din ɔ, Axɔ́súɖuto Mawu tɔn, alǒ acɛkpikpa jǐxwé tɔn ɔ ná bló bɔ hǔzúhúzú gěgé ná tíin ɖo ayǐkúngban jí. (Daniyɛ́li 2:44) Acɛkpikpa énɛ́ ná ɖe nǔ e nɔ zɔ́n bɔ gbɛtɔ́ lɛ́ nɔ se wǔvɛ́ lɛ́ é síin, bo ná bló bɔ jlǒ Mawu tɔn ná nyí wiwa ɖo ayǐkúngban jí.—Matíe 6:9, 10.

Mǐ dó wǔsyɛ́n lanmɛ nú we ɖɔ a ní wa nǔ sɔgbe xá wěɖexámɛ Jezu tɔn, bo “nɔ wunzɛn” dó lěe nǔ e ɖo jijɛ wɛ ɖo gbɛ ɔ mɛ lɛ́ é ɖo xlɛ́xlɛ́ wɛ ɖɔ nǔɖɔɖayǐ Biblu tɔn lɛ́ ɖo jijɛnu wɛ gbɔn é wú. (Maki 13:37) Nú a jló ná tuun lěe Biblu sixú d’alɔ we din gbɔn é, gɔ́ nú lěe é sixú ná nukúnɖíɖó jɔ nukúnɖíɖó hwi kpó xwédo towe kpó dó sɔgúdo wú gbɔn é hǔn, kɛnklɛ́n ɖɔ sɛ́dó mǐ.